रिभेन्ज पोर्नको पीडा

जनकराज सापकोटा

सामाजिक सञ्जालबाट हुर्किएको प्रेम अनि विछोडपछि सामाजिक सञ्जाललाई नै हतियार बनाएर रिस साध्ने प्रवृत्ति  । प्रहरी परिसर काठमाडौंको साइबर शाखामा कार्यरत इन्स्पेक्टर बुद्धि सुवेदीले तन्नेरी पुस्तामाझ हुर्किंदो यस्तो प्रवृत्तिलाई नजिकबाट नियालेका छन्  ।

ZenTravel

प्रेम सम्बन्धमा रहँदाका गोप्य तस्बिर भिडियोको प्रयोग सम्बन्ध बिग्रेपछि प्रतिशोध साध्नका निम्ति प्रयोग गर्ने प्रवृत्ति नेपाली समाजका निम्ति नयाँ रहेन ।
महोत्तरीको गौशाला नगरपालिका ६ घर भई काठमाडौंमा बसेर पढ्दै गरेका फूलबाबु यादव फूलदास अधिकारी, म केटो बिन्दासजस्ता दुई तीनवटा फेसबुक आईडी चलाउँथे । फेसबुकबाटै उनले एउटी युवतीसँग प्रेम अंकुराएको थियो । प्रेममा रहँदा उनीहरूबीच स्वाभाविक शारीरिक आकर्षण रह्यो । उनले प्रेमिकासँगको चुम्बनदेखि अन्य गोप्य गतिविधिको फोटो खिचेर राखेका रहेछन् । जब प्रेमको यात्रामा खटपट सुरु भयो र सम्बन्धमा पूर्णविराम लाग्यो, उनले त्यही तस्बिरलाई प्रतिसोध साध्ने हतियार बनाए ।
प्रहरीका अनुसार फूलले केटीकै नामबाट नक्कली फेसबुक आईडी खोलेर सम्बन्धमा रहँदाको गोप्य तस्बिरहरू पोस्ट गरे । केटीका आफन्तहरूले सामाजिक सञ्जालमार्फत भएको यस्तो हर्कत थाहा पाए । प्रहरीमा उजुरी गरे । अनुसन्धानलगत्तै प्रहरी परिसर काठमाडौंले मंसिरको पहिलो साता फूलबाबुलाई पक्राउ गर्‍यो र साइबर अपराधमा मुद्दा चलायो । काठमाडौं जिल्ला अदालतको आदेशपछि डेढ लाख धरौटी बुझाएर उनी २३ मंसिरमा थुनामुक्त भए ।
प्रेम सम्बन्धको यात्रा टुंगिएको झोंकमा सम्बन्धमा रहँदाको तस्बिरहरूको दुरुपयोग गर्ने र केटीको सामाजिक चरित्रमाथि प्रहार गर्ने अपराध गर्ने फूलबाबु पहिलो पात्र होइनन् । मंसिरकै पहिलो साता प्रहरीले सिरहा सुखीपुर १ घर भई काठमाडौंमा बसेर इन्जिनियरिङ पढ्दै गरेका सुनीलकुमार चौधरीलाई पक्राउ गर्‍यो ।
सुनील पक्राउको कारण पनि उही सामाजिक सञ्जालको दुरुपयोगको घटनासँग जोडिएको थियो । प्रेम सम्बन्धमा रहेका सुनील तिनै युवतीसँग एक वर्षसम्म लिभिङ टुगेदरमा बसेका थिए । सम्बन्धको गति प्रेमको तापमा चलिरहेकै थियो । तर समय सधैं उस्तै रहेन । एक दिन सुनीलले आफ्नी प्रेमिकाको पहिलो पूर्वप्रेमीबारे थाहा पाए । शंका र आशंकाको दोहोरी सुरु भयो । उनीहरूको सम्बन्धमा पूर्णविराम लाग्यो ।
सम्बन्ध सकिएपछि पनि सुनील त्यत्तिकै चुप लागेनन् । उनले सम्बन्धमा रहँदाका केही निजी गतिविधिका फोटा र भिडियो खिचेका थिए । बदलाको भावनाले प्रेरित सुनीलले ती फोटा र भिडियो प्रेमिकाको आफन्तलाई पठाइदिए । सामाजिक सञ्जालको हतियार चलाएर चरित्रहत्याको खेलमा लागेपछि प्रेमिकाको परिवार प्रहरीमा पुग्यो । अनि सुनील पक्राउ परे ।
इन्स्पेक्टर सुवेदीको अनुभवमा प्रतिशोध साध्न सामाजिक सञ्जालको प्रयोग गर्ने प्रवृत्ति तन्नेरी पुस्तामा मौलाउँदो देखिन्छ । उनका अनुसार प्रेम सम्बन्ध टुटेपछि केटीको चरित्रहत्या गर्न गोप्य गतिविधि समेटिएको फोटो र भिडियोलाई हतियारको रूपमा प्रयोग गर्ने डरलाग्दो प्रवृत्ति देखिन्छ । उनले भने, ‘सामान्यदेखि सामाजिक हैसियत र छवि बनाएहरू पनि यस्तो चरित्रहत्याको खेलबाट पीडित भएका कैयन उदाहरणहरू छन् ।’
सम्बन्ध बिग्रिएपछि आफ्ना पूर्वप्रेमी–प्रेमिकाका गोप्य तस्बिरहरू सामाजिक सञ्जाल वा इन्टरनेटमार्फत सार्वजनिक गरेर रिस साध्ने समस्या नेपालको मात्रै होइन, विश्वभरकै हो । अंग्रेजी भाषामा यस्तो प्रवृत्तिलाई रिभेन्ज पोर्न भनिन्छ । रिभेन्ज पोर्नको सिकार संसारमा धेरै मानिस भएका छन् । कत्तिले आफ्नो गोप्य तस्बिर र भिडियो सार्वजनिक भएपछि आत्महत्याको गलत बाटो रोज्छन् भने कतिले कानुनी लडाइँमार्फत न्याय भेट्ने प्रयास गर्छन् ।
केही समय मात्रै दक्षिण कोरियाकी के–पप स्टारले पनि रिभेन्ज पोर्नकै कारण आत्महत्याको गलत बाटो रोजिन् ।
प्रेमीले गोप्य रूपमा आफ्नो भिडियो खिचेकोमा आपत्ति जनाउँदै त्यसविरुद्ध सार्वजनिक रूपमै लडिरहेकी कोरियाली के–पप स्टार गू हाराले गत साता आत्महत्या गरेकी हुन् । आफूलाई भएको अत्याचारबारे आवाज उठाएकै कारण अनलाइनमा उनको निकै धेरै आलोचना भएको थियो । दक्षिण कोरियामा अहिले गोप्य क्यामराको प्रयोग गरेर महिलाहरूको भिडियो बनाउने र त्यसलाई अनलाइनमा प्रसारण गर्ने होड नै चलेको छ । यसबाट सेलिब्रेटीदेखि आम मानिस सबै पीडित भएका छन् ।
यसबारे आवाज उठाइरहेकी के–पप स्टार गू हाराको आत्महत्याको खबर बाहिरिएसँगै महिलाहरूले यस्तो काम गर्नेमाथि झन् बढी सजायको माग गर्न थालेका छन् ।
गू हारा के–पपकी रानी नै थिइन् । उनी कोरियाली महिला समूह ‘कारा’ बाट चर्चाको शिखरमा पुगेकी थिइन् । तर पछिल्लो एक वर्ष भने उनी स्टेजमाथिभन्दा पनि स्टेजतलका गतिविधिका कारण चर्चामा थिइन् ।
गत सेप्टेम्बर महिनामा उनले आफ्नो प्रेमीविरुद्ध नै ब्ल्याकमेलिङको मुद्दा हालेकी थिइन् । प्रेमीले उनीहरू दुईबीच भएको शारीरिक सम्पर्कको भिडियो अनलाइनमा सार्वजनिक गरेर करिअर नै सकिदिने धम्की दिएको उनको आरोप थियो ।
अदालतले धम्कीबाहेकका अन्य आरोपलाई सही ठहर्‍याउँदै उनको प्रेमीलाई डेढ वर्ष जेल सजाय सुनाएको थियो । दक्षिण कोरियामा यो दुई वर्षमा मात्रै ११ हजार २ सय गोप्य क्यामराबाट खिचिएका भिडियोलाई प्रहरीकहाँ उजुरीहरू परेका छन् । यसविरुद्धका अभियन्ताहरूको दाबी मान्ने हो भने यो संख्या निकै माथि हुन सक्छ । किनभने दक्षिण कोरियाजस्तो पितृसत्तात्मक समाजमा अधिकांश महिला बोल्न डर मान्छन् ।

प्रकाशित : मंसिर २७, २०७६ ११:१२
ADVERTISEMENT
प्रतिक्रिया
पठाउनुहोस्
ADVERTISEMENT

वीर वीरबहादुर

राम्रो खेलेर पनि तीन वर्षअघि फाइनलमा चुकेका तेक्वान्दो खेलाडी वीरबहादुर महराले १३ औं सागमा आएर स्वर्णपदक जित्ने सपना पूरा गरेका छन् ।
कुशल तिमल्सिना

भारतमा तीन वर्षअघि सम्पन्न १२ औं दक्षिण एसियाली खेलकुद (साग) वीरबहादुर महराको अन्तर्राष्ट्रिय डेब्यु थियो  । तैपनि उनले राम्रो गर्ने आशा थियो  ।

गर्दै थिए पनि । फाइनलमा अफगानिस्तानी खेलाडी थोरै अंकले अगाडि थिए । तर, ती अफगान चोटग्रस्त भइसकेका थिए । उनलाई उभिनै गाह्रो थियो । खुट्टा टेक्ने अवस्थामै थिएनन् । तर, रेफ्रीले खेल रोकेनन् । वीरले अंक थप्न पनि सकेनन् र डेब्युमै स्वर्ण चुम्ने मौका चुकाए ।
स्वर्ण चुम्ने त्यो अधुरो सपनालाई उनले १३ औं सागमा आएर स्वदेशमै पूरा गरेका छन् । उनले यसपालिको फाइनलमा पाकिस्तानी प्रतिद्वन्द्वीमाथि वीरता प्राप्त गरे । पुरुष ६८ केजीमुनि तौलसमूहमा वीरबहादुरको पहिलो खेल नै भारतका पृथ्वीराज चौहानसँग थियो । बलियो प्रतिस्पर्धीविरुद्धको पहिलो राउन्डमा उनको सुरुआत राम्रो भएन । पहिलो राउन्डमा ११–९ ले पछि परे । नेपाल पुलिस क्लबका यी २४ वर्षे खेलाडीले सानदार पुनरागमन गरे । दोस्रो र तेस्रो राउन्डमा क्रमस ः १२–६ र ११–७ स्कोरसहित चौहानलाई उनले समग्रमा ३२–२४ ले पराजित गरे । र, फाइनलमा प्रवेश गरे ।
अब उनका प्रतिद्वन्द्वी थिए पाकिस्तानका मुहम्मद फाहिम । जसले सेमिफाइनलमा श्रीलंकाका थारंगा लक्मललाई एकपक्षीय रूपमा हराएका थिए । सिलोङमा अधुरो रहेको सपना पूरा गर्नका लागि अग्ला कदका फाहिमलाई पराजित गर्नु वीरका लागि चुनौती बन्दै थियो । तर दुईपल्ट पछाडि परेर पनि उत्कृष्ट पुनरागमन गरेका उनले आफ्नो आत्मविश्वासलाई अन्तिमसम्म
डगमगाउन दिएनन् ।
पहिलो राउन्ड १५–१३ ले जितेका उनी दोस्रो राउन्डमा १३–८ को आरामदायी अवस्थामा पुगे । तेस्रो राउन्डको अन्तिम १ मिनेट ४१–२७ को अग्रतामा रहेका वीरले रक्षात्मक बन्ने प्रयास गर्दा फाहिमले फाइदा उठाए । स्कोरमा अधिक अन्तर भएका कारण वीरलाई उछिन्न सकेनन् । वीरले समग्रमा ४१–३६ को स्कोरसहित मंगलबार सागमा स्वर्ण सपना पूरा गरे ।
‘१२ औं सागमा मेरो पहिलो अन्तर्राष्ट्रिय प्रतियोगिता थियो । फाइनलमा पराजित भएपछि अर्कोपल्ट जित्छु भन्ने सोच बनाए,’ स्वर्ण विजेता वीरले भने, ‘यसपल्ट घरमै प्रतियोगिता हुँदै थियो, स्वर्ण पदक सोचेर खेलेको थिएँ, भनेजस्तै भयो ।’ वीरले यो पदक आफूलाई सफलताको हकदार बनाउने सबैसँग बाँड्न चाहेको सुनाए ।



फाइनलमा भन्दा सेमिफाइनलमा भारतीय खेलाडीसँगको प्रतिस्पर्धा कठिन भएको वीरले अनुभव गरे । ‘सुरुमै भारतका खेलाडी थिए । उनी मेरा लागि नयाँ थिए । मैले उनको खेल देखेको थिइनँ, त्यसैले सुरुमा गाह्रो भयो । तर दोस्रो राउन्डपछि मैले उनको कमजोरी पत्ता लगाए र त्यसैको फाइदा उठाएर जित निकाल्न सकें,’ फाइनलबारे वीरले भने, ‘पाकिस्तानका खेलाडी पनि मेरा लागि नयाँ थिए । तर मैले सेमिफाइनलमा श्रीलंकासँग उनको खेल हेर्न पाएको थिएँ । त्यही खेलपछि बनाएको रणनीति सफल भएको हो ।’
वीरको आक्रामक खेलशैली नयाँ होइन । उनको यही शैलीले नै यहाँसम्मको यात्रा गराएको हो । नेपाली तेक्वान्दोकै परम्परागत समस्या ब्लक र डिफेन्स हो । फाइनलमा उनले धेरै हदसम्म आफ्नो कमजोरी सुधार्ने प्रयास गरे । ‘मैले ब्लकमा राम्रो गरेँजस्तो लागेको छ । सबै किकहरू ब्लक गर्न त सकिँदैन । सकेजति राम्रो गर्ने प्रयास गरेँ,’ वीरले थपे ।
वीरको अबको लक्ष्य ओलम्पिक छनोट हो । त्यसका लागि यतिको तयारीले पुग्दैन भन्ने उनलाई थाहा छ । ‘२०२० को ओलम्पिकमा छनोट हुने लक्ष्य राखेको छु । त्यसका लागि यति तयारीले पुग्दैन । हामीले धेरैभन्दा धेरै अन्तर्राष्ट्रिय प्रतियोगितामा सहभागिता जनाउने र नियमित स्तरीय प्रशिक्षण गर्नुपर्छ । त्यसले अनुभव र आत्मविश्वास दुवै बढ्छ,’ १३ औं सागको सफलताको आधारबारे उनले थपे, ‘हामीले १ महिना चीनमा विशेष प्रशिक्षणका साथै २ अन्तर्राष्ट्रिय प्रतियोगिता खेल्न पायौं, यसले हामीमा धेरै सुधार भएको थियो । घरेलु समर्थकको साथ त छँदै थियो ।’
कञ्चनपुरका उनले १०/११ वर्षको उमेरदेखि नै तेक्वान्दो खेल्न थालेका हुन् । आफ्नै प्रदेशका दीपक विष्टको सफलता उनको करिअरमा मागदर्शन बन्यो । राष्ट्रिय टिममा परेदेखि नै दीपकबाटै प्रशिक्षित छन् र एकपछि अर्को प्रतियोगितामा राम्रो गर्दै गइरहेका छन् । २०७० सालमा पुलिसमा अनुबन्ध भएपछि वीरको करिअरले उचाइ लियो । सातौं कोरियन एम्बासडर, सातौं र आठौं राष्ट्रिय खेलकुद, राखेप च्याम्पियनसिपमा उनले स्वर्ण जितेका छन् । यसको अर्थ उनी ६ वर्षयता आफ्नो स्पर्धामा अविच्छिन्न राष्ट्रिय च्याम्पियन हुन् ।

प्रकाशित : मंसिर २०, २०७६ १०:२९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×