७ प्रतिशतभन्दा बढी मत बदर

मतदाता शिक्षा प्रभावकारी बनाउन नसक्दा मतदातामा भएको अन्योलताका कारण प्रत्यक्ष र समानुपातिकमा धेरै मत बदर भएको हो । कुल खसेको मतअनुसार प्रत्यक्षमा ११ हजार ६ सय १५ र समानुपातिकमा १२ हजार ४ सय ४६ मत बदर भएको मुख्य निर्वाचन कार्यालय सल्यानले जनाएको छ । मुख्य निर्वाचन अधिकृत गिरीराज गौतमका अनुसार प्रत्यक्ष तर्फ प्रतिनिधिसभाका लागि खसेको कुल मत ७६ हजार ३ सय ५ मा ७ हजार ३ सय ५९ , प्रदेशसभाअन्तर्गत सल्यान १ मा खसेको ४१ हजार १ सय ७६ मतमा २ हजार ३ सय ४८ र २ मा ४१ हजार ९ सय ६७ मत खसेकोमा १ हजार ८ सय ९८ मत बदर भएका छन ।

समानुपातिकमा प्रतिनिधिसभाका लागि ८४ हजार ७ सय ८९ मत खसेकोमा ६ हजार २ सय १५ र प्रदेशसभामा ८२ हजार ९ सय ९८ मत खसेकोमा ६ हजार २ सय ३१ मत बदर भएको छ । मतदाता शिक्षा प्रभावकारी बनाउन सरोकारवाला सबैको जिम्मेवारी रहे पनि प्रभावकारी नभएकै कारण खसेको मत बढी बदर भएको निर्वाचन कार्यालय सल्यानका प्रमुख निमराज भट्टराईले बताए । प्रत्यक्षमा थोरै चिह्न र समानुपातिकमा धेरै चिह्न भएकाले मतदाता अलमलमा परेका कारण समानुपातिकमा बढी मत बदर भएको उनको भनाइ छ । उनका अनुसार एकै मतदाताले एक चिह्नमा मात्र नभई धेरैमा छाप लगाएको पाइएको छ । निर्वाचनमा कार्यालयले स्वयंसेवक भर्ना गरेर जिल्लाका सबै पालिकामा मतदाता शिक्षा दिएको उनको भनाइ छ ।

सल्यानमा १ लाख ५७ हजार ७ सय १ मतदाता छन् । जिल्लाभरिका २ सय ५ मतदान केन्द्रबाट कुल ८४ हजार अर्थात् ५३.२७ प्रतिशतले मतदान गरेका थिए ।

मतदाता शिक्षा नपाउँदा मत बदर

जुम्ला– जिल्लामा यसपालिको प्रतिनिधिसभा तथा प्रदेशसभा निर्वाचनमा भएको बदर मत हेर्दा मतदाता शिक्षा नाम मात्रै भएको देखिएको छ । प्रत्यक्ष तथा समानुपातिक गरेर ९ हजार ६ सय ४४ मत बदर भएको मुख्य निर्वाचन अधिकृत कार्यालयले जनाएको छ ।

प्रतिनिधिसभातर्फ २ हजार ४ सय ७८ मत बदर भएकोमा प्रदेशसभा (क) तर्फ १ हजार ८२ मत बदर भएको छ । प्रदेशसभा (ख) ६ सय ९८ र प्रदेशसभा समानुपातिकतर्फ २ हजार ९ सय ३७ मत बदर भएको छ । प्रतिनिधिसभा समानुपातिकतर्फ २ हजार ४ सय ४९ मत बदर भएको तथ्यांकमा उल्लेख छ ।

प्रतिनिधिसभामा ४५ हजार २ सय ८४, प्रदेश (क) मा २४ हजार ६ सय ६५ र प्रदेशसभा (ख) मा २० हजार ६ सय ७ खसेको थियो । प्रदेशसभा समानुपातिकतर्फ ४५ हजार ७ सय १३ र प्रतिनिधिसभा समानुपातिकतर्फ ४५ हजार ६ सय १० मत खसेको मुख्य निर्वाचन अधिकृत विष्णुप्रसाद गौतमले बताए । जिल्लाभर कुल ६८ हजार ६ सय ३८ मतदाताले फोटो सहितको मतदाता नामावलीमा नाम दर्ज गरेका थिए ।

मतदाता शिक्षा गाउॅमा नपुगेकोले समस्या भएको स्थानीय देबहादुर थापाले बताए । जिल्ला निर्वाचन अधिकारी महेश शर्मा धेरैजसो मतदाता साक्षर नभएकाले बदर मतको संख्या बढेको प्रतिक्रिया दिन्छन् । एउटै चिह्नमा औंठाछाप र कोठाभन्दा बाहिर स्वास्तिक छाप लगाएको पनि पाइएको छ ।