झापाका डिजाइनर

बिर्तामोडका फिरोज राई र उनको टिमले सामान्य पार्टी प्यालेसलाई फरक सज्जा दिएका छन् र सबैका लागि यो आकर्षणको केन्द्र बनेको छ ।

पार्टी प्यालेस नजिकै होटल पनि छ । होटलको प्रवेशद्वारमा बुद्ध बेम्बो नामको अनौठो बाँस रोपिएको छ । होटलको उत्तर र पश्चिमपट्टि पर्खाल छैन । पर्खालको स्थानमा फूलका गमलाहरू झुन्ड्याएको छ । यसलाई झापाकै युनिक स्थान मानिन्छ । होटलको रिसेप्सनलाई पनि फरक बनाइएको छ । लबीमा बडेमानका सोफाहरू छैनन् । ग्याभिन चियरहरू छन् । तारजालीभित्र ढुंगा राखेको बनाइएको सल्लो काठका यी शोभाहरूले सबैको ध्यान तान्छ । ‘यस्तो दृश्य झापाका अरू कुनै होटलमा छ भन्ने हामीलाई लाग्दैन,’ फिरोजले सुनाए, ‘हामीले अलग ढंगबाट होटल र रेस्टुरेन्टको डेकोरेसन गरेका छौं ।’

रेस्टुरेन्टमा डिजाइनले सबैको ध्यान खिच्छ । प्रत्येक टेबलमा ड्रेसिना प्लान्ट छ । अक्सर होटल तथा रेस्टुरेन्टहरूमा नक्कली फूल सजाएको भेटिन्छ । यहाँचाहिँ असली फूल राखिएको छ । जसको सुगन्धले होटल नै मगमगाएको छ ।

सन् ९० को सुरुआततिर फिरोज रोजगारीको सिलसिलामा थाइल्यान्ड पुगेका थिए । पर्यटक भिसामा थाइल्यान्ड पुगेका उनले पछि मात्रै वर्किङ भिसा पाए । करिब १५ वर्ष त्यहाँ बिताउँदा उनले धेरै काम गरे, हाइड्रोलिक मेकानिकदेखि माछा मार्नेसम्म ।

एक पटक सुपर मार्केटको सेटिङ गर्दागर्दै इन्टेरियर डिजाइनमा उनको मन बस्यो । ‘संयोगले विदेशमा पनि त्यही काम गर्ने मौका मिल्यो,’ फिरोजले भने ।

थाइल्यान्डबाट घर फर्किंदा उनले केही लाख पैसासँगै अनुभव लिएर आए । त्यही अनुभवलाई अहिले उनले प्रयोग गरिरहेका छन् । घर फर्किएको करिब एक दशकपछि बल्ल उनलाई नयाँ व्यवसाय गर्ने तारतम्य मिल्यो, राजेन्द्र जोशीसँग मिलेर ।

जोशी पनि अबुधाबीमा लामो समय बिताएर घर फिरेका थिए । स्वदेशमै केही गर्ने यी दुईको सोच र योजना त्यही भएर मेल खायो । जोशीले झापाको दुर्गापुरमा फ्लोरिडा नर्सरी सञ्चालन गरेका थिए । ‘सुरुमा त आइडिया नभएर निकै समय अन्योलमै बित्यो,’ राजेन्द्रले अनुभव साटे, ‘पछि फिरोज दाइसँगको भेटपछि मात्रै नर्सरी फस्टाउन सक्यो ।’

अहिले यी दुई युवाले नर्सरी, होटल व्यवसायसँगै ‘ल्यान्ड किपिङ’ मा जमेर काम गरिरहेका छन् । करिब २ करोड जति लगानीमा होटल व्यवसाय सुरु गरेका छन् । होटल सञ्चालन गर्न १० वर्षका लागि घर लिजमा लिएका छन् ।

हालै सम्पन्न झापा गोल्डकप आयोजनास्थल डोमालाल रंगशालालाई चिटिक्क पारेर सजाउने मुख्य मान्छे फिरोज र राजेन्द्र नै हुन् । ‘हामीले मर्मत गरेको मैदानको धेरैले प्रशंसा गर्दा खुसी लाग्यो,’ फिरोजले भने । उनीहरू घरहरूमा गार्डेन डिजाइन पनि गर्छन् । झापाका धेरै घरका बगैंचा उनीहरूकै डिजाइनमा बनेका छन् र तारिफ पनि पाइरहेका छन् ।

[email protected]