संखुवासभामा अझै सुरु भएन मतगणना
संखुवासभा — संखुवासभमा अझै मतगणना सुरु हुन सकेको छैन । विकट मतदान केन्द्रका मतपेटिका मतगणनास्थल खाँदबारी ल्याउन ढिलाइ हुँदा मतगणनाको काम सुरु हुन नसकेको हो । सहायक मुख्य निर्वाचन अधिकृत ईन्द्रप्रसाद सापकोटाका अनुसार भोटखोलाको गोलाबजारमा संकलन गरिएको मतपेटिका ल्याउन ढिलाइ हुँदा मतगणना हुन नसकेको हो ।
सोमबार दुर्गम भोटखोला गाउँपालिकाका ३ वटा मतदान केन्द्रका मतपेटिका सेनाको हेलिकप्टरबाट सोमबार सदरमुकाम खाँदबारी ल्याइएको थियो । विकट मानिएको च्याम्ताड्ड मतदान केन्द्रको मतपेटिका हिँडाएर ल्याउँदा ढिलाइ भएको हो । किमाथांका, थुदाम र रिदाक मतदान केन्द्रका मतपेटिका सेनाको हेलिकप्टरबाट ल्याइए पनि गोला बजारमा संकलन गरिएको ११ केन्द्रको मतपेटिका मंगलबार सोमबार मध्यरातिमात्र आइपुगेको छ । च्याम्ताड्ड मतदान केन्द्रका कर्मचारी १५ घण्टा हिँडेर गोलाबजार आएका थिए ।
मंगलबार बिहान सर्वदलीय बैठक बसेर मतगणना सुरु गर्ने तयारी गरिएको सापकोटाले बताए । १ सय ६४ केन्द्रको मतपेटिका संकलन भइसकेको उनले बताए । उनका अनुसार विकटता र कच्ची सडक भएकाले मतपेटिका समयमै ल्याउन नसकिएको हो । मतगणना जिल्ला समन्वय समितिको सभाहलमा गर्ने तयारी गरिएको छ । तारजाली लगाएर सीसीटीभी क्यामराको निगरानीमा मत गन्ने तयारी गरिएको छ । संखुवासभामा ५६ प्रतिशत अर्थात् ६५ हजार ८९२ मत खसेको जिल्ला निर्वाचन कार्यालयले जनाएको छ । संखुवासभामा १ लाख १७ हजार ५ सय ५४ मतदाता रहेका छन् ।
प्रकाशित : मंसिर ६, २०७९ ०८:२१
