मकवानपुरमा ५९ प्रतिशत मतदान, मतगणना सोमबार
मकवानपुर — मकवानपुर जिल्लामा सोमबार मात्र प्रदेशसभा र प्रतिनिधिसभा निर्वाचनको प्रत्यक्षतर्फको मतगणना गरिने भएको छ । प्रमुख जिल्ला अधिकारी राजेन्द्रदेव पाण्डेका अनुसार बिहान ८ बजेका लागि सर्वदलीय बैठक डाकिएको छ ।
‘सर्वदलीय बैठकबाट भएको सहमतिअनुसार मतगणना प्रक्रिया अगाडि बढाउने छौं' उनले भने,‘विकट स्थानबाट मतपेटिका ल्याउन समय लाग्ने देखिन्छ ।’ अहिले मतपेटिका संकलन कार्य भइरहेको बताए । राति करिब २ बजेसम्ममा मतपत्र आइसक्ने अनुमान गरिएको छ । एकैपटक आठ स्थानमा मतगणना गर्ने तयारी जिल्ला निर्वाचन अधिकृतको कार्यालयले तयार गरेको छ । प्रजिअ पाण्डेका अनुसार जिल्लामा प्रारम्भिक तथ्यांक अनुसार करिब ५९ प्रतिशत मत खसेको छ ।
मकवानपुर जिल्लाबाट ३ लाख ७ सय ३३ जना मतदाता रहेका थिए । जिल्लामा दुईवटा प्रतिनिधिसभा निर्वाचन र चारवटा प्रदेशसभा निर्वाचन क्षेत्र रहेका छन् ।
प्रकाशित : मंसिर ४, २०७९ १९:३१