कान्तिपुर वेबसाईट
AdvertisementAdvertisement
२९.१२°C काठमाडौं
काठमाडौंमा वायुको गुणस्तर: १९०

कस्तो होला रोनाल्डोको आगामी यात्रा ?

मोरक्कोसँगको पराजयसँगै क्रिस्टियानो रोनाल्डोको विश्वकप सपना अन्त्य भएको छ
एजेन्सीहरू

काठमाडौँ — कतारमा जारी विश्वकपको विजेताको दावेदार मानिएको पोर्चुगल नकआउट चरणमा मोरक्कोसँग १ गोल खाँदै यसपटकको विश्वकप प्रतिस्पर्धाबाटै बाहिरियो ।

कस्तो होला रोनाल्डोको आगामी यात्रा ?

यसपटकको विश्वकप पोर्चुगलका लागि जति महत्त्वपूर्ण थियो त्यसभन्दा धेरै महत्त्वपूर्ण कप्तान क्रिस्टियानो रोनाल्डोका लागि पनि थियो । उनका लागि आफ्नो करिअरको अन्तिम विश्वकप पोर्चुगललाई जिताउनु खेल करिअरमै एक ऐतिहासिक योगदान हुने थियो, जुन अवसर उनले गुमाइसकेका छन् ।

पोर्चुगलका लागि त आगामी विश्वकपका लागि आफूलाई तयार पार्न पर्याप्त समय छ । जुन अवसर र समय एक खेलाडीको रुपमा ३७ वर्षीय रोनाल्डोका लागि छैन । कतारमा शनिबार राति मोरक्कोबाट पराजित भएसँगै रोनाल्डोको विश्वकप विजेता बन्ने सपना टुंगिएको छ ।

मोरक्कोसँगको अन्तिम खेलको पहिलो हाफको अवधिभर पोर्चुगलका कोच फर्नान्डो सान्तोसले रोनाल्डोलाई बेन्चमै राखिदिएका थिए । दोस्रो हाफ सुरु भएसँगै रोनाल्डो मैदानमा उत्रिए । तर गोल गर्न सकेनन् । खेल सकिँदासम्म मोरक्कोले १ गोल हानिसकेको थियो भने पोर्चुगलले शून्यमै चित्त बुझाउनुपर्‍यो ।

खेल सकिएसँगै रोनाल्डो निकै निराश र स्तब्ध देखिए । टोलीका साथीहरूसँग अंकमाल नगरी उनी मैदानबाट बाहिर निस्किए। मैदानबाट एक्लै बाहिरिँदै गर्दा उनी दुखित देखिन्थे ।

रोनाल्डोले हालसम्म आफ्नो अन्तर्राष्ट्रिय खेल करिअरको भविष्यबारे कुनै प्रतिक्रिया दिएका छैनन् । यद्यपि कतार विश्वकप नै रोनाल्डोका लागि अन्तिम विश्वकप भएको अधिकांश खेल समीक्षकहरूको टिप्पणी छ ।

रोनाल्डो अहिलेसम्मकै महान खेलाडीमध्येका एक हुन् भन्नेमा दुईमत छैन । उनी पाँचवटा विश्वकपमा गोल गर्ने एक मात्र खेलाडी हुन् । रोनाल्डोले १९६ वटा खेलमा ११८ अन्तर्राष्ट्रिय गोलसहित अन्तर्राष्ट्रिय खेलहरूमा सबैभन्दा धेरै गोलकर्ताको रूपमा विश्व रेकर्ड राखेका छन्। उनी पाँचपटकको बालोन डी’ओर विजेता साथै चारवटा युरोपेली गोल्डेन बुट विजेता पनि हुन् ।

गत अक्टोबरमा उनले म्यानचेस्टरका लागि आफ्नो क्लब करिअरको ७००औं गोल प्रहार गरेका थिए । जुन क्लब करिअरमा उनले पाएको ऐतिहासिक उपलब्धी हो ।

यसपटकको विश्वकपमा भने रोनाल्डो पोर्चुगलको नकआउट चरणको पहिलो खेलमै बेन्चमा बस्नुपर्‍यो । बदलामा कोच फर्नान्डो सान्तोसले गोन्जालो रामोसलाई मैदानमा उतारे । फलस्वरुप रामोस स्विजरल्याण्डसँगको खेलमा ह्याट्रिक नै गर्न सफल बने ।

सान्तोसले शनिबार पनि त्यही तरिकालाई निरन्तरता दिँदै मोरक्कोसँगको खेलमा पनि रोनाल्डोलाई बेन्चमै राखिदिए । तर पहिलो हाफमै पोर्चुगलले १ गोल खानुपर्‍यो । दोस्रो हाफमा भने रोनाल्डोलाई मैदानमा उतारियो । तर उनले आफ्नो जादु देखाउन सकेनन् ।

पोर्चुगल विश्वकपबाट बाहिरिएसँगै कोच सान्तोसको यो रणनीतिको धेरैले आलोचना गरेका छन् । सान्तोसले भने आफ्नो निर्णयप्रति कुनै पश्चाताप नरहेको प्रतिक्रिया दिएका छन् ।

'क्रिस्टियानो महान खेलाडी हुन् । हामीले आवश्यक ठानेपछि उनी मैदान प्रवेश गरे । हामीलाई कुनै पश्चाताप छैन,' रोनाल्डोलाई बेन्चमा राखिएकोबारे कोच सान्तोसले प्रतिक्रिया दिएका छन् ।

कतार विश्वकपको पराजयसँगै रोनाल्डो आफ्नो खेल करिअरको निर्णायक मोडमा पुगेका छन् । २ दशकको खेल यात्रामा रोनाल्डोले उच्चतम उपलब्धीसहित प्रसंसा मात्रै पाएनन्, मैदान भित्र र बाहिर पनि धेरै विवाद र उतारचढावको पनि सामना उनले गरे । तर सबै विवाद तथा उपलब्धीलाई बिर्साउन सक्ने एक ऐतिहासिक अवसर उनको हातबाट गुमेको छ ।

प्रकाशित : मंसिर २५, २०७९ १९:११
प्रतिक्रिया
पठाउनुहोस्
जनताको राय

माथिल्लो अरुण जलविद्युत् आयोजना निर्माणका लागि विश्व बैंकसँग सैद्धान्तिक सहमति जुटेपनि अहिले भारतले नै निर्माणका लागि चासो देखाएको छ । यसबारे तपाईंको के राय छ ?