जाडोमा छालाको स्याहार कसरी गर्ने?- स्वास्थ्य - कान्तिपुर समाचार
कान्तिपुर वेबसाईट
AdvertisementAdvertisement

जाडोमा छालाको स्याहार कसरी गर्ने?

कान्तिपुर संवाददाता

काठमाडौँ — विशेषगरी जाडोमा मानिसका शरीरको छाला सुख्खा हुने, हातखुट्टा, ओठ फुट्ने समस्या देखिन्छन् । त्यसैगरी अर्को ‘चिलब्लेन्स’ भन्ने हुन्छ । यसले हात गोडाहरु सुन्निने हुन्छ । चिसो लागिसकेपछि हातहरु रातो अनि घाउहरु जस्तो हुने कहिलेकाहीं पानीफोकाहरु पनि आउन सक्छ ।

अर्को ‘ह्यान्ड एक्जिमा’ हुने सम्भावना हुन्छ । छाला सुख्खा भइ जाडोमा हातखुट्टाहरु चिलाउने, पानीफोका निस्किने र कहिलेकाहीं पटपट फुट्ने समस्या पनि हुन सक्छन् । धेरैजस्तो साबुन, सर्फहरुमा धेरै समय बिताए यो समस्या बढ्छ । त्यसैले जाडाेमा छालाकाे स्याहार अलि बढी गर्नुपर्छ ।

गर्मी महिनामा आद्र तापक्रम हुन्छ जाडोमा सुख्खा खालको हुन्छ । हाम्रो शरीरमा हुने होमियोथर्मिक मेकानिजम भन्छौं जाडो महिनामा शरीरभित्र आफैं ताप जोगाइरहेको हुन्छ । त्यसैले जाडोमा पसिना पनि आउँदैन । जाडो मौसममा हाम्रो शरीरको आफ्नो तापक्रम तथा बाहिरको तापक्रमले छालाहरु सुख्खा हुन्छ ।

जाडो समयमा देखिने अर्को समस्या हो सोरियासिस । जाडोको बेला छालाहरु अरुबेला भन्दा बढी सुख्खा हुने भएकाले गर्दा यो झन् बढ्न सक्छ । सामान्यतया मान्छेमा यो समस्या छ भने गर्मीमा ठीकै हुन्छ जाडो भएपछि कत्लाहरु जस्तो भएर फुस्रो हुने र चिलाउने समस्याहरु देखिन्छ ।

चायाँपोतोको समस्याले पनि जाडो समयमा बढी सताउने गर्दछ । त्यसैगरी जाडोमा धेरैबेरसम्म आगो तापेर बस्ने हुँदा पनि छालामा समस्या आउन सक्छन् । जाडोमा सबै जना न्यानो हुनका लागि एउटै ओच्छ्यानमा सिरकमा गुटुमुटु परेर बस्ने बानी हुन्छ । त्यस्तो बेलामा लुतोको समस्याहरु पनि देखिने सक्छ ।

जाडोमा मान्छेहरु नुहाउन अलि अल्छी गर्छन् । जसले गर्दा हप्ता-दस दिन सरसफाईको कमीले काछ लाग्ने समस्या आउन सक्छन् साथै ब्याकेटिरयाको संक्रमणहरु हुने र घाउ-खटिरा पनि गराउन सक्छन् ।

जाडोमा घाम पनि धेरै तापिन्छ । घामले पनि छालाको एलर्जीहरु गराउँछ । जसलाई हामी ‘पोलिमर्फिक लाइट इरप्सन’ भन्छौं । यसले छाला रातो गराउँछ । सर्न बर्नहरु हुने समस्या हुन्छ ।

कसरी ध्यान दिने त ?

जाडोमा सर्वप्रथम त खानपिनमै ध्यान दिनुपर्छ ।जाडोमा पानी चिसो हुन्छ भनेर पानी खाइँदैन । छाला सुख्खा हुन नदिन हात था गोडामा मोस्चराइजरको प्रयोग गर्नुपर्दछ । नुहाउँदा पनि माइल्ड सोप बडी वासको प्रयोग गर्नुपर्दछ । नुहाइसकेपछि शरीरमा मोस्चराइजर लगाउने गर्नुपर्दछ । अनुहारमा पनि सनस्क्रिन लगाउन बिर्सिनुहुँदैन । ओठमा लीप बामहरु लगाइराख्ने गर्दा समस्या आउँदैन ।

जाडो महिनामा छालाको स्याहार त गर्नपर्छ नै । हामीले कोठा न्यानो बनाउन प्रयोग गर्ने हिटरबारे पनि सावधानी अपनाउनुपर्छ । राति सुत्दा झ्यालहरु डम्म लगाएर सुत्नुभएन । त्यसैगरी आगोको एकदम नजिक गएर पनि नबसौँ । छाला त सुख्खा गराउँछ नै दुर्घटना हुने सम्भावना पनि रहन्छ । जाडोमा आगोले पोलिएका घटना पनि धेरै सुनिने गर्दछन् । त्यसैले जोगिएर बस्नुपर्दछ ।

(छालारोग विशेषज्ञ तथा कस्मेटिक सर्जन डा रुपक घिमिरेसँग कुराकानीमा आधारित )


प्रकाशित : कार्तिक २७, २०७८ १८:२३
प्रतिक्रिया
पठाउनुहोस्

नेकपा मालेको आठौं महाधिवेशन चितवनमा सुरु

रमेशकुमार पौडेल

चितवन — नेकपा (माले)को आठौं राष्ट्रिय महाधिवेशन शनिबारदेखि चितवनको नारायणगढमा सुरु भएको छ । सोमबारसम्म चल्ने महाधिवेशनले पार्टीको नयाँ नेतृत्वसहित केन्द्रीय समिति चयन गर्नेछ ।

पार्टीका महासचिव सीपी मौनालीले शनिबार नारायणी कलामन्दिरमा महाधिवेशनको उद्घाटन गरे । बन्दसत्र पनि सोही ठाउँमा हुने बताइएको छ । महाधिवेशनमा विभिन्न आठवटा दस्तावेज र प्रतिवेदनहरूमाथि छलफल र निर्णय हुनेछ ।

मालेका नेताहरूका अनुसार पार्टीको आगामी नेतृत्व पनि मैनालीले नै गर्ने लगभग पक्कापक्की जस्तै छ । पार्टीका स्थायी समिति सदस्य तथा अधिवेशन मूल व्यवस्थापन समितिका संयोजक दिनानाथ घिमिरेले मालेमा जसको नीति पारित हुन्छ त्यसैको नेतृत्व रहने बताएका छन्।

पार्टीले सीपी मैनालीको ‘नेपाली क्रान्तिको कार्यक्रमः नयाँ जनवाद’लाई ५९ सालको चैत्रदेखि मूल रणनैतिक नीति मानेर आएको छ । सो नीतिका विषयमा हालसम्म फरक मत आएको छैन । त्यसैले पनि महासचिव मैनालीले नै पार्टीको नेतृत्व गर्ने निश्चितप्राय: भएको मालेका नेताहरू बताउँछन् ।

अब बन्ने नयाँ केन्द्रीय समितिले महासचिव नियुक्त गर्ने, स्थायी कमिटी र पोलिटब्यूरो निर्माण गर्ने तथा पार्टीका विभिन्न २० वटा विभागहरूको नेतृत्व टुङ्ग्याउने पार्टीका पोलिटब्यूरो सदस्य भगवति घिमिरेले जानकारी दिइन् ।

महाधिवेशनमा देशभरबाट ३५० जना प्रतिनिधिले भाग लिएका छन् । मालेले अब संसदीय व्यवस्थाको विकल्प खोज्न आवश्यकता देखेको महासचिव मैनालीले बताएका छन् ।

‘असफल भइसकेको बेलायती मोडलको संसदीय व्यवस्थालाई विस्थापित गर्दै प्रत्यक्ष निर्वाचित कार्यकारी प्रमुख हुने व्यवस्था कायम गरौं भन्ने हाम्रो जोड छ’ महासचिव मैनालीले भने । मालेले आफ्नो पार्टीको निर्देशक सिद्धान्त मार्क्सवाद, लेनिनवाद र माओ बिचारधाराका साथ नेपाल चिन्तनलाई मान्ने गरेको छ ।

नेकपा (माले) अहिलेको प्रमुख प्रतिपक्षी नेकपा (एमाले)को प्रारुप पनि हो । वि सं २०३५ साल पुस ११ मा स्थापना भएको नेकपा मालेको संस्थापक महासचिव नै सिपी मैनाली थिए। उनी ०३९ सालसम्म महासचिव रहे । ०४७ सालपछि अन्य कम्युनिष्ट घटक र मालेबीच एकीकरण भएर नेकपा (एमाले) नामाकरण भएको हो । मैनाली ०५४ सालको फागुनसम्म एमालेमै थिए ।

०५४ सालको फागुन २१ मा एमाले विभाजित हुँदा बामदेव गौतमले पार्टी फुटाएर नेकपा माले गठन गरेपछि मैनाली पनि मालेमै आएका थिए । ०५८ सालको फागुनमा बामदेव गौतमलगायतका नेताहरू फेरि एमालेमा गएपछि सीपी मैनालीले नेकपा मालेको पुनर्गठन र नेतृत्व गर्दैआएका छन् । नेकपा एमालेले पनि आगामी मंसिर १० देखि १२ गतेसम्म चितवनमै पार्टीको १० औं महाधिवेशन आयोजना गरेको छ ।

प्रकाशित : कार्तिक २७, २०७८ १८:२१
पूरा पढ्नुहोस्
प्रतिक्रिया
पठाउनुहोस्
×