क्‍वारेन्टाइनमा मास्क लगाएर योग- स्वास्थ्य - कान्तिपुर समाचार
कान्तिपुर वेबसाईट
AdvertisementAdvertisement

क्‍वारेन्टाइनमा मास्क लगाएर योग

जनकपुरस्थित क्‍वारेन्टाइनमा श्वासप्रश्वास र घाँटीको समस्या निदान गर्ने तथा रोग प्रतिरोधक क्षमता बढाउने खालका योग अभ्यासमा जोड दिइएको छ ।
अजित तिवारी

जनकपुर — बिहान ६ बजेतिर म्याट बोकेर सबै आँगनमा ओर्लिन्छन् । सामाजिक दूरी राख्दै म्याटमा पलेँटी कस्छन् । योग गुरु विमल पण्डित बरन्डामा पलेँटी कसेर बस्छन् र प्रणाम भन्दै योगको थालनी गर्छन् । क्‍वारेन्टाइनमा बसिरहेका २६ जना जनकपुरको गोपाल धर्मशालाको फराकिलो आँगनमा बिहान दैनिक २ घण्टा योग गर्छन् ।

जनकपुरधाम उपमहानगरपालिकाले मंगलबारदेखि सञ्चालनमा ल्याएको धर्मशालाको क्‍वारेन्टाइनमा बुधबार बिहानदेखि योग कक्षा थालिएको हो ।

‘ओम’ तीनपटक उचारण गरेपछि क्‍वारेन्टाइनमा बसेकाहरूले गायत्री र महामृत्युंजय मन्त्र वाचन गर्छन् । त्यसपछि आधा घण्टा हल्का व्यायाम । ‘सुरुमा शारीरिक कसरत हुने उठबस, सिंहासन र सूर्य नमस्कार गराइन्छ,’ योग गुरु पण्डितले कान्तिपुरसँग भने, ‘क्‍वारेन्टाइनमा बसेकाहरूलाई श्वासप्रश्वास र घाँटीको समस्या निदान गर्ने तथा इम्युनिटी पावर (प्रतिरोधक क्षमता) बढाउने योग अभ्यास बढी गराउने गरिएको छ ।’

यसबाहेक उद्यायी प्राणायाम, श्वासप्रश्वास र दम फुल्नबाट रोक्न अनुलोम–विलोम, मन शुद्धि गर्न भास्त्रिका र कपालभाती लगायतका योग अभ्यास गराइने पण्डितले बताए । ‘क्‍वारेन्टाइनमा बसेकाहरूलाई योग सिकाउनु नौलो अनुभव हो,’ उनले भने । क्‍वारेन्टाइन रहेको जनकपुर–४ का अध्यक्ष सुदर्शन सिंहका अनुसार योग कक्षास्थललाई दैनिक सेनिटाइज गरिन्छ । ‘प्रशिक्षक र परीक्षार्थीबीच सामाजिक दूरी कायम गरिएको छ । सबैले मास्क लगाएका हुन्छन्,’ वडाध्यक्ष सिंहले भने, ‘क्‍वारेन्टाइन जहिलेसम्म रहन्छ, त्यतिबेलासम्म योग अभ्यास गराइनेछ ।’

करिब एक साता योग अभ्यास गराएपछि संगीतमार्फत त्यसलाई निरन्तरता दिइने उनले बताए । गोपाल धर्मशालामा सञ्चालनमा ल्याइएको क्‍वारेन्टाइनलाई नमुना बनाउने प्रयास गरिएको जनकपुरधाम उपमहानगरपालिका प्रमुख लालकिशोर साहले बताए । प्रमुख कार्यकारी अधिकृत गोपाल रेग्मीले क्‍वारेन्टाइनको बसाइ पट्यारलाग्दो नहोस् भनेर बिहान योग अभ्यास थालिएको जनाए । उनका अनुसार उक्त धर्मशालामा ६० शय्याको क्‍वारेन्टाइन सञ्चालनमा ल्याइएको छ । बिहीबारसम्म त्यहाँ ४० जनालाई राखिएको छ ।

व्यवस्थित क्‍वारेन्टाइन

नगरप्रमुख साहले क्‍वारेन्टाइनमा बसेकाहरूको खानपान, मनोरञ्जन, शारीरिक अभ्यास, बस्ने–सुत्ने सबैको राम्रो प्रबन्ध मिलाइएको दाबी गरे । ‘दिनमा चारपटक खाना–खाजा उपलब्ध गराइन्छ,’ उनले भने, ‘बिहानको खाजामा तुलसीको पात र अदुवा मिसाइएको चिया दिइन्छ । प्रतिरोधात्मक क्षमता बढाउने अण्डा, चाना र बिस्कुट नियमित खुवाइन्छ ।’ क्‍वारेन्टाइनमा बस्ने प्रत्येक व्यक्तिलाई एउटा बेड, तन्ना, सिरानी, झुल, नुहाउने र लुगाधुने साबुन, टुथपेस्ट, ब्रस तथा डस्टबिन उपलब्ध गराइएको छ । तातोपानी पिउन थर्मस र गिलास राखिएको छ ।

क्‍वारेन्टाइनमा खाना खुवाउने तरिका पनि बेग्लै छ । कुन कोठामा कोको बसेका छन्, त्यसको तथ्यांक राखिएको छ । खाना खाने समयमा माइकबाट कोठा नम्बरअनुसार एक–एक गर्दै व्यक्तिको नाम बोलाइन्छ । ‘धर्मशालामा पर्याप्त शौचालय रहेकाले एउटा कोठामा बस्नेलाई एउटा शौचालय प्रयोग गर्न लगाइएको छ,’ रेग्मीले भने, ‘क्‍वारेन्टाइनलाई व्यवस्थित र सुविधासम्पन्न बनाइएको छ । मनोरञ्जनका लागि वाइफाई पनि जोडिएको छ ।’ औषधिसहित स्वास्थ्यकर्मीलाई चौबीसै घन्टा खटाइएको छ ।

प्रकाशित : जेष्ठ ९, २०७७ १८:२१
प्रतिक्रिया
पठाउनुहोस्

प्रदेशमा लगानी सम्भाव्यता प्रतिवेदन तयार

कान्तिपुर संवाददाता

विराटनगर — प्रदेश १ मा लगानी सम्भाव्यता क्षेत्रहरुको अध्ययन गरी प्रतिवेदन तयार गरिएको छ । नेपाल उद्योग वाणिज्य महासंघ प्रदेश १ ले प्रदेशमा लगानीका सम्भाव्यताका क्षेत्रको अध्ययन गरी तयार पारिएको प्रतिवेदन प्रदेश सरकारलाई शुक्रबार हस्तान्तरण गरेको छ ।

महासंघ प्रदेश समितिका उपाध्यक्ष राजेन्द्र राउतले मुख्यमन्त्री शेरधन राईलाई प्रतिवेदन हस्तान्तरण गरेका हुन् । महासंघले पहिलो प्राथमिकता क्षेत्रका रुपमा जारी लकडाउन र विश्वव्यापी आर्थिक मन्दीका कारण संकटमा रहेका कृषि तथा गैरकृषि उद्योगभन्दा कलकारखानाहरुको पूर्ववत् अवस्थामा फर्काउन प्रयास गर्नुपर्ने औंल्याएको छ ।

आगामी दिनमा उत्पादन र रोजगारीको क्षेत्रलाई सम्बोधन गर्न आवश्यक आर्थिक एवं वित्तीय राहत, सहुलियत, क्षमता विस्तारका लागि प्राविधिक, आर्थिक एवं नीतिगत सहजीकरणका लागि आगामी वर्षको नीति तथा कार्यक्रम मार्फत सम्बोधन गर्नुपर्ने प्रतिवेदनमा उल्लेख छ ।

सम्भावित क्षेत्रहरुमा लगानी प्रोत्साहन गर्ने, निजी क्षेत्रका लगानीकर्तालाई सहजीकरण गर्ने तथा सार्वजनिक निजी सहकारी साझेदारीका अवधारणामा आर्थिक वृद्धि लक्षित क्षेत्रहरुलाई नीतिगत, व्यावहारिक एवं आर्थिक सहकार्यका प्याकेजहरु मार्फत अघि बढाउने उल्लेख गरिएको छ ।

व्यावसायिक कृषि तथा पशुपालन, फार्म स्थापना, बजार प्रवन्ध, कृषि र पशुपालनमा आधारित उद्योग एवं व्यवसायमार्फत् रोजगारीका अवसरहरु सिर्जना, कृषिमा यान्त्रीकीकरण एवम् आधुनिकीकरण लगायत क्षेत्र काम गर्नुपर्ने उल्लेख गरिएको छ ।

कृषियोग्य भूमिको अधिकतम प्रयोग, चक्लाबन्दी, करार खेती, भूमि बैंक स्थापना लगायत व्यावसायिक आधुनिक कृषिका क्षेत्रहरुको पहिचान गरी कृषि पर्यटनको पूर्वाधार एवं व्यवसायको विकास गर्न महासंघले आग्रह गरेको छ ।

निर्यातयोग्य कृषि उपजहरुको ब्राण्डिङ, प्याकेजिङ, प्रमाणीकरण, निर्यात बजार खोजी र प्रवद्र्धन गर्ने, प्रदेश १ मा रहेका निर्यातयोग्य कृषि उपजहरुको सम्भावित बजार खोजी, निर्यात विविधीकरणका लागि सहकार्य गर्न प्रतिवेदनमा सुझाइएको छ ।

प्रकाशित : जेष्ठ ९, २०७७ १८:१६
पूरा पढ्नुहोस्
प्रतिक्रिया
पठाउनुहोस्
×