लकडाउन हुँदैन, यसबारे सरकारले केही निर्णय गरेको छैन : स्वास्थ्य मन्त्रालय- स्वास्थ्य - कान्तिपुर समाचार

लकडाउन हुँदैन, यसबारे सरकारले केही निर्णय गरेको छैन : स्वास्थ्य मन्त्रालय

कान्तिपुर संवाददाता

काठमाडौँ — स्वास्थ्य तथा जनसंख्या मन्त्रालयले बाहिर हल्ला फैलिएजस्तो लकडाउनबारे निर्णय नभएको जनाएको छ । सोमबार ओमिक्रोनका २ जना संक्रमित भेटिएपछि स्वास्थ्य तथा जनसंख्या मन्त्रालयले यस्तो जनाएको हो ।

झण्डै ४० देशमा देखा परिसकेको यो भेरिएन्ट संक्रामक पनि मानिएको छ । ओमिक्रोन फैलनसक्ने भन्दै सामाजिक सञ्जालमा चासो र चिन्ता बढेपछि सरकारले सचेत गराउँदै लकडाउन बारे निर्णय नगरेको जनाएको हो ।

मन्त्रालयका सहप्रवक्ता डा समीर कुमार अधिकारीले सरकारले लकडाउन बारे केही निर्णय नगरेको बताए । उनले भने, ‘लकडाउन हुँदैन । यसबारे सरकारले केही निर्णय गरेको छैन । ’

उनका अनुसार ओमिक्रोनको निगरानीका लागि सर्भिलेन्स तथा कन्ट्याक्ट ट्रेसिङ कार्यलाई थप प्रभावकारी बनाइएको छ ।उनले जनस्वास्थ्यका मापदण्ड सबैले पालना गर्न र आफ्नो पालोमा खोप लिनुपर्ने बताए ।

नेपालमा पनि ओमिक्रोन देखिएपछि फेसबुक, टिकटक, ट्वीटर लगायत सामाजिक सञ्जालमा धेरैले सरकारले अब लकडाउन गर्नसक्ने भन्दै चासो र चिन्ता व्यक्त गर्न थालेका छन् । तर सरकारी अधिकारीहरूले अहिले लकडाउनबारे कुनै निर्णइ नगरेको जनाएका छन् । तर स्वास्थ्य मापदण्ड पालना गर्न सबैलाई सचेत गराएका छन् ।

नेपालमा पनि कोरोनाको ओमिक्रोन भेरिएन्ट पुष्टि

प्रकाशित : मंसिर २०, २०७८ १५:३२
प्रतिक्रिया
पठाउनुहोस्

३२ अंकले बढ्यो नेप्से, सबै उपसमूहमा हरियाली  

कान्तिपुर संवाददाता

काठमाडौँ — कारोबार बन्द हुँदा सोमबार सेयर बजारको परिसूचक नेप्से ३२ अंकले बढेको छ । सो अंकको वृद्धिपछि नेप्से २५४६ अंकमा पुगेको छ । सोमबारको बजारमा उच्च उतारचढाव देखिएको छ । कारोबार खुलेको एक घण्टामै मध्यान्ह १२ बजे ७२ अंकसम्म झरेको बजारमा त्यसपछि क्रमिक सुधार देखिएको हो ।

कारोबार रकममा पनि सुधार आएको छ । दिनभर ४ अर्ब ५४ करोड रुपैयाँको कारोबार भएको छ । यसअघि आइतबार ४ अर्ब ९ करोडको कारोबार भएको थियो । सबै उपसमूहमा हरियाली छाएको छ । बैंकिङ १३, विकास बैंक १५७, फाइनान्स ५७, होटल तथा पर्यटन ४१, जलविद्युत ८२, जीवन बीमा १२३, उत्पादन ६२, माइक्रोफाइनान्स ६५, निर्जीवन बीमा २६, अन्य ३१ ब्यापार उपसमूह ३ अंकले बढेका छन् ।

कुल १५७ कम्पनीको मूल्य बढ्यो भने २५ कम्पनीको घट्यो । ७ कम्पनीको मूल्य भने स्थिर रह्यो । मेरो माइक्रोफाइनान्सको मूल्य १० प्रतिशतले बढ्यो । एक्सल डेभलपमेन्टको ९.५ तथा साहस उर्जाको ८ प्रतिशतले मूल्य बढ्यो । जनउत्थान सामुदायिक लघुवित्तको मूल्य सबैभन्दा धेरै ६.८ प्रतिशतले घट्यो ।


प्रकाशित : मंसिर २०, २०७८ १५:२५
पूरा पढ्नुहोस्
प्रतिक्रिया
पठाउनुहोस्
×