रोकिएला लहडी प्रतिस्पर्धा ?

भारतबाट सञ्चालित युट्युब च्यानल टी सिरिज र स्वीडेनका युट्युबर पिउडाइपाईबीच सबभन्दा धेरै सब्सक्राइबर कसको हुने भन्ने अघोषित होड नै चलेको छ ।
हेलो शुक्रबार

काठमाडौँ —  प्रतिस्पर्धा पनि कस्तो ? जसले प्रतिस्पर्धा गरिरहेका छन्, उनीहरूलाई मतलब छैन  । जसले हेरेर मजा लिनुपर्ने हो, ऊ नै जुध्न तम्सिएको छ  ।

यो प्रतिस्पर्धा हो भारतबाट सञ्चालित युट्युब च्यानल टी सिरिज र स्वीडेनका युट्युबर पिउडाइपाईको । एउटाले बलिउड फिल्मको ट्रेलर र गीतको भिडियो हाल्छ अर्कोले अनलाइन गेमसम्बन्धी जानकारी दिन्छ । एउटा च्यानल संस्थागत रूपमा चलेको छ अर्को व्यक्तिगत लोकप्रियताको भरमा ।


यी दुई च्यानलबीच कसको धेरै सब्सक्राइबर भन्ने लहड चलेको झन्डै एक वर्ष पुग्न लाग्यो । यो बीचमा कहिले एउटा पहिलो बन्ने त कहिले अर्को पहिले बन्ने भई नै रह्यो र आ–आफ्नो च्यानलका प्रशंसकबीच हल्लीखल्ली भइरह्यो । गत साताको तथ्यांक हेर्ने हो भने टी सिरिजको सब्सक्राइबर ९ करोड २४ लाख नाघेको छ भने पिउडाइपाईका सब्सक्राइबर ९ करोड २६ लाख नाघेका छन् । खासमा यो तथ्यांकको दौड मात्रै थियो । यसमा कोही पहिलो र कोही दोस्रो भएर हानि कसैलाई थिएन । तर, पछिल्लोपटक पिउडाइपाईका प्रशंसकहरूले गर्नुसम्म गरे । केही प्रशंसकले ५० हजार प्रिन्टर ह्याक गरेर त्यसबाट प्रिन्ट हुने बिलमा टी सिरिज अनसब्सक्राइब गर्न र पिउडाइपाईलाई सब्सक्राइब गर्न सन्देश लेखे । यसले विश्वभर हंगामा मच्चियो । आखिर, यी दुई बीचको प्रतिस्पर्धालाई धेरै मानिसको ध्यानमा खिच्ने काण्ड पनि यही थियो ।


पिउडाइपाईलाई सबैभन्दा धेरै सब्सक्राइबर भएको युट्युबर बनाउने दौडमा सामान्य प्रशंसक नलागेर अर्का चर्चित युट्युब जिमी (मिस्टर बिस्ट) पनि लागे । उनले त पिउडाइपाईलाई सब्सक्राइब गरौं भनेको सन्देश लेखिएको टिसर्ट लगाएर आफ्ना साथीहरूसँग सार्वजनिक स्थानमा पुग्न थाले । विशेषतः १८ देखि २४ वर्षसम्मका उमेर समूहमा लोकप्रिय पिउडाइपाई सुरुवाती समयमा यस्ता विषयमा निकै रमाइरहेका थिए । उनी आफ्ना प्रशंसकलाई भन्थे– मलाई पहिलो नम्बरमा राख्ने प्रयासले म खुसी भएको छु । उनी आफूलाई पहिलो नम्बरमा राख्न गैरकानुनी उपाय नलगाउन पनि आफ्ना प्रशंसकलाई भनिरहन्थे । तर, लहडी प्रशंसक सबैले उनले भनेको किन मान्थे र ?


मार्च दोस्रो साताको कुरा हो । न्युजिल्यान्डको एक मस्जिद अगाडि अन्धाधुन्ध गोली चलाएर एक २८ वर्षीयाले ४९ जनाको ज्यान लिए । फेसबुकमा लाइभ गर्दै ऊनले गोली चलाएका थिए । आक्रमणका त्रममा उनले पिउडाइपाईलाई सब्सक्राइब गर्न आह्वान पनि गरे । प्रशंसकको यस्तै हर्कतले उनी फेरि सब्सक्राइबरको संख्यामा टी सिरिजभन्दा माथि पुग्ने त कहिले फेरि केही अंकले दोस्रो बन्थे । यो लडाइँमा टी सिरिजले पनि केही मार्केटिङ रणनीति लियो । एक अर्ब बढी जनसंख्या भएको र विश्वका धेरै देशमा लोकप्रिय बलिउड फिल्मसँग सम्बन्धित टी सिरिज पनि चर्चामा नरहने कुरै थिएन । टी सिरिजका मालिक भूषण कुमारले यो दौडमा आफूलाई कुनै रुचि र वास्ता नभएको बताइरहेका छन् । तर, उनका कम्पनीका वरिष्ठ कर्मचारीहरूले लगाएको जुक्ति पनि रोचक छ । पिउडाइपाईका प्रशंसकले आफ्नो च्यानललाई धेरै सब्सक्राइबर भएको पहिलो नम्बरमा आउन नदिन अनेक तिकडम गरेपछि उनीहरूले पनि जुक्ति निकाले– राष्ट्रवाद । टी सिरिजका कर्मचारीहरूले भनिरहे– संसारमा सबैभन्दा धेरै सब्सक्राइबर भएको युट्युब च्यानल हाम्रो देशमा हुनु हाम्रो गौरवको कुरा हो । यस्तै यस्तै कुराले संसारभर छरिएका भारतीयहरू पनि खोजीखोजी टी सिरिज सब्सक्राइब गर्न थाले । बलिउड फिल्मबाट प्रभावित नेपालसहित श्रीलंका, भुटान, माल्दिभ्ससहित विश्वका धेरै देशमा टी सिरिज आफैं पनि चर्चित नै थियो ।


टी सिरिजसँगको करिब एकवर्षे लामा प्रतिस्पर्धापछि पिउडाइपाईले यसै साता एक भिडियोमा सार्वजनिक हार स्विकारेका छन् । उनले यो दौडमा टी सिरिजको प्रशंसा पनि गरेका छन् । ‘एउटै बलिउड गीत बनाउन पनि कति धेरै खर्च हुने रहेछ,’ उनले भनेका छन् । उनको यो स्विकारोक्तिपछि यो लहडी प्रतिस्पर्धाको दौड रोकिने धेरैको विश्वास छ । पिउडाइपाईले हार स्वीकारे पनि उनका प्रशंसकले यसलाई स्विकार्लान् ?
–एजेन्सीको सहयोगमा

hellosukrabar@gmail.com

प्रकाशित : चैत्र २२, २०७५ १२:०९
ADVERTISEMENT
प्रतिक्रिया
पठाउनुहोस्
ADVERTISEMENT

टोरन्टिनोको नवौं

यो कथा हो, हलिउडका प्रख्यात फिल्ममेकर क्वन्टिन टोरन्टिनो र उनको नयाँ फिल्मको । टोरन्टिनोलाई संसारभर थुप्रै युवालाई फिल्ममेकर बन्न प्रेरित गर्ने निर्देशक मानिन्छ । हलिउडका यी स्टाइलिस फिल्ममेकरले आफ्नो पूरा करिअरमा जम्मा १० वटा फिल्म बनाउने बताएका छन् ।
हेलो शुक्रबार

काठमाडौँ —  आफ्नो समयका दुई ठूला सुपरस्टारलाई एउटै फिल्ममा देख्न पाउनु दर्शकका जति स्वादको कुरा हो, फिल्म निर्माताहरूका लागि त्यति नै गाह्रो काम  । एक त दुई स्टारको पारिश्रमिक नै धेरै  ।

त्यसमाथि समय पाउन मुस्किल । अझै एकअर्काका प्रतिस्पर्धी परे भने त अरू झन्झट । कोही त साथी कलाकारको गतिलो सिन काट्न दबाब दिने खालका समेत हुन्छन् ।


त्यसमाथि स्टारहरू हलिउड सुपरस्टार ब्राड पिट र लियोनार्डो डिक्याप्रियो परे भने ? यी दुवै संसारभर लाखौं प्रशंसक कमाएका सिद्धहस्त अभिनेता हुन् । आफैंमा करोडौं डलरको ब्रान्ड बनिसकेका यी दुई स्टारलाई एउटै फिल्ममा ल्याउनु ठूलो चुनौती थियो । यसका लागि क्वन्टिन टोरन्टिनो वा स्टिभव स्पिलवर्गजस्तै फिल्ममेकरले मात्रै पार लगाउन सक्थे । नभन्दै, टोरटिन्टोले आफ्नो नवौं फिल्म ‘वन्स अपन अ टाइम इन हलिउड’ मा यी दुईलाई एकसाथ ल्याए । यी दुईका साथ पुरानो जमानाका सुपरस्टार अल पचिनोसमेत ।


यो कथा हो, हलिउडका प्रख्यात फिल्ममेकर क्वन्टिन टोरन्टिनो र उनको नयाँ फिल्मको । टोरन्टिनोलाई संसारभर थुप्रै युवालाई फिल्ममेकर बन्न प्रेरित गर्ने निर्देशक मानिन्छ । हलिउडका यी स्टाइलिस फिल्ममेकरले आफ्नो पूरा करिअरमा जम्मा १० वटा फिल्म बनाउने बताएका छन् । ‘वन्स अपन अ टाइम इन हलिउड’ उनको नवौं फिल्म हो । ‘किलबिल’, ‘पल्प फिक्सन’ देखि ‘इन्ग्लोरियस बास्टर्ड×’ र ‘ज्याङ्गो अनचेन्ड’ सम्म आइपुग्दा टोरन्टिनोले एक्सन र थ्रिलरलाई उचाइमा पुर्‍याएको मानिन्छ ।


‘वन्स अपन अ टाइम इन हलिउड’ दुइटा कथाको फिल्म हो । फिल्मको कथा सन् १९६९ को हलिउडबारे छ । जसमा टेलिभिजन सेरिजबाट फिल्ममा आउन संघर्ष गरिरहेको एक एक्सन स्टार र उसका स्टन्टहरू गरिदिने ‘बडी डबल’ को कथा छ । फिल्ममा त्यो स्टारको भूमिकामा लियोनार्डो डिक्याप्रियो छन् । डिक्याप्रिओ यसअघि टोरन्टिनोको ‘ज्याङ्गो अनचेन्ड’ मा पनि मुख्य भूमिकामा थिए । स्टारको बडी डबलको भूमिकामा ब्रड पिट छन् । पिटले उनको दोस्रो विश्वयुद्धताकाको कथा ‘इन्ग्लोरियस बास्टर्ड’ मा नाजी हन्टरको भूमिकामा अभिनय गरेर चर्चा पाएका थिए ।


फिल्मको अर्को ट्र्याक १९६९ मा भएको अभिनेत्री स्यारोन टेटको हत्याको कथा छ । त्यो समयमा क्यालिफोर्नियाको एउटा आपराधिक समूह ‘म्यानसन फ्यामिली’ का सदस्यले टेटसहित उनको घरमा रहेका चारजनाको हत्या गरेको घटना फिल्मको केन्द्रमा छ । हत्या भएको समयमा अभिनेत्री स्यारोनको पेटमा साढे आठ महिनाको बच्चा थियो । उनका पति विश्व प्रसिद्ध पोलिस फिल्ममेकर रोमन पोलस्कीं फिल्म सुटिङका क्रममा युरोपमा रहेका कारण बचेका थिए । फिल्ममा मार्गोट रोबीले स्यारोनको भूमिकामा अभिनय गरेकी छन् । रोबीले यसअघि मार्टिन स्कोरसेजीको फिल्म ‘उल्फ अफ वालस्ट्रिट’ मा लियोनार्डोको जोडीका रूपमा अभिनय गरेकी थिइन् ।


यी दुइटा ट्र्याकमा टोरन्टिनोको फिल्म गुडेको छ । यसबीचमै उनले हलिउडको ‘गोल्डन एज’ को कथा भनेका छन् । साठीको दशक भनेको हलिउडमा वेस्टर्न (काउब्वाई) कथाको वर्चस्व रहेको समय हो । जोन वाइन त्यसबेलाका सबभन्दा ठूला स्टार थिए । उनका ‘ट्रयु ग्रिट’ लगायतका फिल्म १९६९ मै प्रदर्शनमा आएका थिए । त्यसै वर्ष अर्को चर्चित वेस्टर्न ‘बुचकासिडी एन्ड द सनडान्स किड’ पनि आएको थियो । यही समयमा इङमर वर्गम्यानजस्ता फिल्ममेकर पनि सक्रिय थिए ।


टोरन्टिनो फिल्म मेकिङका लागि जति मानिन्छन्, त्यति नै विवादास्पद पनि छन् । सहकर्मी कलाकारसँगको सम्बन्धमात्र होइन, उनीहरूबारे गर्ने टिप्पणीले पनि उनलाई बेलाबेला विवादमा ल्याउने गर्छ । ‘वन्स अपन अ टाइम इन हलिउड’ घोषणादेखि नै रोमन पोलन्स्कीका कारण विवादमा आएको थियो । पोलन्स्की करिब ३० वर्ष पुरानो एक बलात्कारको मुद्दा खेपिरहेका थिए । कम उमेरकी किशोरीसँगको शारीरिक सम्बन्धलाई लिएर उनीमाथि मुद्दा चलिरहेको थियो । त्यसैबेला टोरन्टिनोले उनकी पूर्वपत्नीको हत्याको कथामा फिल्म बनाउने घोषणा गरेपछि गलत समयमा पोलस्कीप्रति सद्भाव दर्शाउन खोजेको भन्दै टोरन्टिनोको आलोचना भएको थियो ।


टोरन्टिनो हलिउडका अर्का विवादास्पद निर्माता हार्भी विन्स्टनसँगको सामीप्यताका कारण पनि विवादमा परे । ‘वन्स अपन अ टाइम’ को पनि सुरुवाती निर्माता हार्भी नै थिए । टोरन्टिनोका अहिलेसम्मका सबै फिल्मको निर्माता उनै हुन् । हार्भी माथि यौन उत्पीडनको आरोप लागेपछि टोरन्टिनो यो फिल्ममा भने उनीबाट अलग भए । हार्भीले यौन दुर्व्यवहार गरेको भनेर सलमा हयाक लगायतका ठूला अभिनेत्रीहरूले सार्वजनिक गरेपछि हलिउडमा ‘मीटु’ मुभमेन्टले गति लिएको हो । पछि हार्भी गिरफ्तार नै भए ।


जुलाई २६ मा अमेरिकी बजारमा प्रदर्शनमा आउने यो फिल्मको निर्माण र वितरण सोनी पिक्चर्सले गर्दैछ । संसारलाई भनै सबभन्दा धेरै प्रभावित गर्ने सांस्कृतिक उद्योगका रूपमा रहेको हलिउडको यो भित्री कथाले अहिले फिल्मप्रेमीहरूको उत्सुकता बढाइरहेको छ । २०१५ मा ‘दि रेभेनान्ट’ का लागि उत्कृष्ट अभिनेताको ओस्कर पाएपछि लियोनार्डोले अभिनय गरेको फिल्म यही हो ।

hellosukrabar@gmail.com

प्रकाशित : चैत्र १५, २०७५ १२:०१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT