दबंग

बलिउडमा एकपछि अर्को हिट फिल्म दिइरहेकी कंगना रनावत जे बोल्छिन्, त्यसले तरंग ल्याउँदै आएको छ । उनले सुपरस्टारहरूसँग पनि पंगा लिने गर्छिन् ।
हेलो शुक्रबार

 दबंग, अर्थात्, निडर  । कसैसँग नडराउने, नदब्ने  ।

बलिउडमा यो नाम कसैलाई सुहाउँछ भने त्यो कंगना रनावत नै हुन् । १५ वर्षको उमेरमा मनालीबाट हिरोइन बन्न भागेर हिँडेकी अंग्रेजी बोल्न नजान्ने कंगना अचेल बलिउडमा सबैलाई थर्काउन सक्ने तेज तर्रार कंगना बनिसकेकी छन् । यस्तो लाग्छ, कंगनालाई कसैको डर लाग्दैन । बलिउडकी ‘आउटसाइडर’ कंगनाले ‘इनसाइडर’ ऋत्विक रोशनलाई त सार्वजनिक रूपमा मुस्किलमा पारिन् नै, हालै पत्रकार जगत्लाई पनि छोडिनन् । ऋत्विकको होम प्रोडक्सन ‘क्रिस ३’ र ‘काइट्स’ मा अभिनय गर्ने क्रममा आफूहरूबीच प्रेम भएको तर ऋत्विकले त्यसलाई अस्वीकार गरेको भन्दै उनले ऋत्विकलाई आरोपमाथि आरोप लगाइरहिन् । ऋत्विकले पनि यसको जवाफ दिन थालेपछि यो ठूलो स्क्यान्डल बन्यो । पछि कानुनी लडाइँमा समेत पुग्यो ।


गत साता रिलिज भएको फिल्म ‘जजमेन्टल है क्या’ को पत्रकार सम्मेलनमा एक पत्रकारलाई आफूविरुद्ध लगातार नकारात्मक लेखेको र आफ्नो फिल्म ‘मनिकर्णिका’ बारे भ्रम फैलाएको भनेर उनले माइकबाटै गाली गरिन् । यसको विरोधमा भारतका मनोरञ्जन बिटका पत्रकारले कंगनाको कार्यक्रम बहिष्कारसमेत गरे । तर पनि, कंगना पछि हटिनन् । बरु पत्रकारहरूलाई गाली गर्दै ट्वीटरमा अर्को भिडियो पोस्ट गरिन् जसमा भनिएको थियो– ‘तिमीहरूको के हैसियत छ, मलाई बहिष्कार गर्ने ?’
त्यही भिडियोमा उनले आफूलाई बलिउडको सबभन्दा धेरै पारिश्रमिक लिने हिरोइन भएको दाबी पनि गरिन् । यसलाई लिएर प्रियंका चोपडा र दीपिका पादुकोणका फ्यानहरूले प्रश्न उठाए पनि उनी यसबाट पछि हटिनन् । यसअघि उनको फिल्मको शीर्षक ‘मेन्टल है क्या ?’ राखिएको थियो । तर, मेन्टल हेल्थसम्बन्धी काम गर्ने दीपिकाको संस्थाले प्रश्न उठाएपछि यसको नाम फेरिएको थियो । कंगनाको लडाइँ मिडिया र सहकर्मी कलाकारहरूसँग मात्र छैन । उनको बक्स अफिस र बलिउडका ठूला ग्याङसँग पनि कुरा मिल्दैन । करण जोहरलाई त उनले ‘नेपोटिजमको फ्ल्याग बेयरर’ को संज्ञा नै दिइन् । प्रायः बलिउड स्टार र निर्माता/निर्देशकका छोराछोरीलाई मात्र फिल्ममा लिने करणका लागि यो संज्ञा सही थियो । तर पनि, आधा बलिउड कंगनासँग भड्कियो । वरुण धवनदेखि सैफ अलि खानजस्ता स्टारहरू करणको पक्षमा बोल्न अघि सरे । उनीहरूमाथि पनि कंगनाले कडा टिप्पणी गरिन् ।


गत वर्षको ‘मनिकर्णिका’ बाट निर्माता/निर्देशक बनेपछि कंगनाको बोली झन् कडा हुँदै गएको छ । र, उनीभन्दा कडा छिन्– बहिनी रंगोली चन्डेल । ट्वीटरमा कंगनाको ‘एक्लो सेना’ भएर रंगोलीले कंगनाको बचाउ गर्छिन् । कंगनाबारे हल्का नकारात्मक बोल्नेहरूको सातो खान्छिन् । रंगोली कंगनाकी म्यानेजर पनि हुन् । रंगोली आफैं एसिड आक्रमणको सिकार हुन् । जब एसिड आक्रमणको कथामाथि बन्न लागेको फिल्म ‘छपाक’ मा दीपिकाले लिड रोल गर्ने खबर आयो, रंगोलीले तुरुन्त यो भूमिका कंगनालाई दिनुपर्ने माग पनि गरिन् । कंगनाको हिम्मत मात्रै बलियो छैन, उनको फिल्म करिअर पनि त्यत्तिकै बलियो छ । भट्ट क्याम्पका ‘ग्याङस्टर’, ‘ओ लम्हे’ जस्ता फिल्ममा लागूपदार्थ दुर्व्यसनीको भूमिकामा अभिनय गरेर करिअर थालेकी कंगनालाई विकास बहलको फिल्म ‘क्विन’ ले उचाइमा पुर्‍याइदिएको थियो । त्यसपछिका ‘तनु वेड्स मनु’ शृंखलाले त्यो उचाइलाई अझै बढाइदियो । यसपालि ‘जजमेन्टल है क्या ?’ मा उनीसँग क्विनकै कोस्टार राजकुमार राव छन् । फिल्मले पहिलो सातामा ३० करोड आसपासको व्यापार गर्ने अनुमान गरिएको छ ।


३१ वर्षकी अविवाहित कंगनालाई अचेल सुपरस्टारहरूसँग पनि पंगा लिन सक्ने हिरोइनका रूपमा हेरिएको छ । संयोग त के छ भने उनको अब आउने फिल्मको नाम पनि ‘पंगा’ नै राखिएको छ । कबड्डी खेलाडी युवतीको कथा यो फिल्ममा छ । त्यसपछि उनी अर्को एक्सन फिल्म ‘धाकड’ मा देखिने छिन् । फिल्मको हालै सार्वजनिक गरिएको पोस्टरमा कंगना हातमा बन्दुक बोकेकी लडाकुका रूपमा छिन् । सधैंजसो पुरुष सुपरस्टारहरूको कब्जामा रहने गरेको दीपावली, क्रिसमस र नयाँ वर्षजस्ता बिदाको समयमा पनि अब कंगनाले हमला गरिरहेकी छन् । उनले आफ्ना नयाँ फिल्म यिनै समयमा रिलिज गर्ने बताएकी छन् । कंगनाले आफ्नै जीवन कथामाथि पनि फिल्म बनाउने समाचार आएको थियो । हालै फस्टपोस्टडटकमलाई लिएको अन्तर्वार्तामा उनले आफूले दोस्रो फिल्म निर्देशनको तयारी गरे पनि त्यो आफ्नै बायोपिक नहुने बताएकी छन् । बरु, कंगनाले तमिलनाडुकी पूर्वमुख्यमन्त्री जयललिताको जीवनमाथि हिन्दी र तमिलमा बन्न लागेको फिल्म ‘जया’ मा मुख्य भूमिका गर्दैछिन् । पूर्वफिल्म अभिनेत्री जयललिताको यो बायोपिकबारे कंगनाले भनेकी छन्, ‘उनी पनि मजस्तै सानो सहरबाट आएर ठूलो स्टार बनेकी हुन् । उनको कथामा फिल्म खेलेपछि अहिले नै मेरो कथामा बनाउनु पर्दैन ।’


कतिपयले कंगना पनि राजनीतिमा जाने तयारीमा रहेको बताउने गरेका छन् । उनका अन्तर्वार्ताहरूमा वर्तमान भारतीय प्रधानमन्त्री नरेन्द्र मोदी र भाजपाप्रति उनको वैचारिक झुकाव रहेको बताइन्छ । उनी आफैंले भने राजनीतिमा जाने कुनै इच्छा नभएको तर भविष्य कसैलाई थाहा नभएको बताउने गरेकी छन् ।

hellosukrabar@gmail.com

प्रकाशित : श्रावण १७, २०७६ ११:३४
प्रतिक्रिया
पठाउनुहोस्

लामो भिडियोको बाढी

हेलो शुक्रबार

 ट्युबमा सब्स्क्राइब गरेको च्यानलमा अपलोड भएका नयाँ भिडियो हुन् वा ट्रेन्डिङमा देखिने भिडियो  । यी सबैमा एउटा समानता पाइन्छ– भिडियोको लम्बाइ  ।

अचेल युट्युबमा अपलोड हुने अधिकांश भिडियो लामो हुन थालेका छन् । गैरव्यावसायिक रूपमा युट्युबमा अपलोड हुने भिडियोहरू लम्बाइका हिसाबले छोटो हुन सक्लान् तर युट्युबमा चर्चित रहेका क्रिएटरहरूको च्यानलबाट अपलोड हुने भिडियोको लम्बाइ भने निकै लामो बन्न थालेका छन् ।


युट्युबको नीतिका कारण पनि कन्टेन्ट क्रिएटरहरूले लामो भिडियो बनाउन थालेको विज्ञहरूको निष्कर्ष छ । युट्युबको नीतिअनुसार लामो भिडियोमा बढी विज्ञापन राख्न पाइन्छ र कन्टेन्ट निर्माताले लामो भिडियो अपलोड गर्नुको अर्थ उसले बढी विज्ञापन राख्न पाउने अवसर पनि हो । यस्तै कारणले अधिकांश कन्टेन्ट निर्माताले आफ्नो भिडियोलाई सकेसम्म लामो बनाउन थालेका छन् ।हालै पिउ रिसर्च सेन्टरले गरेको एक अध्ययनअनुसार युट्युबमा बढी चर्चित रहेका २ लाख ५० हजार च्यानलमा अपलोड भएका भिडियोको औसत लम्बाइ १३ देखि १४ मिनेट छ । केही वर्ष अघिसम्म यस्ता च्यानलको औसत लम्बाइ १० मिनेटभन्दा कम हुन्थ्यो । अचेल अपलोड हुने अधिकांश भिडियोको लम्बाइ कम्तीमा पनि १० मिनेट देखिन्छ ।


पछिल्ला समय युट्युबमा अपलोड हुने गरेको कुकिङ, मेकअपजस्ता ट्युटोरियलहरू पनि लामो लामो हुन थालेका छन् । विस्तृत रूपमा जान्न चाहने प्रयोगकर्ताका लागि यस्ता भिडियो रुचिकर लागे पनि अनावश्यक लामो भिडियो अधिकांशका लागि भने बोरिङ लाग्न सक्छ । भ्लगरहरूले समेत आफ्नो भ्लगको लम्बाइ कम्तीमा १ घण्टाको बनाउन थालेका छन् । युट्युबमा बढ्दै गएको भिडियोको लम्बाइ केही प्रयोगकर्ताका लागि विस्तृतमा हेर्ने अवसर भए पनि मनोरञ्जनको चाह राख्नेका लागि रुचिकर नहुन सक्छ ।


युट्युबलाई कुन भिडियो कति हेर्‍यो भन्दा पनि आफ्नो प्लेटफर्ममा मानिस कति बढी सक्रिय रहेकोसँग मात्रै सरोकार रहेकाले यसप्रति कम्पनीको ध्यान नगएको विज्ञहरूको बुझाइ छ । भिडियो सामग्रीमा केन्द्रित हुँदै गएको फेसबुकले पनि युट्युबकै बाटो तय गर्ने सम्भावना छ । युट्युबले जस्तै फेसबुकले पनि भिडियो सामग्री निर्माताहरूलाई पैसा दिन थालेको छ । आफ्नो प्लेटफर्ममा भिडियो राखेबापत विज्ञापनको पैसा दिने त छँदै छ, कम्पनीले चर्चित व्यक्तिहरूलाई भिडियो निर्माणका लागि ‘सिड मनी’ उपलब्ध गराउँदै आएको छ । फेसबुकमा राम्रा–राम्रा भिडियो अपलोड होऊन् र मानिसहरू भिडियोका लागि अन्त नजाऊन् भन्ने कम्पनीको स्वार्थ हो ।


युट्युबमा लामो भिडियो अपलोड हुने क्रम बढ्दै गर्दा प्रयोगकर्ताहरूको रुचि भने छोटो भिडियोतर्फ गएको देखिन्छ । छोटो भिडियो अपलोडको सुविधा दिने टिकटकमा प्रयोगकर्ताको सक्रियता बढ्दो छ । सन् २०१८ मा मात्रै टिकटक एप ६६ करोड पटक डाउनलोड भएको थियो । २०१८ को डिसेम्बरमा मात्रै साढे ७ करोड प्रयोगकर्ताले टिकटक सुरु गरेका थिए । सन् २०१७ मा जम्मा १३ करोड प्रयोगकर्ता रहेको टिकटकले एक वर्षमा ५ गुणा बढी लोकप्रियता पायो । छोटो भिडियो अपलोड गर्ने सुविधा भए पनि प्रयोगकर्ता सबैभन्दा बढी रहने रेकर्ड टिकटककै नाममा छ । यसमा औसत प्रयोगकर्ता २ सय ९४ सेकेन्ड रहन्छन् । गत वर्ष टिकटक इन्स्टाग्राम र युट्युबलाई जित्दै सबैभन्दा बढी डाउनलोड हुने एपको चौथो स्थानमा थियो ।

hellosukrabar@gmail.com

प्रकाशित : श्रावण १७, २०७६ ११:३०
पूरा पढ्नुहोस्
प्रतिक्रिया
पठाउनुहोस्