घरबाटै काम गर्ने कि ?

हेलो शुक्रबार

कोरोना भाइरस (कोभिड–१९) चीनबाट सुरु भए पनि यसले पछिल्लो महिना विश्वभरका एक सय बढी देशलाई प्रभावित पारिसकेको छ । पछिल्लो सातामात्रै विश्व चर्चित कम्पनी गुगलले दक्षिण अमेरिकी देशमा भएका आफ्ना कार्यालयका कर्मचारीलाई घरबाटै काम गर्न निर्देशन दिएको छ । इटालीसहित धेरै देशका नागरिक कोरोनाको प्रभावसँगै घरमै आइसोलेसनमा बस्न थालेका छन् ।

कार्यालय नजाने, भीडभाडमा नजाने र घरमै बस्ने यो क्रम धेरै देशमा चल्न थालेको छ । कोरोनाको क्राससँगै धेरै नागरिक जानैपर्ने बाहेक अन्य कामको लागि आफ्नो घरबाट निस्कन छाडेका छन् ।


नेपालमा कोरोनाको संक्रमण नदेखिए पनि यसको त्रास बढ्दो छ । कार्यालयमा जाँदा भीडभाड हुने र एक जनालाई संक्रमण भएमा अर्कोलाई सर्ने सम्भावना बढी हुन्छ । त्यसको लागि नेपालमा पनि घरबाटै काम गर्ने अभ्यास सुरु हुन सक्छ । तर, घरबाट गर्ने काम कसरी गर्ने ? यहाँ त्यस्ता एपहरुको चर्चा गरिएको छ, जुन कार्यालय प्रयोजनको काम गर्न बढी प्रचलनमा छन् र कुनै कार्यालयले आफ्ना कर्मचारीलाई घरबाटै काम गर्न प्रेरित गरेमा यस्ता एप्लिकेसनको प्रयोगले काममा सघाउँनेछन् । यी एप्लिकेसनले एक भन्दा बढी व्यक्तिहरुबीच भुर्चअल संवादको लागि सहायता गर्छन् । कोरोना भाइरसको चर्चा चलेको बेला मात्रै होइन, अरु बेलामा पनि कार्यालयको काम घरमै बसेर गर्न यी टुलहरुले सघाउँछन् । कुनै टुल कार्यालयको व्यवस्थापनको लागि बढी उपयोगी हुन्छन् भने कुनै कर्मचारीहरुको लागि ।


स्ल्याक

स्ल्याक कार्यालय प्रयोजनको लागि प्रयोग भइरहेको टुल हो । यसको विशेषता के हो भने यसले कार्यालयका व्यक्तिहरुबीच विभिन्न शीर्षकमा पनि संवाद गर्ने अवसर दिन्छ । स्ल्याकको अर्को विशेषता भनेको यो सशुल्क र निःशुल्क दुवै रुपमा प्रयोग गर्न पाइन्छ । जतिसुकै धेरै कर्मचारी भएको संस्थाले पनि यसलाई प्रयोग गर्न सक्छ । स्ल्याक कार्यालयहरुमा लोकप्रिय हुनुको सबैभन्दा ठूलो विशेषता च्याट गर्ने मात्रै नभई विषय अनुसार च्याट गर्ने सुविधा हो । यसमा डकुमेन्ट सेयर, इडिटसहित काम लाग्ने अन्य सामाजिक सञ्जाल र टुलहरु पनि एकीकृत गर्न सकिन्छ । एप र वेब दुवै भर्सनमा यसलाई प्रयोग गर्न सकिन्छ ।


फ्लोक

यो पनि स्ल्याकजस्तै व्यवसायिक म्यासेजिङ प्लेटफर्म हो । यसले प्रयोगकर्तालाई च्याट गर्ने, भइरहेको कामको प्रगति तत्कालै उपलब्ध गराउने सुविधा दिन्छ । यसले एक भन्दा बढी व्यक्तिसँग सामूहिक रुपमा वा बिषय अनुसार छुट्टाछुट्टै च्याट गर्ने सुविधा दिन्छ । साथै, भिडियो च्याट गर्ने व्यवस्था पनि यसमा छ । कार्यालयको छुट्टाछुट्टै विभाग, छुट्टाछुट्टै काममा लागेका समूहलाई आफ्नो काम अनुसारको म्यासेज गर्ने सुविधा यसमा छ । फ्लोकलाई निःशुल्क वा शुल्क तिरेर प्रयोग गर्न सकिन्छ । यसको पूरा फिचर प्रयोगका लागि भने शुल्क तिर्नैपर्ने हुन्छ ।


माइक्रोसफ्ट टिम


माइक्रोसफ्ट टिम स्ल्याकको प्रतिस्पर्धी टुल हो । यसको उद्देश्य कार्यालयका कर्मचारीबीच र उनीहरुको कामलाई अनुगमन गर्नु हो । माइक्रोसफ्टले चार वर्षअघि यसको सुरुवात गरेको भए पनि दुई वर्ष अघि यसलाई निःशुल्क भर्सनमा पनि प्रयोग गर्न मिल्ने बनाएको थियो । यसमा आफ्ना कर्मचारीलाई एड गरेर भिडियो, अडियो कलसहित फाइल सेयरिङ, च्याट र प्रोजेक्ट अनुसारको जिम्मेवारी बाँडफाँड गर्न सकिन्छ भने त्यसको अनुगमन पनि सहजै गर्न सकिन्छ । साथै, कुन कर्मचारीको कुन सिफ्ट हो र उनीहरुले कति समय काम गरे भन्ने पनि सहजै थाहा पाउन सकिन्छ ।


टिम भ्युअर

घर र कार्यालय दुवै तिर काम गर्ने मानिसको लागि यो निकै उपयोगी टुल हो । यसले एक डिभाइसबाट अर्को डिभाइसमा पहुँच दिन्छ, जुन फाइल सेयरिङको लागि निकै उपयोगी हुन्छ । यसले घरमै बसेर पनि कार्यालयको आफ्नो कम्युटरमा काम गर्ने सुविधा दिन सक्छ । यसलाई निःशुल्क प्रयोग गर्न मिल्छ ।


ड्रपबक्स

कामकाजी मानिसको लागि उपयोगी टुल हो ड्रपबक्स । कार्यालयको आफ्नो कम्प्युटरमा भएको फाइल, डकुमेन्टलाई ड्रपबक्समा राखेमा जहाँ बसे पनि मजाले काम गर्न सकिन्छ, जसका कारण घरमै बसेर कार्यालयको काम गर्न पनि झन्झट हुन्न । ड्रपबक्समा भएका फाइल अरुसँग सेयर गर्न, इमेल गर्न, इडिट गर्न, कपी गर्न पनि मिल्ने भएकाले यसले काममा धेरै सहजता ल्याउँछ । यसलाई निःशुल्क प्रयोग गर्न मिल्छ । प्रकाशित : चैत्र ७, २०७६ १६:३२

ADVERTISEMENT
प्रतिक्रिया
पठाउनुहोस्

च्याम्पियन केटो

हिमेश पन्तले रियालिटी शो ‘कमेडी च्याम्पियन’को उपाधि चुमे । उनी कसरी सफल भए ? अब के गर्दैछन् ?
गोकर्ण गाैतम

मान्छेहरुले मलाई भन्छन्– ‘तैले नेताहरुको धेरै मजाक उडाउछस् ।’ नेताहरुले मेरो भोटको मजाक उडाउनचाहिं हुने, मैले नेताको मजाक उडाउन नहुने ? सत्तरी वर्ष देश लुटेको हो के कांग्रेसले । लाज लाग्नुपर्ने हो, कांग्रेसलाई । कम्युनिष्टहरुबाट केही सिक । दुई वर्षमै देश लुटेर देखाइदिए ।

...

यस्ता कयौं पेचिला व्यंग्यले हिमेश पन्तको छवि अलग र विशेष बनेको थियो, ‘कमेडी च्याम्पियन’मा। तर, उनी आफैं उपाधी जित्नेमा ढुक्क थिएनन्। शोमा एकसेएकप्रतिभाशाली प्रतियोगी जो थिए। उत्कृष्ट पाँचसम्म पुगेपछिचाहिं उनलाई लागेछ, ‘च्याम्पियन त मै हो।’ किन? हिमेश भन्छन्, ‘कन्टेन्ट र पर्फमेन्समा मैले अचाक्ली मेहनत गरेको थिएँ। जसले ममा प्रचुर आत्मविश्वास बढाएको थियो।’ नभन्दै हिमेश शोको पहिलो संस्करणको विजेता बने। भलै उनी भन्ने गर्छन्, ‘उपाधी जितेपछि मैले २५ लाख र कार पाउने भएँ। बाँकी मैले गर्नुपर्ने संघर्षचाहिं उस्तै हुन्छ। बरु जिम्मेवारी थपिएको छ।’

त्यसो त शोमा भाग लिनुअगावै हिमेश युट्युबमा परिचित थिए। सुरुमा आफ्नै युट्युब च्यानल खोलें, छोटा कमेडी भिडियो बनाएर अपलोड गरे। हल्काफुल्का भ्युज बटुल्न थाल्यो। त्यतिबेला उनको कमेडी युवा पुस्ता लक्षित हुन्थ्यो। पछि ‘कमेडी सर्कल’ नामक स्ट्यान्ड–अप कमेडीको प्लेटर्फममा जोडिए। यसबाट उनको लोकप्रियता अझ बढ्यो, स्ट्यान्ड–अपमै भविष्य देखे। भन्छन्, ‘बिस्तारै मलाई हसाएर मात्र हुन्न, विकृतिमाथि कटाक्ष गर्नुपर्छ बोध हुनथाल्यो। त्यसैले सामाजिक–राजनीतिक घटनाक्रमलाई नियाल्न थाले।’

हिमेशको मुख्य विशेषता नै उनको कमेडीमा समाज–चेत हुनु हो। जहाँ हसाउनका लागि मात्र हसाइएको हुन्न, सन्देश र सवाल पनि हुन्छ। ‘हास्यलाई हामीले भोगिरहेको तीतो–मिठो यथार्थसँग जोड्‍न सकियो भने मात्र त्यसको आयु लामो हुन्छ,’ उनले आफ्नो बुझाई सुनाए।

उपाधी जित्ने अभिलासा त छदै थियो, त्यो भन्दा बढीचाहिं आफ्नो प्रतिभा पस्कने र नयाँ कुरा सिक्ने चाह बोकेर हिमेश ‘कमेडी च्याम्पियन’मा पुगेका थिए। शोमा अघि बढ्दै जादा ती चाहनाहरु पुरा हुँदै गए। कन्टेन्ट चयन र प्रस्तुतीकरणका नयाँ तरिका सिके। ‘थाहा नभएको कुरा सिक्ने मोहकै कारण म यहाँसम्म आइपुगेको हुँ,’ हिमेशले भने। केही समयमा अन्य दुई फाइनलिस्ट सुमन कोइराला र खड्गबहादुर पुनमगरसँगै उनी ‘वर्ल्ड टूर’मा निस्कदैछन्। ‘कमेडी च्याम्पियन’कै निर्माताको नयाँ रियालिटी जोमा उनको पनि सहभागिता हुनेछ। आफ्नो युट्युब च्यानलका लागि कन्टेन्ट उत्पादन गर्दैछन्। ‘जे गर्छु, कमेडीमै गर्छु,’ उनले भने।

कतिपय रियालिटी शोका विजेताहरु शो सकिएसँगै ओझेलमा पर्छन्। आफ्नो मौलिक छवि बनाउन सक्दैनन्। हिमेशलाई यसको हेक्का नभएको होइन। तर, गायन वा नृत्यभन्दा कमेडीमा आफ्नो प्रतिभा देखाउन सहज हुने भएकाले यस क्षेत्रमा हराउने सम्भावना कम हुने बताउँछन् उनी। गीत निकाल्न, म्युजिक भिडियो बनाउन टन्न पैसा लाग्छ तर क्यामेराको जोहो भयो भने कमेडी भिडियो बनाएर युट्युबमा अपलोड गर्न उतिविघ्न खर्च लाग्दैन्। युट्युबबाटै आम्दानी गर्न सकिन्छ। ‘आफूमा क्षमता छ भने कमेडीमा चाहिं पछि परिन्न। एकल प्रयासमै अगाडि बढ्न सकिन्छ,’ हिमेश भन्छन्, ‘मेहनत गरिएन भने त जहाँ पनि पछि परिन्छ, कमेडीमा पनि त्यही हो।’
टेलिभिजन र युट्युबमा मात्र होइन, फिल्ममा पनि हास्यकलाकारकै जगजगी छ अहिले। हिट फिल्मको सूची हेर्दा कमेडीकै पल्लाभारी हुन्छ। शो जितेसँगै हिमेशको चर्चा चुलिएको छ। भिडियोमा धेरथोर अभिनयकला पस्किसकेका छन्। फिल्म खेल्ने योजना छैन? उनले मुस्कुराउँदै भने, ‘छ तर त्यसअगाडि मैले मेरो अभिनयमा व्यापक सुधार गर्नुपर्नेछ। लहडमा होइन, सिकेर मात्र फिल्म खेल्छु।’ जहाँ कला देखाए पनि स्तर खस्कन नदिन प्रतिबद्ध छन् उनी। झाराटार्ने ढंगले काम गर्दा किनारा लागेका धेरै कलाकार देखेकाले आफू त्यही हुलमा मिसिन चाहँदैनन्। ‘मलाई धेरै होइन, स्तरिय कला पस्कनुछ। त्यसमाथि कमेडीमा त हरेक पटक केही न केही नयाँ गनैपर्छ। एउटा जोकमा दुई पटक कोही हाँस्दैनन्,’ हिमेशले यथार्थ सुनाए।

शोकै दौरान हिमेशले मोटरसाइकलको लाइसेन्सका लागि ‘ट्रायल’ दिए तर फेल भए। च्याम्पियन बनेसँगै उनले कार पनि पाएका छन्। हाँस्दै भने, ‘भाग्यमा कार लेखेको रहेछ, मचाहिँ बाइकको लाइसेन्स लिन दौडिएछु। अब एकैपटक कार चलाउनै सिक्ने हो।’

प्रकाशित : चैत्र ७, २०७६ १५:४७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×