रुकुम पश्चिममा ६ उम्मेदवारको धरौटी जफत- प्रतिनिधि / प्रदेशसभा निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

रुकुम पश्चिममा ६ उम्मेदवारको धरौटी जफत

महेश केसी

रुकुम पश्चिम — मंसिर ४ गते भएको प्रतिनिधिसभा र प्रदेशसभा निर्वाचनमा रुकुम पश्चिमबाट उम्मेदवार बनेका ६ जनाको धरौटी जफत भएको छ । कुल सदर मतको १० प्रतिशत मत नपाउने ६ जनाको धरौटी जफत भएको मुख्य निर्वाचन अधिकृतको कार्यालयले जनाएको छ ।

कार्यालयका अनुसार धरौटी जफत हुनेमा प्रतिनिधिसभा सदस्यका ४ जना उम्मेदवार र २ जना प्रदेशसभा सदस्यका उम्मेदवार छन् ।

प्रतिनिधिसभा सदस्य निर्वाचनतर्फ राप्रपाका दीपककुमार मल्ल, मंगोल नेशनल अर्गनाइजेसनका हरिबहादुर पुन तथा स्वतन्त्र उम्मेदवारहरु तारक केसी र राजन पाण्डेको धरौटी जफत भएको मुख्य निर्वाचन अधिकृतको कार्यालयले जनाएको छ । उनीहरुमध्ये राप्रपाका मल्लले ७ सय ९६, मंगोल नेसनलका पुनले २ सय ८, स्वतन्त्र उम्मेदवार केसीले ३ हजार ५ सय ६७ र अर्का स्वतन्त्र उम्मेदवार पाण्डेले २ सय १४ मत पाएका थिए । प्रतिनिधिसभातर्फ कुल ५७ हजार २ सय ९५ मत सदर भएकामा जमानत जोगाउन त्यसको १० प्रतिशत अर्थात् ५ हजार ७ सय ३० मत आवश्यक थियो ।

प्रतिनिधिसभामा नेकपा माओवादी केन्द्रका जनार्दन शर्मा ३९ हजार ५ सय ४९ मत ल्याएर विजयी भए । एमालेका नन्दराम देवकोटाले १२ हजार ९ सय ६१ मत पाएका थिए । त्यस्तै प्रदेशसभातर्फ २ वटा निर्वाचन क्षेत्र रहेकामा दुवै क्षेत्रमा राप्रपाका उम्मेदवारको धरौटी जफत भएको छ । प्रदेशसभा १ मा विनोदकुमार मल्लको धरौटी गुम्दा २ मा निर्जल केसीले पनि धरौटी जोगाउन नसकेको मुख्य निर्वाचन अधिकृतको कार्यालयको भनाइ छ । मल्लले १ हजार ११ मत पाउँदा केसीले १ हजार १ सय ७ मत पाएका थिए ।

प्रदेशसभा १ मा २८ हजार १ सय २५ मत सदर भएकामा धरौटी जोगाउन त्यसको १० प्रतिशत अर्थात् २ हजार ८ सय १३ मत ल्याउनुपर्ने थियो भने प्रदेशसभा २ मा २९ हजार ३ सय ४५ मत सदर हुँदा धरौटी फिर्ताका लागि २ हजार ९ सय ३५ मत आवश्यक थियो ।

प्रदेशसभा १ मा माओवादी केन्द्रका महेन्द्र केसी १९ हजार ३३ मतका साथ विजयी हुँदा एमालेका नारायणकुमार शाहले ८ हजार ८१ मत प्राप्त गरेका थिए । प्रदेशसभा २ मा पनि माओवादी केन्द्रकै राजकुमार शर्मा २० हजार १ सय ६० मत पाएर विजयी भए । उनका निकटतम् प्रतिस्पर्धी एमालेका कर्णबहादुर घर्तीले ८ हजार ७८ मत प्राप्त गरेका थिए ।

प्रकाशित : मंसिर २०, २०७९ १६:५०
प्रतिक्रिया
पठाउनुहोस्

उषा राई मृत्यु प्रकरण : हत्या आरोपमा ४ जना महिला पक्राउ

पोस्टमार्टम रिपोर्ट आउन अझै एक साता लाग्ने
प्रदीप मेन्याङ्बो

धरान —  एकल महिलालाई कुटपिट गरी हत्या गरेको आरोपमा प्रहरीले पक्राउ गरेका ४ महिलालाई मंगलबार सार्वजनिक गरेको छ । धरान–१३ स्थित धार्मिक मार्गमा डेरा गरी बस्ने ४२ वर्षीया एकल महिला उषा राईलाई कुटपिट गरेर हत्या गरेको आरोपमा प्रहरीले ४ जना महिलालाई पक्राउ गरी सार्वजनिक गरेको हो ।

कुटपिटपछि २८ र ८ वर्षीया छोरीका आमा उषाको मंसिर १३ गते उपचारकै क्रममा मृत्यु भएपछि मृतकका भाइ सुन्दर राईले किटानी जाहेरी दिएका थिए । सोही जाहेरीको आधारमा ४ जना पक्राउ गरिएको र अन्यको खोजी भइरहेको धरानस्थित इलाका प्रहरी कार्यालयका प्रहरी नायब उपरीक्षक(डीएसपी) बुद्ध श्रेष्ठले जानकारी दिए ।

डीएसपी श्रेष्ठका अनुसार पक्राउ पर्नेहरुमा मुख्य आरोपी धरान–१३, सूर्य मार्ग बस्ने ५५ वर्षीया उर्मिला राई रहेकी छिन् । उर्मिलाले आफ्नो श्रीमान गोविन्द राईसँग उषा नजिकिएको भन्दै महिलाको समूह बटुलेर गत कात्तिक ३ गते कुटपिट गरेको आरोप लागेको छ । उनलाई मंसिर १५ गते पक्राउ गरिएको र १० दिनको म्याद थप गरिएको डीएसपी श्रेष्ठले बताए ।

कुटपिटपछि घाइते भएकी उषाको बीपी कोइराला स्वास्थ्य विज्ञान प्रतिष्ठानको आईसीयूमा भर्ना गरेर उपचार गर्दा गर्दै मृत्यु भएपछि कुटपिटमा संलग्न अन्य तीन महिलालाई पनि पक्राउ गरिएको डीएसपी श्रेष्ठले बताए । उनका अनुसार मंसिर १६ गते सोही वडा बस्ने २६ वर्षीया सुमित्रा राई र धरान–१७ बस्ने २९ वर्षीया सुसेली राई र ४० वर्षीया रत्न लिम्बूलाई मंसिर १८ गते पक्राउ गरेर अदालतबाट म्याद थप गरी अनुसन्धान भइरहेको छ । मृतक उषाको पछि दुई वर्षअघि मात्र मृत्यु भएको थियो । पतिको मृत्युपछि एउटा सिलाइ बुनाइको मेसिन किनेर दुई छोरीका साथ बाख्रापालन गर्दै सूर्यमार्गमा टेलर पसल सञ्चालन गरेर जीविका चलाउँदै आएकी थिइन् ।

प्रहरीले उक्त घटना भएको बेला खिचिएको भिडियोमा देखिएका महिलाहरुको पनि खोजी र अनुसन्धान भइरहेको जनाएको छ । उक्त घटनामा सिर्जना राई, मिना राई र निरकुमारी गुरुङको पनि संलग्नता रहेको भन्दै जाहेरी परेकोले उनीहरुको खोजी भइरहेको प्रहरीले जनाएको छ । तीन दिनअघि मात्र पोस्टमार्टम गरिए पनि रिपोर्ट भने आइसकेको छैन । पोस्टमार्टम रिपोर्ट आउन अझै एक साता लाग्ने बताइएको छ ।

सम्बन्धित समाचार


प्रकाशित : मंसिर २०, २०७९ १६:३४
पूरा पढ्नुहोस्
प्रतिक्रिया
पठाउनुहोस्
×