ग्लाम मेटलका उत्कृष्ट

कान्तिपुर संवाददाता

कुनै समय थियो, जति बेला केही ठूल्ठूला नाम चलेका ब्यान्डका अधिकांश पुरूष सदस्यले पनि लामा लामा कपाल पाल्थे  । यस्तो भन्दा ठ्याक्कै सन् अस्सी वरिपरिको समयको सम्झना हुन्छ  ।

यस्ता ब्यान्डका संगीतबीच पनि एउटा समानता थियो र त्यो थियो, उनीहरुले पस्केको एक विशेषखाले मेटल संगीत । सन् अस्सीतिर त्यो खुबै लोकप्रिय पनि रह्यो । लामा–लामा कपाल पालेका सदस्य भएका ब्यान्डको संगीत भएको हुनाले यसलाई ‘हेयर मेटल’ पनि भनियो ।


खासमा यो ग्लाम मेटल थियो, अझ भनौं, पप मेटल । हार्डकोर मेटल संगीतका फ्यानका लागि यस्तो ग्लाम मेटल मन नपर्न पनि सक्छ, अझ भनौं उनीहरु यसका विरोधी पनि हुन सक्छन् । उनीहरुले ग्लाम मेटललाई मेटल संगीत नै होइन पनि भन्न सक्छन् । तर यस्तो संगीतको जबरदस्त प्रभाव रहेको तथ्यलाई भने नकार्न सकिन्न । सुरू सुरूमा एलिस कुपर, भ्यान हेलन जस्ताले यसलाई लोकप्रिय बनाए, पछि यसलाई डेभ लेपार्ड र बन जोभी जस्ता ब्यान्डले सफलताको शिखरमा पुर्‍याए ।
सन् नब्बेको सुरूको समयसम्मलाई ग्लाम मेटलको सबैभन्दा राम्रो समय मानिन्छ । यस्ता ब्यान्डमा सदस्यले लामो कपाल मात्र पाल्दैनन्, फेसनेबल लुगा पनि लगाउने गर्छन् । सन् नब्बेको सुरूसँगै यसको लोकप्रियतामा कमी आउन थाल्यो । अहिले आएर फेरि यसले लोकप्रियता कमाउन थालेको अनुभव गरिएको छ । यसैबीच संगीतसम्बन्धी लोकप्रिय पोर्टल ॅरोलिङ स्टोन’ ले ग्लाम मेटलका उत्कृष्ट एल्बमको सूची बनाएको छ, त्यसमध्ये शीर्ष पाँच यस्ता छन् र जसलाई अहिलेसम्मकै सदाबहार पाँच मान्न सकिन्छ ।


हिस्टेरिया, सन् १९८७
डेभ लेपार्ड


डेभ लेपार्डले सन् १९८७ मा हिस्टेरिया एल्बम जारी गर्दा यो खुबै लोकप्रिय सावित भयो । केहीले के पनि भने भने यो रक संगीत नै होइन तर यस एल्बमको प्रभाव खुबै रह्यो, त्यो समयमा र त्यसपछि पनि । त्यसको ‘लभ बाइट्स’ जस्ता गीत त्यति बेला सबैको मुखमा झुन्डिएको जस्तै थियो । अनि ‘पुल सम सुगर अन मी’ जस्ता गीत पनि धेरैले मन पराए । त्यसैले यो एल्बम दुई करोडभन्दा बढी बिक्री भयो । गितारिस्ट फिल कोलिनले भने जस्तै, यो माइकल ज्याक्सनको ‘थ्रिलर’ को हार्डरक भर्सन हो ।

लक ह्वाट द क्याट ड्रायग्ड इन, १९८६
पोइजन

पोइजनको डेब्यु एल्बम नै हो, लक ह्वाट द क्याट ड्रायग्ड इन । यो नै उनीहरूको सबैभन्दा लोकप्रिय र सफल एल्बम सावित भयो । यसका चार गीतले त्यति बेला खुबै धमाका मच्चाएको थियो र ती थिए, ‘टक डर्टी टु मी’, ‘आई वान्ट एक्सन’, ‘आई वन्ट फरगेट यु’ र ‘क्राई टफ’ । यसलाई ग्लाम मेटलमा विश्वकै सबैभन्दा बढी चलेको एल्बममा गनिन्छ । यो एल्बम कति धेरै राम्रो थियो भने यसपछि अमेरिकाको पेन्सिल्भानियाको यो ब्यान्डले दबाबमै अरू राम्रा सिर्जना गर्न सकेन ।


साउट एट द डेझिल, सन् १९८३
मोटली त्रुm


त्यसो त मोटली त्रुलाई हेभी मेटल ब्यान्ड भन्ने पनि छन् तर यसको तेस्रो एल्बम ‘साउट एट द डेभिल’ पक्कापक्की ग्लाम मेटलको
एउटा राम्रो उदाहरण हो । अझ यसमा रहेका दुई गीत ‘लुक ड्याट किल’ र ‘टु योङ टु फल इन लभ’ धेरैले मन पराए र यसलाई ग्लाम मेटल संगीतको राम्रो उदाहरण झन्न सकिन्छ । यही एल्बमले त हो खासमा मोटली त्रुलाई स्थापित गरेको । दुई सातामै यो एल्बम दुई लाख बिक्री भएको थियो र यसले पनि देखाउँछ, यो कस्तो छ भनेर ।


स्लिभरी ह्वेन वेट, सन् १९८६
बन जोभी


बन जोभी ब्यान्डको फ्यान हो भने सबैभन्दा मन परेको एउटा गीतमा पर्न सक्छ, ‘यु गिफ लभ अ ब्याड नेम’ । यो यही एल्बमको गीत हो । यसमा लगभग सबै गीत खुबै चले, जस्तो, ‘लिभिन अन ए प्लेयर’, ‘वान्टेड डेड अर अलाइभ’ । यो अमेरिकाको न्यु जर्सीको तेस्रो स्टुडियो एल्बम हो, भनिरहनु पर्दैन, सबैभन्दा सफल पनि । यसमा रिची साम्बोराले ‘राइज योर ह्यान्ड्स’ मा गितारबाट जस्तो प्रस्तुति दिएका छन्, त्यो सुन्दा अझै पनि आनन्द लाग्छ ।

स्किड रो, सन् १९८९
स्किड रो


स्किड रोले आफ्नो डेब्यु एल्बमको नाम पनि स्किड रो नै राखेको थियो । यसका लागि ब्यान्डले खुबै मिहिनेत पनि गरेको थियो । यसैको नतिजा हो, यो एल्बम उत्तिकै सफल पनि रह्यो । सुरुका दिनमा एरोस्मिथको कन्सर्टमा ओपनिङ एक्ट गर्ने ब्यान्ड थियो, यो । पहिलो एल्बमपछि भने यसलाई यस्तो काम गरिरहन आवश्यक परेन । यसका चार गीत खुबै लोकप्रिय रहे, ‘योङ गन वाइल्ड’, ‘एटिन एन्ड लाइफ’, ‘आइ रिमेम्बर यु’ र ‘पिस अफ मी’ ।

प्रकाशित : आश्विन ३, २०७६ ११:५५
प्रतिक्रिया
पठाउनुहोस्

मोजिल्लामै भीपीएन

कान्तिपुर संवाददाता

चर्चित ब्राउजर फायरफक्सले प्रयोगकर्तालाई भीपीएनको पनि सुविधा दिने भएको छ  । फायरफक्सका प्रयोगकर्ताले अब ब्राउजरमै भीपीएन प्रयोग गर्न पाउने छन्  ।

यो फिचरको परीक्षण भइरहेको फायरफक्सले जनाएको छ । केही सातामै प्रयोगकर्ताले फायरफक्सको अपडेटमा यो सुविधा पाउनेछन् ।
मोजिल्ला फायरफक्सले केही साता अघिमात्रै आफ्नो ब्राउजरमा सबै थर्ड पार्टी ट्र्याकर बन्द गर्ने घोषणा गरेको थियो । थर्ड पार्टी ट्र्याकर नहुने र टोर ब्राउजिङको सुविधा हुने भएकाले अहिले धेरै प्रयोगकर्ता फायरफक्स र क्रोम छाडेर ब्रेभ ब्राउजरतर्फ आकर्षित भइरहेका छन् । ब्राउजरमा भएको भीपीएनले सोही ब्राउजरबाहेक अन्यत्र भएको इन्टरनेट गतिविधिलाई सुरक्षित भने बनाउँदैन । यसका लागि आफ्नो डिभाइसमै भीपीएन इन्स्टल गर्नुपर्छ ।

प्रकाशित : आश्विन ३, २०७६ ११:५१
पूरा पढ्नुहोस्
प्रतिक्रिया
पठाउनुहोस्