एन्टिरेबिज भ्याक्सिन अभावले समस्यामा बिरामी

भैरहवा — भैरहवास्थित भीम अस्पतालमा ‘एन्टिरेबिज भ्याक्सिन’ सकिएपछि उपचारका लागि आउने निम्न वर्गका बिरामी मर्कामा पर्न थालेका छन् । सरकारी स्तरबाट निःशुल्क उपलब्ध गराइने उक्त भ्याक्सिन गत बिहीबारदेखि सकिएको हो । कुकुरको टोकाइबाट उपचारका लागि अस्पतालमा आउने बिरामीको संख्या भने दैनिक २० जना भन्दा धेरै छ ।  

भीम अस्पतालको इमर्जेन्सी कक्षकी प्रमुख सबिता शर्माले एन्टिरेबिज भ्याक्सिन सकिएकाले उपचारार्थ आउने बिरामीलाई उपलब्ध गराउन नसकिएपछि बिरामीले अस्पताल बाहिरको औषधी पसलमा किन्न बाध्य हुन थालेको बताइन् ।

‘एन्टिरेबिज भ्याक्सिन सकिँदा निम्न आर्थिक अवस्थाका बिरामी समस्यामा परेका छन्’ उनले भनिन्, ‘कतिपय बिरामीले भ्याक्सिन नपाइएको भन्दै झगडा गर्न थाल्नाले व्यवस्थापन गर्न समस्या हुने गरेको छ ।’

उनका अनुसार, कुकुरले टोकेको बिरामीलाई ३ पटकसम्म एन्टिरेबिज भ्याक्सिन लगाउनु पर्छ । एक भायल एन्टिरेबिज भ्याक्सिनको निजी पसलमा ६ सय रुपैयाँ भन्दा धेरै मूल्य पर्छ ।

अस्पताल प्रशासनका अनुसार, अस्पतालमा विगत ३ महिनादेखि नै एन्टिरेबिज भ्याक्सिनको असहजता हुन थालेको हो । भदौ महिना सुरु भएपछि २ सय ८० भायल एन्टिरेबिज भ्याक्सिन आएकोमा १५ गते नै सकिएको हो । अस्पतालमा नयाँ र पुराना गरेर दैनिक उपचारका लागि ३० देखि ४० जनासम्म आउने गर्छन् । गत आव २०७९/०८० मा कुकुरको टोकाइबाट उपचारमा आएका बिरामीको संख्या ३ हजार ७ सय ९३ थियो ।

अस्पतालका मेडिकल सुपरिटेन्डेन्ट डा.नुरुल होदाले आवश्यकता अनुरुपका भ्याक्सिन उपलब्ध गराउन महामारी तथा रोग नियन्त्रण महाशाखा समक्ष माग गरिएको र खरिद प्रक्रिया असहज भएकाले महाशाखाबाट उपलब्ध हुन नसकेको बताए । ‘अहिले यो समस्या मुलुकभरि नै देखिएको छ,’ उनले भने ।