ओल्ड टाउन स्टार

लिल नास एक्स गत वर्ष ॅओल्ड टाउन रोड’ गीत ल्याएसँगै खुबै चर्चामा छन् । अमेरिकाका यी २० वर्षीय गायकको गीत सामाजिक सञ्जालमा भाइरल बनेको छ । उनी पनि उत्तिकै लोकप्रिय भएका छन् ।
हेलो शुक्रबार

 आम गोना टेक माई हर्स टु द ओल्ड टाउन रोड’अचेल बार, पप, होटलमा खुबै बज्ने यो गीतका गायक हुन् लिल नास एक्स  । असली नाम मोंटरो लामार हिल भएका उनी स्टेजमा लिल नास याक्सबाट परिचित छन्  ।

उनी भर्खर २० औं वसन्तमा हिँड्दै छन् । लिल नास याक्स अमेरिकी गायक तथा गीत लेखक हुन् । करिब दुई वर्षअघि मात्र सांगीतिक करिअर सुरु गरेका उनी अमेरिकन कन्ट्रीसाइड र्‍याप ‘ओल्ड टाउन रोड’ सार्वजनिक गरेपछि लोकप्रिय बनेका हुन् ।


त्यसो त लिल नासले आफ्नो बाल्यकाल त्यति मजाले बिताउन पाएका थिएनन् । लिलका अनुसार उनका आमाबुबाको सम्बन्ध राम्रो थिएन । उनी सांगीतिक करिअरलाई अगाडि बढाउनकै लागि आफ्ना अभिभावकसँग छुट्टिए । उनका बुबा पनि सुखद समाचार गीतमार्फत सुनाउने गर्थे । १३ वर्षको हुँदा लिलमा इन्टरनेट र मिम (आइडिया, व्यवहार र शैली व्यक्ति–व्यक्तिमार्फत प्रचार गर्ने संस्कृति) प्रतिको अधिक लगाव भइसकेको थियो । उनी आफ्ना साथीहरूलाई जिस्काउन मिम प्रयोग गर्थे । टिनएजमा धेरै समय एक्लो भएरै पनि रमाएका थिए ।


उनी गायकभन्दा अगाडि एक इन्टरनेट सेलेब्रिटीका रूपमा परिचित थिए । उनले बनाएका इन्स्टाग्राम अनि फेसबुक भाइन (छोटा भिडियो) अहिले पनि सामाजिक सञ्जालमा भाइरल छन् । उनी पढाइको सिलसिलामा विश्वविद्यालयबाट ‘ड्रप आउट’ भए र अतिरिक्त क्रियाकलापमै रामाउन थाले । उनले सन् २०१८ मा सांगीतिक क्षेत्र रोज्दै करिअर अगाडि बढाउने निर्णय गरेका थिए ।हितैषी बिली रे साइरससँग मिलेर ‘ओल्ड टाउन रोड’ को बिट बनाएर गीत गाए । उनले यो गीत ५ अप्रिल, २०१९ मा युट्युबबाट औपचारिक रूपमा सार्वजनिक हुनपूर्व नै अन्य माध्यमबाट चर्चा कमाइसकेका थिए । चर्चामा ल्याउन उनलाई संगीतसँगै टिकटकले सहयोग गर्‍यो । उनको यो गीत टिकटकमा यति भाइरल भयो कि युट्युबमा गएर ओल्ड टाउन रोड खोजेर नहेर्ने मानिसहरू निकै कम भए । उनको गीतको चर्चाको उचाइ यति चुलियो कि ओल्ड टाउन रोड ३८ करोड बढीले हेरिसकेका छन् ।


लिल नास २० वर्षकै उमेरमा यस्तो भाग्यमानी बने कि लोकप्रियता हासिल गरेसँगै उनको गीत बिलबोर्डमा शीर्ष एक सयको सूचीमै पुग्यो । दिन–प्रतिदिन दर्शक ओइरिन थाले । त्यसले उनको जिन्दगीको बाटो नै परिवर्तन गरिदियो । सांगीतिक दुनियाँको चर्चित टेलिभिजन एमटीभीदेखि भी ह्याच ओनको हट लिस्टमा पनि उनको गीतले राम्रै स्थान पाउन थाल्यो । ओल्ड टाउन रोडको चर्चा अहिले पनि सेलाएको छैन । चर्चासँगै उनलाई कोलम्बिया रेकर्डले मार्च २०१९ मा ठूलो रकममा अनुबन्ध गर्‍यो ।ओल्ड टाउन रोडपछि उनको कार्डी बीलगायत धेरैसँग संगीत आए पनि ओल्ड टाउन रोडको जस्तो चलेको छैन । त्यसको कारण हो, उनको संगीतको लोकप्रियता । लिल नासले २०१९ को ‘प्राइड महिना’ मै उनले आफू समलिंगी भएको सार्वजनिक गरेका थिए । अमेरिकामा जुन महिनालाई प्राइड महिनाका रूपमा लिइन्छ ।


लिल नासले अरू जति नै संगीत बनाए पनि उनी ओल्ड टाउन रोडले नै चिनिने छन् । उनले टिन च्वाइस अवार्ड, एमटीभी म्युजिक भिडियो अवार्ड जिते । अमेरिकन चार्टको नम्बर १ स्थानमा सबभन्दा धेरै १७ साता रहेर कीर्तिमान पनि बनायो । उनका लागि अमेरिकन चार्टको सफता जीवनकै सबभन्दा महत्त्वपूर्ण उपलब्धि हो । उनले समर्थकलाई राम्रो संगीत दिने वाचा गरेका छन् । ओल्ड टाउन रोडले एउटा अवार्डमा तहल्का मच्चाउँदा हरेकको मनोनयनमा लिल नासको नाम गुन्जिएको थियो ।सन् २०१९ मा आएका धेरै संगीतले लिल नासलाई उछिन्न सकेनन् । ओल्ड टाउन रोड ‘हट हन्ड्रेड सिंगल चार्ट’ को शीर्षस्थानमा ६० वर्षयताकै सबभन्दा लामो समय बसेको हो । उनको गीतलाई एमिनेमको होमोसाइडरको नयाँ गीतले पनि उछिन्न सकेन । लोकप्रिय बन्दै गएपछि उनको गीत पाँच भर्सनमा निकालियो ।


पछिल्लोपटक उनले किम नाम जुनसँग सहकार्य गर्दै ल्याएको ‘सोल टाउन रोड’ स्पटिफाईमा पाँच दिनमै ४० करोड बढी दर्शकले बजाएका थिए । अर्का गायक बिली रे साइरससँग मिलेर गाएको रिमिक्स भर्सन स्पटिफाईमै ५४ करोडभन्दा धेरैपल्ट बज्यो । यसले विश्व हिपहप संगीत बदलिँदै छ भन्ने पुष्टि गरिदियो ।

hellosukrabar@gmail.com
–एजेन्सीको सहयोगमा

प्रकाशित : भाद्र २०, २०७६ ११:४९
ADVERTISEMENT
प्रतिक्रिया
पठाउनुहोस्
ADVERTISEMENT

आयुष्मान भवः

बलिउडमा आयुष्मान खुरानाका फिल्म एकपछि अर्को गर्दै किन हिट भइरहेका छन् त ?
हेलो शुक्रबार

 केही दिनअघि एक भारतीय फिल्म समीक्षकले लेखे, ‘पछिल्ला दिनमा अजय देवगन र अक्षय कुमारले खेलेका फिल्म भन्नासाथ मलाई झुर कमेडी वा फाल्तुको राष्ट्रवादी फिल्म भन्ने लाग्छ  । ’

उनले यो भनाइलाई यसरी पूरा गरे, ‘तर, आयुष्मान खुरानाले खेलेको फिल्म भन्नासाथ पक्कै राम्रो होला भन्ने लाग्छ । यो समयमा आयुष्मान राम्रो फिल्मको ग्यारेन्टी भएका छन् ।’


यो भनाइ काफी छ– आयुष्मानबारे बुझाउन । हुन पनि उनले फिल्म नै त्यस्तै खेलेका छन् । एकसे एक । गत दुई वर्षकै फिल्म हेरौं– आर्टिकल १५, बधाई हो, अन्धाधुन, शुभ मंगल सावधान, बरेलीकी बर्फी । सब हिट । सब शानदार । सबै फरक विषयका । जवान छोराका बाबुआमाले फेरि बच्चा जन्माउने भएपछि त्यो जवान छोराको जीवनमा के कस्तो असर पर्ला ? यस विषयमा थियो, ‘बधाई हो ।’ दलितमाथि भइरहेका अत्याचारको बयान गर्ने ‘आर्टिकल १५’, दृष्टिविहीनको अभिनय गरिरहेको एउटा संगीतकार/गायकको संघर्ष गाथा ‘अन्धाधुन’, एउटा यौन समस्याले ग्रसित युवाको मनोविज्ञानमा आधारित ‘शुभ मंगल सावधान’ र सानो सहरको एउटा कविको प्रेमकथा ‘बरेलीकी बर्फी’ । सबै आम मानिसका कथा तर खास तरिकाले बनाइएका ।


आयुष्मानले आफ्नो पहिलो फिल्म ‘विक्की डोनर’ बाट नै आफ्नो फरक बाटोको संकेत गरेका थिए । धेरै अभिनेताले अस्वीकार गरेको वीर्यदाताको भूमिकामा उनले आफूलाई अब्बल सावित गरेका थिए । टीभी एंकरका रूपमा करिअर सुरु गरेका आयुष्मानले यसै फिल्मबाट आफूलाई राम्रो गायक पनि सावित गरेका थिए । त्यसलगत्तै भूमि पेडनेकरसँग उनको ‘दम लगा के हैसा’ ले पनि आयुष्मानलाई ‘डेरिङ’ अभिनेता बनाइदिएको थियो । एउटा कलाकारका लागि आफैंलाई चुनौती हुने भूमिकाहरूमा देखिनु आवश्यक हुन्छ । जुन फिल्ममा पनि उस्तै देखिन थाले भने ती कलाकारको समय र प्रतिभा सकिएको मानिन्छ ।


आयुष्मानले आफूलाई त्यसबाट जोगाइरहेका छन् । विक्की कौशल र राजकुमार रावजस्ता नयाँ छिमलका अभिनेतासँग कुममा कुम मिलाएर उनले बलिउडमा एउटा बीचको बाटो बनाइरहेका छन् । राजकुमारसँग उनले ‘बरेलीकी बर्फी’ मा अभिनय गरे भने विक्कीसँग उनले यस वर्ष संयुक्त रूपमा उत्कृष्ट अभिनेताको नेसनल अवार्ड पाए । आयुष्मानले ‘अन्धाधुन’ र विक्कीले ‘उरी’ का लागि यो पुरस्कार पाएका थिए । आयुष्मानका दुई वर्षमा आउने फिल्मको सूची पनि उत्तिकै तगडा छ । उनी सबभन्दा पहिले ‘ड्रिम गर्ल’ मा देखिने छन् । यो फिल्ममा उनी युवतीको भेष र आवाजमा धेरै पुरुषलाई प्रेम पासमा पार्ने छलीको भूमिकामा छन् । त्यसलगत्तै उनको नयाँ फिल्म ‘बाला’ मा देखिने छन् । गत वर्षको हिट फिल्म ‘स्त्री’ का निर्देशक अमर कौशिकको यो ब्ल्याक कमेडीमा उनी कपाल खुइलिँदै गएर समस्यामा परेका युवाको भूमिकामा देखिने छन् । सोमबार मात्रै यसको पहिलो टिजर सार्वजनिक गरिएको छ ।


स्त्रीलगत्तै उनी अमिताभ बच्चनसँग ‘गुलाबो सिताबो’ मा देखिने छन् । सन् २०२० को अप्रिलमा रिलिज हुने यो फिल्मका निर्देशक सुजित सरकार हुन् । यी तिनै सुजित हुन् जसले आयुष्मानको पहिलो फिल्म ‘विक्की डोनर’ तथा ‘पिकु’ र ‘पिंक’ को निर्देशन गरेका थिए । यो फिल्ममा बच्चन र खुराना पपेट पात्रका रूपमा देखिने छन् । त्यसपछि आउनेछ गत वर्षको हिट ‘शुभ मंगल सावधान’ को सिक्वेल ‘शुभ मंगल ज्यादा सावधान’ । यसमा भने उनी गे युवाका रूपमा देखिने छन् । ‘बाला’ जस्तै यसमा पनि उनको साथ भूमि पेडनेकर हुनेछिन् । आयुष्मानका आउने फिल्मको छोटो कथा र निर्देशकहरू हेर्दा यी सबै गम्भीर किसिमका फिल्म देखिन्छन् । विषय गम्भीर भए पनि आयुष्मानका प्रायः फिल्मको प्रस्तुति हास्य रहने भएकाले यिनले बक्स अफिसमा राम्रो व्यापार पनि गर्ने गरेका छन् । तीन खान, अक्षय कुमार र अजय देवगनका फिल्मको बजेट नै निकै धेरै हुने भएकाले सानो प्रोजेक्टमा यिनलाई लिनै मुस्किल पर्छ । यस्तोमा गतिलो विषयवस्तु भएका फिल्म आयुष्मान, विक्की वा राजकुमारकै पोल्टामा पर्ने गरेका छन् । ठूलो बजेटका धुमधडाकावाला फिल्ममा मात्रै देखिन थालेकाले ठूला स्टारहरूले आमदर्शकमा आफ्नो छाप बिस्तारै गुमाउँदै गएका छन् । यसैले बेलाबेला ऋत्विक रोशनजस्ता स्टार ‘सुपर ३०’ जस्ता फिल्ममा आउँछन् । अजय देवगन ‘रेड’ र अक्षय कुमार ‘स्पेसल २६’ मा ।


राष्ट्रवादको गफ र खोक्रा कमेडीको बीचमा मनोरञ्जक सिनेमालाई जोगाउने काम अहिले बलिउडमा आयुष्मानजस्ता अभिनेताले नै गरिरहेका छन् । जसका फिल्ममा आजको समाज र आजका युवाको समस्या पनि हुन्छ, साथमा मनोरञ्जक पनि हुन्छन् । यसैले त समीक्षकहरूले नयाँ आउने अभिनेताहरूलाई भन्न थालेका छन्– आयुष्मान भवः ।

प्रकाशित : भाद्र १३, २०७६ १२:२४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT