बेल्जियम र क्रोएसियाको निर्णायक भिडन्त- विश्वकप फुटबल २०२२ - कान्तिपुर समाचार
कान्तिपुर वेबसाईट
AdvertisementAdvertisement
विश्वकप २०२२

बेल्जियम र क्रोएसियाको निर्णायक भिडन्त

एपी

दोहा — जतिबेला बेल्जियमको स्वर्णिम पुस्ता र क्रोएसियाको अनुभवी खेलाडीले भरिएको टिमबीच बिहीबार विश्वकप २०२२ मा भिडन्त हुनेछ, त्यसको नतिजा निर्णायक हुनेछ । यो खेलमा युवा खेलाडीले बिरलै मात्र मौका पाउनेछन् । चार वर्षअगाडि रुसमा क्रोएसिया फाइनल पुगेको थियो । सन् २०१८ को त्यही विश्वकपमा बेल्जियम भने तेस्रो स्थानमा रहेको थियो । दुवै टिम यसपल्ट निकै अनुभवी खेलाडीमा निर्भर छ ।

क्रोएसियाका २० वर्षीय जोस्को ग्वाभ्डिलो र २५ वर्षीय निकोला भ्लासिच तथा बेल्जियमका २१ वर्षीय चाल्र्स डे केटलेरेले भने केही अपवाद हुन् । बेल्जियमका २१ वर्षीय एमाडोउ ओनाना भने दुई पहेँलो कार्डका कारण प्रतिबन्धबाट गुज्रिरहेका छन् । ग्वाभ्डिलोलाई ‘लिटिल पेप’ भन्ने गरिन्छ, किनभने उनको नाम केही हदसम्म म्यानचेस्टर सिटीका पेप ग्वार्डिओलासँग मिल्छ । शारीरिक रूपमा निकै बलिया देखिने उनी क्रोएसिया र लाइप्जिगका लागि नियमित खेलाडी हुन् ।

क्रोएसिया टिम भने वास्तवमै जेठो उमेरका खेलाडीले भरिएको टिम रहेको छ । जस्तो कि लुका मोड्रिच, मार्सेलो ब्रोजोभिच छन् । भ्लासिच भने इटालीको सिरी ‘ए’ कै उत्कृष्ट मिडफिल्डरमध्ये एक हुन् । उनी ऋणमा वेस्ट ह्यामबाट टुरिनोका लागि खेलिरहेका छन् । उनी मध्यपंक्तिबाट गोल

अवसर सिर्जना गर्न र लामो कडा प्रहारलाई बढी चिनिन्छन् । बेल्जियमका प्रशिक्षक रोबर्टो मार्टिनेज क्रोएसियाबारे भन्छन्, ‘क्रोएसियाको मध्यपंक्ति वास्तवमै डरलाग्दो छ ।’

उनी थप्छन्, ‘क्रोएसियाली प्रशिक्षक (ज्लाट्को डालिच) ले पुराना खेलाडीसँग नयाँ अनुहारको राम्रो मिश्रण गरेका छन् ।’ बेल्जियम आफैं पनि पुराना अनुभवी खेलाडीमै निर्भर छ । जस्तो इडेन हाजार्ड, केभिन डी ब्रुयन र रोमेलु लुकाकु । यी तीनै

खेलाडी शारीरिक रूपमा पूर्णत: फिट छैनन् । त्यसैले हुनसक्छ, चाल्र्स डे केटलेरे अर्थात सीडीकेले राम्रो मौका पाउन सक्छन् । इटालीको लिग च्याम्पियन एसी मिलानका लागि खेलेयता उनको प्रदर्शनमा व्यापक सुधार आएको छ ।

मार्टिनेज भन्छन्, ‘पछिल्लो समय केही युवा खेलाडीको पक्कै पनि उदय भएको छ र तिनीहरू विस्तारै पृष्ठभूमिमा देखिन थालेका छन् । मलाई जतिबेला तिनीहरू आवश्यक पर्नेछ, म तिनलाई मैदानमा उतार्ने छु । त्यसमध्ये मोरक्कोविरुद्धको खेलमा केहीले राम्रो पनि खेलिसकेका छन् ।’

क्रोएसिया यस खेलमा विजयी रहे अन्तिम १६ चरण पुग्नेछ । त्यतिमात्र होइन, बराबरीले पनि टोलीलाई लागि पर्याप्त छ । बेल्जियमका लागि भने यस खेलमा निश्चित जित आवश्यक छ ।

यस समूह ‘एच’ मा क्रोएसिया र मोरक्को ४–४ अंकसहित शीर्ष दुई स्थानमा छन् भने त्यसपछि ३ अंकमा बेल्जियम छ । क्यानडा भने अंकविहीन छ । उसको प्रतियोगितामा चुनौती समाप्त भइसकेको छ । क्यानडाले समूहको अर्को खेलमा मोरक्कोलाई हराउँछ भने क्रोएसिया र बेल्जियम दुवै नकआउट चरण पुग्न सक्छन् । भ्लासिच भन्छन्, ‘हामी एक अंकका लागि खेल्ने छैनौं । हामीले जितकै लागि खेल्नुपर्नेछ र जितकै लागि खेल्छौं ।’

प्रकाशित : मंसिर १५, २०७९ ०७:०८
प्रतिक्रिया
पठाउनुहोस्

भूतपूर्व गोर्खाका मागबारे बेलायतसँग दोस्रो वार्ता, पेन्सनमा गहन छलफल

नवीन पोखरेल

लन्डन — भूतपूर्व ब्रिटिस गोर्खाका माग सम्बोधनका लागि लन्डनस्थित नेपाली दूतावासमा दोस्रो वार्ता भएको छ । भूतपूर्व गोर्खा प्रतिनिधिसमेतको सहभागितामा नेपाल र बेलायत सरकारका प्रतिनिधिबीच बुधबार प्राविधिक तहमा वार्ता भएको हो । 

यसअघि गत ३ नोभेम्बरमा मन्त्रिस्तरिय वार्ता भए पनि यसपटक दुवै देशका सरकारी कर्मचारी र गोर्खा प्रतिनिधिहरुले विस्तृत रूपमा छलफल गरेका हुन् । भूतपूर्व गोर्खाका लागि ब्रिटिस सैनिकसरह समान पेन्सन, पूरक पेन्सन, अंगभंग भएका मृतकको परिवारका लागि एकमुष्ट भुक्तानी, कल्याणकारी कार्यलगायत एजेन्डामा छलफल भएको हो ।

‘प्राविधिक तहमा लामो छलफल भयो । पेन्सनअन्तर्गत गट्स र जीपीएसमा छलफल केन्द्रित थियो,’ वार्तामा सहभागी दूतावासकी उपनियोग प्रमुख रोशन खनालले कान्तिपुरसँग भनिन्, ‘उहाँहरू सकारात्मक हुनुहुन्छ । हामी सबै समेटेर प्रतिवेदन माथि दिन्छौँ भन्नु भएको छ ।’ अर्को वार्ता फेरि डिसेम्बर दोस्रो सातासम्म गर्ने बताइएको छ ।

दिउँसो साढे २ बजेदेखि झन्डै दुई घण्टा चलेको वार्तामा नेपाल सरकारका तर्फबाट दूतावासकी उपनियोग प्रमुख रोशन खनाल, द्वितीय सचिव रामबाबु नेपाल, ब्रिटिस रक्षा मन्त्रालयबाट आर्मर्ड फोर्सेस पिपुल सपोर्ट डिभिजनका जेम्स ग्रीनरड, जेनेभिभ होर्स्टेड, जेन्ना क्लेयर, म्याथ्यू लियोन, ब्रिगेड अफ गोर्खाज हेडक्वार्टरका कर्णेल डेभिड रविन्सन, इन्टरनेशनल पोलिसी एन्ड स्ट्राटेजीका स्क्वाड्रोन लिडर गेभिन रिचार्डसन र आर्मर्ड फोर्सेस पारिश्रमिक विभागकी नाजिया लोधी, गोर्खा प्रतिनिधित्व गर्दै अवकासप्राप्त मेजरहरु जुदबहादुर गुरुङ, उदयबहादुर गुरुङ र टिकेन्द्र दल देवान सहभागी थिए ।

यसअघि गत ३ नोभेम्बरमा बेलायती रक्षा मन्त्रालयमा रक्षाराज्यमन्त्री डा. एन्ड्रिउ मरिसन तथा संयुक्त अधिराज्य (यूके) का लागि नेपाली राजदूत ज्ञानचन्द्र आचार्य र भूतपूर्व गोर्खाहरुको तर्फबाट मेजर (अवकास प्राप्त) जुदबहादुर गुरुङसमेतको सहभागितामा पहिलो वार्ता भएको थियो ।

उक्त वार्तामा नेपाल सरकारको तर्फबाट राजदूत आचार्यले भूतपूर्व गोर्खाका लागि ब्रिटिस सैनिकसरह समान पेन्सन, पूरक पेन्सन, अंगभंग भएका मृतकको परिवारका लागि एकमुष्ट भुक्तानी, कल्याणकारी कार्यहरु लगायत समाधान गर्न बाँकी रहेका मागबारे आफ्नो अवधारणा राखेका थिए । ब्रिटिस सरकारका तर्फबाट रक्षाराज्य मन्त्रीले आफूले यी विषयमा विस्तृत अध्ययन तथा परामर्श गरी पुनः अर्को वार्तामा छलफल गर्ने आश्वासन दिएका थिए । गोर्खा समस्यामा ‘जी टु जी’ वार्ता आउँदो मार्च २०२३ सम्म टुंग्याउनुपर्ने माग भूतपूर्व गोर्खाहरुको छ । बेलायतमा सरकार परिवर्तन, ब्रिटिस महारानीको निधन, युक्रेन रुस युद्ध आदि कारण वार्तामा ढिलाइ हुँदै आएको थियो

गोर्खा आन्दोलनको प्रमुख घटक गोर्खा सत्याग्रह संयुक्त संघर्ष समितिका प्रमुख संयोजक कृष्णबहादुर राईले यसअघि पेन्सन मुद्दामा बोल्नै नचाहेको बेलायत अहिले सकारात्मक हुनु खुसीको कुरा भएको प्रतिक्रिया दिए । उता, गोर्खा भूतपूर्व सैनिक संघ (गेसो) सभापति कृष्णकुमार राईले दोस्रो चरण वार्तामा विस्तृत छलफल हुनु सकारात्मक भएको जनाउँदै भूतपूर्व गोर्खाहरुले अप्रिय निर्णय लिनुअगावै नेपाल सरकारलाई पनि वार्तातर्फ विशेष ध्यान दिन जोड दिए ।

प्रकाशित : मंसिर १५, २०७९ ०७:०३
पूरा पढ्नुहोस्
प्रतिक्रिया
पठाउनुहोस्
×