ओखरले बढाउँछ प्रजनन क्षमता

कान्तिपुर संवाददाता

काठमाडौँ — एक मुठी ओखरमा ४ ग्राम प्रोटिन, २ ग्राम फाइबर र म्याग्नेसियम (१० प्रतिशत डीबी) हुन्छ । मानिसका लागि अत्यावश्यक ओमेगा ३, ओमेगा ६ र अल्फा लिनोलेनिक एसिड प्रशस्त हुने एकमात्र फल ओखर हो । ओखरमा भिटामिन बी, भिटामिन ई, म्याग्नेसियम, जिंक, कपर, आयरन, क्याल्सियम र एन्टिअक्सिडेन्टलगायतका प्रशस्त प्राकृतिक खनिज हुन्छ । 

ZenTravel

सेवन गरेको ४ घण्टापछि नै ओखरको फाइदा मिल्छ । ओखर सेवनले शरीरमा कोलेस्ट्रोलको स्तरमा तीव्र गतिले कमी हुन्छ । यसले रगत नलीलाई झन् बढी लचिलो बनाउँछ र शरीरमा रक्तसञ्चार सहज भई मुटुमा बढी दबाब पर्दैन ।

Meroghar


ओखरले शरीरमा थर्मोजेनिक प्रभाव उत्पन्न गर्ने हुँदा मुटुको धमनीमा जमेको बोसो घुलनशील अवस्थामा आएर विस्तारै समाप्त हुन्छ । जसले गर्दा मुटुलाई रक्तसञ्चारका लागि बढी मिहिनेत गर्नु पर्दैन ।
ओखरको सेवनले अस्थमा, अर्थराइटिस, छालाको समस्या, एक्जिमा र सोराइसिसजस्ता रोगबाट समेत बच्न सकिन्छ । ओखरको नियमित सेवनले मस्तिष्क तेज हुन्छ र स्मरणशक्ति बलियो हुन्छ ।

पोषकतत्त्वले भरिपूर्ण प्रोटिनको राम्रो स्रोत रहेको ओखर वर्षभरि नै पाइन्छ । ‘जर्नल अफ न्युट्रिसन’ मा प्रकाशित एक अध्ययनअनुसार एउटा ओखर (२८.३५ग्राम) मा १ सय ४६ क्यालोरी हुन्छ ।

ओखर खानाले मुटु रोग, क्यान्सरलगायत अन्य रोगको जोखिम कम हुने अनुसन्धानहरूले देखाएका छन् । पुरुषको शुक्रकीट बढाउनमा समेत ओखर सेवनले महत्त्वपूर्ण भूमिका खेल्छ । पुरुषको प्रजनन स्वास्थ्य र क्षमतामा ओखरको सेवनले सकारात्मक प्रभाव पार्छ ।

एक अध्ययनअनुसार दिनहुँ ७५ ग्राम ओखर सेवनले २१ देखि ३५ वर्ष उमेर समूहका स्वस्थ पुरुषमा शुक्रकीटको जीवनशक्ति, गतिशीलता र सामान्य आकृतिमा सुधार देखिएको छ ।

यति मात्रै नभई ओखरका अन्य धेरै फाइदा छन् । ओखर सेवनले पाचनक्रियालाई राम्रो बनाउनुका साथै रगतमा कोलेस्ट्रोलको स्तर कम गर्छ र पेटसम्बन्धी समस्याबाट छुटकारा दिलाउँछ । ओखरको नियमित सेवनले पेटमा भएका कीराबाट समेत मुक्ति पाइन्छ । ओखर भुटेर खानाले खोकीको समस्यामा समेत राहत पाइने आयुर्वेदमा उल्लेख छ ।

ओखर सेवनले प्यांक्रियाज ग्रन्थीमा हुने क्यान्सरबाट बच्न पनि सहयोग पुग्छ । यसले महिलामा हुने स्तन क्यान्सरको सम्भावनालाई पनि कम गर्छ । रगत जम्नबाट रोक्न र टाइप २ डाइबिटिजबाट बच्न पनि ओखर सेवन लाभदायक हुन्छ ।

घुँडाको दुखाइ कम गर्नसमेत ओखर फायदाजनक मानिन्छ । ओखरको तेल जोर्नीमा लगाउँदा आराम मिल्छ । ओखर सेवनले नियमित निद्रा लाग्ने र शरीरमा मेलाटोनिन हार्मोनको श्रावमा वृद्घि हुने बताइन्छ । मेलाटोनिन निद्रासँंग जोडिएको हार्मोन हो । यसले नर्भस सिस्टमको सन्देशलाई मस्तिष्कमा पठाउन र निद्रासँग जोडिएका सबै गतिविधिमा महत्त्वपूर्ण भूमिका खेल्छ । मेलाटोनिनको बढी मात्राले राम्रो निद्रा लाग्छ । ओखरको नियमित सेवनले डिमेन्सिया (बिर्सने रोग) र स्मरणशक्ति कमजोर हुने समस्याबाट समेत राहत मिल्छ ।

प्रकाशित : माघ १८, २०७६ ०८:२६
ADVERTISEMENT
प्रतिक्रिया
पठाउनुहोस्

पामपछि भटमास तेल निर्यात बढ्यो

गत आवको ६ महिनामा ३२ करोड रूपैयाँको भटमास तेल निर्यात भएकामा चालु आवको सोही अवधिमा ४ अर्ब ३८ करोड रूपैयाँ बराबरको निर्यात भएको छ, यो १२६९.५ प्रतिशत बढी हो 
राजु चौधरी

काठमाडौँ — विदेशबाट भटमासको कच्चापदार्थ ल्याई पुनः प्रशोधन गरेर भारत निर्यात गर्ने क्रम बढेको छ । पाम तेल पनि यसैगरी निर्यात गरिन्थ्यो । भन्सार विभागले सार्वजनिक गरेको तथ्यांकअनुसार चालू आवको ६ महिनामा ४ अर्ब ३८ करोड रुपैयाँको प्रशोधित भटमास तेल निर्यात भएको छ । अघिल्लो आवको सोही अवधिको तुलनामा यो १२६९.५ प्रतिशत बढी हो । आव ०७५/७६ को पहिलो ६ महिनामा ३२ करोड रुपैयाँको भटमास तेल निर्यात भएको थियो । 

भटमास बढी मात्रामा सुदूरपश्चिममा उत्पादन हुने कृषि तथा पशुपन्छी विकास मन्त्रालयले जानकारी दिएको छ । ती क्षेत्रका गाउँगाउँमा संकलित भटमास तराईका क्षेत्रमा बिक्री हुन्छ । पहाडको केही क्षेत्रमा व्यावसायिक खेती सुरु भए पनि उत्पादन भने पर्याप्त छैन । अर्बौं रुपैयाँको निर्यात गर्न सक्ने अवस्थामा पुगिनसकेको मन्त्रालयले जनाएको छ ।

‘पहाडमा खेती भए पनि ६ महिनामा ४ अर्ब रुपैयाँभन्दा बढीको निर्यात गर्न सक्ने अवस्थामा पुगेका छैनौं । उक्त परिमाण हाम्रो उत्पादन हुनै सक्दैन,’ कृषि मन्त्रालयका प्रवक्ता हरिबहादुर केसीले भने, ‘तेस्रो मुलुकबाट आयातित भटमास प्रशोधन गरेर पुनः निर्यात भएको हुन सक्छ ।’ कच्चा भटमास तेल ब्राजिल र अर्जेन्टिनाबाट आयात भएको विभागका तथ्यांक अधिकृत मोहन पुडासैनीले जानकारी दिए । ६ महिनामा ७ अर्ब ९६ करोड रुपैयाँको कच्चा तेल आयात भएको उनले बताए । ‘७ अर्ब ९६ करोडको कच्चा पदार्थ आयात हुँदा भारतमा ४ अर्ब ३८ करोडको प्रशोधित भटमास तेल निर्यात भएको देखिन्छ,’ उनले भने ।

निर्यातको सूचीमध्ये भटमास तेल तेस्रो नम्बरमा छ । पहिलो नम्बरमा प्रशोधित पाम तेल नै छ । ६ महिनाको अवधिमा १३ अर्ब ९० करोड रुपैयाँको प्रशोधित पाम आयल निर्यात भएको छ । ०७५/७६ को ६ महिनाको तुलनामा पाम आयलको निर्यात ४ सय ९२.१ प्रतिशत बढी हो । विभागका अनुसार यी वस्तु नेपालबाट निर्यात गर्दा महसुल लाग्दैन । अन्य मुलुकबाट नेपाल आयात गर्दा पनि गुणस्तरका आधारमा थोरै भन्सार लाग्छ । पुनः भारत निर्यात गर्दा महसुल नलाग्ने हुँदा व्यवसायी कच्चापदार्थ ल्याई प्रशोधन गरेर निर्यात गर्नेतर्फ आकर्षित भएका छन् । पाम आयलको कच्चा पदार्थ मलेसिया र इन्डोनेसियाबाट आयात हुन्छ । ‘कृषिजन्य वस्तुमा नेपाल सरकारले पनि छुट दिएको छ । ४ अर्ब रुपैयाँको भटमास तेल निर्यात ठूलो रकम हो,’ पूर्ववाणिज्य सचिव पुरुषोत्तम ओझाले भने, ‘आयातित कच्चा पदार्थ प्रशोधन गरी निर्यातमा जोड दिएका छन् । भटमासमा पनि त्यही गरिएको हुन सक्छ ।’

तेस्रो मुलुकबाट आयातित यी वस्तु प्रशोधन गरेर पुनः निर्यात हुँदा समग्र निर्यात व्यापारको अवस्थामा सुधार देखिएको छ । तथ्यांकअनुसार ६ महिनाको अवधिमा कुल वैदेशिक व्यापार ७ खर्ब ५१ अर्ब ९७ करोड रुपैयाँ भएको छ । आयात ४.०४ प्रतिशत घटेर ६ खर्ब ९४ अर्ब ६९ करोड रुपैयाँमा झरेको छ । निर्यात २६.१३ प्रतिशत बढेर ५७ अर्ब २७ करोड रुपैयाँ पुगेको छ ।

आव ०७५/७६ को ६ महिनामा निर्यात ४५ अर्ब ४१ करोड थियो । आयातमा कमी र निर्यातमा सुधार भएपछि व्यापार घाटामा समेत कमी आाएको तथ्यांक छ । व्यापार घाटा ६.०६ प्रतिशत घटेर ६ खर्ब ३७ अर्ब ४१ करोड रुपैयाँ पुगेको छ । अघिल्लो वर्ष ६ महिनामा व्यापार घाटा ६ खर्ब ७८ अर्ब ५२ करोड रुपैयाँ थियो ।

पाम तेलले समग्र निर्यातको आकार वृद्धि भइरहँदा भारतको वाणिज्य विभागअन्तर्गतको वैदेशिक व्यापार निर्देशनालयले हालै परिपत्र जारी गर्दै प्रशोधित तेलको पैठारीमा रोक लगाएको छ । भारतको मलेसियासँग कूटनीतिक द्वन्द्वका कारण निकासीमा रोक लागेपछि निर्यात व्यापार पुनः घट्ने आकलन छ । सरकारले प्रतिबन्ध फुकुवाका लागि पहल गरे पनि भारत सकारात्मक देखिएको छैन ।

दिगो निर्यात वृद्धिका लागि गुणस्तरीय स्वदेशी उत्पादनको वृद्धि, उद्योग उत्पादन क्षमतामा विस्तार हुनु आवश्यक रहेको जानकारहरू बताउँछन् ।

६ महिनाको अवधिमा ४ अर्ब ७४ करोड रुपैयाँको उनी गलैंचा/कार्पेट निर्यात भएको विभागको तथ्यांक छ । सेन्थेटिक यार्न ४ अर्ब २१ करोड र तयारी कपडा २ अर्ब ९६ करोड रुपैयाँको निर्यात भएको छ । आयातमा भने पहिलो नम्बरमा पेट्रोलियम पदार्थ छ ।

६ महिनामा ४९ अर्ब १५ करोडको डिजेल र १८ अर्ब २७ करोडको पेट्रोल आयात भएको छ । एमएस बिलेट २२ अर्ब २६ करोड र तयारी कपडा खरिदमा पनि १८ अर्ब ३५ करोड रुपैयाँ बाहिरिएको छ ।

प्रकाशित : माघ १८, २०७६ ०८:१३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×