मदिरा सेवन गर्ने मतदान अधिकृत हटाइए
कपिलवस्तु — नैतिक आचरण विपरीत काम गरेका एक मतदान अधिकृतलाई जिम्मेवारीबाट हटाइएको छ । जिल्लाको क्षेत्र नम्बर ३ (२) को कृष्णनगर नगरपालिका–४ मा रहेको गणेश आधारभूत विद्यालय बालानगर 'ख' केन्द्रका मतदान अधिकृत वेदप्रसाद पन्थीलाई जिम्मेवारीबाट हटाइएको हो ।
प्रतिनिधि तथा प्रदेश सभा निर्वाचन निर्देशिका ०७९ को ८३ (१) अनुसार उनलाई जिम्मेवारीबाट हटाएर यमलाल न्यौपानेलाई मतदान अधिकृत पदमा नियुक्त गरी खटाइएको निर्वाचन अधिृकत प्रकाश मरासिनीले बताए । साथै, उनले निर्वाचनका लागि बुझेको रकम समेत फिर्ता गर्न निर्देशन गरिएको छ ।
उनले मदिरा सेवन गरी लापरबाही गरेकाले जिम्मेवारीबाट मुक्त गर्नु परेको अधिकृत मरासिनीले बताए । अनुगमनमा रहेको टोलीले उनले नैतिक आचरण विपरित काम गरेको भेट्टाएको थियो । उनलाई सेवा सर्त ऐन अनुसार कारबाही गर्ने तयारी छ ।
निर्वाचन सम्बन्धी कामका लागि खटाइएका मतदान अधिकृतलगायत कर्मचारीलाई तोकिएको जिम्मेवारी इमान्दारीपूर्वक निर्वाह गर्न निर्वाचन अधिृकत मरासिनीले निर्देशन समेत दिएका छन् ।
प्रकाशित : मंसिर ३, २०७९ १७:३९