ग्रिजमनको प्रभावमा फ्रान्स सबैभन्दा बलियो

२०१८ को विश्वकपमा फ्रान्सको च्याम्पियन यात्रामा युवा खेलाडी किलियन एमबाप्पेले उत्कृष्ट प्रदर्शन गरेका थिए । उनी कतारमा पनि खुबै चलेका छन् । रुसमा चम्किएका एन्टोइन ग्रिजमन कतारमा प्लेमेकरमा परिणत भएका छन् । चार वर्षअघि सात खेलमै पहिलो रोजाइमा रहे पनि प्रतियोगितामा गोलको खाता खोल्नै नसकेका ओलिभर जिरुड ३६ वर्षको उमेरमा प्रभावशाली स्ट्राइकर बने । करिम बेन्जेमा, एन्गोलो कान्टे, पउल पोग्बा गुमाए पनि डिडियर डेसच्याम्पको टिम खाडी क्षेत्रमा पहिलोपल्ट आयोजित विश्वकपमा सबैभन्दा शक्तिशाली देखिएको छ ।

प्रशिक्षक गारेथ साउथगेटले रुसमा इंग्ल्यान्डको युवा टिमलाई नसोचिएको ढंगले सेमिफाइनल पुर्‍याएका थिए । त्यो टिम अनुभवी भएर कतार आइपुग्दा भने इंग्ल्यान्ड क्वाटरफाइनलबाटै सबैभन्दा धेरै सातपल्ट बाहिरिने टिम भएको छ । कप्तान ह्यारी केनले दोस्रोपल्ट पाएको पेनाल्टीमा बल पोस्टमाथि प्रहार गरेपछि फ्रान्स उपाधि रक्षाको बाटोमा एक कदम अगाडि बढेको हो ।

‘धेरैले मोरक्कोसँग खेल्न सजिलो हुन्छ भनेका होलान्, तर मोरक्को धेरै राम्रो टिम छ,’ डेसच्याम्पले इंग्ल्यान्डविरुद्धको जितपछि भने, ‘टिम संगठित छ । राम्रो प्रदर्शन गरिरहेको छ । खेलाडीहरू उत्कृष्ट छन् । त्यसैले त राम्रो रणनीतिसहित ठूला टिमलाई पराजित गर्दै सेमिफाइनल पुगेको हो । हामी उसलाई कमजोर मान्ने छैनौं ।’

यो विश्वकपमा ५ गोल गरिसकेका एमबाप्पेलाई इंग्लिस रक्षकहरूले रोके, खासै चल्न दिएनन् । एमबाप्पेको तीव्र गतिमा बल दौडाउँदै गोल गर्ने खुबी इंग्ल्यान्डविरुद्ध खुल्न पाएन । तर, मिडफिल्ड नियन्त्रणमा लिएका सानो कदका ग्रिजमनका सटीक र चलाखीपूर्ण पासलाई इंग्ल्यान्डले निस्तेज पार्न सकेन । ग्रिजमनकै पासमा फ्रान्सेली मिडफिल्डर उरेलिन चाउमेनीले २५ यार्डबाट प्रहार गर्दै १७ औं मिनेटमा गोलको खाता खोले । उनै चाउमेनीले प्रभाव देखाइरहेका बुकायो साकालाई फउल गर्दै लडाएपछि ५४ औं मिनेटमा पाएको पेनाल्टीमा केनले टोटेनहमका सहकर्मी गोलकिपर ह्युगो लोरिस उल्केको ठीक उल्टोतिर बल प्रहार गर्दै इंग्ल्यान्डलाई १–१ को बराबरीमा पुर्‍याए । यससँगै विश्वकपमा पेनाल्टीमा सबैभन्दा बढी (४ गोल) गोल गर्ने खेलाडी बनेका केनले इंग्ल्यान्डका लागि सर्वाधिक ५३ गोलको वायन रोनीको कीर्तिमान पनि बराबरी गरे । केन विश्वकप २०१८ का गोल्डेन बुट विजेता पनि हुन् ।

दोस्रो हाफमा इंग्ल्यान्डले फ्रान्सलाई दबाब दिइरहेका बेला ग्रिजमनको लोभलाग्दो क्रसमा जिरुडको हेडर गोलमा फ्रान्स ७८ औं मिनेटमा २–१ ले अगाडि बढ्यो । इंग्ल्यान्डका डिफेन्डर सचेत नहुँदाको फाइदा लिँदै जिरोडले यो विश्वकपमा आफ्नो चौथो गोल गरे । उनी फ्रान्सका सर्वाधिक गोलकर्ता पनि हुन्, जसले ५३ गोल पुर्‍याएका छन् । फ्रान्सका कप्तान लोरिसले पनि कीर्तिमान १ सय ४३ औं खेलमा केही राम्रा बचाउ गरे । ३५ वर्षीय उनले आफ्नो देशका लागि सर्वाधिक खेलमा २४ वर्षअघिको च्याम्पियन लिलियम थुराम (१४२ खेल) को कीर्तिमान तोडेका हुन् ।

डिफेन्डर थियो हर्नान्डेजले सब्स्टिच्युट मेसन माउन्टलाई पेनाल्टी क्षेत्रमा फउल गरेपछि इंग्ल्यान्डले बराबरीका लागि ८४ औं मिनेटमै पेनाल्टी अवसर पायो । फेरि कप्तान केन १२ यार्डबाट बल प्रहार गर्न आए । यसपालि उनको प्रहार पोस्टमाथिबाट बाहिरियो । इंग्ल्यान्डको सन् १९६६ यता पहिलोपल्ट उपाधि जित्ने सपना कतारमा पनि अधुरै रह्यो । फ्रान्स भने विश्वकपमा इंग्ल्यान्डविरुद्धको पहिलो जितले ब्राजिल (१९९८) पछि सेमिफाइनल पुग्ने पहिलो डिफेन्डिङ च्याम्पियन भयो । ‘मलाई व्यक्तिगत र टिमका रूपमा पनि स्विकार्न (हार) गाह्रो भएको छ,’ इंग्ल्यान्डका स्ट्राइकर केनले भने, ‘खेलाडीहरूका लागि म गर्वको पात्र हुने छैन । हामीले राम्रो गरेका थियौं । धेरै अवसर बनाएका थियौं । तर, फुटबलमा सानो कुराले पनि तल पार्छ । एउटा कप्तान र पेनाल्टीमा चुकेको खेलाडीका रूपमा त्यसको (हार) जिम्मेवारी म लिन चाहन्छु ।’ पेनाल्टीबारे उनी बोले, ‘तयारीमा मेरो गल्ती थिएन । तर, आत्मविश्वास गुमाएँ । मैले चाहेजस्तो गर्न सकिनँ ।’

अल बायतमा क्षमताअनुसार ६८,८९५ दर्शक रहेको त्थ्यांक सुनाइए पनि प्यारापिटमा थुप्रै सिट खाली थिए । ‘थ्री लायन्स’ का समर्थक कमै थिए । फ्रान्सका समर्थक पनि खासै थिएनन् । विश्वकपलाई मौका पारेर खेल हेर्नेकै बाहुल्य थियो । साका, डेक्लान राइसको प्रदर्शनका आधारमा इंग्ल्यान्ड जितको हकदार नै थियो । तर, ग्रिजमनको सटीक पास, पेनाल्टी क्षेत्रमा प्रभावशाली जिरुडको गोल र दोस्रो पेनाल्टीमा केनको असफलताले फ्रान्सलाई अगाडि बढायो ।