गाभीको उदय र स्पेनको ७ गोल- विश्वकप फुटबल २०२२ - कान्तिपुर समाचार
कान्तिपुर वेबसाईट
AdvertisementAdvertisement

गाभीको उदय र स्पेनको ७ गोल

एएफपी

दोहा — गाभीले भलीमा उत्कृष्ट गोल गर्दै विश्व स्टेजमा आफ्नो आगमनको सन्देश दिएपछि स्पेनले विश्वकपको आफ्नो पहिलो खेलमा उत्कृष्ट प्रदर्शन गर्दै कोस्टारिकालाई ७–० ले हराएको छ ।

सन् २०१० को विजेता स्पेनका लागि फेरान टोरेसले दुई गोल गरे । तर स्पेनका लागि पाँचौं गोल १८ वर्ष ११० दिन उमेरका गाभीले असाधारण भलीमा गरेका थिए । बार्सिलोनाका टिनएजर गाभीले पेनाल्टी बक्सलाइनबाट गरेको ड्रप बल पोस्टमा लागेर गोल भएको थियो । विश्वकपमा कम उमेरमा गोल गर्ने गाभी तेस्रो कान्छा खेलाडी बनेका छन् । कम उमेरमा गोल गर्नेमा ब्राजिलका पेले र मेक्सिकोका म्यानुयल रोसास थिए ।

समूह ‘इ’ को प्रतिद्घन्द्घी जर्मनी बुधबारकै अर्को खेलमा जापानसँग स्तब्ध भइसकेको अवस्थामा स्पेनका लागि यो जित महत्त्वपूर्ण बनेको छ । डानी ओल्मो र मार्को एसेन्सियोले पहिलो १० औं मिनेटमा गोल गरेपछि स्पेनलाई सुरुदेखि खेलमा पकड राख्न मदत गरेका थिए । सन् २०१४ मा ब्राजिलमा भएको प्रतियोगिताको क्वाटरफाइनल पुगेको कोस्टारिका विश्वकपका लागि छानिने अन्तिम टोली थियो । टोलीले स्पेनविरुद्ध एउटै आक्रामण गर्न सकेन । रियल म्याड्रिड र पेरिस सेन्ट जर्मेनबाट खेलिसकेका कोस्टारिकाका गोलरक्षक केलर नाभास स्पेनसामु मूकदर्शकमात्र बने । स्पेनबाट कार्लोस सोलेरले ९० मिनेट र अल्भारो मोराटाले इन्ज्युरी समयमा गोल गरेका थिए ।

प्रकाशित : मंसिर ८, २०७९ ०८:२१
प्रतिक्रिया
पठाउनुहोस्

एनरिके नै ‘टिम नेता’

एएफपी

दोहा — स्पेनिस प्रशिक्षक लुइस एनरिकेले स्टार खेलाडीहरूको अनुपस्थितिमा आफैं टिम नेता भएको दाबी गरेका छन् । स्पेनले विश्वकप २०२२ को आफ्नो पहिलो खेलमा बुधबार कोस्टारिकाको सामना गर्दै छ ।

विश्वकप विजेता खेलाडी तथा कप्तान सर्जियो बास्क्वेट खासै चर्चामा आउन रूचाउँदैनन् । युवा खेलाडी अंशु फाटी र पेड्री स्टार खेलाडी रहे पनि उनीहरू अझै परिपक्व हुने स्थितिमा छन् । एनरिकेले प्रेससँगको कुराकानीमा भनेका छन्, ‘राष्ट्रिय टिमको नेतृत्वकर्ता प्रशिक्षक हुनुपर्छ । म आफूलाई स्पेनी टिमको नेता मान्छु । जतिबेला टिममा दुविधा हुने गर्छ, त्यतिबेला त्यसलाई हटाउने म नै हुँ ।’

उनले थपेका छन्, ‘मैले नै कस्ले खेल्ने हो, कता जाने हो, कसरी खेल्ने हो यी सबैको निर्णय गर्ने र टिमलाई सल्लाह दिने गर्छु । म अहिले खुसी छु र प्रशिक्षकका रूपमा विश्वकपमा डेब्यु गर्न पाउँदा प्रसन्न पनि छु । म फुटबलको रमझममा रमाउन चाहन्छु । भर्खर अन्तिम अभ्यास सत्र सकाएको छु र अब पहिलो खेलमा रमाउने प्रयासमा छु ।’

यस विश्वकपमा स्पेन नै तेस्रो सबैभन्दा युवा खेलाडीले भरिएको टिम हो । एनरिकेले युवा खेलाडीमै जोड दिएका छन् । सर्जियो रामोस जस्ता अनुभवी खेलाडीलाई टिममा राखेका छैनन् । उनी भन्छन्, ‘युवा खेलाडी बढी सकारात्मक हुने गर्छन् । युवा खेलाडीसँगै अनुभवी पनि चाहिन्छ । यी दुवैको समिश्रण आवश्यक हुन्छ ।’

प्रकाशित : मंसिर ७, २०७९ ०६:२५
पूरा पढ्नुहोस्
प्रतिक्रिया
पठाउनुहोस्
x
×