सेभ नेपाल ग्लोबल अलायन्सद्वारा सय थान अक्सिजन कन्सन्ट्रेटर प्रदान- स्वास्थ्य - कान्तिपुर समाचार
कान्तिपुर वेबसाईट
AdvertisementAdvertisement

सेभ नेपाल ग्लोबल अलायन्सद्वारा सय थान अक्सिजन कन्सन्ट्रेटर प्रदान

कान्तिपुर संवाददाता

काठमाडौँ — नेपाल, अमेरिका, न्युजिल्यान्ड, अस्ट्रेलिया, फ्रान्स र बेलायत लगायतका विभिन्न देशका नेपालीहरु आबद्ध संघसंस्था मिलेर बनेको सेभ नेपाल ग्लोबल अलायन्सले सय थान अक्सिजन कन्सन्ट्रेटर प्रदान गरेको छ ।

अलायन्सले शुक्रबार प्रहरी प्रधान कार्यालयमा एक समारोहबीच अक्सिजन कन्सन्ट्रेटर प्रहरी महानिरीक्षक शैलेश थापा क्षेत्रीलाई हस्तान्तरण गरेको हो । प्राप्त अक्सिजन कन्सन्ट्रेटर प्रहरीले देशैभरीका विभिन्न सरकारी अस्पतालमा पुर्‍याउने बताएको छ ।

अलायन्सले गो फण्ड मि लगायतका क्राउड फन्डिङबाट पछिल्लो दुई हप्तामामात्रै ८० लाख रुपैयाँ संकलन गरेको थियो । अलायन्सका नेपाल संयोजक पुकार बमका अनुसार अलायन्समा पूर्व क्रिकेट कप्तान पारस खड्का एक्लैले आठ लाख रुपैयाँ प्रदान गरेका थिए । उनले अलायन्सले किनेका स्वास्थ्य सहायता सामग्रीहरु देशका दुर्गम जिल्लाहरुसम्म पुर्‍याउने जिम्मा नेपाल प्रहरीले लिएको बताए । पुकारले अलायन्सले दोस्रो चरणमा थप स्वास्थ्य सहायता सामग्रीहरु नेपाल झिकाउनुका अलावा कोभिड भ्याक्सिनका निम्ति अन्तर्राष्ट्रियस्तरबाट पहल गर्ने काम भइरहेको बताए । उनले भने, ‘विभिन्न देशमा छरिएका नेपाली र नेपाललाई माया गर्नेहरुबाट भइरहेका सहयोगका विभिन्न प्रयासहरुलाई अलायन्सले एकत्रित गर्दै थप सहायता सामग्री जुटाउने प्रयासमा लागिपरेको छ ।’

अलायन्समा नेपालबाट कलाकारहरु मनिषा कोइराला, निश्चल बस्नेत, नम्रता श्रेष्ठ, मलिना जोशी, विजय लामा तथा पूर्वमिस नेपाल शृंखला खतिवडालगायत जोडिएका छन् । अलायन्सकी अन्तर्राष्ट्रिय संयोजक प्रगति घिमिरेले संक्रमणको बिस्तारसँगै नेपालमा देखा परेको स्वास्थ्य संकटमा आफूहरुले सहायता प्रदान गर्न निरन्तर लागिपरेको बताइन् ।

प्रकाशित : जेष्ठ २३, २०७८ १९:०४
प्रतिक्रिया
पठाउनुहोस्

पुनर्बहाली भएपछि गण्डकीका सांसद थापाले भने, 'न्याय पाएँ'

प्रतीक्षा काफ्ले

कास्की — पुनर्बहाली भएपछि गण्डकी प्रदेश सांसद कृष्ण थापाले सर्वोच्च अदालतले आफूलाई न्याय दिएको प्रतिक्रिया दिएका छन् । कान्तिपुरसँग कुरा गर्दै उनले भने, ‘म पुरानो कम्युनिष्ट हुँ । मलाई अदालतले न्याय दिएको छ । म खुसी छु ।’ 

उनले अदालतले दिएको न्याय आफ्नोमात्र नभई आफ्नो निर्वाचन क्षेत्र र सिंगो जनताको भएको बताए । ‘आजसम्म कम्युनिष्टको विचार बोकेर आए’, उनले भने, ‘विचारलाई संरक्षण गर्नुपर्छ । अरुसंग टाँसिएर विचारको कदर हुँदैन ।’ उनले सरकारलाई विश्वासको मत दिने वा नदिने भन्ने विषयमा निर्णय नलिएको बताएका छन् । आफू तटस्थ पनि रहन सक्ने उनको भनाइ छ ।

विपक्षी गठबन्धनलाई भने आफ्नो समर्थन नहरने ठोकुवा गरेका छन् । उनले भने, ‘प्रदेश विघटन गर्ने दिशातिर जानु हुँदैन । यसो त, विपक्षीलाई साथ दे भन्यो भने पार्टीको निर्णय पनि मेरो लागि मान्य हुँदैन ।’ उनले पार्टीको कुनै नयाँ भएमात्र समर्थन गर्ने र पुरानो निर्णयलाई साथ नदिने बताएका छन् ।

आइतबार थापालाई सांसदको हैसियतमा काम गर्न दिन सर्वोच्चले अन्तरिम आदेश जारी गरेको हो । न्यायाधीश कुमार चुडालको एकल इजलासले थापालाई प्रदेश सभा बैठकमा नियमित भाग लिन, सो हैसियतमा मतदान गर्ने, मत प्रकट गर्ने कार्यमा बञ्चित नगर्न अन्तरिम आदेश दिएको छ ।

पार्टीको ह्वीप नमानेको भन्दै थापालाई राष्ट्रिय जनमोर्चाले बिहीबार (जेठ २०) कारबाही गरेको थियो । कारबाही भएको भोलिपल्ट (शुक्रबार) उनी सर्वोच्च अदालत गएका थिए । गण्डकीका मुख्यमन्त्री पृथ्वीसुब्बा गुरुङविरुद्ध ल्याएको अविश्वासको प्रस्तावमाथि दलले समर्थन गरिरहँदा थापाले पार्टीको निर्देशन उल्लंघन गर्दै एमालेलाई सहयोग गर्दै आएका थिए ।

प्रकाशित : जेष्ठ २३, २०७८ १८:२५
पूरा पढ्नुहोस्
प्रतिक्रिया
पठाउनुहोस्
×