मतदाताले रोजे नयाँ उम्मेदवार
कञ्चनपुर — प्रतिनिधिसभामा कञ्चनपुरका सबै क्षेत्रमा हरेक निर्वाचनमा एउटै दल वा गठबन्धन निर्वाचित हुँदै आएको छ । प्रदेशसभाको पहिलो निर्वाचनमा पनि यही देखियो । प्रतिनिधिसभामा ३ वटा निर्वाचन क्षेत्र हरेको कञ्चनपुरमा यस पटकको निर्वाचनमा भने उक्त ट्रेन्ड बदलिएको छ ।
प्रदेशसभामा मिश्रित नतिजा आएको छ भने प्रतिनिधिसभामा पनि एउटै दल वा गठबन्धन निर्वाचित हुने सम्भावना छैन ।
प्रतिनिधिसभामा ३ निर्वाचन क्षेत्रमध्ये २ र ३ मा कांग्रेसका उम्मेदवार विजयी भएका छन् । गठबन्धनबाट उम्मेदवार बनेको कांग्रेसका एनपी साउद क्षेत्र नं. २ बाट र रमेश लेखक क्षेत्र ३ बाट निर्वाचित भएका हुन् । क्षेत्र नं. १ मा गठबन्धनबाटै उम्मेदवार बनेकी माओवादी केन्द्रकी बिना मगर भने एमालेका उम्मेदवार तारा लामा तामाङसँग पराजित भइन् ।
प्रदेशसभातर्फ पनि क्षेत्र नं. १ (१) मा एमालेका वीरबहादुर थापा र १ (२) मा कांग्रेसका दिवानसिंह विष्ट विजयी भए । क्षेत्र नं. २ (१) मा माओवादी केन्द्रका ओमविक्रम भाट र क्षेत्र नं. २ (२) मा कांग्रेसका बहादुरसिंह थापा तथा क्षेत्र न) ३ (१) मा एकीकृत समाजवादीका प्रकाश रावल र ३ (२) मा कांग्रेसका बेलबहादुर राना निर्वाचित भएका छन् ।
प्रतिनिधिसभाको २०४८ देखिको नतिजा हेर्दाहरेक निर्वाचनमा एउटै दलका उम्मेदवार निर्वाचित भएका छन् । लगातार कुनै पनि दलले दोहोर्याएर जित्न सकेको छैनन् । सबै क्षेत्रमा एउटै पार्टीको उम्मेदवार विजयी हुने ट्रेन्डलाई मतदाताले यसपटक भने फेरेका छन् । राजनीतिक दलहरूले गरेको गठबन्धनलाई समेत जनताले फेल गराइ दिएका छन् । ‘जनताले नयाँलाई परीक्षण गर्न खोज्छन्, त्यसकै परिणाम यहाँ पनि देखियो,’ राजनीतिशास्त्रका प्राध्यापक डा. टेकराज पन्तले भने, ‘गठबन्धनको राजनीति पनि कामयाव भएजस्तो लागेन ।’
२०४८ मा कञ्चनपुरमा २ वटा मात्रै निर्वाचन क्षेत्र थिए । उक्त निर्वाचनमा दुवै क्षेत्रमा कांगस्रेका उम्मेदवार विजयी भएका थिए । क्षेत्र नं. १ मा वासुदेव भट्ट र क्षेत्र नं. २ मा तारिणीदत्त चटौत निर्वाचित भए । ०५१ को मध्यावधि निर्वाचनमा निर्वाचन क्षेत्र थपेर ३ बनाइयो । त्यतिबेला तीनवटै क्षेत्रमा एमालेका उम्मेदवार विजयी भए । क्षेत्र नं. १ मा रामकुमार ज्ञवाली, २ मा भोजराज जोशी र ३ मा उर्वादत्त पन्त निर्वाचित भएका हुन् ।
२०५६ मा तीन वटै क्षेत्रमा कांग्रेसले बाजी मार्यो । क्षेत्र नं. १ मा एनपी साउद, २ मा तारिणी दत्त चटौत र ३ मा रमेश लेखक विजयी भए । माओवादी शान्ति प्रक्रियामा आएपछि २०६४ मा भएको पहिलो संविधानसभाको निर्वाचनमा कञ्चनपुरलाई ४ वटा निर्वाचन क्षेत्रमा विभाजन गरियो । त्यतिबेला चारै क्षेत्रमा माओवादी विजयी भयो ।
क्षेत्र नं. १ मा पुरन रानाथारू, २ मा देवीलाल चौधरी, ३ मा टेकेन्द्र भट्ट र ४ मा हरिश ठकुल्ला निर्वाचित भए । क्षेत्र नं. ४ मा कांग्रेसका शेरबहादुर देउवा निर्वाचित भए पनि उनले छाडेपछि उपनिर्वाचनमा माओवादीका ठकुल्ला विजयी भएका हुन् । दोस्रो संविधानसभाको निर्वाचनमा ४ वटै क्षेत्रमा कांग्रेसका उम्मेदवार विजयी भए । क्षेत्र नं. १ मा दिवानसिंह विष्ट, २ मा एनपी साउद, ३ मा बहादुरसिंह थापा र ४ मा रमेश लेखक विजयी भए ।
प्रकाशित : मंसिर १०, २०७९ ०९:५५
