सरकारले सातै प्रदेशमा रेबिजको इम्युनोग्लोबुलिन सेवा सुरु गर्ने
काठमाडौँ — बिहीबार स्वास्थ्य मन्त्रालयमा आयोजित प्रेस ब्रिफिङमा स्वास्थ्यमन्त्री विरोध खतिवडाले मंसिर ५ गतेबाट यो सेवा ७ प्रदेशका ९ वटा अस्पतालमा सुरू हुने बताए ।
हालसम्म यो सेवा टेकु अस्पतालमा मात्र पाइन्थ्यो । यो सुई नि:शुल्क वितरण हुनेछ । रेबिजको इम्युनोग्लोबुलिन रेबिज लाग्न सक्ने जनावरले टोकेपछि घाउको वरिपरि सुईको माध्यमले लगाइन्छ। यो जीवनमा एकपटक मात्र लगाए पुग्छ ।यो सुईले एन्टिबडीको रुपमा काम गर्नेछ ।
ईपिडिमियोलोजी तथा रोग नियन्त्रण महाशाखा प्रमुख डा कृष्णप्रसाद पौडेलले कुकुर तथा जनावरले टोकेर ठूला घाउ बनाएमा त्यसमाथि कुनै पनि रेबिजको सुई पाएका छैनन् भने यो इम्युनोग्लोबुलिन पाउने बताए ।
हरेक वर्ष विश्वमा ५९००० जना मानिसको रेबिजबाट मृत्यु हुने गरेको छ ।
कुन कुन अस्पतालमा सेवा पाइन्छ?
प्रदेश १– कोशी अस्पताल, विराटनगर
प्रदेश २– जनकपुर अस्पताल, धनुषा
वाग्गती प्रदेश – मदन भण्डारी स्वा.वि.प्रतिष्ठान, हेटौंडा र भरतपुर अस्पताल
गण्डकी– पोखरा स्वास्थ्य विज्ञान प्रतिष्ठान, पोखरा
लुम्बिनी– लुम्बिनी अस्पताल, बुटवल
कर्णाली– सुर्खेत अस्पताल, वीरेन्द्रनगर
सुदूरपश्चिम– सेती प्रादेशिक अस्पताल, धनगढी
प्रकाशित : मंसिर २, २०७८ १४:५०