बिटकोइनमा नयाँ के हुँदै छ ? 

अहिले हेर्ने हो भने एक बिटकोइन बराबर करिब ३५ सय अमेरिकी डलर पर्न आउँछ, जुन तुलनात्मक हिसाबमा निकै कम हो । तर, बजार अध्ययन गरी अहिले यसमा लगानी गर्नेलाई भने पछि मूल्य बढेका बेला यो फलदायी सिद्ध हुन सक्छ । त्यसैले बिटकोइन खरिद गर्न चाहनेका लागि अहिलेको समय उपयुक्त छ ।

...

अमेरिकी राज्य ओहायोमा अबदेखि बिटकोइनका माध्यमबाट कर भुक्तानी गर्न पाइनेछ । यो नियम लागू गर्ने पहिलो राज्य नै ओहायो बनेको छ । हाललाई व्यवसायमा मात्र सीमित राख्ने भनिएको यो नियम छिट्टै आममानिसको पहँुचमा समेत पुर्‍याउने लक्ष्य त्यहाँको राज्य सरकारले लिएको छ । अधिकांश सेवासुविधा डिजिटल माध्यमबाट लिन सकिने अमेरिकामा यो नियम छिट्टै देशव्यापी हुने आकलन विज्ञहरूले गरिरहेका छन् । स्थिर विनिमय दर नभएका कारण कर तिर्ने समयमा भएको दरलाई नै आधिकारिक मान्ने निर्णय पनि पारित हुने भएको छ । चीन, बोलिभिया, इक्वेडर, किर्गिजस्तान, नेपालजस्ता देशमा भने बिटकोइनलगायत सम्पूर्ण क्रिप्टोकरेन्सीको प्रयोग वर्जित छ । ताइवान, भियतनाम र रुसमा यो आंशिक रूपमा वर्जित छ ।

...

नर्वेमा सरकारले बिटकोइन माइनर्सलाई दिँदै आएको विद्युत् अनुवृत्ति खारेज गर्ने भएको छ । सन् २०१९ को सुरुआतसँगै व्यक्तिगत तथा संस्थागत रूपमा बिटकोइन तथा अन्य डिजिटल मुद्रा माइनिङ गर्दै आएका निकायले करसहित विद्युत् महसुल भुक्तानी गर्नुपर्नेछ । यसअघि भने माइनर्सका हकमा उक्त नियम लागू हुँदैनथ्यो । बिटकोइन माइनर्सले यसमा असन्तुष्टि व्यक्त गरे पनि विभिन्न सरकारी पदाधिकारीले भने यसमा आफ्नो सहमति जनाएका छन् । भविष्यमा डिजिटल मुद्रा खारेज नै गर्नेसम्मको संकेत दिँदै आएको नर्वे कालान्तरमा प्रविधिको विकासमा बाधक नै बन्न सक्ने तर्क पनि नआएका होइनन् ।