“वार” को करामत

हेलो शुक्रबार

ऋतिक रोशन र टाइगर श्राफबीच अनेक समानता छन् । दुवै स्टारकिड्स हुन्, गुड लुकिङ छन्, डान्समा पोख्त, एक्सन उस्तै दमदार । टाइगर त फिल्ममा आउनुको प्रेरणाको स्रोत बुबा ज्याकीभन्दा ऋतिकलाई ज्यादा मान्छन् । उनको आइडल नै ऋतिक । यता, ऋतिक पनि टाइगरको ऊर्जा र मेहनतसँग खुब प्रभावित छन् । यी दुई स्टारको क्रेज युवा पुस्ता र बच्चामा अधिक छ ।

उनीहरू एकसाथ स्क्रिनमा देखिन लागेको चर्चा चल्न थालेको धेरै भयो । दुर्भाग्य के भइदियो भने टाइगरको उदय र ऋतिकको व्यक्तिगत जीवनमा उतारचढाव आउनु करिब एकै समयमा बन्यो । पत्नी सुजैन खानसँगको डिभोर्सको घाउमा कंगना रनावतसँगको लफडाले नुनचुक छर्‍यो । फिल्ममा फोकस हुनै पाएनन् । तर अहिले सबथोक बदलिएको छ । ऋतिकका लगातार दुई फिल्म आए, ‘सुपर ३०’ र ‘वार’ ।
‘वार’ चाहिँ त्यही फिल्म हो, जसमा ऋतिक र टाइगर पहिलोपटक सँगै देखिएका छन् । यो फिल्म आउनु नै उनका फ्यानका लागि खुसीको कुरा थियो, त्यसमाथि फिल्मले फ्यानमात्र होइन, बहुसंख्यक समीक्षकको पनि मन जितेको छ । एक्सन–थ्रीलर जनराको यस फिल्मले अढाइ घण्टा बाँध्ने सामर्थ्य राख्छ जोकोहीलाई । यही कारण हुनुपर्छ, बक्सअफिसमा कमाल गरेको । बलिउड व्यापारको आधिकारिक न्युजपोर्टल कोइमोई डटकमका अनुसार फिल्मले सुरुमै भारु ५३ करोड कमायो, एक साता बित्दा २३८ करोड पुग्यो । रफ्तार घटेको छैन । बलिउडका व्यापार विश्लेषक दाबी गरिरहेका छन्, ‘वार’ ले ‘कविर सिंह’ को रेकर्ड तोड्छ । यसको प्रत्यक्ष संकेत हो, ऋतिक र टाइगरको क्रेजलाई ‘वार’ ले थप फराकिलो बनाएको छ । भारु २ सय करोड बजेटको यस फिल्म हिन्दीसँगै तमिल र तेलगु भाषामा समेत रिलिज भयो, जसले कमाइ उकास्न भूमिका खेल्यो ।
‘वार’ का निर्देशक हुन्, सिद्धार्थ आनन्द । उनले यसअघि ऋतिकलाई लिएर ‘ब्याङ ब्याङ’ बनाएका थिए । हिट भए पनि प्रशंसा कमाएन । त्यही अभाव पूर्ति गरिदियो, ‘वार’ ले । वास्तविक जीवनमा झैं फिल्ममा पनि टाइगर (खालिद) को गुरु बनेका छन्, ऋतिक (कविर) । भारतमा आतंक मच्चाउनेलाई सिध्याउने मिसनमा हुन्छन् तर देशभक्त अफिसरको ख्याति बनाएका कविरले एकाएक धोका दिन्छन् । त्यसैले भारतीय खुफिया एजेन्सीबाट कविरलाई मार्ने जिम्मा पाउँछन्, खालिदले । कविरले धोका दिएर किन आफ्नै सहकर्मीलाई मार्दैछन्, खालिद आफ्नो ड्युटी पूरा गर्न सफल होलान् ? यी प्रश्नको जवाफ दिँदै फिल्म अगाडि बढ्छ । यसबीच खुफिया एजेन्सीभित्र हुने धोकेबाजी, स्वार्थको खेल, आतंककारीको सञ्जाल, एजेन्टको मनोविज्ञान र आन्तरिक द्वन्द्वजस्ता विविध पक्षलाई नियाल्न पाइन्छ । घरीघरी चक्मा दिने ट्वीस्ट अनि धमकेदार एक्सन सिक्वेन्सले मन अन्त डुल्नै दिँदैन । यसको एक्सन बलिउडकै लागि बेन्चमार्क मानिएको छ । यसका लागि हलिउड र दक्षिण कोरियाका नामी कोरियोग्राफर ल्याइएको थियो ।
नरेन्द्र मोदी र बीजेपीको लोकप्रियतासँगै बलिउडमा राष्ट्रभक्ति खुब बिकिरहेको छ । ‘उरी ः द सर्जिकल स्ट्राइक’, ‘मिसन मंगल’, ‘बाट्ला हाउस’, ‘भारत’ उदाहरण धेरै छन् । वार पनि राष्ट्रप्रेमले ओतप्रोत छ । त्यसैले यसको लोभलाग्दो व्यापारमा राष्ट्रप्रेमको मनोविज्ञानले पक्कै भूमिका खेलेको छ । तर त्यतिमात्र होइन, विषयवस्तु उठानदेखि त्यसको प्रस्तुतिसम्म रोचक छ । न त निर्देशकमा दुई स्टार लिएपछि फिल्म चलिहाल्छ भन्ने सोच नै देखिन्छ । व्यापार र ऋतिकसँगको सहकार्यका कारण मात्र होइन, अभिनय कुशलताको कोणबाट पनि टाइगरका लागि ‘वार’ सम्झनायोग्य छ । डान्स र एक्सनजस्तै उनको अभिनय पनि खारिएको छ । यसले ‘स्टुडेन्ट अफ द इयर’ को असफलताको चोट मत्थर पारिदिएको छ ।
ऋतिक त सदाझैं छँदैछन् । ‘सुपर ३०’ को गणितज्ञ आनन्द कुमार र वारको कविरबीच किञ्चित समानता छैन । तर दुवै भूमिकामा ऋतिक जीवन्त लाग्छन् । अभिनेतालाई दीर्घजीवी बनाउने गुण यही हो । तर उनको दिल कति ठूलो छ भने टाइगरको प्रशंसा गर्न रत्तिभर कन्जुस्याइँ गर्दैनन् । उनी निर्धक्क भन्छन्, ‘अबको ५० वर्ष टाइगरलाई छुन सक्दैन । उनी अनुशासन र ऊर्जाले भरिएका छन् ।’
ऋतिक–टाइगरको फ्यानलाई फुरुंग बनाउने अर्को खबर छ, निर्देशक सिद्धार्थ आनन्दले ‘वार’ को सिक्वेल बनाउने घोषणा गरेका छन् । यसलाई फ्रेन्चाइजकै रूपमा लैजाने सोच छ उनको ।
फिल्मको अन्त्यमा ऋतिक स्वयंले भनेकै छन्, ‘वार स्टिल अन ।’

hellosukrabar@gmail.com

प्रकाशित : कार्तिक १, २०७६ ११:४३
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

अवसर खोज्दै भाइबर

विजय तिमल्सिना

फेसबुकको आफ्नै च्याट गर्ने एप छ, म्यासेन्जर । फेसबुककै अर्को म्यासेजिङ एप छ, ह्वाट्सएप । फेसबुक स्वामित्वको इन्स्टाग्राममा पनि प्रयोगकर्ताले च्याट गर्न मिल्ने सुविधा छ । अहिले सामान्य स्मार्टफोन प्रयोगकर्ताका लागि च्याट, भिडियो च्याट गर्न धेरै विकल्प छन् । यी विकल्पमा प्रयोगकर्ताले कसलाई रोज्लान् ?

फेसबुकजस्तो धेरै प्रयोगकर्ताको पहुँच भएको सेवालाई प्रयोगकर्ताले रोज्लान् वा भाइबरजस्तो विशुद्ध म्यासेजिङ एपलाई प्रयोग गर्न रुचाउलान् ? यो प्रश्नको उत्तर खोज्नु नै भााइबरजस्ता कम्पनीका लागि चुनौती हो । भाइबरका प्रमुख कार्यकारी अधिकृत जमैल अगाउवा भने सहजै जवाफ दिन्छन्, ‘अन्य देशमा एक जना प्रयोगकर्ताले औसत ३ वटा म्यासेजिङएप प्रयोग गर्छन् तर दक्षिण एसियाली प्रयोगकर्ता भने औसत ५ वटा एप चलाउँछन् । प्रयोगकर्ताको रोजाइमा हामी पनि पर्छौं ।’
उनका अनुसार फेसबुकजस्ता ठूला कम्पनीका प्रयोगकर्ता भए पनि भाइबरजस्ता म्यासेजिङएपका आफ्नै विशेषता छन्, जसलाई प्रयोगकर्ताले छाड्न चाहन्नन् । भाइबरको सबैभन्दा ठूलो विशेषता के हो ? प्रमुख कार्यकारी अधिकृत जमैल भाइबर अन्य एपको तुलनामा सबैभन्दा छिटो भएको दाबी गर्छन् । व्यक्तिगत रूपमा भाइबरबारे उनलाई मन पर्ने विशेषता पनि यही हो ।
यसबाहेक भाइबरको अर्को विशेषता गोपनीयता भएको जमैलको दाबी छ । भाइबरले डिफल्ट रूपमै आफ्नो एपमा इन्ड टु इन्ड इन्स्क्रिप्सन राखेको छ, जसका कारण एक प्रयोगकर्ताले पठाएको म्यासेज अर्को डिभाइसमा नभई बीचमा कसैले पढ्न वा ह्याक गर्न नसक्ने उनको दाबी छ । भाइबरले इन्स्क्रिप्सनलाई डिफल्ट बनाएको भए पनि चलनचल्तीमा रहेका अन्य धेरै एपले यो फिचर प्रयोगका लागि विकल्प छाडेका छन् । त्यसैले पनि भाइबर अन्य एपको तुलनामा फरक रहेको दाबी जमैलको छ ।
सामान्य प्रयोगकर्ताका लागि भाइबर म्यासेज गर्ने एप मात्रै हो । कर्पोरेट हाउस वा कम्पनीका लागि भने भाइबर व्यवसाय साझेदार पनि हो । नेपालमा पनि भाइबरले केही कर्पोरेट हाउससँग सहकार्य गरिरहेको छ । नेपालमा भाइबर बैंकिङ होस् वा कर्पोरेट हाउससँग ‘भाइबर कम्युनिटी’ निर्माणको साझेदारी भाइबरले यसलाई व्यावसायिक रूप दिने प्रयास जारी राखेको छ । ‘यस्ता व्यावसायिक सहकार्यले प्रयोगकर्तासँग पैसा नलिई पनि कम्पनी सञ्चालनमा सहयोग पुग्छ,’ जमैल भन्छन्, ‘आखिर अहिले पैसा तिरेर च्याट गर भन्दा कसले गर्छ र ?’
भाइबरले धेरै जनसंख्या भएको अन्य देशको तुलनामा नेपालमा किन आफ्नो बजार र प्रभाव विस्तारका लागि ध्यान दिइरहेको छ ? ‘नेपालजस्तो धेरै वैदेशिक रोजगारीमा जाने श्रमिक भएको देशका लागि भाइबर आफ्नो घरजस्तो हो,’ जमैल भन्छन्, ‘यसले नेपालमा रहेका र बाहिर रहेका मानिसबीच सम्पर्क स्थापित गराउन भूमिका खेलेको छ ।’
भाइबरले आफ्नो प्रयोगकर्तालाई ध्यानमा राखे पनि आम्दानीका लागि भने नयाँ बिजनेस मोडल स्थापित गरिरहेको जमैलको तर्क छ । ‘तर भाइबर प्रयोगकर्तामै केन्द्रित हुन्छ,’ उनी भन्छन्, ‘हामी कर्पोरेट हाउससँग व्यावसायिक रूपमा काम गरेर आम्दानीको मोडेल पहिल्याउँदै छौं ।’ यही प्रयासको परिणामस्वरूप भाइबर यो वर्षदेखि आफ्नो खर्च धान्न सक्ने गरी सक्षम भएको उनको दाबी छ । ‘हाम्रो आम्दानीको करिब आधा हिस्सा कर्पोरेटसँगको साझेदारीमार्फत आउँछ,’ उनले भने, ‘हामीले बनाएको कम्युनिटीबाट पनि ब्रान्ड र सेलेब्रिटीले धेरै मानिससँग सञ्चार गर्न सक्छन् ।’ संसारभरका टेलिकम कम्पनीहरूले इन्टरनेटमार्फत् निःशुल्क कल र म्यासेजको सुविधा दिने भाइबरजस्ता एपले आफ्नो आम्दानी घटाएको आरोप लगाइरहेका छन् । टेलिकम कम्पनीबाट सोझै कल गर्दा सञ्चार सम्पर्क महँगो हुने भएकाले प्रयोगकर्ताले भाइबरजस्ता एपलाई रोजेको उनको बुझाइ छ । ‘तर हामी टेलिकम कम्पनीका दुश्मन होइनौं,’ उनी भन्छन्, ‘धेरै टेलिकम सेवा प्रदायक हामीसँग सहकार्य गर्न चाहन्छन् ।’

twitter : @bjtimalsina

प्रकाशित : कार्तिक १, २०७६ ११:४३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT