पानवालाको सगरमाथा सपना

जनकपुरका रञ्जित सिंह चार वर्षयता वर्षमा एक महिना साइकल यात्रा गरिरहेका छन् । उनी साइकल लिएरै विश्वको सर्वोच्च शिखर सगरमाथा आरोहण गर्न चाहन्छन् ।
कुम्भराज राई

गत साता जनकपुरका एक पान व्यापारी युवा काँधमा हिरो साइकल बोकेर सगरमाथा आधारशिविर पुगेपछि एकाएक चर्चित भए । उनी थिए, जनकपुर उपमहानगरपालिका ४ का ३३ वर्षीय रञ्जित साह । पाँच वर्षयता साइकल यात्रा थालेका रञ्जित यसपटक आधारशिविर पुगेका हुन् । उनी वर्षको ११ महिना पान बेच्छन् । बाँकी एक महिना साइकल हााक्छन् ।

आधारशिविरमा पाइला रञ्जितको छैटौं साइकल यात्रा हो । यसअघि जनकपुर–पशुपतिनाथ, जनकपुर–हलेसी, जनकपुर–मुक्तिनाथ, जनकपुर–अयोध्या, जनकपुर–पाथीभरा (ताप्लेजुङ) यात्रा गरिसकेका छन् । यसपटक जनकपुरदेखि मन्थली, चरिकोट, कालिञ्चोक, काठमाडौं, खुर्कोट, घुर्मी, ओखलढुंगा हुँदै सोलुखुम्बुको सगरमाथा आधारशिविर पुगेका हुन् ।
जनकपुरका रञ्जितलाई नेपालको झन्डासहित काँधमा हिरो साइकल बोकेर समुद्री सतहबाट ५,६४३ मिटर उचाइस्थित कालापत्थर र ५,३६४ मिटरमा रहेको सगरमाथा आधारशिविर पुग्दासमेत गाह्रो महसुस गर्नुपरेन । उनको नारा हो, ‘तराई, पहाड, हिमाल, हाम्रो मातृभूमि नेपाल, राष्ट्रिय एकता’ । रञ्जितले पर्यटन वर्ष २०२० को बोर्डलाई समेत बोकेर यात्रा गरेका हुन् । अब उनको सबैभन्दा ठूलो सपना साइकल लिएरै सगरमाथा चढ्ने हो ।
उनले सगरमाथा चढ्नकै लागि साइकल गोरक्सेपमा छोडेर जनकपुरसम्मै पैदल फर्किएका छन् । तराई, पहाड र हिमाल एकताको सन्देशसहित विश्वसामु आफूलाई चिनाउने उनको मूल लक्ष्य छ । रञ्जितले हालसम्म कसैबाट नगद लिनु नपरेको बताए । ‘कसैले दिइहालेमा लिनेबित्तिकै कुनै आशक्त, फरक किसिमले योग्य वा वृद्धाश्रममा पैसा थपेर सहयोग गरेको छु,’ उनले भने । ‘म जति सक्छु, आफ्नै पैसाले यात्रा गर्छु,’ रञ्जित भन्छन्, ‘मैले कोहीबाट सहयोग लिएर मेरो यात्रा र उद्देश्य पूरा गर्दिनँ । म सगरमाथा आफ्नै खर्चले चढ्ने तयारीमा छु । त्यसका लागि परिवारको उत्तिकै साथ छ ।’ कतिपयले अहिलेदेखि सगरमाथा चढ्नलाई प्रायोजन गरिदिने भन्न थालेका छन् तर उनले कसैलाई सहमति जनाएका छैनन् ।
बुवा केशरी साह र आमा सरस्वतीका कान्छा छोरा हुन् रञ्जित । दुई भाइ र तीन बहिनीमध्ये दाजुले बिहे गरेपछि अलग्गै बसेका छन् । दिदीको बिहे भइसक्यो । दुई बहिनी पढिरहेका छन् । रञ्जित अविवाहित छन् । उनले कक्षा सातसम्म मात्रै पढेका छन् । साइकल यात्राको प्रेरणा उनले मधेस आन्दोलनबाट पाएको बताए ।
२०७२ साल भदौमा मधेस बन्दका कारण उनले आफ्ना एक साथीलाई बर्दिवाससम्म साइकलमा लिन गएका थिए । साथीको तौल उनको भन्दा दोब्बर थियो । दोब्बर तौलका साथीलाई बर्दिवासबाट साइकलमा जनकपुरसम्म ल्याइदिए । त्यतिबेला साथीहरूले उनको साइकल चलाउने कलाको प्रशंसा गरे । त्यहीबेला उनलाई साइकल यात्रा गर्ने रहर पलायो । त्यसैले कतिपयले मधेस आन्दोलनले जन्माएको साइकल यात्री भन्ने पनि गरेका छन् । आन्दोलनबाट सुरु भएको साइकल यात्रा अब सगरमाथाको शिखरसम्म पुर्‍याउने उनको चाहना छ ।
सगरमाथा आरोहणको अनुमति सरकारले देला वा नदेला भन्ने उनलाई चिन्ता छ । हालसम्म साइकल बोकेरै सगरमाथा शिखरमा कोही पुगेका छैनन् । विश्व साइकल यात्री पुष्कर शाहले समेत सगरमाथाको शिखरमा साइकलको पाङ्ग्रामात्र बोकेर पुर्‍याएका थिए । यदि उनले साइकल लाने अनुमति पाए भने पुर्‍याउन सक्लान् या नसक्लान् भन्ने प्रश्न पनि उब्जिएको छ । रञ्जित भने आफ्नो आत्मबल र शक्ति दुवैका कारण पुर्‍याउन सक्नेमा ढुक्क छन् ।

kumbha.kantipur@gmail.com

प्रकाशित : कार्तिक १, २०७६ ११:४७
प्रतिक्रिया
पठाउनुहोस्
ADVERTISEMENT
ADVERTISEMENT

‘७०० क्लब’

कान्तिपुर संवाददाता

युरोपयन च्याम्पियनसिप २०२० को छनोटमा सोमबार युक्रेनले पोर्चुगललाई २–१ ले हरायो । त्यसमा पोर्चुगलका कप्तान क्रिस्टियानो रोनाल्डोले ७२ औं मिनेटमा पेनाल्टीमा गरेको गोल सान्त्वनामै सीमित भयो । तर, व्यक्तिगत रूपमा रोनाल्डोका लागि भने त्यो गोलले ठूलै अर्थ राख्छ । यससँगै उनी ‘७ सय क्लब’ मा प्रवेश गरे अर्थात् उनी ७ सय गोल गर्ने छैटौं खेलाडी बने ।

३४ वर्षीय रोनाल्डोले ९७३ औं खेलमा आएर ७ सय गोलको कोसेढुंगा पार गरेका हुन् । पोर्चुगलका लागि ९५ औं गोल गरेका उनी अन्तर्राष्ट्रिय फुटबलमा इरानका अली दाई (१०९ गोल) लाई पछ्याइरहेका छन् । उनले स्पेनी महारथी रियल म्याड्रिडका लागि ४५० गोल गरेका छन् । करिअर सुरु गरेको पोर्चुगिज क्लब स्पोर्टिङ सीपीका लागि ५ गोल गरेका उनले इंग्लिस प्रिमियर लिग क्लब म्यानचेस्टर युनाइटेडमा ११८ र इटालियन च्याम्पियन युभेन्ट्समा ३२ गोल गरेका छन् । उनलाई गोलको कीर्तिमानमा अर्जेन्टिनी फरवार्ड लियोनल मेसीले चुनौती दिइरहेका छन् ।
विश्व फुटबलमा केही दशकअघिसम्म कसले कति गोल गरे भन्ने यकिन गर्न सकिने अवस्था छैन । तथ्यांक र दाबी गरिएका गोल संख्यामा भिन्नता पाइन्छ । त्यसैले सन् १९७० को दशकसम्मका तथ्यांक विवादित नै छन् । तर, फुटबलको तथ्यांकसम्बन्धी कार्यरत संस्थाहरू जोसेफ बिकानले सबभन्दा धेरै गोल गरेकामा सहमत छन् । चेकोस्लोभाकिया र अस्ट्रियाबाट खेलेका यी फरवार्डले देश र क्लबको लागि औपचारिक खेलहरूमा ८०५ गोल गरेको मानिन्छ । ‘७ सय क्लब’ का सदस्यहरू :

प्रकाशित : कार्तिक १, २०७६ ११:४६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT