२२.१२°C काठमाडौं
काठमाडौंमा वायुको गुणस्तर: ४१५

फ्रान्स नौ खेलाडी परिवर्तन गरेर ट्युनिसयाविरुद्ध भिड्दै

राजु घिसिङ

दोहा — डिफेन्डिङ च्याम्पियन फ्रान्सले डेनमार्कविरुद्ध जित हात पारेएको टिममा फरवार्ड किलियन एम्बाप्पे र प्लेमेकर एन्टोइन ग्रिजमनसहित नौ खेलाडी परिवर्तन गर्दै ट्युनिसियाविरुद्ध खेल्ने टिमको घोषणा गरेको छ । खेल नेपाली समयअनुसार बेलुकी ८ : ४५ मा सुरु हुनेछ ।

फ्रान्स नौ खेलाडी परिवर्तन गरेर ट्युनिसयाविरुद्ध भिड्दै

सुरुआती दुई खेल जितेर अन्तिम १६ स्थानमा सुरक्षित गगरेपछि फ्रान्सेली टिमका मुख्य प्रशिक्षक डिडियर डेसच्याम्पले कतार संस्करणमा तीन गोल गरिसकेका एम्बाप्पेलाई एजुकेसन सिटी स्टेडियममा हुने खेलमा आराम दिइएको छ । अस्ट्रेलिविरुद्ध ४–१ को जितमा एक गोल गरेका उनले डेनमार्कविरुद्ध २–१ को रोमान्चक जितमा दुवै गोल गरेका थिए । फरवार्ड करिम बेन्जेमा चोटको कारण विश्व्कपमा खेल्न नसक्ने अवस्थामा छन् भने डिफेन्डर ल्याकास हर्नान्डेज पनि पहिलो खेलमै घाइते भएदेखि मैदानबाहिरै छन् ।

त्यस्तै, उत्कृष्ट लयमा रहेका ग्रिजमनसहित मिडफिल्डर एड्रियन र्‍याबियट र ओसमन डेम्बेले तथा कप्तान एवम् गोलकिपर ह्युगो लोरिस पनि ट्युनिसियाविरुद्ध खेल्ने छैनन् । थिएरी हेनरीको फ्रान्सको लागि सर्वाधिक ५१ गोलको रेकर्ड तोड्ने लक्ष्यमा रहेका सेन्टर फरवार्ड ग्रिजमनलाई पनि डेसच्याम्पले आराम दिएका छन् । उनले अस्ट्रेलियाविरुद्ध दुई गोल गरेर हेनरीको रेकर्ड बराबरी गरेका थिए । उक्त खेलमा र्याबियटलाई पनि एक गोल गरेका थिए ।

डिफेन्डर जुल्स कोन्डे, थियो हर्नान्डेज र दायोत उपामेकानोलाई पनि बेन्चमा राखिएको छ । डेनमार्कविरुद्ध २–१ को जितमा पहिलो रोजाईमा खेलेका म्यानचेस्टर युनाइटेका डिफेन्डर राफेल भारान र रियल म्याड्रिडका मिडफिल्डर चाउमेनी आउरेलिनले मात्रै टिममा निरन्तरता पाएका छन् । यस क्रममा भारानले कप्तानी गर्ने अवसर पाएका छन् ।

गोलपोष्टको जिम्मेवारी स्टिभ मन्डान्डालाई दिइएको छ । डिफेन्समा भारानसँगै एक्सेस डिसासी, युसुफ फोफना र लिभरपुलका इब्राहिम कोनाटे खेल्दै छन् । कोनाटे अस्ट्रेलियाविरुद्ध सुरुबाटै खेलेका थिए । मिडफिल्डमा चोउमेनीसँगै माटेओ गुन्डोजी, जोर्डन भेरेटोट र रियलका एडुआर्डो कामाभिंगा ल्याइएका छन् । अग्रपंक्तिमा जर्मन बुन्डेस लिगा क्लब बायर्न म्युनिखका किङ्सले कोम्यान र फ्रयांकफर्टका रान्डाल कोलो मुआनीले अवसर पाएका छन् ।

समूह डी को प्रतिस्पर्धामा डेनमार्कविरुद्ध गोलरहित खेलेको ट्युनिसिया अस्ट्रेलियाविरुद्ध १–० ले हारेको थियो । समूहको पुछारको रहेको अफिकी टिमको अन्तिम १६ मा छनोट हुने सम्भावना गणितीय रुपमामात्रै बाकी छ । फ्रान्सको लागि यो खेल समूह विजेता बन्ने प्रतिस्पर्धामा महत्त्वपूर्ण रहेको छ ।

ठीक यही समयमा डेनमार्क र अस्ट्रेलिया अल जनोब रंगशालामा भिड्दै छन् । उक्त खेल जित्ने टिम नकआउटमा छनोट हुनेछ । बराबरी नतिजामा अस्ट्रेलिया भाग्यमानी हुनसक्छ ।

प्रकाशित : मंसिर १४, २०७९ २०:२०
प्रतिक्रिया
पठाउनुहोस्
जनताको राय

सुख्खा मौसम सुरुभएसँगै डढेलो र आगलागी घटना व्यापक बढेका छन् । वर्षेनी हुने यस्ता घटनाबाट धेरै क्षति हुन नदिन के गर्नुपर्छ ?