मनमोहक लाङटाङ

विमल खतिवडा

राजधानी काठमाडौंबाट नजिकको पर्यटकीय गन्तव्य हो लाङटाङ उपत्यका  । यस क्षेत्रको यात्राका लागि उपयुक्त मौसम यही नै हो  । अर्थात् दसैं छेका । फोटो र भिडियोको सौखिनहरूका लागि यो जति उपयुक्त समय अर्को नहोला । पुग्नलाई समस्या छैन । काठमाडौंबाट १७० किमिको स्याफ्रुबेंसीसम्म बस पाइन्छ । मौसम राम्रो भयो भने जिपमा थाङजिमसम्मै पुगिन्छ । बालाजु बसपार्कबाट यहाँसम्म पुग्न करिब आठ घण्टा लाग्छ ।

धेरैले स्याफ्रुबेंसीलाई पहिलो दिनको गन्तव्य बनाउँछन् । यहाँ बस्ने–खानेको समस्या हुन्न । लाङटाङका व्यवसायी तेम्बा लामा थाङजिममा बास बस्नु राम्रो मान्छन् । ‘थाङजिङको प्राकृतिक दृश्यले लोभ्याउँछ । गाउँ साह्रै रमाइलो छ’ उनले भने । लाङटाङ, गणेशलगायत हिमालहरूले मोहित बनाउँछ । तिब्बततर्फको हिमशृंखला लोभलाग्दा छन् । चिलिमे हाइड्रोपावर रहेको यस क्षेत्रमा पैदल घोडतबेला पुग्न सकिन्छ । त्यसको अर्को दिनमात्र लाङटाङ पुगिन्छ । लाङटाङ राष्ट्रिय निकुञ्ज नुवाकोट, सिन्धुपाल्चोक र रसुवा जिल्लामा फैलिएको छ । तामाङ र शेर्पा जातिको संस्कृतिलाई यहाँ नजिकबाट चिन्न सकिन्छ ।

‘राजधानीबाट सबभन्दा नजिक र छोटो दूरीको गन्तव्य भनेकै लाङटाङ हो, जहाँ हिमाल र हिमनदीले सबैको ध्यान तान्छ,’ पर्यटन व्यवसायी लामा भन्छन्, ‘एक दिनको गाडी र दुई दिनको पैदलबाट लाङटाङ पुगिन्छ ।’ महाभूकम्पले ध्वस्त बनाएर फेरि उठेको लाङटाङको बस्तीमा करिब १५ वटा होटल छन् । यसमा करिब ३ सय पर्यटक अटाउने उनले बताए । एक जनालाई दैनिक २ हजारदेखि २५ सय रुपैयाँ खर्चले पुग्छ ।

यहाँको दालभातको स्वादै बेग्लै लाग्छ । ढिँडो, शेर्पा सुप, लोकल आलुको स्वाद नयाँ लाग्न सक्छ । समुद्री सतहबाट ३,५०० मिटरको उचाइमा अवस्थित लाङटाङमा हिमनदी, झरना र आकर्षक बस्तीले यात्राको थकानलाई बिर्साइदिन्छ । लाङटाङबाट करिब तीन घण्टामा पुगिने ३,९८० मिटरस्थित क्यान्जिङ गुम्बाको महत्त्व र यहाँका बौद्ध कलाकृतिको बेग्लै महत्त्व छ । यहाँबाट दृश्यावलोकन गर्नुको अनुभव बिछट्टै हुने गर्छ । यहाँ पनि तामाङ जातिकै बाक्लो बस्ती छ ।

लाङटाङ क्षेत्र घुम्नलाई एक साता पर्याप्त हुन्छ । दसैंका बेला विदेशी पर्यटक धेरै हुन्छन् । धेरै यात्रु स्याफ्रुबेंसीबाटै हिँड्ने गर्छन् । यो क्षेत्र पद यात्राकै लागि चर्चित पनि हो । यस क्षेत्रको आम्दानीको मुख्य स्रोत पनि हो पर्यटन । लाङटाङ निकुञ्जमा चितुवा, हाब्रे (रेडपान्डा), कस्तूरी, मृग, हिमाली भालु, थार, घोरललगायत वन्यजन्तुसँगै विभिन्न प्रजातिका वनस्पति र चराचुरुंगी पाइन्छन् ।

अरु ५ गन्तव्य
कालिञ्चोक
दोलखास्थित कालिञ्चोकमा केबलकार चढ््दै गौरीशंकरसहितको हिमाली दृश्यलाई नजिकबाट हेर्न सकिन्छ ।
सौराहा
चितवन राष्ट्रिय निकुञ्जको एकसिंगे गैंडा, बाघ, गोही, चराचुरूंगी हेर्दै थारु संस्कृति बुझ्न र जंगल सफारीका लागि प्र्रसिद्ध क्षेत्र हो, सौराहा ।
चित्लाङ
मकवानपुरको चित्लाङ हाइकिङका लागि लोकप्रिय छ र यहाँ टेन्ट, होम स्टेमा रहेर स्थानीय र अर्ग्यानिक खानेकुराको स्वाद लिन सकिन्छ ।
भोटेकोसी
सिन्धुपाल्चोक जिल्लास्थित भोटेकोसी नदीको पुलमा बन्जी र स्वीङ गर्नु तथा र्‍याफ्टिङ, कायकिङ, कनोइङलगायत साहसिक पर्यटकका लागि राम्रो विकल्प हो, यो ।
सुकुटे
सिन्धुपाल्चोकस्थित सुनकोसी किनारको मनोरम दृश्य नियाल्ने यस क्षेत्रमा र्‍याफ्टिङ, कायकिङ तथा बिच भलिबल, फुटबल खेल्न सकिन्छ ।

bimalnews@gmail.com

प्रकाशित : आश्विन १०, २०७६ १२:१६
प्रतिक्रिया
पठाउनुहोस्
ADVERTISEMENT
ADVERTISEMENT

जनकपुर तीर्थ

प्रदेश २
अजित तिवारी

 यो प्रदेशमा घुमफिरका लागि प्रख्यात मुगल शैलीको माता सीताको जानकी मन्दिर नै हो  । मन्दिरसँगै रहेको रामजानकी विवाहमण्डपले धेरैलाई आकर्षित पार्छ  ।

यसको ऐतिहासिक र धार्मिक महत्त्व छ ।
जनकपुरको गंगासागरमा दिनहुँ साँझ हुने गंगा आरतीमा घन्टौं बिताउँदा आनन्द लाग्छ । शंखको एकनास ध्वनि र आरतीले त्यहाँ पुग्ने जो–कोही रोमाञ्चित महसुस गर्छन् । गंगासागरमा बोटिङको पनि सुविधा छ । गंगासागर नजिकै रहेको स्वर्गद्वारी पनि आकर्षक स्थल हो । जनकपुरमा नयाँ निर्माण भएको रेल्वे ब्रोडगेज प्लेटफर्म र न्यारोग्रेड रेल्वेको पुरानो इन्जिन र डब्बाले पनि पर्यटकलाई तान्ने गर्छ ।
जनकपुरमा सुविधासम्पन्न होटल, लज र धर्मशालाहरू छन् । जहाँ एक रातमा करिब १ हजारभन्दा बढी पर्यटक बसोबास गर्न सक्छन् । खानाका लागि सामान्य होटलदेखि भर्खरै खुलेका आधुनिक रेस्टुराँमा स्वादअनुसारको भोजन उपलब्ध छ । जनकपुरमा नेपाली, भारतीय, थकाली र अन्य परिकारको खाना पनि पाइन्छन् । यहाँको माछाका परिकार खुबै चलेको छ । बारा पुग्नेले झिर (खसीको सेकुवा), कटियाको मासु, पकौडा र मिठाईको स्वाद लिने गर्छन् । रिक्सा चढेर पनि सहरलाई फन्को लगाउन सकिन्छ ।
जनकपुरको भ्रमणपछि नछुटाउने अर्को धार्मिक स्थल हो, महोत्तरीको जलेश्वरधाम । धार्मिक आस्थाको केन्द्र जलेश्वरधाममा दर्शन गर्ने पर्यटकको संख्या बढ्दो छ । महोत्तरीको बर्दिवासमा धुर्मुस–सुन्तलीले बनाएको नमुना बस्तीले धेरैलाई आकर्षित गर्छ । दसैंको बिदामा सप्तरीको छिन्नमस्ता र कंकालिनी मन्दिरबाट धार्मिक यात्रा, भारतको जयपुर सहरको शैलीमा बसाइएको राजविराज ‘प्लान सिटी’ आकर्षक छन् । राजविराजको पान मुखै रसाउने खालको हुन्छ । लहान नजिकको फूलबारी सलहेश मन्दिरमा नयाँ वर्षको दिनमात्र फुल्ने फूलले पनि आकर्षण थपेको छ ।
धनुषाको धनुषाधाम मन्दिरको आफ्नै धार्मिक आस्था छ । सीतासँग विवाहका लागि रामले धनुष भाँच्दा एउटा टुक्रा धनुषाधाममा खसेको मान्यता छ । धनुषाधाम मन्दिरको परिसरमा रहेको धनुष आकारको माटोको ढिस्को हेर्न आउने बर्सेनि बढ्दो छ । धनुषाधामबाट २० मिनेटमै जनकपुर पुग्न सकिन्छ, जहाँ जानकी मन्दिर अवस्थित छ । मन्दिरको आलिसान र भव्य बनोटले सबैलाई मोहित पार्छ । मन्दिरको भव्य स्वरूपलाई पृष्ठभूमिमा राखेर सेल्फी खिच्नेको भीड लाग्छ ।

अरु ५ गन्तव्य
नाडिमन ताल
सर्लाहीको चन्द्रनगरमा रहेको नाडिमन ताल ५२ बिघामा फैलिएको छ, जहाँ बोटिङ गर्न सकिन्छ ।
नुनथर
चरे पहाडमा पर्ने रौतहटस्थित यस क्षेत्रमा घुम्न, पिकनिक खान र परिवारसहित टहलिन पुग्नेको ताँती नै लाग्छ ।
सिम्रौनगढ
बाराको ऐतिहासिक स्थल सिम्रौनगढमा इँटा, पोखरी, जलेको चामललगायत युद्धकालका अवशेष हेर्न पाइन्छ ।
पर्सा
हात्ती सफारी गर्दै पर्सा वन्यजन्तु आरक्षलाई नजिकबाट नियाल्न सकिन्छ ।
वीरगन्ज
यो पुरानो सहरमा घडिअर्वा पोखरी, भिस्वा डाँडाको गुम्बा, विन्दवासिनी मन्दिर, आईसीपी र सुक्खा बन्दरगाह रहेको छ ।

ajitjanakpur@gmail.com

प्रकाशित : आश्विन १०, २०७६ १२:१६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT