लमजुङमा राष्ट्रिय स्वतन्त्र पार्टीका केसीको मत ६ हजारनजिक

कतिपय पुराना पार्टीहरुले समेत ५ सय हाराहारी मत ल्याइरहँदा स्वतन्त्र पार्टीका केसीले एमाले र सत्ता गठबन्धन उम्मेदवारपछि आफ्नो तेस्रो हैसियत देखाएका छन् । स्वतन्त्र पार्टीका उम्मेदवारमा सत्ता गठबन्धनको असतुष्ट मत पुगेको सत्ता गठबन्धनका नेताकार्यकर्ताको बुझाई छ । एक नेताका अनुसार स्वतन्त्रका उम्मेदवारले पाउने मतले हारजितको निर्णय गर्नसक्छ ।

क्वहोलासोंथर, दोर्दी, दूधपोखरी गाउँपालिका र मध्यनेपाल नगरपालिका गणना हुँदासम्म उनको मत १ हजार ९ सय ८९ थियो । सुन्दरबजार र राइनास नगरपालिका गणना सकिँदा उनले ३ हजार ७ सय ५९ मत बढाएको हो । सुन्दरबजार नगरपालिका ६ घर भएका उनको पक्षमा बेंसीसहर नगरपालिकाबाट मत खस्ने समर्थकहरुले दावी गरेका छन् ।

जिल्ला निर्वाचन अधिकारी नारायण सापकोटाका अनुसार बुधबार बिहानसम्म ५३ हजार ५ सय १२ मतगणना भइसकेको छ । अब २६ हजार ८ सय १७ मत गन्न बाँकी छ । गणना भइसकेकामध्येबाट एमाले उम्मेदवार पृथ्वीसुब्बा गुरुङले २२ हजार ४ सय ३८ मत प्राप्त गरेका छन् । माओवादी केन्द्रका देवप्रसाद गुरुङले २२ हजार १ सय ३० मत प्राप्त गरेका छन् ।

मंगोल नेश्नल अर्गनाइजेशनका विकास गुरुङले ३ सय ९९, राप्रपाका बालचन्द्र श्रेष्ठले ८ सय ६९, जसपाका नरेन्द्रबहादुर गुरुङले १ सय १२, आमूल परिवर्तन मसिहा पार्टीका नन्दजंग गुरुङ ४८, नेपाली कांग्रेस (बीपी) का लक्ष्मीकान्त पौडेल ४१, नेमकिपाका राजेन्द्रप्रसाद प्रजापति १८, राप्रपा नेपालका टकबहादुर गुरुङ २६ र स्वतन्त्र उम्मेदवार चन्दन बस्यालले १८ मत पाएका छन् ।