राजधानीमै कटियाको स्वाद

रौतहटमा माटोको भाँडोमा पकाइने खसीको परिकार काठमाडौंमा पनि लोकप्रिय हुन थालेको छ ।
विद्या राई

काठमाडौंमा लोकल र अर्ग्यानिक भनेपछि जोकोही हुरुक्कै हुन्छन् । अझ खानेकुराका परिकारमा सौखिनहरू त लोकल र अर्ग्यानिक भनेपछि खोजीखोजी नै पुग्छन् । रौतहटको कटियाले यतिबेला काठमाडौं सहरमा नयाँ स्वाद थपेको छ । तीनकुनेस्थित गैरीगाउँको लेकाली किचन एन्ड कटिया हाउसले कटियाको स्वादमा मौलिकता र फरकपना दिएको छ ।

‘हामीले रौतहटकै स्वाद दिन स्थानीय स्रोतसाधनलाई प्राथमिकता दिएका छौं, यसकारण स्वादमा नयाँपन र रौतहटकै मौलिकता दिन सकेका छौं,’ कटिया हाउसका सञ्चालक मधुसूदन ढकालले दाबी गरे । यहाँ कटिया बनाउन प्रयोग हुने खसी स्थानीय प्रजातिको छ । पेप्सीकोलाको उदयपुर्या मासु पसलको खोरमा पालिएका स्थानीय जातका खसी सञ्चालक आफैंले छनोट गर्छन् । काट्न र सफा गर्न लगाएर सिंगै खसी कटिया हाउसमा ल्याउँछन् । करिब २० किलो खसीको मासु दैनिक खपत गर्छन् ।
कटिया माटोबाट बनाइएको भाँडो हो । त्यसैमा पकाइने भएकाले मासुको परिकार नै कटिया नामले चिनिएको छ । सुरुमा कटियामा काटेको प्याज, जिराको दाना, लसुनको पोटी, नुन, बेसार र सुकेको खुर्सानी आवश्यकताअनुसार राखिन्छ । भुटेको तोरीको तेलमाथि टुक्रा पारिएको खसीको मासु राखिन्छ ।
एउटा कटियामा ३ सय ग्राम मासु राख्ने बताइन्छ जसमा १२ टुक्रा हुन्छ । त्यसपछि कटियालाई प्लेटले छोपेर कोइलाको रागमाथि राखिन्छ ।
कटिया हाउसमा दाउराबाट बनाइएको कोइला प्रयोग गरिन्छ । कटियामा पकाउँदा मासुलाई बेला–बेला चलाइरहनुपर्छ । पाक्ने बेलामा जिरा, धनियाँ, सुपारी, सुक्मेल, ल्वाङ, तेजपत्ता, जाइफल, जाइपत्री, अलैंची, मरिच, पिप्ला, सोठी, दालचिनी गरी १३ प्रकारका मसलाको धूलो राखिन्छ । कटिया डेढदेखि दुई घण्टासम्ममा तयार हुन्छ । कटियामा प्रयोग हुने मसला रौतहटबाटै ल्याइन्छ । कटिया ग्यास चुलोमा पनि बनाउन सकिन्छ तर कोइलामा पकाएजस्तो स्वादिलो हुँदैन ।
कटिया सेटमा कटिया, भुजा, अचार हुन्छ । प्रतिकटिया ७ सय रुपैयाँ पर्छ । ६ महिनाअघि सुरु भएको कटिया यतिबेला काठमाडौंमा ब्रान्ड नै बनेको छ । सुरुमा दैनिक २५–३० वटा बिक्री हुने गरेको कटिया पछिल्लो समय कम्तीमा पनि ५०–६० वटा बिक्ने गरेको बताउँछन् । शुक्रबार र शनिबार ग्राहकको घुइँचो बढ्छ । अर्का सञ्चालक राज अर्याल भन्छन्, ‘सुरुमा त रौतहटको स्थानीय स्वाद सहरले मन नपराइदेला भनेर डराएका थियौं । अब कटिया बिस्तारै–बिस्तारै सहरको स्वाद बन्दै र बढ्दै छ ।’
कटिया बढी पिरोलाई स्वादिलो मानिन्छ । मौलिक र अर्ग्यानिक स्वाद दिन सकेकै कारण कटिया ग्राहकको रोजाइमा परेको बताउँछन् । ‘हामी रौतहटकै गाउँमा पाइने थरीथरीका मसला प्रयोग गर्छौं, ‘कुक’ उतैबाट ल्याएका छौं,’ मधुसूदनले भने । कटिया रौतहटको स्थानीय परिकार हो । रौतहटको गौर कटियाका लागि प्रसिद्ध मानिन्छ ।
कटिया हाउसले खानाकै माध्यमबाट हिमाल, पहाड र तराईलाई जोड्ने प्रयास गरेको छ । रौतहटको कटिया भनेजस्तै दाङको बदिया (खसी पारिएको भाले कुखुराको मासुको परिकार), मुस्ताङको थकाली खाना, च्याङ्ग्रा सुकुटी र पहाडको कालिजको मासु यहाँका विशेष परिकार हुन् । मधुसूदन र राजसहित पाँच जना युवा मिलेर एक करोड रुपैयाँ लगानीमा कटिया हाउस सञ्चालनमा ल्याएको हो । पछिल्लो समय लगानीअनुसारको प्रतिफल पाउँदै गएको उनीहरू बताउँछन् ।
त्रिभुवन विमानस्थल र चक्रपथले गर्दा कटिया हाउस रहेको स्थान पनि उपयुक्त छ । सञ्चालकहरूका अनुसार नेता, कार्यकर्ता, कलाकार, समाजसेवी सबैखाले र सबै उमेर समूहका ग्राहक कटियाका पारखी भएका छन् । कटिया हाउसमा २ सय जना अट्ने क्षमता छ । पारिवारिक भेटघाट, बैठक, गोप्य कुराकानीका लागि व्यवस्था गरिएका बेग्लै कोठा र क्याबिनमा रहेर कटियाको स्वाद लिन सकिन्छ । ‘थ्री डी पेन्टिङ’ ले सजाइएका भित्ता र क्याम्प फायर गर्न सकिने रुफटपले पनि कटिया हाउसमा कटियाका पारखी बढाएको छ ।

bidhyaraee19@gmail.com

प्रकाशित : कार्तिक १, २०७६ ११:४४
ADVERTISEMENT
प्रतिक्रिया
पठाउनुहोस्

“वार” को करामत

हेलो शुक्रबार

ऋतिक रोशन र टाइगर श्राफबीच अनेक समानता छन् । दुवै स्टारकिड्स हुन्, गुड लुकिङ छन्, डान्समा पोख्त, एक्सन उस्तै दमदार । टाइगर त फिल्ममा आउनुको प्रेरणाको स्रोत बुबा ज्याकीभन्दा ऋतिकलाई ज्यादा मान्छन् । उनको आइडल नै ऋतिक । यता, ऋतिक पनि टाइगरको ऊर्जा र मेहनतसँग खुब प्रभावित छन् । यी दुई स्टारको क्रेज युवा पुस्ता र बच्चामा अधिक छ ।

उनीहरू एकसाथ स्क्रिनमा देखिन लागेको चर्चा चल्न थालेको धेरै भयो । दुर्भाग्य के भइदियो भने टाइगरको उदय र ऋतिकको व्यक्तिगत जीवनमा उतारचढाव आउनु करिब एकै समयमा बन्यो । पत्नी सुजैन खानसँगको डिभोर्सको घाउमा कंगना रनावतसँगको लफडाले नुनचुक छर्‍यो । फिल्ममा फोकस हुनै पाएनन् । तर अहिले सबथोक बदलिएको छ । ऋतिकका लगातार दुई फिल्म आए, ‘सुपर ३०’ र ‘वार’ ।
‘वार’ चाहिँ त्यही फिल्म हो, जसमा ऋतिक र टाइगर पहिलोपटक सँगै देखिएका छन् । यो फिल्म आउनु नै उनका फ्यानका लागि खुसीको कुरा थियो, त्यसमाथि फिल्मले फ्यानमात्र होइन, बहुसंख्यक समीक्षकको पनि मन जितेको छ । एक्सन–थ्रीलर जनराको यस फिल्मले अढाइ घण्टा बाँध्ने सामर्थ्य राख्छ जोकोहीलाई । यही कारण हुनुपर्छ, बक्सअफिसमा कमाल गरेको । बलिउड व्यापारको आधिकारिक न्युजपोर्टल कोइमोई डटकमका अनुसार फिल्मले सुरुमै भारु ५३ करोड कमायो, एक साता बित्दा २३८ करोड पुग्यो । रफ्तार घटेको छैन । बलिउडका व्यापार विश्लेषक दाबी गरिरहेका छन्, ‘वार’ ले ‘कविर सिंह’ को रेकर्ड तोड्छ । यसको प्रत्यक्ष संकेत हो, ऋतिक र टाइगरको क्रेजलाई ‘वार’ ले थप फराकिलो बनाएको छ । भारु २ सय करोड बजेटको यस फिल्म हिन्दीसँगै तमिल र तेलगु भाषामा समेत रिलिज भयो, जसले कमाइ उकास्न भूमिका खेल्यो ।
‘वार’ का निर्देशक हुन्, सिद्धार्थ आनन्द । उनले यसअघि ऋतिकलाई लिएर ‘ब्याङ ब्याङ’ बनाएका थिए । हिट भए पनि प्रशंसा कमाएन । त्यही अभाव पूर्ति गरिदियो, ‘वार’ ले । वास्तविक जीवनमा झैं फिल्ममा पनि टाइगर (खालिद) को गुरु बनेका छन्, ऋतिक (कविर) । भारतमा आतंक मच्चाउनेलाई सिध्याउने मिसनमा हुन्छन् तर देशभक्त अफिसरको ख्याति बनाएका कविरले एकाएक धोका दिन्छन् । त्यसैले भारतीय खुफिया एजेन्सीबाट कविरलाई मार्ने जिम्मा पाउँछन्, खालिदले । कविरले धोका दिएर किन आफ्नै सहकर्मीलाई मार्दैछन्, खालिद आफ्नो ड्युटी पूरा गर्न सफल होलान् ? यी प्रश्नको जवाफ दिँदै फिल्म अगाडि बढ्छ । यसबीच खुफिया एजेन्सीभित्र हुने धोकेबाजी, स्वार्थको खेल, आतंककारीको सञ्जाल, एजेन्टको मनोविज्ञान र आन्तरिक द्वन्द्वजस्ता विविध पक्षलाई नियाल्न पाइन्छ । घरीघरी चक्मा दिने ट्वीस्ट अनि धमकेदार एक्सन सिक्वेन्सले मन अन्त डुल्नै दिँदैन । यसको एक्सन बलिउडकै लागि बेन्चमार्क मानिएको छ । यसका लागि हलिउड र दक्षिण कोरियाका नामी कोरियोग्राफर ल्याइएको थियो ।
नरेन्द्र मोदी र बीजेपीको लोकप्रियतासँगै बलिउडमा राष्ट्रभक्ति खुब बिकिरहेको छ । ‘उरी ः द सर्जिकल स्ट्राइक’, ‘मिसन मंगल’, ‘बाट्ला हाउस’, ‘भारत’ उदाहरण धेरै छन् । वार पनि राष्ट्रप्रेमले ओतप्रोत छ । त्यसैले यसको लोभलाग्दो व्यापारमा राष्ट्रप्रेमको मनोविज्ञानले पक्कै भूमिका खेलेको छ । तर त्यतिमात्र होइन, विषयवस्तु उठानदेखि त्यसको प्रस्तुतिसम्म रोचक छ । न त निर्देशकमा दुई स्टार लिएपछि फिल्म चलिहाल्छ भन्ने सोच नै देखिन्छ । व्यापार र ऋतिकसँगको सहकार्यका कारण मात्र होइन, अभिनय कुशलताको कोणबाट पनि टाइगरका लागि ‘वार’ सम्झनायोग्य छ । डान्स र एक्सनजस्तै उनको अभिनय पनि खारिएको छ । यसले ‘स्टुडेन्ट अफ द इयर’ को असफलताको चोट मत्थर पारिदिएको छ ।
ऋतिक त सदाझैं छँदैछन् । ‘सुपर ३०’ को गणितज्ञ आनन्द कुमार र वारको कविरबीच किञ्चित समानता छैन । तर दुवै भूमिकामा ऋतिक जीवन्त लाग्छन् । अभिनेतालाई दीर्घजीवी बनाउने गुण यही हो । तर उनको दिल कति ठूलो छ भने टाइगरको प्रशंसा गर्न रत्तिभर कन्जुस्याइँ गर्दैनन् । उनी निर्धक्क भन्छन्, ‘अबको ५० वर्ष टाइगरलाई छुन सक्दैन । उनी अनुशासन र ऊर्जाले भरिएका छन् ।’
ऋतिक–टाइगरको फ्यानलाई फुरुंग बनाउने अर्को खबर छ, निर्देशक सिद्धार्थ आनन्दले ‘वार’ को सिक्वेल बनाउने घोषणा गरेका छन् । यसलाई फ्रेन्चाइजकै रूपमा लैजाने सोच छ उनको ।
फिल्मको अन्त्यमा ऋतिक स्वयंले भनेकै छन्, ‘वार स्टिल अन ।’

hellosukrabar@gmail.com

प्रकाशित : कार्तिक १, २०७६ ११:४३
पूरा पढ्नुहोस्
प्रतिक्रिया
पठाउनुहोस्
ADVERTISEMENT