पोखरा स्वास्थ्य विज्ञान प्रतिष्ठानमा २ जनाको मिर्गौला प्रत्यारोपण- स्वास्थ्य - कान्तिपुर समाचार
कान्तिपुर वेबसाईट
AdvertisementAdvertisement

पोखरा स्वास्थ्य विज्ञान प्रतिष्ठानमा २ जनाको मिर्गौला प्रत्यारोपण

अतुल मिश्र

काठमाडौँ — पोखरा स्वास्थ्य विज्ञान प्रतिष्ठान, पश्चिमाञ्चल क्षेत्रीय अस्पतालमा शनिबार एकै दिन दुई जनाको मिर्गौला प्रत्यारोपण गरिएको छ । यसअघि पनि सहिद धर्मभक्त राष्ट्रिय प्रत्यारोपण केन्द्रको सहयोगमा गत असार ९ गते प्रतिष्ठानमा पहिलो पटक एक जनाको मिर्गौला प्रत्यारोपण भएको थियो ।

उपत्यकामा मात्र सीमित नराखी सातवटै प्रदेशमा प्रत्यारोपण सेवा विस्तार गर्ने कार्यक्रमअन्तर्गत मुलुकमै पहिलो पटक उपत्यका बाहिरको सरकारी स्वास्थ्य प्रतिष्ठानमा गत महिना मिर्गौला प्रत्यारोपण सेवा सुरु भएको थियो । शनिबार गरिएको दुई जनाको मिर्गौला प्रत्यारोपणसमेत त्यसकै निरन्तरता भएको केन्द्रका कार्यकारी निर्देशक एवं वरिष्ठ मिर्गौला र कलेजो प्रत्यारोपण शल्यचिकित्सक डा. पुकारचन्द्र श्रेष्ठले बताए ।

पहिलो पटक पोखरामा प्रत्यारोपण सेवा सुरु हुँदा नै यसले निरन्तरता पाउने डा. श्रेष्ठले बताएका थिए । हाल प्रत्यारोपण केन्द्रले मुलुकका अन्य प्रदेशहरूमा समेत प्रत्यारोपण सेवा विस्तार गर्ने क्रम जारी राखेको छ ।

कास्की जिल्ला रुपाकोट गाउँपालिकाका ५३ वर्षीय पुरुष र स्याङ्जा जिल्ला चापाकोट नगरपालिकाका ४२ वर्षीय पुरुषको शनिबार मिर्गौला प्रत्यारोपण गरिएको हो । दुवै जनालाई आ-आफ्ना पत्नीले मिर्गौला दिएका थिए ।

पोखरा स्वास्थ्य विज्ञान प्रतिष्ठानलाई प्रत्यारोपण सेवामा आत्मनिर्भर बनाउनका लागि नेफ्रोलोजिस्ट, सर्जन, एनेस्थेसियोलोजिस्ट, कोअर्डिनेटर, शल्यक्रिया कक्ष एवं आईसीयू नर्सहरूलाई तालिम दिइँदै आएको केन्द्रले जनाएको छ ।

प्रकाशित : श्रावण २९, २०७९ १९:४८
प्रतिक्रिया
पठाउनुहोस्

फोहोरको रास लगाएर कुहिएको राजनीतिक खेल नखेलौं : बालेन्द्र शाह

धुनिबेंसी वडा नम्बर १ का कांग्रेस, माओवादी र नेकपा एसका वडा समितिद्वारा सदाका लागि फोहोर विसर्जन बन्द गर्न माग
कान्तिपुर संवाददाता

काठमाडौँ — सत्तारुढ दल आबद्ध नेताहरूले फोहोरमैला व्यवस्थापन अवरुद्ध गर्ने चेतावनी दिएपछि 'कुहिएको राजनीतिक खेल नखेल्‍न' भन्दै काठमाडौं महानगरपालिकाका मेयर बालेन्द्र शाहले आग्रह गरेका छन् ।

आइतबार कांग्रेस, माओवादी र नेकपा एसका धुनिबेंसी-१ वडा समितिले पार्टी नगरसमितिलाई संयुक्तरुपमा पत्र लेख्दै बन्चरेडाँडामा फोहोर मैला दीर्घकालीनरुपमा बन्द गर्न आग्रह गरेका हुन् । उनीहरुले ती पार्टीको नगर कार्यसमितिलाई पत्र लेख्दै फोहोर मैला विसर्जन सदाका लागि बन्द गराउन पहल गर्न आग्रह गरेका थिए ।

ती पार्टीका वडा समितिले पत्र लेखेपछि मेयर शाहले 'फोहोरको रास लगाएर त्यो भित्र झन् कुहिएको खेल खेलेर त्यसलाई राजनीतिको नाम नदिन' आग्रह गरेका हुन् । उनले भनेका छन्, 'राजनीति त्यस्तो हुँदैन । त्यस्तो राजनीतिले कसैलाई अगाडि बढाउँदैन । यसमा हेक्का राखौँ ।'

शाहले संविधानले परिकल्पना गरेको राज्य प्रणालीविपरीत एउटा सरकारले अर्को तहको सरकारलाई असहयोग गर्ने काम पनि भएको बताएका छन् । सामाजिक सञ्जालमा शाहले लेखेका छन्, 'हामीले र हाम्रो संविधानले जुन राज्य प्रणालीको परिकल्पना गरेको छ, त्यसमा एउटा सरकारको तह र अर्को तहको आपसी समन्वय तथा मेलमिलापको नै कल्पना गरिएको छ । यसका विपरीत एउटा सरकारले अर्को तहको सरकारलाई असहयोग गर्नु पर्ने, असफल नै बनाउनु पर्ने खेल किन गरिन्छ ? हामी त्यति धेरै असभ्य र स्वार्थी किन छौं ? '

उनले आइतबार फोहोर विसर्जन गर्नका लागि भएका दुई वटा अवरोधको समाना गरिएपछि नयाँ अवरोधको कसरत भइरहेको पनि बताएका छन् । उनले फोहोर विसर्जन कार्यलाई अवरोध गर्ने कोसिस बिडम्बनापूर्ण भएको बताए ।

फोहोर व्यवस्थापनका लागि संरचना बनिसकेको मुअब्जालगायतका काममा ५ अर्ब खर्च भइसकेको पनि उनले बताए । सबै सम्झौताहरु वैधानिकरुपमा गरिएको र कसैले पनि नझुक्याएको उनको भनाइ थियो ।

प्रकाशित : श्रावण २९, २०७९ १९:४७
पूरा पढ्नुहोस्
प्रतिक्रिया
पठाउनुहोस्
x
×