ओमिक्रोनको सङ्क्रमण रोक्न भारतको सीमा क्षेत्रमा सतर्कता- स्वास्थ्य - कान्तिपुर समाचार

ओमिक्रोनको सङ्क्रमण रोक्न भारतको सीमा क्षेत्रमा सतर्कता

कान्तिपुर संवाददाता

काठमाडौँ — अफ्रिकी मुलुकबाट फैलिएको कोरोनाको नयाँ भेरियन्ट ओमिक्रोन भारतमा पनि देखा परेपछि पश्चिमी सीमानाका गड्डाचौकीमा सतर्कता अपनाउन थालिएको छ ।


सीमा नाका भएर आउने यात्रुमध्ये कोरोनाका शंकास्पद बिरामीको एन्टिजेन विधिबाट कोरोना परीक्षण गरी नतिजा पोजिटिभ आए नमूना पुनः परीक्षणका लागि केन्द्रीय प्रयोगशालामा पठाउने व्यवस्था गरिएको छ ।

'सीमा नाकाबाट भित्रिने यात्रुको एन्टिजेन विधिबाट गरिएको कोरोना परीक्षणमा नतिजा पोजिटिभ आए उपचार र परीक्षणका लागि अस्पताल पठाउँदै आएका थियौं,' जिल्ला स्वास्थ्य कार्यालय कञ्चनपुरका प्रमुख शिवराज सुनारले भने, 'कोरोनाको नयाँ भेरियन्ट ओमिक्रोन भारतलगायत मुलुकमा देखा परेपछि नमूना परीक्षण गर्न केन्द्रीय प्रयोगशालामा पठाइने गरिएको छ ।'

कोरोनाको नयाँ भेरियन्ट फैलिन नदिनका लागि सीमा क्षेत्रमा सावधानी र सतर्कता अपनाइएको उनले बताए । जोखिमलाई कम गर्न भारतबाट आउने यात्रुको पीसीआर रिपोर्टसँगै कोरोनाविरुद्धको खोप लगाइएको कार्डसमेत हेर्ने गरिएको छ ।

सीमा क्षेत्रमै मलेरिया, क्षयरोग र कोरोना परीक्षण

भारतबाट भित्रिने यात्रुको पश्चिमी सीमा क्षेत्र गड्डाचौकीमै मलेरिया, क्षयरोग र कोरोना परीक्षण गर्ने व्यवस्था गरिएको छ । सीमा क्षेत्रमा राखिएको हेल्थ डेस्कमै शंकास्पद यात्रुको मलेरिया, क्षयरोग र कोरोना परीक्षण गरिँदै आएको छ ।

'मलेरिया र कोरोना सीमा क्षेत्रमा रहेको हेल्थ डेस्कमा परीक्षण गरी यकिन गरिन्छ,' जिल्ला स्वास्थ्य कार्यालयका प्रमुख सुनारले भने, 'क्षयरोग (टिवी)को परीक्षणका लागि खकार संकलन गरी जिल्लामै रहेको जिन ल्याबमा लगेर परीक्षण गर्छौं ।' क्षयरोगको नतिजाबारे बिरामीलाई फोनमार्फत् जानकारीसमेत दिइने गरिएको छ ।

प्रकाशित : मंसिर १८, २०७८ १२:२२
प्रतिक्रिया
पठाउनुहोस्

राप्रपाको मतदान सुरु

कान्तिपुर संवाददाता

काठमाडौँ — राष्ट्रिय प्रजातन्त्र पार्टी (राप्रपा)को नयाँ नेतृत्व चयन गर्नका लागि मतदान सुरु भएको छ । अध्यक्षका लागि कमल थापा र राजेन्द्र लिङ्देनबीच प्रतिस्पर्धा रहेको छ । मतदान काजगी मतपत्र र इलेक्ट्रोनिक भेटिङ मेसिन(इभिएम) दुवैको प्रयोग गरेर गर्न लागिएको निर्वाचन अधिकृत राजु बस्नेतले बताए ।

महाधिवेशनमा अध्यक्षको चुनावमा काजगी मतपत्र र बाँकी पदाधिकारी तथा सदस्यको निर्वाचन भने इभिएमबाट हुनेछ । 'मतदानका लागि ८६ वटा इभिएमको प्रयोग गरेका छौ' रामलक्ष्मण इनोभेसन्सका लक्ष्मण रिमालले भने । उनका अनुसार एक जना मतदातालाई मतदान गर्न आधा घण्टा लाग्ने उनले बताए । ४ हजार ३ सय ८० प्रतिनिधि रहेको राप्रपामा मतदान सकिन कम्तिमा २४ घण्टा लाग्ने सक्ने छ ।

नेतृत्वका लागि फरकफरक प्यानल बनाएर थापा र लिङ्देनबीच प्रतिस्पर्धा रहेको छ । एक महिलासहित ४ उपाध्यक्षका लागि ९ जनाको उम्मेदवारी परेको छ ।

खुला उपाध्यक्ष जगत गौचन, दिलविकास राजभण्डारी, ध्रुवबहादुर प्रधान, विक्रम पाण्डे, बुद्धिमान तामाङ, रामचन्द्र राय यादव रहेका छन् । त्यसैगरी महिला उपाध्यक्षमा दुर्गा श्रेष्ठ, रोशन कार्की र लिलादेवी श्रेष्ठ रहेका छन् ।

त्यसैगरी महामन्त्री खुलामा धवलशम्शेर राणा, भाष्कर भद्रा, भुवन पाठक, श्यामप्रसाद तिमल्सेना र महिला महामन्त्रीमा कुन्ती शाही र रेखा थापा उम्मेदवार रहेका छन् ।

आदिवासी जनजातितर्फ १४ पदका लागि ३० जना उम्मेदवारी परेको छ । मुस्लिम ३ पदाका लागि ८ जनाको उम्मेदवारी परेको छ । त्यसैगरी महिला खुला ४७ पदका लागि ७२ जनाको उम्मेदवारी परेको छ । ११ मधेशी केन्द्रीय सदस्यमा २० जनाको उम्मेदवारी परेको छ । प्रवास २ सदस्यका लागि ४ जना, उत्पीडित ३ पदका लागि १० जनाको उम्मेदवारी परेको छ । कर्णाली तथा पिछडिएको क्षेत्रमा २ केन्द्रिय सदस्यका लागि ६ जनाको उम्मेदवारी परेको छ ।


तस्बिरहरू : कविन अधिकारी/कान्तिपुर

यस्तै, खुला महिला ४७ स्थानका लागि ७२ र खुला ५७ मा १ सय १३ जनाको उम्मेदवारी परेको आयोजक कमिटीका सदस्य भरत पाठकले बताए । महाधिवेशनमा ४ हजार ३ सय ८० जना प्रतिनिधिहरु सहभागी रहेका छन् ।

रामदुलारी निर्विरोध

केलालीका रामदुलारी चौधरी थारु कोटाबाट निर्विरोध निर्वाचित भएकी छन् । थारु समुदायका क्लष्टरका लागि दुई स्थान सुरक्षित गरेको भएपनि रामदुलारीको मात्रै उम्मेदवारी परेपछि निर्विरोध भएको निर्वाचन आयुक्त बस्नेतले बताए ।

प्रकाशित : मंसिर १८, २०७८ १२:१३
पूरा पढ्नुहोस्
प्रतिक्रिया
पठाउनुहोस्
×