मेसीको गोलमा अग्रता लिएको अर्जेन्टिना साउदीसँग २–१ ले पराजित- विश्वकप फुटबल २०२२ - कान्तिपुर समाचार

मेसीको गोलमा अग्रता लिएको अर्जेन्टिना साउदीसँग २–१ ले पराजित

राजु घिसिङ

दोहा — कप्तान लियोनल मेसीले पेनाल्टीमार्फत सुरुमै दिलाएको अग्रता जोगाउन असफल भएको अर्जेन्टिना विश्वकप फुटबल २०२२ को पहिलो खेलमै साउदी अरेबियाविरुद्ध २–१ ले स्तब्ध भएको छ ।


कर्नरमा बल प्रहार गर्ने प्रयासमा रहेका लियान्द्रो पाराडेसलाई मेसीले साउदीका डिफेन्डर अब्दुल हमिदसाउदले धकेलेर लडाएपछि भिडियो असिस्टेन्ट रेफ्रीको सहयोगमा पाएको पेनाल्टीमा मेसीले सहजै गोल गर्दै १० औं मिनेटमै अर्जेन्टिनालाई अग्रता दिलाएका थिए । त्यसअघि दोस्रो मिनेटमै मेसीको प्रहारमा गोलकिपर मोहमद अवाइसले उत्कृष्ट बचाउ गर्दै साउदीको संकट टारेका थिए ।

पहिलो हाफमा अर्जेन्टिना हावी भयो । तर, दोस्रो हाफमा उस्तै लय काम राख्न सकेन । दोस्रो हाफको पहिलो १५ मिनेटमा साउदीले आक्रामक खेल प्रदर्शन गर्यो । सलेह अलसहरीले नियन्त्रण लिदै अगाडि बढाएर ४८ औं मिनेटमा उत्कृष्ट गोल गर्दै साउदीलाई बराबरीमा पुर्याएका थिए । उनले सेकेन्डबार च्याप्दै प्रहार गरेको उक्त गोलमा फिनिसिङ उत्कृष्ट रह्यो ।

सलेम अलडवसरीले ५३ औं मिनेटमा गोल गर्दै साउदीलाई २–१ ले अगाडि बढाएका थिए । उनले डिफेन्सलार्य छक्याउँदै विपक्षीका चार खेलाडीको वीचबाट प्रहार गरेको बलले गोलकिपर एमिलानो मार्टिनेजको ग्लोभ्स छुँदै लोभलाग्दा रुपमा जाली चुमेको थियो ।

थपिएको इन्ज्युरीको आठ मिनेटसहित अन्तिम आधा घन्टा अर्जेन्टिनाले आक्राम रुप लियो । केही मुभ पनि बनायो । तर, संगठित देखिएको साउदीको डिफेन्स र गोलकिपरलाई उछिन्न सकेन र पहिलो तेस्रोपल्ट विश्वकप जित्ने लक्ष्य बनाएको टिम कतार संस्करणको पहिलो खेलमै पराजित भयो । अर्जेन्टिनाले समूह सी मा मेक्सिको र पोल्यान्डविरुद्ध खेल्ने छ, जसमा जित हासिल गर्दै नकआउट चरणमा स्थान बनाउने प्रयास गर्नेछ ।

प्रकाशित : मंसिर ६, २०७९ १८:०६
प्रतिक्रिया
पठाउनुहोस्

मेसीको पेनाल्टी गोलमा अर्जेन्टिनालाई अग्रता

राजु घिसिङ

दोहा — सुपरस्टार लियोनल मेसीको पेनाल्टी गोलमा अर्जेन्टिनाले विश्वकप २०२२ को पहिलो खेलमा साउदी अरेबियाविरुद्ध दसौं मिनेटमै अग्रता लिएको छ ।



भिडियो असिस्टेन्ट रिभ्युपछि रेफ्रीले दिएको पेनाल्टीमा मेसीले सहजै गोल गोरेका हुुन् । उनको प्रहारमा गोलकिपर मोहमद अवाइसले उल्टो दिशामा डाइभ गरेका थिए । लुसेल रंगशालामा भइरहेको खेलको दोस्रो मिनेटमा मेसीले प्रहार गरेको बलमा भने अवाइसले उत्कृष्ट बचाउ गर्दै साउदीको संकट टारेका थिए ।

विश्व फुटबलले पाएको सबभन्दा ठूला स्टारमध्येका एक हुन् मेसी । हाल फ्रान्सेली क्लब पेरिस सेन्ट जर्मेन (पीएसजी) मा आबद्ध उनले आफ्नो करिअरमा अन्तिमपल्ट विश्वकपको उापधि जित्ने प्रयास गर्ने बताएका छन् । सन् २००६ मा जर्मनीमा भएको विश्वकपमा डेब्यु गरेका उनको कतार यात्रा लगातार पाचौं विश्वकप हो । उनको उत्कृष्ट प्रदर्शनमा अर्जेन्टिना आठ वर्षअघि ब्राजिलमा भएको विश्वकपको फाइनल पुगेपनि उपाधि होडमा उसलाई जर्मनीले पराजित गरेको थियो ।

साउदीविरुद्ध मेसीसँगै इटालियन क्लब इन्टरमिलानका फरवार्ड लाउतारो मार्टिनेजले अर्जेन्टिनाको अग्रपंक्ति सम्हालेका छन् । उनीहरुसगै एन्जेल डि मारिया पनि छन् । एस्टोन भिल्लाका गोलकिपर एमिलानो मार्टिनेजले गोलपोष्ट सम्हालेका छन् भने डिफेन्समा निकोलस टाग्लिफिको, क्रिस्टियन रोमेरो, निकालेस ओटामेन्डी र नाथुएल मोलिना छन् । मिडफिल्डमा लियान्द्रो परेडेस, रोडरिगो डे पाउल र एलेसान्द्रो गोमेज खेलेका छन् ।

दुईपल्टको विश्वकप विजेता डिएगो म्याराडोनाको टिमले सन् १९८६ मा उपाधि जितेयता च्याम्पियन बन्न सकेको छैन । समूह सी को प्रतिस्पर्धामा अलफराज सलमानको कप्तानीमा रहेको साउदीका सबै खेलाडी आफ्नै घरेलु लिगका क्लबमा आबद्ध छन् । अर्जेन्टिनी टिमका सबै खेलाडी युरोपेलका क्लबमा आबद्ध छन् । यो समूहमा मेक्सिको र पोल्यान्ड पनि छन् । यी दुई पनि आजै प्रतिस्पर्धा गर्दै छन् ।

प्रकाशित : मंसिर ६, २०७९ १६:१८
पूरा पढ्नुहोस्
प्रतिक्रिया
पठाउनुहोस्
×