पाल्पामा मतपेटिका संकलनमा ढिलाइ हुँदा मतगणना हुन सकेन - प्रतिनिधि / प्रदेशसभा निर्वाचन २०७९ - कान्तिपुर समाचार

पाल्पामा मतपेटिका संकलनमा ढिलाइ हुँदा मतगणना हुन सकेन 

माधव अर्याल

पाल्पा — दुई प्रतिनिधि र चार प्रदेशसभा रहेको पाल्पामा मतपेटिका संकलन गर्न ढिलाइ हुँदा मतगणना समयमा हुन सकेको छैन । क्षेत्र नम्बर १ र २ को दुर्गम भेगबाट मतपेटिका ल्याउन राति १ बजेकाले संकलन गर्न ढिलाइ भएको जिल्ला निर्वाचन अधिकारी रुक्मांगत अर्यालले जानकारी दिए । 

उनका अनुसार दुर्गमबाट आउनै ढिलाइ भएको र कर्मचारीले मतपेटिका संकलन गर्न समय लागेका कारण पनि सर्वदलीय बैठक बस्न समयमा नसकेको हो । क्षेत्र नम्बर १ का निर्वाचन अधिकृत गोपालप्रसाद ढकालका अनुसार ११ बजे सर्वदलीय बैठक हुनेछ । क्षेत्र नम्बर २ का मुख्य निर्वाचन अधिकृत कमलराज बिष्टले बिहान साढे १० बजे सर्वदलीय बैठक बोलाइएको बताए ।

सर्वदलीय बैठक बसेर दलको प्रतिनिधि जुट्नासाथ मतगणना सुरु हुने मुख्य निर्वाचन अधिकृत बिष्टले बताए । मतपेटिकाहरू मतगणनास्थलमा सोमबार बिहान ५ बजेमात्र मतदान अधिकृतहरुले बुझाएका छन् । क्षेत्र नम्बर १ को रामपुर नगरपालिकास्थित नापी कार्यालय भवन र क्षेत्र नम्बर २ को तानसेनस्थित बालमन्दिर भवनमा मतगणना हुने पाल्पाका प्रमुख जिल्ला अधिकारी जगन्नाथ पन्तले बताए ।

प्रतिनिधिसभा र प्रदेशसभा सदस्य निर्वाचनमा ६ महिनाअघि भएको स्थानीय चुनावको भन्दा करिब ९ प्रतिशत कम मतदान भएको जिल्ला निर्वाचन कार्यालयले जनाएको छ । निर्वाचन कार्यालयका अनुसार प्रतिनिधिसभा र प्रदेशसभा सदस्यका लागि आइतबार भएको मतदानमा ६० दशमलव ९० प्रतिशत मतदाता सहभागी भएका छन् । गत वैशाखमा सम्पन्न स्थानीय तहको निर्वाचनमा करिब ७० प्रतिशत मतदाताले मत खसालेका थिए ।

यसआधारमा स्थानीय चुनावमा मतदान गरेका करिब ९ प्रतिशत मतदाताले यसपटकको निर्वाचनमा मतदान गरेननन् । स्थानीय चुनावमा योग्य ठहरिएका कुल मतदाताको सूचीमै यसपटक ६ हजार बढी थपिएका थिए । जिल्ला निर्वाचन कार्यालयका अनुसार स्थानीय तहको निर्वाचनमा एक लाख ९९ हजार ६ सय ९० मतदाता रहेका थिए । दोहोरो नाम हुनेको हटाउने, मृत्यु, बसाइसराइँलगायतका घटाएर २ लाख १ हजार ३ सय २६ मतदाता पुगेका थिए ।


प्रकाशित : मंसिर ५, २०७९ ०९:५०
प्रतिक्रिया
पठाउनुहोस्

पाल्पामा महिलाकै जिम्मामा मतदान केन्द्र 

माधव अर्याल

पाल्पा — पाल्पाको क्षेत्र नम्बर २ को तानसेन नगरपालिका वडा नम्बर २ को रेडक्रस सोसाइटी परिसरको दुई केन्द्रमा मतदान अधिकृतसहित सबै कर्मचारी र सुरक्षाकर्मी महिला खटिएका छन् । मतदान केन्द्र (क) मा करदाता सेवा कार्यालयकी प्रमुख गीता पाण्डेय र (ख) मा त्रिभुवन बहुमुखी क्याम्पसकी उपप्राध्यापक मीना ढकाल मतदान अधिकृत खटिएका छन् । 

मुख्य निर्वाचन अधिकृत कमलराज बिष्टका अनुसार महिला एक्लैले पनि काम गर्न सक्छन् भन्ने विश्वासका साथ दुई केन्द्रमा महिलामात्रै खटाइएको बताए । उनका अनुसरा यसलाई नमुना मतदान केन्द्रका रुपमा लिइएको छ । महिला मतदान अधिकृत र सहायक अधिकृत धेरै स्थानमा खटाइएपनि यहाँ सहायक मतदान अधिकृत र सहायक कर्मचारी, सुरक्षाकर्मी, म्यादी प्रहरीलगायत स्वयंसेवकसमेत महिला नै रहेको जिल्ला निर्वाचन अधिकारी रुक्मांगत अर्यालले जानकारी दिए ।

पाण्डेयसँग सहायक मतदान अधिकृत भवानी पंगेनी र ढकालसंग सहायक मतदान अधिकृत ममता ज्ञवाली खटिएकी छन् । मतदानमा खटिएका महिला कर्मचारीलाई व्यवस्थापनमा सहज होस् भनेर नजिकैको केन्द्रमा महिला कर्मटारी खटाइएको हो । यसअघिको निर्वाचनमा पनि करदाता सेवा कार्यालयकी प्रमुख पाण्डेयले मतदान अधिकृतको जिम्मेवारी पूरा गरिसकेकी हुन् ।

महिला मात्र रहेको केन्द्रमा आठ/आठ जना महिला कर्मचारी छन् । चार जना स्वयंसेवक छन् । सीता थापाको नेतृत्वमा जनपद र म्यादी गरी १६ जना सुरक्षाकर्मी खटिएका छन् । यो केन्द्रलाई जिल्ला सुरक्षा समितिले सामान्यको सूचीमा राखेको छ । महिला केन्द्रमा निर्माण सर्वदलीय तथा सर्वपक्षीय बैठक राखेर निर्वाचनलाई स्वच्छ निष्पक्ष र भयरहित वातावरणमा सम्पन्न गराउन सबैले सहयोग र साथ दिने प्रतिबद्धता जनाएको बताएका छन् ।

सबै महिला कर्मचारी र सुरक्षाकर्मीले निर्वाचनलाई सफलता पूर्वक सम्पन्न गराउने गरी सहयोग जुटेको मतदान अधिकृत पाण्डेयले बताइन् । जिल्ला निर्वाचन कार्यालयका अनुसार वडा नम्बर २ रहेको रेडक्रस सोसाइटीको क केन्द्रमा ७ सय २८ र ख केन्द्रमा ७ सय ६९ गरी १ हजार ४ सय ९७ मतदाता रहेका छन् । जिल्लामा १ सय १८ मतदान केन्द्रमा २ सय ४६ र दुई अस्थायी गरी २ सय ४८ मतदान केन्द्रमा २ लाख १ हजार ३ सय २६ जना मतदाता छन् ।

प्रकाशित : मंसिर ४, २०७९ ०६:३०
पूरा पढ्नुहोस्
प्रतिक्रिया
पठाउनुहोस्
×