वायु प्रदूषणले बर्सेनि ७० लाख मानिसको अल्पायुमै मृत्यु : विश्व स्वास्थ्य संगठन - स्वास्थ्य - कान्तिपुर समाचार

वायु प्रदूषणले बर्सेनि ७० लाख मानिसको अल्पायुमै मृत्यु : विश्व स्वास्थ्य संगठन 

कान्तिपुर संवाददाता

काठमाडौँ — विश्व स्वास्थ्य संगठनले विश्वमा मानिसको अल्पायुमै मृत्यु हुनुमा वायु प्रदूषण प्रमुख कारकको रुपमा रहेको दाबी गरेको छ । संगठनका अनुसार वार्षिक ७० लाख मानिसको वायु प्रदूषणका कारण अल्पायुमै मृत्यु हुने गर्दछ । त्यसैगरी दक्षिणपूर्वी एसियामा २० लाख मानिसको मृत्यु वायु प्रदूषणले हुने गरेको तथ्यांकले देखाएको छ ।

बुधबार प्रकाशित नयाँ निर्देशिकामा संगठनले भनेको छ– ‘अहिले देखिएको वायु प्रदूषणमा भेटिने पीएम २.५ का कणले गर्दा धेरै समस्या हुने गरेकाे देखिन्छ । त्यसलाई कम गर्न सकिए झन्डै ८० प्रतिशत मृत्यु रोक्न सकिन्छ ।' नयाँ निर्देशिकामा अस्वस्थ खान्की र धूमपानजस्तै वायु प्रदूषणलाई पनि मृत्यको कारक मानिएको छ ।

संगठनका अनुसार ६ वटा प्रमुख प्रदूषक जस्तै ओजोन, नाइट्रोजन डाइअक्साइड, सल्फर डाइअक्साइड र कार्बोन मोनोअक्साइड जस्ता विषाक्त ग्यास र पीएम १० देखि पीएम २.५ सुक्ष्म कणहरु हुन् ।

डब्लूएचओका महानिर्देशक डा. टेड्रोस एड्हानोम गेहब्रेयससका अनुसार वायु प्रदूषणले विश्वका देशमा स्वास्थ्यमा जोखिम बढाएको छ । तर, यो समस्या मध्यम तथा निम्न आय भएका देशहरुमा धेरै देखिन्छ ।

बालबालिकामा वायु प्रदूषणले फोक्सोको विकासमा कमी गराउनुका साथै श्वासप्रश्वासका संक्रमण तथा आस्थमाका समस्या पनि ल्याउन सक्छ । त्यसैगरी वयस्कमा यसले मुटुका समस्या तथा स्ट्रोक गराउन सक्छ । त्यसैगरी यसले मधुमेहका समस्या तथा नसासम्बन्धी समस्या गराउन सक्ने संगठन बताउँछ ।

प्रकाशित : आश्विन ७, २०७८ १३:५६
प्रतिक्रिया
पठाउनुहोस्

अमेरिकी उप–विदेशमन्त्री शेरमनले गरिन् नेपालसहित ५ देशका प्रतिनिधिसँग संयुक्त भेटवार्ता  

जगदीश्वर पाण्डे

काठमाडौँ — अमेरिकी उप–विदेशमन्त्री विन्डी आर शेरमनले संयुक्त राष्ट्रसंघको जारी ७६ औं महासभा अन्तर्गत बिहीबार दक्षिण एसियाका नेपालसहित पाँच देशका प्रतिनिधिहरुसँग संयुक्त रुपमा साइडलाइन भेटवार्ता गरेकी छन् ।

भेटवार्तामा नेपालको तर्फबाट न्युयोर्कस्थित संयुक्त राष्ट्रसंघका लागि स्थायी नियोग प्रमुख अमृतकुमार राई उपस्थित थिए ।

भेटवार्तापछि ट्वीट गर्दै उप–विदेशमन्त्री शेरमनले बंगलादेश, भुटान, माल्दिभ्स, नेपाल र श्रीलंकासँग परामर्श गर्न पाउँदा आफूलाई खुसी लागेको बताइन् । उनले अमेरिकाको दक्षिण एसियासँगको साझेदारी आफ्नो र हिन्द प्रशान्त क्षेत्रका जनताहरुको सुरक्षा र समृद्धिको लागि अत्यन्तै संवेदनशील रहेको उल्लेख गरेकी छन् । दक्षिण एसियाका तीन मुलुक भारत, पाकिस्तान र अफगानिस्तानका प्रतिनिधि बाहेक उक्त बैठक भएको थियो ।

शेरमनले अनौपचारिक बैठकमा लोकतान्त्रिक सिद्धान्तहरुलाई अघि बढाउने तथा कोभिड–१९, आर्थिक सुधार र जलवायु परिवर्तनलगायतका विश्वव्यापी चुनौतीहरुलाई कसरी सम्बोधन गर्ने विषयमा छलफल गरेको उल्लेख गरेकी छन् । उनले ट्वीटमा भनेकी छन्, ‘म भविष्यमा परामर्श र साझेदारीको गर्न चाहन्छु ।’

प्रकाशित : आश्विन ७, २०७८ १३:५६
पूरा पढ्नुहोस्
प्रतिक्रिया
पठाउनुहोस्
x
×