कास्कीमा कांग्रेस नेताको घरमा कार्यकर्ताहरूको नाराबाजी- ‘अन्तर्घाती मुर्दावाद’- प्रतिनिधि / प्रदेशसभा निर्वाचन २०७९ - कान्तिपुर समाचार

कास्कीमा कांग्रेस नेताको घरमा कार्यकर्ताहरूको नाराबाजी- ‘अन्तर्घाती मुर्दावाद’

दीपक परियार

पोखरा — कास्कीको निर्वाचन क्षेत्र नम्बर १ मा अन्तर्घातका कारण यसपटकको चुनावमा पराजय बेहोर्नुपरेको भन्दै कांग्रेस कार्यकर्ताहरूले पूर्व जिल्ला सभापति कृष्ण केसीको घर अगाडि नाराबाजी गरेका छन् ।

कांग्रेस कार्यकर्ताले बिहीबार साँझ पोखरा–१३ बाँझापाटनस्थित केसीको घरमा पुगेर नाराबाजी गरेका हुन् ।

उनीहरूले एमालेसँग ७० लाख रुपैयाँ लिएर केसीले अन्तर्घात गरेको आरोप लगाएका छन् । यस क्रममा उनीहरूले ‘अन्तर्घाती मुर्दावाद, कृष्ण केसी पार्टी छोड्’ भन्दै नाराबाजी गरिरहेका छन् ।

कास्की–१ मा केसी प्रतिनिधिसभा सदस्य उम्मेदवारको आकांक्षी थिए । उनको सट्टामा कांग्रेस कास्की सभापति किशोरदत्त बरालले टिकट पाए ।

आफूले टिकट नपाएपछि उनले बराललाई असहयोग गर्दै आएका थिए । कास्की १ मा बरालले एमालेका मनबहादुर गुरुङसँग प्रतिस्पर्धा गरिरहेका छन् । मतगणना भइरहँदा उनी गुरुङसँग पराजित हुने अवस्था देखेपछि कांग्रेस कार्यकर्ताहरू विरोधमा उत्रिएका हुन् ।

यता कास्की–१(२) मा पनि कांग्रेसका दीपक गुरुङ ‘माइला’ एमालेका बेदबहादुर गुरुङसँग पराजित भइसकेका छन् । कास्की–१(१) मा पनि एमालेका खगराज अधिकारीले सत्ता गठबन्धनतर्फबाट माओवादी केन्द्रका उम्मेदवार दीपक कोइरालालाई पछाडि पारेका छन् । कांग्रेसको प्रभाव क्षेत्र मानिएको वडामै सत्ता गठबन्धनका उम्मेदवारलाई मत नआएर हार्ने स्थिति हुनुमा केसीकै अन्तर्घात कारण रहेको कास्कीका कांग्रेस कार्यकर्ताहरूले आरुोप लगाउँदै आएका छन् ।

प्रकाशित : मंसिर ८, २०७९ १९:२३
प्रतिक्रिया
पठाउनुहोस्

पूर्वी नवलपरासी- २ मा कांग्रेसका कार्की विजयी     

कान्तिपुर संवाददाता

काठमाडौँ — पूर्वी नवलपरासी क्षेत्र नम्बर २ बाट प्रतिनिधिसभामा फराकिलो मतान्तरले कांग्रेसका विष्णुकुमार कार्की विजयी भएका छन् । अघिल्लो पटक आफूलाई १३ सय मतले पराजित गरेका एमाले नेता तिलबहादुर महत क्षेत्री (तिलक)लाई यस पटक कार्कीले २ हजार भन्दा बढी मतान्तरले पछि पारेका हुन् । 

कार्कीले ३६ हजार १ सय ४ मत पाएका छन् भने महतले ३४ हजार ८३ मत पाएका छन् । दुवैको मतान्तर २ हजार २१ रहेको निर्वाचन कार्यालयले जनाएको छ । नवनिर्वाचित कार्की रुपन्देहीबाट पूर्वी नवलपरासी बसाइ सरेर आएका हुन् । उनले राजनितिसँगै व्यापार ब्यवसाय गर्दै आएका छन् । उनी क्रसर र इट्टा उद्योग संचालक हुन् । २०४८ सालपछि हाल सम्पन्न ७ वटा निर्वाचनमा यहाँ ५ पटक एमाले विजयी भएको छ । ०६४ साल र यस पटक कांग्रेसका उम्मेदवार विजयी भएका हुन् ।

०७४ सालको प्रतिनिधिसभामा १३ सय मतान्तरले एमालेका तिलक महतसँग पराजित कार्कीले ५ वर्षपछि उनै महतलाई २ हजार भन्दा बढी मतले हराए संसदको यात्रा थालेका छन् । विनोद चौधरीले यो क्षेत्रमा उम्मेदवार हुन खोज्दा देउवासँगको घनिष्टताका कारण कार्कीले टिकट पाउन सफल भएका हुन् । प्रतिनिधि सभाका दुई वटै क्षेत्रमा यहाँ कांग्रेस विजयी भएको छ । क्षेत्र नम्बर १ मा कांग्रेसकै शशांक कोइराला विजयी भइसकेका छन् ।

प्रकाशित : मंसिर ८, २०७९ १९:२२
पूरा पढ्नुहोस्
प्रतिक्रिया
पठाउनुहोस्
×