मतदान केन्द्र अपांगतामैत्री नहुँदा समस्या- प्रतिनिधि / प्रदेशसभा निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

मतदान केन्द्र अपांगतामैत्री नहुँदा समस्या

रासस

नवलपरासी — पूर्वी नवलपरासी कावासोती-६ विष्णुनगरस्थित ९० वर्षीया पवित्रा काफ्लेले मतदान गरिन् । मतदान महत्त्वपूर्ण भएकाले मतदान गर्न आएको काफ्लेको भनाइ छ ।


शारीरिक रुपमा अशक्त काफ्लेले ‘ह्विलचियर’को साहारामा भए पनि मतदान केन्द्रसम्म आइ मतदान गर्न पाउँदा खुसी लागेको बताइन् । कावासोती–६ विष्णुनगरको जनता माध्यामिक विद्यालयमा रहेको मतदान केन्द्रमा उनले मत खसालिन् ।

कावासोतीकै गोमता भूर्तेल पनि शारीरिक रुपमा अशक्त छिन् । उनी पनि ‘ह्विलचियर’ प्रयोग गर्छिन् । तर गत स्थानीय तहको निर्वाचनमा मतदानस्थल अपाङ्गमैत्री नहुँदा उनलाई मत खसाल्न गाह्रो भयो ।

देवचुली-१५ की ८८ वर्षीया ज्ञानकुमारी श्रेष्ठ पनि ‘ह्विलचियर’ बिना आवतजावत गर्न सक्दिनन् । उनी मताधिकारको सहजताका लागि अपाङ्गतामैत्री मतदान केन्द्र हुनुपर्ने बताउँछिन् । समथर स्थानमा भन्दा पहाडी भेगमा मतदान केन्द्रसम्म पुग्न अपाङ्ग व्यक्तिहरुलाई असहजता हुने उनको भनाइ छ ।

कावासोतीका दलबहादुर पाण्डे भने दृष्टिविहीन छन् । उनलाई पनि अन्यलाई झैं मतदानका लागि केन्द्र पुग्न कठिन छ । तर अरुको सहायतामा नभइ आफैं मत हाल्न मन लागेको उनी बताउँछन् । तर यसका लागि सहज व्यवस्था नहुँदा त्यो सम्भव भएन । प्रविधिको प्रयोग र डिजिटल माध्यमबाट मत हाल्ने व्यवस्था भए दृष्टिविहीनलाई सहज हुने उनको तर्क छ । देशभर कुल मतदातामध्ये दुई प्रतिशत अर्थात् करिब तीन लाख ६० हजार अपाङ्गता भएका छन् ।

प्रकाशित : मंसिर ४, २०७९ १५:१३
प्रतिक्रिया
पठाउनुहोस्

मौसमविद् भन्छन् : मौसम सफा छ, ढुक्कले मतदान गरौँ

रासस

काठमाडौँ — प्रतिनिधिसभा तथा प्रदेशसभा सदस्य निर्वाचनको दिन आज देशभर मतदान भइरहेको छ ।  मतदानको प्रतीक्षामा रहेका मतदातालाई मौसम कस्तो होला भन्ने चासो हुनसक्छ । देशभरको मौसम सामान्यतया सफा रहने भएकाले ढुक्कका साथ मतदान गर्न पाउने जल तथा मौसम विज्ञान विभाग, मौसम पूर्वानुमान महाशाखाले जनाएको छ ।

महाशाखाका मौसमविद् गङ्गा नगरकोटीले आज देशैभरको मौसम सामान्यतया सफा रहेको जानकारी दिइन् । 'आज देशभरको मौसम सफा रहेको छ । हिमाली भू–भागका एक÷दुई स्थानमा हल्का हिमपातको सम्भावना छ, तर, त्यति धेरै असर हुने देखिँदैन,' उनले भनिन् । महाशाखाले आज दिनभरको मौसम सफा रहने भएकाले ढुक्कका साथ मतदान गर्न आग्रह गरेको छ ।

हाल नेपालमा पश्चिमी वायुको सामान्य प्रभाव रहेको छ । प्रदेश १, गण्डकी प्रदेशका पहाडी भू–भागमा आंशिक बदली रही बाँकी भू–भागमा मौसम सामान्यतया सफा रहेको छ । दिउँसो प्रदेश १ र गण्डकी प्रदेशका पहाडी भू–भागमा आंशिक बदली रही बाँकी भेगमा मौसम सामान्यतया सफला रहने छ । सोही प्रदेशका हिमाली भू–भागका एक वा दुई स्थानमा हल्का हिमपातको सम्भावना रहेको महाशाखाले जारी गरेको मौसम पूर्वानुमान बुलेटिनमा उल्लेख छ ।

आज काठमाडौंको न्यूनतम ८ दशमलव ८ र अधिकतमतापक्रम २२ दशमलव ४ डिग्री सेल्सियस रहने छ ।

प्रकाशित : मंसिर ४, २०७९ १२:१३
पूरा पढ्नुहोस्
प्रतिक्रिया
पठाउनुहोस्
x
×