बलियो ज्यान स्वस्थ शरीर

कान्तिपुर संवाददाता

 प्रतिस्पर्धामा ओर्लने नेपालकै पहिलो महिला बडिविल्डर हुन्, निर्मला महर्जन  । लाजिम्पाटमा जन्मे–हुर्केकी उनी सानैदेखि खेलकुदमा सहभागी हुन चाहन्थिन्  ।

स्कुल पढ्दा कराँते, तेक्वान्दो र भलिबल खेल्न उनलाई मन पर्थ्यो । उनको घर नजिकै फिटनेस सेन्टर (व्यायाम मन्दिर, ज्याठा) थियो तर प्रायः केटाहरूलाई मात्र देख्थिन् त्यहाँ । उनलाई त्यहाँ हेर्दाहेर्दै आफैंलाई जिम गर्ने रहर जाग्यो । स्कुलबाट घर आउजाउ गर्दा हरेक दिन १०–१५ मिनेट उभिएर नहेरी घर नफर्किने भइन् । फिटनेस गर्ने इच्छा बढ्दै गयो । एक दिन त्यहाँका गुरु (प्रशिक्षक) ले बोलाएर भनेको उनले सम्झिइन्, ‘केटीले पनि फिटनेस गर्न मिल्छ । सिकेर अरूलाई सिकाउन पनि मिल्छ ।’


निर्मलालाई इच्छा थियो तर परिवारसँग अनुमतिबिना उनले आँट गरिनन् । उनले बुबासमक्ष कुरा राखिन्, ठाडै अस्वीकार गरिदिए । भने, पढाइ बिग्रन्छ, केटीको काम फलाम उचाल्ने होइन । उनी निराश भइन् । केही दिनपछि फेरि उनको गुरुसँग जम्काभेट भयो । ‘गुरुले फिटनेस नराम्रो होइन,
आफ्नो शरीर स्वस्थ राख्ने हो भनेर सम्झाउनुभयो,’ उनले भनिन् । र, २१ वर्षअघि फिटनेस गर्न थालेकी उनले सन् २००५ मा फिटनेस ट्रेनरका रूपमा काम नै गर्न थालिन् ।बडिविल्डिङमा प्रवेश गरेपछि निर्मलाको यात्रा सहज भएन । उनीअघि महिलाहरू यस क्षेत्रमा थिएनन् । सन् २००५ मा पहिलोपल्ट मिस्टर हिमालयमा एक्लै आफ्नो कला प्रदर्शन गर्दा उनले टु–पिस लगाएकी थिइन् । त्यसबेला महिलाका लागि बेग्लै फिटनेस सेन्टर थिएन, टु–पिस लगाउनु त कल्पनाबाहिरको कुरा थियो । उनी फिटनेसमै दत्तचित्त भएर लागिरहेकी छन् । उनी अचेल एरोबिक्स, जुम्बा पनि सिकाउँछिन् । पर्सनल ट्रेनरको काम पनि गर्छिन् ।


उनी पहिलोपटक सन् २०१५ मा बैंककमा भएको विश्व च्याम्पियनसिपमा सहभागी भएकी थिइन् । त्यसपछि भुटान (२०१६) र ओमान (२०१७) मा भएको एसियन चाम्पियनसिपमा पनि प्रतिस्पर्धा गरिन् । उनी ओमानमा एथलेटिक्स फिजिक्सतर्फ चौथो भएकी थिइन् ।


दिनचर्या र खानपान
निर्मलाको दैनिकी बिहान ५ बजे सुरु हुन्छ । हल्का ब्रेकफास्ट लिन्छिन् । दुई वटा अण्डा, एक कप ब्ल्याक कफी र दुई–तीन वटा कुकिज खान्छिन् । त्यसपछि फिटनेस सेन्टरमै व्यस्त हुन्छिन् । यसबीच उनलाई चना, अण्डा, चिउरा चाहिन्छ । चिउरा उनको प्रिय हो, झोलामा चिउरा कहिल्यै छुट्दैन ।


उनी दिउँसो १ बजे घरमा पाकेको दालभात खान्छिन् । १ घण्टा आराम गरेपछि ब्ल्याक कफीसँगै आलमण्ड ५–६ टुक्रा लिन्छिन् । खाजामा अण्डा नभए घरमा जे पाकेको छ, त्यही मन पर्छ । उनी बेलुकी ८ बजेसम्म फिटनेस सेन्टरमै व्यस्त हुन्छिन् । भोक लागेको अवस्थामा साथै राखिएको प्रोटिन पाउडर उपयोग गर्छिन् । बेलुकी सामान्य खाना खान्छिन् । उनलाई कम चिल्लो मन पर्छ । शरीर सधैं फिट र स्वस्थ रहनुपर्ने भएकाले उनी आफ्नो स्वास्थ्यप्रति सचेत छिन् ।

बिजु महर्जन
twitter : @bij_eta

प्रकाशित : भाद्र २०, २०७६ ११:४७
प्रतिक्रिया
पठाउनुहोस्

ब्रान्ड मोह

व्यावसायिक उत्पादनका वस्तुहरूको बेलाबेला हुने प्रदर्शनमा उत्पादित सामग्रीबारे जानकारी दिने जिम्मेवारी प्रायः महिलालाई दिइन्छ । यस्ता प्रदर्शनीमा प्रवर्द्धकका रूपमा व्यावसायिक मोडलसँगै पार्ट–टाइमरका रूपमा विद्यार्थीलाई प्रयोग गरेको पाइन्छ ।
विमल खतिवडा

भृकुटीमण्डपमा गत साता भएको नाडा अटो शोमा स्कुटर, बाइक, कारलगयात सवारी साधन जति आकर्षक थिए, त्यसलाई सँगै उभिएका मोडल/प्रोमोटरहरू पनि दर्शकका लागि उत्तिकै आकर्षण बनेका थिए  । देशको सबभन्दा ठूलो अटो मेलामा विभिन्न कम्पनीका ९५ ब्रान्डको सहभागिता थियो  ।

ती सबैमा आकर्षक जीउडाल भएका युवतीहरूले प्रवर्द्धक (प्रोमोटर) को काम गरिरहेका थिए । उनीहरूको काम सवारी साधनबारे इच्छुक दर्शकलाई जानकारी दिएर ब्रान्डतर्फ आकर्षित गर्ने हो ।
मेलामा राजधानीस्थित शंखमूलकी २३ वर्षीया विस्मा रिजाल सबैको आकर्षण बनिन् । उनले एमभी अगुस्टाको ७३ लाख ९० हजार रुपैयाँ पर्ने ब्रुटाले ८०० आरआर एलएच ४४ बाइकको प्रवर्द्धन गरेकी थिइन् । नाडा अटो शोमा तेस्रोपल्ट सहभागी उनले भनिन्, ‘मैले मोडलिङ त गरेको छैन । तर, राइडिङमा एकदमै रुचि छ ।

त्यसैले यो मेलामा बाइकमै बस्न आएकी हुँ ।’ कक्षा १२ मा अध्ययनरत छँदै उनले बाइक चढ्न सुरु गरेकी थिइन् । उनी अचेल सीबीआर बाइक हाँक्छिन् । एस इन्स्टिच्युट अफ म्यानेजमेन्ट कलेजमा बीबीए अन्तिम वर्षमा अध्ययनरत उनले भनिन्, ‘ठूला मेलामा प्रवर्द्धकका रूपमा कामक गर्दा आत्मविश्वास बढ्छ । मानिसहरू चिनिन्छ । पकेट मनी पनि राम्रै पाइन्छ ।’ मेलामा आएका दर्शकहरूले बाइकमा उनीसहित बनाइएका भिडियो टिकटकमा खुबै हिट भयो ।


विस्माले मोडलका रूपमा काम गरेकी छैनन्, यही मेलामा ब्रान्डका प्रवर्द्धकमात्र हुन् । सिन्धुलीकी १९ वर्षीया सन्ध्या कोइराला दुई वर्षयता मोडलिङमा सक्रिय छिन् । शंकरदेव क्याम्पसमा स्नातक तहमा अध्ययनरत उनले भनिन्, ‘यस्तो कार्यक्रम (नाडा अटो शो) मा पढाइ प्रभावित नहुने गरी उपस्थित हुने गरेको छु । पहिलोपल्ट नाडामा सहभागी भए पनि यो सोचेभन्दा राम्रो रहेछ ।’ चिनजानकै माध्यमबाट मेलामा आएकी उनले ६ दिन प्रवर्द्धकको काम गरेको पारिश्रमिक २० हजार रुपैयाँ पाइन् । कम्पनीहरूले ब्रान्डको प्रवर्द्धन गर्नेहरूलाई राम्रै पारिश्रमिक दिने बताइन्छ । प्रवर्द्धकको काम मेलामा आउनेहरूलाई सवारी साधनबारे जानकारी दिने हुन्छ ।


‘मोडलिङमा लागेको एक वर्ष हुन लाग्यो । आफ्नै रुचिको विषय भएकाले मेलासम्म आइपुगें । यहाँ धेरै जना भेटिए, धेरैसँग चिनजान भयो,’ बिहान ११ बजेदेखि साँझ ६ बजेसम्म ६ दिन मेलामा खटिएकी ऋतिका शर्माले भनिन् । महाराजगन्जकी १९ वर्षीया उनले मोडल हन्ट नेपाल २०१८ मा मोस्ट स्टाइलिसको अवार्ड जितेकी थिइन् । नेसनल कलेज, धुम्बाराहीमा स्नातक तहमा अध्ययनरत उनी पनि नाडा अटो शोमा पहिलोपल्ट सहभागी भएकी हुन् । गौरीघाटकी १७ वर्षीया विभुषी उपाध्यायले बाल्यकालबाटै विज्ञापनमा अभिनय गर्न थालेकी थिइन् । ‘सानै छँदा दूध र चाउचाउको विज्ञापनमा अभिनय गरेकी थिएँ,’ उनले भनिन्, ‘दुई वर्षयता मोडलिङमै सक्रिय छु ।’ उनी मोडल हन्ट नेपाल २०१९ मा पनि सहभागी हुँदैछिन् । त्यसैको तालिममा व्यस्त भइरहेका बेला उनीसहित चार प्रतिस्पर्धीलाई प्रवर्द्धक बन्ने प्रस्ताव आएको थियो । हालै १२ कक्षा सकाएकी उनको चाहना मोडलिङ गर्ने हो ।


चाबहिलकी २२ वर्षीया रुविना कार्की नोबेल कलेजमा पब्लिक हेल्थकी विद्यार्थी हुन् । ‘मोडलिङ मन पर्छ,’ उनले भनिन्, ‘यो क्षेत्र बेलाबेला सुनिएजस्तो नराम्रो छैन भन्ने अनुभव गरेकी छु ।’ मेलामा कारको प्रवर्द्धन गरेकी उनले पढाइलाई प्राथमिकता दिएर मोडलिङमा पनि अघि बढ्ने बताइन् । ‘दिनभर गाडीसँगै उभिँदा थाकिन्थ्यो, तर त्यस्तो गाह्रो लागेन । हाम्रा लागि यो राम्रो अवसर हो,’ उनले भनिन् ।


फेसन डिजाइन पढिरहेकी हात्तीवन, ललितपुरकी १९ वर्षीया क्रान्ति चन्दको पनि प्रवर्द्धकको यो पहिलो अनुभव हो । ‘मेलामा बसेर गाडीहरूको नयाँ–नयाँ ब्रान्डबारे बुझ्न पाउँदा खुसी लाग्यो,’ नमुना कलेज अफ फेसन टेक्नोलोजीमा अध्ययनरत उनले सुनाइन्, ‘नयाँ केही गरौं भनेर यो काम गरेकी हुँ । यसमा हल्का रुचि पनि हो । ब्रान्डको प्रवर्द्धन गर्नु राम्रो काम हो जस्तो लागेको छ ।’ यसमा परिवारको साथ रहेको पनि उनले बताइन् ।सीजी मोटोकर्पका कार्यकारी निर्देशक करणकुमार चौधरी अटो क्षेत्रलाई ग्ल्यामरस बनाउन मोडलहरू प्रयोग गरिएको बताउँछन् । ‘नेपालमा मात्र होइन, विदेशमा पनि यस्तो गरिन्छ,’ उनले भने, ‘मेलामा प्रदर्शनमा राखिने उत्पादन वा ब्रान्डलाई प्रवर्द्धन गर्न सजिलो होस् भनेर मोडल प्रयोग गरिएको हो । यो चलन नेपालमा पनि पुरानै भइसकेको छ ।’ ‘पहिला विदेशी मोडलसमेत ल्याउने गरिन्थ्यो । यसपालि नेपाली मात्रै छन्,’ मोडल एजेन्सी एमसी स्टुडियोका कार्यकारी निर्देशक विकास सिंहले भने, ‘यस्तो काममा मोडलहरूलाई राम्रै पारिश्रमिक दिइन्छ । उनीहरूका लागि करिअर बनाउने अवसर हुन् यस्ता मेला ।’

प्रकाशित : भाद्र २०, २०७६ ११:४५
पूरा पढ्नुहोस्
प्रतिक्रिया
पठाउनुहोस्