जुम्लामा मतदाता शिक्षा अभावमा मत बदर- प्रतिनिधि / प्रदेशसभा निर्वाचन २०७९ - कान्तिपुर समाचार

जुम्लामा मतदाता शिक्षा अभावमा मत बदर

डीबी बुढा

जुम्ला — जिल्ला निर्वाचन कार्यालय जुम्लाले मंसिर १४ गते भएको प्रतिनिधिसभा तथा प्रदेशसभा निर्वाचनअघि हरेक पालिकामा नमुना मतदान गरेर मतदाता शिक्षा प्रदान गरेको थियो । तर कुनै पनि मतदाताले आफ्नो मत बदर नगरुन् भन्ने उद्देश्यले गरिएको मतदाता शिक्षा अप्रभावकारी बनेको छ ।

यसपटकको प्रतिनिधिसभा तथा प्रदेशसभा निर्वाचनमा भएको बदर मत हेर्दा 'मतदाता शिक्षा' नाम मात्रै भएको देखिन्छ । जहाँ प्रत्यक्ष तथा समानुपातिक गरेर ९ हजार ६ सय ४४ मत बदर भएको मुख्य निर्वाचन अधिकृत कार्यालयको तथ्यांकले देखाउँछ ।

प्रतिनिधिसभातर्फ २ हजार ४ सय ७८ मत बदर भएकोमा प्रदेशसभा (१) तर्फ १ हजार ८२ मत बदर भएको छ । प्रदेशसभा (२) ६ सय ९८ र प्रदेशसभा समानुपातिकतर्फ २ हजार ९ सय ३७ मत बदर भएको छ । प्रतिनिधिसभा समानुपातिकतर्फ २ हजार ४ सय ४९ मत बदर भएको तथ्यांकमा उल्लेख छ ।

प्रतिनिधिसभामा ४५ हजार २ सय ८४, प्रदेश (१) मा २४ हजार ६ सय ६५ र प्रदेशसभा (२) मा २० हजार ६ सय ७ खसेको थियो । प्रदेशसभा समानुपातिकतर्फ ४५ हजार ७ सय १३ र प्रतिनिधिसभा समानुपातिकतर्फ ४५ हजार ६ सय १० मत खसेको मुख्य निर्वाचन अधिकृत विष्णुप्रसाद गौतमले बताए ।

जिल्लाभर कुल ६८ हजार ६ सय ३८ मतदाताले फोटो सहितको मतदाता नामावलीमा नाम दर्ज गरेका थिए । मतदाता शिक्षा नपाउनुलाई मत बदर भएको मुख्य कारण मानिएको छ । मतदाता शिक्षा दिने नाममा निर्वाचन आयोगले निर्णय मात्रै गरेको तर कार्यान्वयनमा ध्यान नदिएकाले धेरै मत बदर भएको स्थानीय अगुवाहरू बताउँछन् ।

मतदाता शिक्षा गाउँमा नपुगेको साथै मतदान केन्द्रमा खटिने कर्मचारीले समेत राम्रोसँग बुझाउन नसकेको बुझिएको छ । मतदातालाई स्वस्तिक छाप लगाउने मात्र थाहा भएकाले समस्या भएको स्थानीय अगुवा देबहादुर थापाले जानकारी दिए ।

मतदान केन्द्रमा मतदाताले गोप्य मतदान गर्न पाउने प्राबधान छ । जसकारण मतदान केन्द्रमा खटिएका कर्मचारीले मतदान गरेको चुनाव चिह्न हेर्न मिल्दैन । तर मतपत्रमा भएको चिह्नमा प्रष्ट रुपमा छाप लगाउनेबारे सिकाउन सकिन्छ ।

मतदाता शिक्षित नहुनु, दलका कार्यकर्ताले चाहिने भन्दै धेरै ठाउँमा छाप लगाउन दबाब दिनुले पनि मत बदर हुने सम्भावना हुने जिल्ला निर्वाचन कार्यालय जुम्लाले जनाएको छ ।

जिल्ला निर्वाचन अधिकारी महेश शर्मा धेरैजसो मतदाता साक्षर नभएकाले बदर मतको संख्या बढेको प्रतिक्रिया दिन्छन् । घरदैलोमा पुगेका दलका कार्यकर्ताले पनि मतदाता शिक्षा दिनु पर्नेमा त्यसो हुन नसकेकोमा जोड दिए ।

'मतदाता शिक्षा दिन अधिकतम प्रयास भएको हो, तर जनशक्तिको अभाव र भौगोलिक रुपमा विकट जिल्ला भएकोले समस्या आएको हो,' शर्माले भने, ‘दलहरूले पनि मतदातालाई जागरुक बनाउन कोसिस नगर्नु मुख्य कारण हो ।’

एउटै चिह्नमा औंठाछाप लगाएको, कोठाभन्दा बाहिर स्वस्तिक छाप लगाएको, चिह्न छुने गरेर छाप लगाएको र एकै मतपत्रमा दुई ठाउँमा छाप लगाउँदा मत बदर भएको हो ।


प्रकाशित : मंसिर १२, २०७९ १९:२१
प्रतिक्रिया
पठाउनुहोस्

चर्को ब्याजविरुद्ध जुम्लाका व्यवसायी आन्दोलित

डीबी बुढा

जुम्ला — बैंक तथा वित्तीय संस्थाद्वारा लगाइएको चर्को ब्याजदर फिर्ता हुनुपर्ने माग राख्दै जुम्लाका उद्योगी तथा व्यवसायीहरू आन्दोलित भएका छन् । उनीहरूले पहिलो चरणमा जिल्ला प्रशासन कार्यालय जुम्लामा ज्ञापनपत्र बुझाउँदै तत्काल ब्याजदर फिर्ता गरिनुपर्ने माग राखेका छन् ।


उद्योग वाणिज्य संघ जुम्लाका अध्यक्ष पुरीचन्द्र देवकोटाले प्रमुख जिल्ला अधिकारी मुकेशकुमार केसरीलाई ज्ञापनपत्र बुझाउँदै चर्को व्याजदरले उद्योगी व्यवसायीको ढाडै सेकेको बताए । उनले भने,‘कोरोना महामारीका कारण कलकारखाना पूर्ण रुपमा प्रभावित छ । व्यापार व्यवसायमा तीव्र गिरावट आएको छ । झनै चर्को ब्याजदर बढ्दा नराम्ररी प्रभावित भएको छ । यो अवस्थामा बैंक तथा वितीय संस्थाले ब्याज बढाउनु असान्दर्भिक हो ।’

यस्तै उद्योगीहरूलाई सहजिकरणका लागि आन्तरिक राजस्व कार्यालय र घरेलु तथा साना उद्योग कार्यालयमा हेल्पडेक्स स्थापना गर्नुपर्ने व्यवसायीहरूको माग छ । घरदैलो तथा घुमन्ते व्यवसायहरूलाई कानुनी दायरामा ल्याएर मात्र सञ्चालन गर्ने व्यवस्था मिलाउनु पर्ने पनि उनीहरूले जारी गरेको ज्ञापनपत्रमा उल्लेख छ ।

तर व्यवसायीक र संरक्षणका लागि राखिएका माग सम्बोधन नभए आन्दोलनका थप कार्यक्रम अघि बढाउने उनीहरूले चेतावनी दिएका छन् । ज्ञापनपत्रमा भनिएको छ, ‘विकासोन्मुख अवस्थामा रहेको नेपालमा विश्वव्यापी महामारीका रुपमा रहेको कोरोना भाइरस (कोभिड १९) बाट उद्योगधन्दा कलकारखाना थला परेका छन् । मजदुर तथा कर्मचारीहरू कटौती गर्नुपर्ने अवस्था, उत्पादनमा कमी, इन्धनमा भएको मुल्यवृद्धिले पीडामा परेका उद्योगी व्यवसायीहरू बैंक तथा वित्तीय संस्थाहरुले वृद्धि गरेको व्याजदरका कारण पीडामा परेका छन् ।’ प्रमुख जिल्ला अधिकारी मुकेश कुमार केसरीले व्यापारीहरूको माग सम्बोधनमा पहल गर्ने प्रतिबद्धता व्यक्त गरेका छन्।

प्रकाशित : मंसिर ११, २०७९ १५:५५
पूरा पढ्नुहोस्
प्रतिक्रिया
पठाउनुहोस्
×