सत्ता गठबन्धनलाई हराउँदै रौतहट-२ मा स्वतन्त्रबाट साह विजयी- प्रतिनिधि / प्रदेशसभा निर्वाचन २०७९ - कान्तिपुर समाचार

सत्ता गठबन्धनलाई हराउँदै रौतहट-२ मा स्वतन्त्रबाट साह विजयी

शिव पुरी

रौतहट — प्रतिनिधिसभा सदस्य पदका लागि भएको निर्वाचनमा रौतहटको क्षेत्र नम्बर २ मा स्वतन्त्र उम्मेदवार किरण साह विजयी भएका छन् । उनले नेपाली कांग्रेसका फिरदोस आलमलाई ४ हजार ५९४ मतान्तरले पराजित गरेका हुन् ।

साहले ३२ हजार ८४२ मत ल्याउँदै विजयी भएको मुख्य निर्वाचनको कार्यालय गौरले जनायो । साहका निकटतम प्रतिद्वन्द्वी नेपाली कांग्रेसका आलमले २८ हजार २४८ मत पाए । मुस्लिम बाहुल्य क्षेत्रमा साह पहिलो पटक विजयी भएका हुन् ।

उनका प्रतिद्वन्द्वी आलम कांग्रेस नेता एवं पूर्व मन्त्री मोहम्मद आफताव आलमका जेठो छोरा हुन् । लामो समय माओवादीमा राजनीति गरेका साह मधेसवादी दल हुँदै केही समय अघि एमाले प्रवेश गरेका थिए । पार्टीले टिकट नदिएको र उनको क्षेत्र जसपाको भागमा परेपछि साहले स्वतन्त्रबाट उम्मेदवारी दर्ता गराएका हुन् । उनी क्षेत्र नम्बर ३ का स्वतन्त्र उम्मेदवार प्रभु साह प्यानलका हुन् ।

प्रभुले नै उनलाई स्वतन्त्रमा उम्मेदवारी दिन लगाएका हुन् । एमाले जसपा गठबन्धनका उम्मेदवार शैलेन्द्र साहले २ हजार १४२ मत पाए । एमालेका मधेशप्रदेश सदस्य समेत रहेका शैलेन्द्र जसपाबाट टिकट लिएर चुनाव लडेका हुन् । उनले अन्तिम समयमा किरणलाई समर्थन गरेका थिए ।

किरण २०७४ को संसदीय चुनावमा पूर्व मन्त्री आफताव आलमसित १ हजार ५ सय ५५ मतले पराजित भएका थिए । अहिले आफतावका छोरा फिरदोस सित आमनेसामने भए ।

रौतहटको चारवटै क्षेत्रको प्रतिनिधि र प्रदेशसभाको मतगणना सकिएको जिल्ला निर्वाचनको कार्यालयले जनायो । क्षेत्र नम्बर १ मा एकिकृत समाजवादीका अध्यक्ष माधवकुमार नेपाल, २ मा स्वतन्त्रबाट किरण साह, ३ मा प्रभु साह र ४ बाट कांग्रेसका देवप्रसाद तिमल्सिनाले जितेका छन् ।

प्रकाशित : मंसिर ८, २०७९ २१:५७
प्रतिक्रिया
पठाउनुहोस्

रूपन्देही- २ (२) मा एमालेका श्रेष्ठ विजयी

अमृता अनमोल

बुटवल — रूपन्देही निर्वाचन क्षेत्र नम्बर २ (२) बाट नेकपा एमालेका भोजप्रसाद श्रेष्ठ प्रदेशसभा सदस्यमा विजयी भएका छन् । श्रेष्ठले १६ हजार ३ सय  मत प्राप्त गरेका छन् ।

उनका निकटतम प्रतिस्पर्धी माओवादी केन्द्रका वामदेव घिमिरे क्षेत्रीले ९ हजार ४ सय १० मत प्राप्त गरेका छन् । निर्वाचन कार्यालयका अनुसार यो क्षेत्रमा ४० हजार १ सय ५८ मत खसेको थियो।

विजयी श्रेष्ठ यसअघि यही क्षेत्रबाट निर्वाचित भई लुम्बिनी प्रदेश सरकारका स्वास्थ्यमन्त्री समेत बनेका थिए ।

प्रकाशित : मंसिर ८, २०७९ २१:५४
पूरा पढ्नुहोस्
प्रतिक्रिया
पठाउनुहोस्
×