नेपाललाई अमेरिकाको २२ लाख डोज बाल खोप सहयोग- स्वास्थ्य - कान्तिपुर समाचार

नेपाललाई अमेरिकाको २२ लाख डोज बाल खोप सहयोग

कान्तिपुर संवाददाता

काठमाडौँ — अमेरिकी सरकारले नेपाललाई २२ लाख डोज कोभिड–१९ बाल खोप अनुदान सहयोग गरेको छ । उक्त खोप ५ देखि ११ वर्षसम्मका बालबालिका लक्षित गरिएको बताइएको छ ।

‘अत्यन्त प्रभावकारी, जीवन रक्षक खोप अमेरिकी जनताको उदारतामार्फत् प्रदान गरिएको हो र यी खोप हालसम्म अमेरिकाले नेपाललाई प्रदान गरेको फाइजर खोपका २२ लाख ६० हजार मात्रा र जोन्सन एन्ड जोन्सनको एकल–मात्रा खोपको १५ लाख मात्रामा थपिने छन्,’ काठमाडौंस्थित अमेरिकी राजदूतावासद्वारा जारी विज्ञप्तिमा भनिएको छ ।

यस अनुदानले अमेरिका र नेपालबीच ७५ वर्ष लामो कूटनीतिक सम्बन्धको सम्मान पनि गरेको विज्ञप्तिमा उल्लेख छ । ‘नेपालको स्वास्थ्य क्षेत्रमा अमेरिकाको ऐतिहासिक सहयोगले हाम्रो साझेदारीका सशक्त परिणामहरू प्रतिविम्ब गर्दछ,’ विज्ञप्तिमा उल्लेख छ,‘कोभिड–१९ महामारीको सुरुआतदेखि नै यसविरुद्ध लड्न, अत्यावश्यक स्वास्थ्य सेवाहरूको निरन्तरता सुनिश्चित गर्न र यस महामारीका सामाजिक तथा आर्थिक प्रभावहरू न्यूनीकरण गर्न नेपाललाई मद्दत गर्न अमेरिकी सरकारले नेपाल सरकारसँग प्रत्यक्ष रूपमा काम गर्दै आएको छ ।’

बाल फाइजर खोप अभियानको तयारी स्वरूप अमेरिकी अन्तर्राष्ट्रिय विकास नियोग यूएसएआईडीले उक्त खोप लगाउने विषयमा ५६ जिल्लाहरूमा अग्रपङ्क्तिका स्वास्थ्यकर्मीहरूलाई प्रशिक्षण प्रदान गर्न नेपालको स्वास्थ्य तथा जनसंख्या मन्त्रालयलाई सहयोग गरेको उल्लेख छ ।

प्रकाशित : असार ५, २०७९ १४:४४
प्रतिक्रिया
पठाउनुहोस्

चीनका लागि प्रस्तावित राजदूत श्रेष्ठको अग्रिमो आइपुग्यो

कान्तिपुर संवाददाता

काठमाडौँ — चीनका लागि प्रस्तावित राजदूत विष्णुपुकार श्रेष्ठलाई चीन सरकारले अग्रिमो (स्वीकृति) दिएको छ । श्रेष्ठलाई संसदीय सुनुवाई समितिले जेठ ३ मा अनुमोदन गरेको थियो ।

परराष्ट्र मन्त्रालयका एक अधिकारीका अनुसार श्रेष्ठको अग्रिमो गत साता नै आइपुगेको हो । अब श्रेष्ठलाई नेपालको संविधान अनुसार राष्ट्रपति विद्यादेवी भण्डारीले राजदूतमा नियुक्त गर्ने छिन् । त्यसपछि श्रेष्ठ बेइजिङ प्रस्थान गर्ने छन् ।

कतारका लागि राजदूत नरेन्द्रविक्रम ढकाललाई भने राष्ट्रपतिले दोहाबाट अग्रिमो आएसँगै जेठ २६ नै नियुक्त गरिसकेकी छन् ।

सरकारले श्रेष्ठ र ढकालसहित २० मुलुकका लागि गत चैत २४ मा राजदूत प्रस्ताव गरेको थियो । उनीहरू सबैको संसदीय सुनुवाई समितिबाट अनुमोदित भइसकेका छन् ।

प्रकाशित : असार ५, २०७९ १४:३३
पूरा पढ्नुहोस्
प्रतिक्रिया
पठाउनुहोस्
×