दैलेखमा ५६ प्रतिशत मत खस्यो, सोमबार बिहानबाट गणना गरिने
काठमाडौँ — दैलेखमा ५६.४२ प्रतिशत मतदान खसेको छ । जिल्लाका २ सय ७ मतदान केन्द्रमा भएको चुनावमा ५६.४२ प्रतिशत मत खसेको हो । विभिन्न मतदानस्थलबाट मतपेटिका संकलनको काम भइरहेको छ ।
मुख्य निर्वाचन अधिकृत बलराम लम्सालले सोमबार बिहान ८ बजेबाट मतगणना गर्ने तयारी भइरहेको बताए । जिल्लाका २ वटा प्रतिनिधिसभा र ४ प्रदेशसभा छन् ।
मतगणना स्थलमा तारजाली र सीसीटीभी राखिएको छ । जिल्लामा १ लाख ५८ हजार ९ सय ५८ मतदाता थिए । जसमा ८१ हजार ७ सय ८१ मत खसेको छ ।
निर्वाचनमा महिलाको सहभागिता ५३ प्रतिशतभन्दा बढी छ । खसेको मतमा महिलाहरुको संख्या ४३ हजार चार सय ५४ र पुरुषतर्फ ३८ हजार तीन सय २७ रहेको छ ।
प्रकाशित : मंसिर ४, २०७९ २२:५०