महिलाको जिम्मा मतदान- प्रतिनिधि / प्रदेशसभा निर्वाचन २०७९ - कान्तिपुर समाचार

महिलाको जिम्मा मतदान

मतदान अधिकृत, सहायक अधिकृत, सहयोगी, सुरक्षाकर्मी र म्यादी सबैमा महिला परिचालनले उत्साह
कान्तिपुर टिम

काठमाडौँ — प्रतिनिधिसभा र प्रदेशसभा सदस्य निर्वाचनको मतदानका लागि कतिपय केन्द्रमा सबै महिला कर्मचारी खटाइएको छ । ती केन्द्रमा मतदान अधिकृतदेखि सुरक्षाको जिम्मेवारीसमेत महिलाले लिएका छन् ।मोरङमा विराटनगरस्थित आदर्श बालिका माध्यमिक विद्यालयका तीनवटै केन्द्रमा महिला कर्मचारीमात्रै खटाइएको छ ।

मतदान केन्द्र (क) मा दीपिका खड्गी, (ख) मा समीक्षा पोखरेल र (ग) मा सीमा यादव मतदान अधिकृत छन् भने १३ प्रहरीको नेतृत्व सई कोपिला भुजेलले गरेकी छन् । तीनै जना मतदान अधिकृतका साथै सहायक मतदान अधिकृत, कर्मचारी र स्वयंसेवक पनि महिला नै खटाइएको मुख्य निर्वाचन अधिकृत दुर्गाप्रसाद ढुंगेलले बताए । मतदान अधिकृत खड्गीले यहाँको तीनवटै मतदान केन्द्रमा २ हजार ४ सय ७६ मतदाता रहेको बताइन् । उनले मतदान केन्द्र निर्माण गर्नुका साथै सर्वदलीय बैठकलगायतका सम्पूर्ण तयारी पूरा गरिसकेको बताइन् ।

प्रतिनिधिसभाका ६ र प्रदेशसभाका १२ क्षेत्र रहेको मोरङमा मुलुकमै सबैभन्दा बढी ७ लाख ३५ हजार ५ सय २५ मतदाता छन् । यसमा महिला ३ लाख ६१ हजार १ सय ९३ र पुरुष मतदाता ३ लाख ७४ हजार ३ सय २६ छन् । मतदानका लागि जिल्लाभरि ३ सय ६ मतदानस्थलमा ८ सय ३९ मतदान केन्द्रमा निर्वाचनका लागि सम्पूर्ण कर्मचारी र सुरक्षाकर्मी पुगिसकेको मुख्य निर्वाचन अधिकृत ढुंगेलले बताए ।

चितवन भरतपुर मावि मतदान केन्द्र व्यवस्थापन गर्दै म्यादी प्रहरी । तस्बिर : रमेशकुमार पौडेल/कान्तिपुर

जिल्लास्थित अस्थायीसहित ८ सय ४१ मतदान केन्द्रको सुरक्षाका लागि नेपाल प्रहरी २ हजार ८२, म्यादी प्रहरी ३ हजार ६ सय १६ जना पहिलो सुरक्षा घेराका लागि, दोस्रो सुरक्षा घेरामा १ हजार ५५ सशस्त्र प्रहरी र तेस्रो घेराका लागि ६ सय ५० नेपाली सेना र अनुसन्धान प्रहरी गरी ७ हजार ७ सय १७ सुरक्षाकर्मी परिचालन गरिएको मोरङका प्रमुख जिल्ला अधिकारी (प्रजिअ) काशीराज दाहालले बताए । मोरङमा ५० अतिसंवेदनशील र ११४ संवेदनशील मतदान केन्द्र रहेकाले दोस्रो घेरामा पनि सेना परिचालन गर्ने निर्णय गरेको उनले बताए ।

पाँचथरका तीन मतदान केन्द्रको जिम्मेवारी महिला कर्मचारीले पाएका छन् । यहाँको सुखबोध मावि जोरसालस्थित मतदानस्थलका तीनवटै केन्द्रमा अधिकृत, सहायक अधिकृत, सहयोगी, सुरक्षाकर्मी र म्यादी सबै महिला खटाइएको हो । मुख्य निर्वाचन अधिकृत टिकेन्द्र दाहालका अनुसार यहाँ प्रत्येक केन्द्रमा ८ जनाका दरले २४ कर्मचारी र ६ जनाका दरले १८ सुरक्षाकर्मी गरी कुल ४२ कर्मचारी खटाइएको छ ।

‘अघिल्ला निर्वाचनमा कुनै एउटा मतदान केन्द्रमा महिलालाई जिम्मेवारी दिइन्थ्यो, यस पटक तीनवटै केन्द्रमा सबै जनशक्ति महिला मात्रै छौं, यसले हामीमा उत्साह थपिएको छ,’ सुखबोध मावि मतदान केन्द्र ‘क’ की मतदान अधिकृत निर्मला दाहालले भनिन् । उनीहरूले मतदानस्थल व्यवस्थापनसँगै निर्वाचन प्रक्रियाका लागि आवश्यक संरचना तयार गरेका छन् । यस केन्द्रमा फिदिम नगरपालिका–४ का २ हजार ८ सय मतदाता छन् । योसहित जिल्लाभर ५ महिलालाई मतदान अधिकृत र १५ जनालाई सहायक मतदान अधिकृतको जिम्मेवारी दिइएको मुख्य निर्वाचन अधिकृतको कार्यालयले जनाएको छ ।

पाँचथरको फिदिमस्थित सुखबोध मावि मतदानस्थलको सुरक्षार्थ महिला प्रहरी । तस्बिर : लक्ष्मी गौतम/कान्तिपुर

पर्सामा वीरगन्ज महानगरपालिका–५ स्थित थारू छात्रावास मतदान केन्द्र महिलाले नै सञ्चालन गर्दै छन् । क, ख र ग गरी ३ वटा मतदान केन्द्रका मतदान अधिकृत महिला छन् । यसबाहेक २१ सहायक कर्मचारी पनि महिला छन् । यो ‘विशेष मतदान केन्द्र’ का सुरक्षा कमान्डर पनि महिला सुरक्षाकर्मी नै छन् । यहाँ मतदान अधिकृत जिल्ला अदालतका शाखा अधिकृतहरू क्रमश: अञ्जु परियार, जमुना धिताल र रीतिका शर्मा छन् । ‘२१ सहायक कर्मचारी महिला छन्, सुरक्षाको जिम्मेवारी नेपाल प्रहरी सहायक निरीक्षक श्रीयंका बस्नेतले लिनुभएको छ,’ शर्माले भनिन्, ‘सुरक्षाकर्मीमा पनि आधाजसो महिला छन् ।’

आफूले स्थानीय तह निर्वाचनमा पनि मतदान अधिकृतको जिम्मेवारी निर्वाह गरिसकेकाले यस पटक समस्या नहुने उनले बताइन् । यो केन्द्रमा कुल २ हजार २ सय ५७ मतदाता रहेको उनले बताइन् । ‘हामी सबै अनुभवी छौं,’ उनले भनिन्, ‘महिलाले सञ्चालन गरेका केन्द्र भएकाले सरोकारवाला सबैले सहयोग गरेकाले खासै समस्या भएको छैन ।’

पर्सामा ४५ जना महिला मतदान अधिकृत खटिएको मुख्य निर्वाचन अधिकृत विनोदकुमार पोखरेलले बताए । जिल्लामा निर्वाचनका लागि खटिएका ११ हजार जनशक्ति खटिएका छन् । तिनमा ४ हजार ६ सय सुरक्षाकर्मी, २ हजार म्यादी प्रहरी, ४ हजार ५ सय कर्मचारी र स्वयंसेवक छन् । ३ लाख ४५ हजार मतदाता रहेको नुवाकोटमा १ सय ६७ स्थायी र २ अस्थायी गरी १ सय ६९ मतदानस्थल छन् । ४ सय १५ स्थायी र २ अस्थायी गरी ४ सय १७ मतदान केन्द्र छन् ।

चितवनको भरतपुर महानगरपालिका–१० स्थित भरतपुर मावि मतदानस्थलका चारवटै मतदान केन्द्रको जिम्मा महिलाले लिएका छन् । मतदान अधिकृत, कर्मचारी र सुरक्षाकर्मी सबै महिला छन् । चितवन–२ मा पर्ने उक्त मतदानस्थलका चार केन्द्रमा ३ हजार ४ सय २९ मतदाता छन् । चार मतदान अधिकृतसहित ३२ कर्मचारी र २३ सुरक्षाकर्मी खटिएका छन् । निर्वाचन कार्यालय चितवनका प्रमुख भीमसेन कार्कीका अनुसार तीन निर्वाचन क्षेत्र रहेको चितवनमा जिल्लाभर १ सय ६२ मतदानस्थलमा ४ सय ६० मतदान केन्द्र छन् । पूरै महिलाले मात्रै सम्हालेको मतदानस्थल भरतपुर मावि मात्रै रहेको कार्कीले बताए । चितवनका मतदान केन्द्रमध्ये ३३ वटा अतिसंवेदनशील र ९० वटा संवेदनशील रहेका कारण सुरक्षा व्यवस्था त्यहीअनुरूप मिलाएको कार्कीको भनाइ छ ।

निर्वाचनका लागि जिल्लाभर ३ हजार ६ सय ८० कर्मचारी र एक केन्द्र बराबर ६ जना सुरक्षार्की खटेको कार्कीले जानकारी दिए । भरतपुर माविमा खट्ने चारमध्ये एक मतदान अधिकृत विष्णुमाया विकले यसअघि तीन पटक मतदान अधिकृत भएर निर्वाचन गराए पनि मतदानस्थलमा सबै महिला खटिएर मतदान गराउन लागेको अनुभव पहिलो भएको बताइन् । चितवन महिला मतदाता धेरै भएको जिल्ला हो । कुल ४ लाख ८ हजार ३ सय ४२ मतदाता रहेकामा महिलाहरू मात्रै २ लाख ९ हजार ३ सय ९ जना छन् ।

नुवाकोटका दुईवटा मतदान केन्द्रमा मतदान अधिकृतदेखि सहयोगीसम्म महिला मात्र छन् । नुवाकोट–१ को पञ्चकन्या गाउँपालिका–१ बानियाँटारस्थित इन्द्रायणी मावि (क) मतदान केन्द्रमा अधिकृतदेखि सुरक्षा निकायसमेत महिला मात्रै छन् । यो केन्द्रमा ९ सय १४ पुरुष र ९ सय महिला मतदाता छन् । त्यसैगरी विदुर नगरपालिका–४ को निर्वाचन क्षेत्र नं. २ को नुवाकोट आदर्श बहुमुखी क्याम्पसको (क) मतदान केन्द्रमा पनि महिला मतदान अधिकृतसहित सुरक्षा निकायसमेत सबै महिला राखिएको छ । यो केन्द्रमा महिला १ हजार ३ सय ९४ र पुरुष १ हजार २ सय ६९ गरी २ हजार ६ सय ६२ मतदाता छन् । सबै मतदानस्थल र केन्द्रको सुरक्षा व्यवस्था व्यवस्थित गरिएको प्रमुख जिल्ला अधिकारी नारायणप्रसाद रिसालले बताए ।

निर्वाचनका लागि २ हजार ३ सय ४ जना कर्मचारी खटिएका छन् । नुवाकोटमा १ सय ३२ मतदानस्थल र २ सय ८८ स्थायी मतदान केन्द्र र २ वटा अस्थायी मतदान केन्द्र छन् । २ लाख ३९ हजार ७ सय २६ जना मतदाता छन् । नुवाकोट जिल्लामा कार्यरत १ हजार ७ सय २२ जना सुरक्षाकर्मी तथा कर्मचारीले प्रत्यक्ष नभई समानुपातिक प्रणालीतर्फ मतदान गर्न पाउने भएका छन् ।

पूर्वी नवलपरासीको कावासोतीस्थित मतदान केन्द्रमा खटिएका महिला कर्मचारी । तस्बिर : नवीन पौडेल/कान्तिपुर

पूर्वी नवलपरासीको कावासोती नगरपालिका–२ मा रहेको शिव माध्यमिक विद्यालयको ‘ङ’ केन्द्रमा सबै महिला कर्मचारी मात्रै खटाइएको जिल्ला निर्वाचन कार्यालय नवलपरासीपूर्वका प्रमुख लालप्रसाद शर्मा भुसालले बताए । ‘मतदान केन्द्र पनि समावेशी बनाउन एउटा केन्द्रमा सुरक्षाकर्मीदेखि कर्मचारी सबै महिला मात्र खटाएका छौं,’ उनले भने, ‘यसले महिला कर्मचारीको मनोबल उच्च भएको महसुस गरेका छौं । कर्मचारी पनि खुसी छन् ।’यो केन्द्रमा मतदान अधिकृत शान्ति गुरुङको नेतृत्वमा खटिएका ८ जना महिला कर्मचारी छन् । ‘हामी पुरुषसरह सबै जिम्मेवारी बहन गर्न सक्षम छौं । यो अवसरका लागि सबैलाई धन्यवाद ।’ मतदान अधिकृत गुरुङले भनिन्, ‘सबैभन्दा व्यवस्थित तवरले निर्वाचन सम्पन्न गराउन हाम्रो टिम लागिपरेको छ ।’ जिल्लामा ३ सय २ मतदान केन्द्रमा २ हजार ४ सय १६ कर्मचारी खटिएका छन् ।

नवलपरासी पश्चिमका दुई मतदान केन्द्र महिलामैत्री बनाइएको छ । निर्वाचन क्षेत्र नम्बर–२ अन्तर्गत रामग्राम नगरपालिका–१ मा रहेको सयपत्री बोर्डिङ स्कुलस्थित मतदानस्थलमा मतदान अधिकृतसहित सम्पूर्ण कर्मचारी महिलामात्रै खटाइएको छ । मतदानस्थलमा खटिने कर्मचारीसहित सुरक्षाकर्मीसमेत यस मतदानस्थलमा सबै महिला खटाइएको छ । मतदानस्थलमा १६ जना महिला कर्मचारी खटिएका छन् । साथै नेपाल प्रहरी र म्यादी प्रहरी गरी १३ जना महिला सुरक्षाकर्मी खटाइएको छ । पश्चिम नवलपरासीमा १ सय २० मतदानस्थल र २ सय ८७ मतदान केन्द्र छन् ।

प्रतिनिधिसभा र प्रदेशसभा सदस्य निर्वाचनका लागि जिल्लामा ३८ मतदान केन्द्रमा मतदान अधिकृतको जिम्मा महिलालाई दिइएको छ । मतदानका लागि कायम गरिएको ३ सय ५ केन्द्रमध्ये ३८ केन्द्रमा महिला मतदान अधिकृत नियुक्त गरिएको जिल्ला निर्वाचन कार्यालयले जनाएको छ । तनहुँ निर्वाचन क्षेत्र नम्बर–१ अन्तर्गत १९ र तनहुँ निर्वाचन क्षेत्र नम्बर–२ अन्तर्गत १९ जना महिला कर्मचारीलाई मतदान केन्द्रको जिम्मा दिइएको निर्वाचन कार्यालयका प्रमुख हरिप्रसाद ढकालले बताए । भीमाद नगरपालिका–८ वडा कार्यालय पोखरीछाप (ख) की मतदान अधिकृत गीतादेवी लम्सालले केन्द्र निर्माणको सम्पूर्ण काम पूरा भएको बताइन् ।

-देवनारायण साह (मोरङ), लक्ष्मी गौतम (पाँचथर), शंकर आचार्य (पर्सा), रमेशकुमार पौडेल (चितवन), कृष्ण थापा (नुवाकोट), नवीन पौडेल (नवलपुर), सम्झना रसाइली (तनहुँ)

प्रकाशित : मंसिर ४, २०७९ ०६:२२
प्रतिक्रिया
पठाउनुहोस्

बाढीले सयौं घर डुबानमा, सडक अवरुद्ध 

पहिरोमा एकै परिवारका तीन जनाको मृत्यु
नदी तटीय क्षेत्र उच्च जोखिममा
कर्णालीमा हवाई सेवासमेत ठप्प
कान्तिपुर टिम

काठमाडौँ — तीन दिनयताको मौसमी विपद्का कारण ५ जनाको मृत्यु भएको छ । तराईका विभिन्न ठाउँ जलमग्न छन् भने हिमाली क्षेत्रमा हिमपात भएको छ । काठमाडौंमा एकै परिवारका तीन जनाको पहिरोमा परी मृत्यु भएको हो । लमजुङ र पाल्पामा पनि दुई जनाले ज्यान गुमाएका छन् ।


काठमाडौंको चन्द्रागिरि नगरपालिका–२ देउराली नजिकै बिहीबार रातिको पहिरोमा पुरिएर एकै परिवारका तीन जनाको मृत्यु भएको छ । मृत्यु हुनेमा काभ्रे धुलिखेल–१२ का ५१ वर्षीय राजु श्रेष्ठ, उनकी श्रीमती ४५ वर्षीया रेखा र छोरी डेढ वर्षीया सारथी रहेका छन् । चन्द्रागिरि–२ देउराली नजिकै मसिनी जाने बाटोमा वर्षाका कारण पहिरो खस्दा रेकी ध्यान केन्द्रमा सुतिरहेका उनीहरूको मृत्यु भएको चन्द्रागिरि–२ का वडाध्यक्ष भाइकृष्ण तामाङले बताए । केही समयदेखि बिरामी भएकाले उनीहरू ध्यान केन्द्रमा उपचारका लागि बस्दै आएका थिए ।

उता, लमजुङको दोर्दी र दूधपोखरी गाउँपालिकाको सिरानमा रहेको पर्यटकीय क्षेत्र मेमेपोखरी घुम्न गएका एक युवकको मृत्यु भएको छ । सर्लाही लालबन्दी नगरपालिका–१२, पत्थरकोटका २७ वर्षीय बुद्धिमान योञ्जनको मृत्यु भएको हो । उनीसँगै यात्रामा रहेकी लमजुङ बेंसीसहर नगरपालिका–१० माइत भएकी शर्मिला तामाङ सम्पर्कविहीन छन् । उनीहरूको खोजीमा जुटेका प्रहरी निरीक्षक विष्णु विकका अनुसार शर्मिलाका बुबा, भाइ र काका करिब ४ हजार मिटर उचाइको च्यार्बो भन्ने ठाउँको भेडी गोठमा आएर बसेका छन् । ‘श्रीमान्–श्रीमती पछि आउँदै गर्ने र अन्य ३ जनाले अगाडि बास खोज्न जाने सल्लाहबमोजिम अरू अघि बढे, त्यही बेला श्रीमान्लाई लेक लागेछ,’ विकले भने, ‘श्रीमान्लाई भएको समस्याबारे जानकारी गराउन डाँडाकाँडा खोज्दै मोबाइल सम्पर्क गर्न आएकी श्रीमती रातको समयमा बाटो पहिल्याउन नसक्दा सम्पर्कविहीन भएकी हुन् ।’

दोर्दी गाउँपालिका अध्यक्ष युवराज अधिकारीले ४ हजार ८ सय मिटर उचाइमा रहेको मेमेपोखरी घुम्न गएका युवकलाई लेक लागेको जानकारी आएपछि प्रहरीलाई खबर गरेको र टाप गाउँका युवालाई उद्धारका लागि पठाएको बताए । शुक्रबार बराहपोखरीबाट २ घण्टा माथि गएर खोजी गरे पनि नभेटेको डीएसपी प्रकाश श्रीमलले बताए । उनका अनुसार खोजी कार्यमा दोर्दी–८ टापगाउँका ५ युवा पनि जुटेका छन् । लेकमा भीषण वर्षा भएपछि खोज्न नसकी उनीहरू बराहपोखरी फर्केका छन् । शुक्रबार नेपाली सेनाको उदिपुरस्थित चण्डीप्रसाद गणबाट ५ सैनिक उद्धारका लागि गएको उनले बताए ।

पाल्पामा खोलाले बगाएर बालिकाको ज्यान गएको छ । खोलाले बगाएर दुई र पहिरोमा पुरिएर दुई जना घाइते छन् । रिब्दीकोटको ठिमुरेस्थित मन्दी खोलाले बगाएर पाँच वर्षकी प्रिन्सु पचभैयाको मृत्यु भएको जिल्ला प्रहरी कार्यालयका सूचना अधिकारी वीरेन्द्र थापाले बताए । प्रिन्सुसँगै उनकी आमा ३४ वर्षीया कविता र स्थानीय ३२ वर्षीय मीना रानालाई पनि सँगै खोला तर्ने क्रममा बगाएको थियो । उद्धार गरिएका उनीहरूको तानसेनस्थित लुम्बिनी मेडिकल कलेजमा उपचार गराइएको छ । पाल्पाको तिनाउ गाउँपालिका–६ मस्यामस्थित चिदिसमा पहिरोले घर पुरिँदा २१ वर्षीया विष्णुमाया सारू र डेढ वर्षकी अरुषी खासु घाइते भएका छन् ।

यस्तै, प्यूठानमा पहिरोमा पुरिएर ६ जना बेपत्ता भएका छन् । माण्डवी गाउँपालिका–४ फरिन्डेमा बमबहादुर राहु मगरको घर शुक्रबार पहिरोमा पुरिएको हो । जिल्ला प्रहरी कार्यालयका प्रवक्ता एवं प्रहरी निरीक्षक सुशील थापा मगरका अनुसार पहिरोमा पुरिएर ६० वर्षीय बमबहादुर राहु मगर र उनकी श्रीमती, १८ वर्षीया मौसमी थापा, ६० वर्षीय हीराबहादुर थापा, चार वर्षीय सुशान थापा र २१ वर्षीय टेकी राहु मगर बेपत्ता भएका हुन् । उद्धारका लागि गएको प्रमुख जिल्ला अधिकारी सुनिता नेपाल, प्रहरी नायब उपरीक्षक सुवास खड्कासहितको टोली सडक अवरुद्ध भएका कारण बाटोमै रोकिएको छ ।

पूर्वी नवलपरासीमा भने दुई सयभन्दा बढी घर डुबानमा परेका छन् । सयौं हेक्टर धान बालीमा क्षति पुगेको छ । गैंडाकोट नगरपालिका–१ र २ मा ८० घर डुबानमा परेका हुन् । विनयत्रिवेणी–१ बगुवनमा पनि शुक्रबार ७५ घर डुबानमा परेका छन् । त्रिवेणी जान दाउन्ने सडक भएर पश्चिम नवलपरासीको बर्दघाट हुँदै जानुपर्ने भएकाले उद्धारमा कठिनाइ भएको गाउँपालिका अध्यक्ष घनश्याम गिरीले बताए । नारायणी नदीको पानी बस्ती पसेपछि मध्यबिन्दु नगरपालिका–१० को सेहरी, नन्दपुर क्षेत्रमा पनि २० भन्दा बढी डुबानमा परेका छन् । नारायणी नदी र खहरे खोलामा आएको बाढीको क्षति न्यूनीकरण र डुबान प्रभावितका लागि उद्धार र राहत टोली तयारी अवस्थामा राखिएको पूर्वी नवलपरासीका प्रमुख जिल्ला अधिकारी सुमन घिमिरेले बताए ।

पहिरोले कालीगण्डकी करिडोरअन्तर्गत पूर्वी नवलपरासीको गैंडाकोटदेखि पाल्पा जोड्ने सडक पनि अवरुद्ध भएको छ । बुलिङटार गाउँपालिका–६ मा पर्ने फूलमती खोला नजिकै पहिरो खसेको र अन्य स्थानमा पनि साना पहिरो खस्दा बिहीबारदेखि सडक अवरुद्ध भएको जिल्ला प्रहरीका सूचना अधिकारी सन्तोष पाठकले बताए । स्याङ्जाका प्रमुख जिल्ला अधिकारी गंगाबहादुर क्षत्रीका अनुसार वालिङ–१३ बायाँटारीमा पहिरोले, गल्याङ–५ पिँडीखोलामा डुबान र भीरकोट–९ मा पहिरोका कारण उच्च जोखिममा परेका १६ परिवारलाई सुरक्षित ठाउँमा सारिएको छ ।

यस्तै, वर्षाका कारण म्याग्दीका सबै सडक अवरुद्ध छन् । पहिरोले बेनी–जोमसोम सडकको जलेश्वर, चमेरे, बैंसरी, बेगखोला, तातोपानी, दाना, काप्रेमा यातायात अवरुद्ध छ । बैसरीमा भीर काटेर बनाएको करिब ५० मिटर लामो सडकमा निरन्तर पहिरो झरेकाले पैदल यात्रु खरबारी, धानखोल र झाडी हुँदै २ घण्टासम्म हिँड्नुपरेको छ । ‘बेनी–जोमसोम सडकको म्याग्दी खण्डमा पर्ने बेनीदेखि घाँसासम्मको सडक पहिरोले छियाछिया भएको छ । हिँड्न पनि समस्या भएको छ,’ बेनी–जोमसोम सडकका नागरिक सुपरभाइजर इन्द्रसिं शेरचनले भने । सदरमुकाम बेनीदेखि पश्चिम मालिका गाउँपालिका केन्द्र रहेको दरबाङ हुँदै धवलागिरि गाउँपालिका केन्द्र मुना जोड्ने सडक पनि दर्जनौं स्थानमा पहिरो झर्दा यातायात अवरुद्ध भएको प्रहरीले जनाएको छ । बेनी–बागलुङ जोड्ने सडक पनि ८ किलोमिटर दक्षिण बेनी–१ रत्नेचौरमा भासिएकाले साना सवारीबाहेक आवागमन बन्द छ ।

गण्डकमा तीन वर्षयताकै उच्च बहाव

पूर्वी नवलपरासीको गण्डक ब्यारेजमा पानीको बहाव उच्च भएको छ । बाँधमा पानीले खतराको सूचक पार गरेपछि नेपाल र भारततर्फका सबै ३६ वटै ढोका बिहीबार खोलिएको गण्डक ब्यारेजका भू–आर्जन अधिकारी अमित खड्काले बताए । मंगलबारदेखि परेको वर्षाका कारण नारायणी नदीमा बाढी आएको हो । बुधबार राति ब्यारेजमा २ लाख ५४ हजार क्युसेक प्रतिसेकेन्ड पानी प्रवाह भइरहेकामा शुक्रबार दिउँसो ४ बजे ४ लाख ४० हजार क्युसेक पानी प्रवाह भएको रेकर्ड छ । यो बहाव तीन वर्षयताकै उच्च भएको खड्काले बताए ।

सुस्ता गाउँपालिका अध्यक्ष टेकनारायण उपाध्याय र प्रमुख जिल्ला अधिकारी श्रवणकुमार पोखरेलसहितको टोलीले बाढी प्रभावित क्षेत्रको अवलोकन गरेर स्थानीयलाई सुरक्षित स्थानमा राख्न र कुनै पनि समस्या परेमा प्रहरी र गाउँपालिकामा जानकारी गराउन आग्रह गरेका छन् । बाढीका कारण सरावल, पाल्हीनन्दन र सुस्तामा लगाएको सयौं बिघाको धान खेतीमा क्षति पुगेको छ । बबई नदीमा आएको बाढीले सय बढी घर डुबानमा परेका छन् । सदरमुकाम गुलरियाको वालापुर, इन्द्रपुर, मुक्तिनाथघाट, गंगापुर, राधाकृष्ण टोललगायत बारबर्दिया नगरपालिकाका केही ठाउँ डुबानमा परेको छ ।

बाढीको कटानले गुलरिया नगरपालिकाको वालापुर, थपुवालगायतका ठाउँ उच्च जोखिममा परेका छन् । सल्यान र दाङमा लगातार पानी परेकाले रातिसम्म सदरमुकामलगायत बबई तटीय क्षेत्र उच्च जोखिममा रहेको प्रमुख जिल्ला अधिकारी बन्धुप्रसाद बाँस्तोलाले बताए । गुलरिया–११ इन्द्रपुरका किसान सौखत अली गद्दीले यस क्षेत्रमा करिब ५ सय बिघा खेतमा पाकेको धान डुबानमा परेको ।

सहिद मार्गअन्तर्गत होलेरी–नुवागाउँ खण्डमा क्षति पुगेको छ । भांगोबारी नजिकैको सडक क्षेत्रमा पहिरो खसेपछि आवागमन अवरुद्ध भएको छ । रोल्पाका प्रहरी प्रमुख प्रहरी नायब उपरीक्षक विनोद घिमिरेले सहिद मार्ग आयोजना कार्यालयलाई सडक खुलाउन आग्रह गरिएको बताए । दाङको घोराहीदेखि रोल्पा हुँदै उक्त सडक रुकुमसम्म पुगेको छ । सडकमार्फत दैनिक सयौं यातायातका साधन आवतजावत गर्छन् । सहिद मार्गकै घोराही दुई खोली–होलेरी खण्डमा पनि पहिरो खसेको छ । यस्तै घर्तीगाउँ–दुईखोली–थवाङ खण्डमा पनि पहिरोले सडक अवरुद्ध भएको प्रहरीले जनाएको छ ।

नदी र खोलामा आएको बाढीले दाङको देउखुरी उपत्यकाका बस्ती डुबानमा परेका छन् । राप्ती गाउँपालिकाका कालापानी, पिपरखुट्टी, बगरापुर, सगरापुर, पहरूवा, लट्ठहवा, डोडही, सिसहनियालगायतका गाउँ डुबानमा परेको गाउँपालिका अध्यक्ष प्रकाश विष्टले बताए । लमहीको सतबरिया र राजपुर गाउँपालिकाका विभिन्न क्षेत्रमा राप्ती नदीको डुबानमा परेका नागरिकलाई नेपाली सेना, सशस्त्र प्रहरी र नेपाल प्रहरीको टोलीले उद्धार गरेको प्रजिअ हीरालाल रेग्मीले बताए ।

वर्षाले बाँकेको जनजीवन पनि प्रभावित भएको छ । राप्ती नदी तटीय बस्ती डुडुवा गाउँपालिका–१ को चौफेरी बस्तीका ३ सयभन्दा बढी बासिन्दा डुबानमा परेका छन् । प्रजिअ सूर्यबहादुर खत्रीले चौफेरी गाउँका कम्तीमा ८० घरपरिवारका अढाई सय बासिन्दालाई नजिकैको एउटा आश्रयस्थलमा राखिएको बताए ।

यस्तै, कर्णालीभर हवाई तथा यातायात सेवा बन्द भएको छ । बुधबार अपराह्नदेखिको वर्षाले कर्णाली, राप्ती, मध्यपहाडीलगायत मुख्य राजमार्गको ठाउँठाउँमा पहिरो जाँदा गाडी चल्न सकेनन् भने शुक्रबार नेपालगन्ज र सुर्खेतबाट कुनै पनि जहाजले हिमाली जिल्लामा उडान भरेनन् ।

कर्णाली राजमार्गअन्तर्गत दहीखोला, सुनुवारखोला, पादुका, कालेखोला, हुल्म, कर्णाली करिडोरको खुलालु, भैरेकुना, फुगाड, राप्ती राजमार्गको जलेखर्क, फलाटे, कपुरकोटलगायत ठाउँमा पहिरो खसेपछि यातायात सेवा ठप्प भएको हो । मध्यपहाडी राजमार्गमा पनि झन्डै आधा दर्जन ठाउँमा पहिरो गएपछि दर्जनौं मालवाहक तथा सार्वजनिक सवारीसाधन विभिन्न स्थानमा अलपत्र परेको प्रदेश प्रहरी कार्यालयले जनाएको छ । हिमाली जिल्ला मनाङ जोड्ने एक मात्र बेंसीसहर–चामे सडक पनि अवरुद्ध भएको छ । मनाङका प्रजिअ रवीन्द्रप्रसाद आचार्यले वर्षा रोकिनासाथ प्रहरी, स्थानीय तहका साथै सरोकारवालालाई सडक मर्मतमा खटिन अनुरोध गरिएको बताए ।

- आश गुरुङ (लमजुङ), नवीन पौडेल (परासी), माधव अर्याल (पाल्पा), कमल पन्थी (बर्दिया), काशीराम डाँगी (रोल्पा), दुर्गालाल केसी (दाङ), रूपा गहतराज (नेपालगन्ज), शमशेरविक्रम जीसी (प्यूठान), हरिहरसिंह राठौर (सुर्खेत), प्रतीक्षा काफ्ले (कास्की) र घनश्याम खड्का (म्याग्दी)

प्रकाशित : आश्विन २२, २०७९ ०७:४५
पूरा पढ्नुहोस्
प्रतिक्रिया
पठाउनुहोस्
×