रोनाल्डोको कीर्तिमानमा पोर्चुगलको रोमाञ्चक जित

कन्टेनरले बनाइएको ९७४ रंगशालामा रोनाल्डोले पेनाल्टीमा गोल गर्दै ६५ औं मिनेटमा पोर्चुगललाई अग्रता दिलाएका थिए, जसले उनलाई विश्वकपका पाँच संस्करणमा गोल गर्ने पहिलो खेलाडी बनायो । यसअघि उनले सन् २००६ (जर्मनी), २०१० (दक्षिण अफ्रिका), २०१४ (ब्राजिल) र २०१८ (रुस) मा गोल गरेका थिए । उनले चार संस्करणमा गोल गरेका अर्जेन्टिनी कप्तान लियोनल मेसी, जर्मनीका मिरोस्लाभ क्लोज, ब्राजिली लिजेन्ड पेले र जर्मनीका उवे सिलरलाई उछिन्दै कीर्तिमान बनाएका हुन् ।

घानाविरुद्धको गोल विश्वकपमा रोनाल्डोको आठौं गोल हो । यसक्रममा १८ खेल खेलेका उनले विश्वकपको पहिलो गोल पनि पेनाल्टीमै गरेका थिए । उनले इरानविरुद्ध २–० को जितमा उक्त गोल गरेका थिए । ३७ वर्षीय उनी पुरुषको अन्तर्राष्ट्रिय फुटबलमा सर्बाधिक गोलकर्ता पनि हुन् । उनले १ सय १८ गाल गरेका छन् । युरो २०१६ को उपाधि विजेता उनी सम्भवत अन्तिमपल्ट विश्वकप खेल्दै छन् र यसमा उनी स्टार खेलाडीले भरिएको आफ्नो टिमलाई विश्वविजेता बनाउन चाहन्छन् ।

समकक्षी कप्तान आन्द्रे आयवले ७३ औं मिनेटमा गोल गर्दै घानालाई १–१ को बराबरीमा पुऱ्याएका थिए । जाओ फेलिक्सले उत्कृष्ट फिनिसिङ गर्दै ७९ औं मिनेटमा पोर्चुगललाई २१ ले अगाडि बढाए । राफेल लियोले सेकेन्ड बार च्याप्दै ८० औं मिनेटमा गोल गरेपछि पोर्चुगलले ३–१ ले अघि बढ्दै जितउन्मुख भएको थियो । दुवै गोलमा ब्रुनो फर्नान्डेजले बल उपलब्ध गराएका थिए ।

दुई गोलले पछाडि परेपनि युरोपेली क्लबमा आबद्ध खेलाडीले भरिएको घानाले संघर्ष गर्न छाडेन । ओसमन बुकारीले ८९ औं मिनेटमा गोल गर्दै ‘ब्ल्याक स्टार्स’ को अंक जाड्ने आशालाई कायमै राखेका थिए । घानाले नौ मिनेट थपिएको इन्ज्युरी समयको अन्तिम क्षणमा बराबरी गर्ने अवसर पनि पायो । तर, पेनाल्टी क्षेत्रमा इनाकी विलियम्सले प्राप्त अवसरमा प्रहार गर्न सकेनन् । गोलकिपर डिएगो कोस्टाबाट बल खोसेर पनि प्रहार गर्ने बेला विलियम्स चिप्लिएपछि घानाको अंक जोड्ने चाहना अधुरै रह्यो ।

यसअघि एजुकेसन सिटी स्टेडियममा आजै भएको समूह एच को पहिलो खेलमा दक्षिण कोरिया र उरुग्वेले गोलरहित खेल्दै अंक बाँडेका थिए ।