काठमाडौँ — प्रतिनिधिसभा निर्वाचनमा सर्लाही–३ मा नेकपा एमालेका हरिप्रसाद उप्रेती विजयी भएका छन् । उप्रेतीले ३२ हजार ९३८ मत ल्याई विजयी भएका हुन् ।
उनले निकटतम प्रतिद्वन्द्वी नेपाल कम्युनिष्ट पार्टी (माओवादी केन्द्र)का उम्मेदवार नरेन्द्र साह कलवारलाई ७७० मतान्तरले पराजित गरेका हुन् । पराजित नरेन्द्र साह कलवारले ३२ हजार १६८ मत ल्याएका छन् ।
काठमाडौँ — ललितपर क्षेत्र नं ३ को प्रदेशसभा (२) बाट नेकपा एमालेका प्रेमभक्त महर्जन विजयी भएका छन् । उनले नेपाली कांग्रेसका उम्मेदवार जितेन्द्रकुमार श्रेष्ठलाई एक हजार २८ मतान्तरले पछि पार्दै निर्वाचित भएका हुन् ।
निर्वाचन अधिकृत धर्मराज पौडेलका अनुसार महर्जनले नौ हजार ५८ मत प्राप्त गरे । उनका निकटतम प्रतिस्पर्धी कांग्रेसका श्रेष्ठले आठ हजार ३० मत प्राप्त गरे । राप्रपाका उम्मेदवार सविनकुमार खड्काले सात हजार सात सय ४५, नेमकिपाका नरेश महर्जनले एक हजार पाँच सय दुई तथा जनता समाजवादीका दीपक दोर्जे लामाले तीन सय एक मत प्राप्त गरे ।
यस्तै, लोकतान्त्रिक समाजवादीका प्रकाश खड्गीले एक सय ८३, नेश्ललिष्ट पिपुल्स पार्टीका मनिमान निजानन्दले एक सय १४ तथा स्वतन्त्र उम्मेदवारद्वय विनोद कुँवरले पाँच सय एक र विपिन शाहले तीन सय २१ मत प्राप्त गरे । यस क्षेत्रमा ४५ हजार ३५ मतदाता थिए ।
प्रकाशित : मंसिर ९, २०७९ ०४:४९
