कोस्टारिकाको पोस्टमा स्पेनको ७ गोल- विश्वकप फुटबल २०२२ - कान्तिपुर समाचार
विश्वकप २०२२

कोस्टारिकाको पोस्टमा स्पेनको ७ गोल

राजु घिसिङ

दोहा — बार्सिलोनाका १८ वर्षीय मिडफिल्डर गावीको उत्कृष्ट प्रदर्शनको सहयोगमा स्पेनले कोस्टारिकालाई ७–० ले हराएर बुधबार विश्वकप २०२२ मा उत्कृष्ट सुरुआत गरेको छ ।

अल थुमामा रंगशालामा गावीको भली लोभलाग्दो रह्यो र उनले ७४ औं मिनेटमा गोल पनि गरे । स्पेनले आकर्षक पास खेल्दै निक्कै उच्चस्तरको फुटबल प्रदर्शन गऱ्यो । युवा र युरो २०२० को सेमिफाइनल पुगेको टिमका खेलाडीले भरिएको स्पेनी टिमको छोटो पास र सटिक आक्रामणसामु कोस्टारिका निरिह रह्यो । स्पेनको सात गोलमा सबभन्दा उत्कृष्ट गावीकै रह्यो । उनी ब्राजिली लिजेन्ड पेलेपछि विश्वकपमा गोल गर्ने दोस्रो कान्छो खेलाडी भए ।

सन् २०१० को विश्वकप विजेता स्पेनको फराकिलो जितमा ड्यानी ओल्मोले ११ औं मिनेटमै गोलको खाता खोलेका थिए । मार्को एसेन्सियोले २१ औं मिनेटमा अग्रता दोब्बर बनाए । फेरान टोरेसले दुई गोल गरे । उनले ३१ औं मिनेटमा पेनाल्टीमार्फत आफ्नो पहिलो गोल गरे भने दोस्रो गोल ५४ औं मिनेटमा गरे । त्यसपछि गावीको निक्कै नै उत्कृष्ट गोल निस्कियो । कार्लोस सोरेसले ९० र अल्बारो मोराटाले इन्जुरी समयमा गोल गरेपछि स्पेनको ७–० को जित सम्भव भयो ।

यसअघि समूह ई को अर्को खेलमा जापानले एक गोलले पछाडि परेको स्थिति उल्टाउँदै चारपल्टको विश्वकप विजेता जर्मनीलाई खलिफा रंगशालामा २–१ ले हराएको थियो ।

प्रकाशित : मंसिर ८, २०७९ ००:५८
प्रतिक्रिया
पठाउनुहोस्

लमजुङ प्रदेश (२) मा कांग्रेसका पौडेल विजयी

आश गुरुङ

लमजुङ — लमजुङ प्रदेश (२) मा नेपाली कांग्रेसका भेषबहादुर पौडेल निर्वाचित भएका छन् । प्रतिनिधिसभा तथा प्रदेशसभा सदस्य निर्वाचनअन्तर्गत निकटम प्रतिद्वन्द्वी नेकपा एमालेका कृष्णप्रसाद अधिकारीलाई ७ सय ५४ मतान्तरले पछि पार्दै पौडेलले ५ वर्षका लागि प्रदेशसभाको यात्रा तय गरेका हुन् ।

क्व्होलासोंथर गाउँपालिका, मध्यनेपाल, सुन्दरबजार र बेंसीसहर नगरपालिकाबाट ४१ हजार ८ सय ५७ मत खसेकोमा पौडेलले १९ हजार ५ सय ५७ मत पाएको जिल्ला निर्वाचन अधिकारी नारायणप्रसाद सापकोटाले बताए । प्रतिद्वन्द्वी अधिकारीले १८ हजार ८ सय ३ मत पाए ।

औपचारिक घोषणा हुन भने बाँकी छ । राप्रपा उम्मेदवार ततबहादुर गुरुङले १ हजार ९ सय ५७ मत पाएका छन् । मंगोल नेश्नल अर्गनाइजेशनका राज गुरुङले ३ सय १४ मत पाएका छन् । जसपाका युवराज दुराले २ सय ४१ मत पाएका छन् । नेपाली कांग्रेस बीपीका नवराज बसौलाले १ सय ४५ मत पाएका छन् ।

पौडेल कांग्रेस निवर्तमान सभापति हुन् भने अधिकारी एमालेका जिल्ला अध्यक्ष हुन् । पौडेल २०७४ को स्थानीय तह निर्वाचनमा बेंसीसहर नगरपालिका प्रमुखमा एमाले उम्मेदवार गुमानसिंह अर्यालसँग पराजित भएका हुन् ।

यसअघि कांग्रेसले जित्दै आएको यो क्षेत्रमा २०६४ मा एमालेका हालका उपमहासचिव पृथ्वीसुब्बा गुरुङले जितेका थिए । तिनै गुरुङलाई पराजित गर्दै कांग्रेसका चन्द्रबहादुर कुँवरले २०७० मा संविधानसभाको यात्रा तय गरेका थिए ।

कांग्रेसका कृष्णप्रसाद कोइरालालाई पराजित गर्दै पृथ्वीसुब्बा गुरुङले २०७४ मा गण्डकी प्रदेशसभाको यात्रा तय गर्दै गण्डकी प्रदेशका संस्थापक मुख्यमन्त्री बनेका थिए ।

प्रकाशित : मंसिर ८, २०७९ ००:३८
पूरा पढ्नुहोस्
प्रतिक्रिया
पठाउनुहोस्
×