'जनता बँधुवा होइनन् सार्वभौम हुन्, अधिकार प्रयोगमा विवेक देखाउँछन्'- प्रतिनिधि / प्रदेशसभा निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement
अन्तर्वार्ता

'जनता बँधुवा होइनन् सार्वभौम हुन्, अधिकार प्रयोगमा विवेक देखाउँछन्'

‘घरदैलोमा जाँदा मतदाताहरुले एमाले उमेद्वार को हो भनेर सोध्ने अवस्था छ । मैले एमाले उमेद्वारको परिचय गइदिनु परेको छ । त्यसैले पनि कसैसँग प्रतिस्पर्धा हुने नै देखेको छैन ।’
कान्तिपुर संवाददाता

काठमाडौँ — काठमाडौं क्षेत्र नम्बर ८ मा संस्कृति, पर्यटन तथा नागरिक उड्डयनमन्त्री जीवनराम श्रेष्ठसहित १९ जना उमदेवार प्रतिनिधिसभामा चुनावी प्रतिस्पर्धा गर्दैछन् । उनले २०७४ को निर्वाचन जितेको पार्टी एमालेसँग नै यसपाली प्रतिस्पर्धा हुने भएको छ ।

चुनावी अभियानमा व्यस्त श्रेष्ठसँग कान्तिपुरका सुदीप कैनीले गरेको कुराकानी :

मतदातासम्म के एजेण्डा लिएर जानुभएको छ ? उनीहरु के भन्छन् र चुनावी दौडधुप कस्तो छ?

म घरदैलोमा छु । मतदाताको कुरा सुन्ने र आफ्नो कुरा सुनाउने क्रम प्राथमिकतामा छ । म २०७४ देखि नै यस क्षेत्रको सांसद हुँ । संसदमा रहँदाको मेरो भूमिका देखेर उहाँहरु सन्तुष्ट नै रहेको पाएको छु । आफ्ना समस्याहरु स्थानीयले मलाई सुनाउनुभएको छ । खानेपानी, टोल डुबान, सडक कालोपत्रे गर्नुपर्ने, सम्पदा, संस्कृति र सार्वजनिक जग्गाको संरक्षण लगायतका समस्या राख्नुभएको छ । यी कतिपय समाधान हुने क्रममा र कतिपय बाँकी छन् । यी बाँकी रहेको कुरा पुरा गर्नु नै मेरो मुख्य प्राथमिकता रहेको छ । यो क्षेत्र देशकै सांस्कृतिक राजधानी पनि हो । हनुमानढोका र स्वयम्भुको संरक्षणमा निरन्तर लाग्ने बाचा गरेको छु । यसलाई जोडेर सम्पदा मार्ग बनाउने योजना अघि सारेको छु । गुरुयोजना बनाएर कार्यान्वयनमा चरणमा काम प्रारम्भ हुँदैछ । पर्यटकीय केन्द्रको रुपमा अघि सार्ने अवधारणा ल्याएको छु । त्यो गर्दा यस क्षेत्रका युवालाई स्थानीय रुपमा नै रोजगारी पनि दिन सकिन्छ । भौगोलिक, सांस्कृतिक र सामाजिक विविधतालाई केन्द्रीत गरेर पर्यटकीय विकास गर्ने हो । युवाहरुका लागि पर्यटक गाइड र होमस्टेको तालिमको सुरुवात भइसकेको छ । भोली पर्यटकीय केन्द्र हुँदा आवश्यक जनशक्ति पनि यहि क्षेत्रबाट तयार पार्ने मेरो उद्देश्य छ । जनमुखी ऐन कानुन बनाउन सक्रिय भूमिका खेल्ने प्रतिवद्धता गरेको छु । पहिलो कार्यकालमा समाधान गर्न नसकेका कामहरु निरन्तर गर्नेछु । संकट र अप्ठायारो बेलामा पनि स्थानीय सँगसँगै हुने बाचा गरेको छु । घर दैलोमा गएपछि झनै आत्मविश्वास बढेर गएको छ ।

२०७४ मा आफैं निर्वाचित पार्टी एमाले विरुद्ध चुनाव लड्दै हुनुहुन्छ । प्रतिस्पर्धा कस्तो होला ?

हामीले एमालेबाट विद्रोह गरेर नयाँ पार्टी बनाइसकेका छौं । कम्युनिस्ट आन्दोलनलाई रक्षा गर्न विद्रोह गरेको हो । एमाले अध्यक्ष केपी शर्मा ओलीका कारण असन्तुष्ट जनमत ठूलो छ । एमाले कम्युनिस्टको विचार, नीति सिद्धान्तअनुसार चल्न छाडेको छ । त्यसैले सबैको सहयोग मैले नै पाउने ठानेको छु । घरदैलोमा जाँदा मतदाताहरुले एमाले उम्मेदवार को हो भनेर सोध्ने अवस्था छ । मैले एमाले उम्मेदवारको परिचय गराइदिनुपरेको छ । त्यसैले पनि कसैसँग प्रतिस्पर्धा हुने नै देखेको छैन ।

स्थानीय तहको मतपरिणाम हेर्दा पनि एमालेको जनआधार राम्रो भएको क्षेत्र हो नि ?

जनता भनेको कसैको पेवा होइन । उनीहरु स्वतन्त्र हुन्छन् । उनीहरुले परिस्थितिअनुसार आफ्नो मत दिन्छन । जनता बँधुवा पनि होइनन् । उनीहरु सार्वभौम हुन् । त्यो अधिकारमा उनीहरुले विवेक प्रयोग गर्छन् । एमालेलाई जिताएर भोलि फेरि संसद विघट्न गरे के गर्ने ? पहिले दुईदुई पटक संसद विघट्न गरेको हो । एमालेले अहिलेसम्म संसद विघट्न गलत थियो भनेको छैन । अदालतले गलत भयो भनेर पुन:स्थापना गरिदिएको हो । एमालेलाई किन भोट दिने भनेर प्रश्न गरिराखेका छन् ।

अहिले ‘नो नट अगेन’ को आवाज पनि उठेको छ । स्वतन्त्र उमेदवार पनि छन्, चुनौति हुँदैन ?

'नो नट अगेन', स्वतन्त्र भन्ने कुरा परिणाम पछि छर्लङ हुन्छ । 'नो नट अगेन' भनेको जसले जितेर पनि जनताको पक्षमा काम गरेको छैन त्यसको विरुद्ध हो । जसले बदमासी गरेको छ । खराब छ उसको लागि हो । जनताले मन पराएको, राम्रो काम गरेको अनुभवीहरु त संसदमा आउनु अनिवार्य हुन्छ । जनताले विवेकपूर्ण तरिकाले मत दिन्छन् । अहिलेसम्मको सबै परिस्थितिलाई हेर्दा वाम लोकतान्त्रिक गठबन्धन नै विजय हुनेछ । लोकतन्त्र बलियो बनाउने, सुशासन कायम गर्ने र जनआकांक्षा पुरा गर्ने उद्देश्यले गठबन्धन भएको हो । यसमा जनता आशावादी छन् । आमरुपमा समर्थन प्राप्त भइरहेको छ । गठबन्धनकै पक्षमा अत्याधिक मतदानसहित जित पनि हुन्छ ।

प्रकाशित : कार्तिक २५, २०७९ २०:२०
प्रतिक्रिया
पठाउनुहोस्

'देशले अब युवा प्रधानमन्त्री पाउनुपर्छ'

'मैले म भन्दा अनुभव भएको, म भन्दा पछिल्लो पुस्ताको गगन थापालाई प्रधानमन्त्री भन्दै आएको छु । यदि भोलि संसदीय दलमा प्रधानमन्त्री बन्न अरु युवा अग्रसर भएनन् भने त्यो बेला आउने नाम विश्वप्रकाश शर्मा हुन्छ ।'
कान्तिपुर संवाददाता

काठमाडौँ — कांग्रेस महामन्त्री विश्वप्रकाश शर्मा झापा-१ मा तेस्रोपटक प्रत्यक्ष उम्मेदवार बनेका छन् । दुई पटक पराजित भएका उनका लागि यसपटक प्रतिनिधिसभामा जित्ने चुनौती छ । विगतमा ‘हारेर नहाराएको’ र ‘जितेपछि जरुर गाउँ फर्कने’ भन्दै मतदातालाई विश्वास जित्ने कसरत गरिरहेका छन् ।

विशेषगरी कांग्रेस र सत्ता गठबन्धन (माओवादी, एकीकृत समाजवादी) र स्वतन्त्र मतदाताको भरमा आफूले चुनाव जित्ने दाबी छ । चुनावी घरदैलोबीच झापा-१ धुलाबारीमा विश्वप्रकाश शर्मासँग कान्तिपुरका गंगा बीसी र पर्वत पोर्तेलले गरको कुराकानी:

तपाईँका मुख्य चुनावी मुद्दा के छन् ?

राजनीतिक, राष्ट्रिय र स्थानीय मुद्दा छन् । राष्ट्रिय मुद्दामा राजनीतिक व्यवस्थाको सुदृढीकरण छ । मैले पार्टीको घोषणापत्र संयोजन गरेको हुनाले समृद्धिको विषय पनि गाFसिन्छन् । अर्कोचाहिँ स्थानीयको समुन्नतीको पाटो, सँगै समाज रुपान्तरणको पाटो छ । यो देश र समाजलाई रुपान्तरण गर्नुछ । देशलाई रुपान्तरण गर्नुछ भने समाजलाई रुपान्तरण गर्ने कुरा कहीं न कहीं राजनीतिले बोक्नुपर्छ । देशको पल्लो कुनामा रहेको झापा मेरो क्षेत्र पनि बदलिनुपर्छ भनेर स्थानीय आवश्यकताका आधारमा हामीले भौतिक कुराहरु पनि उठाएका छौं ।

तपाईंहरुले मतदाताका कस्ता प्रश्नहरुको सामना गरिहनुभएको छ ?

सारमा दुई कुरा छ । मतदाताले हामी मत दिन्छौ, जितेपछि फर्केर गाउँ किन आउँदैन भन्ने छ । त्यो आमरुपमा छ । त्यो कुराले मलाई घेरेको छैन । म विगतमा विजेता भएको पनि छैन, म हारेर हराएको पनि छैन । म कुनै न कुनै रुपमा यहाँको जीवनमा गाँसिइरहेको छु । अर्को कुरा, नेपालमा धेरै कुरा हुन बाँकी छ, केही काम भएको छ । यो हामीले नेपाली समाजमा स्थापित गर्न सकेका छैनौं । कयौं मतदाताले भन्ने कुरा हो, हामीले मत दिँदै आएका छौं । यो देश जस्ताको तस्तै छ । केही काम भएको छैन । हामीले निर्वाचनमा जाँदा भन्नुपर्छ, यो देशमा केही काम भएको छ, धेरै गर्न बाँकी छ, त्यसैले म उम्मेदवार भएको छु ।

मतदातामा पुराना सबै पार्टी उस्तै हुन् भन्ने बुझाइ पाइन्छ, किन यस्तो छाप पर्न गयो ?

हामी राजनीतिक दलहरुले आ-आफ्नो छुट्टै पहिचान दिन सक्नुपर्छ । कुन पार्टीले संविधान रक्षाको कर्म गर्न खोजेको छ ? कसले संविधानको अपव्याख्या गरेको छ ? संसद्ले कसले पाँच वर्षसम्म राखौं भन्छ ? कसले भत्काउने कुरा गर्‍यो । नेपाली कांग्रेस पार्टीले मात्र घोषणापत्रमा हामी पाँच वर्षका लागि मत माग्दैछौं । पाँच वर्ष संसद् कायम राख्नलाई प्रतिबद्ध छौं । दल र दलभित्रको द्वन्द्वका कारण यसलाई विघटन गर्न दिदैनौं भनेको छ । संविधान जोगाउने र भत्काउनेबीच फरक छुट्टयाउन सक्नुपर्छ । हामीले एक वर्षमा अढाइ लाख रोजगारी सिर्जना गर्ने कुरा गरेका छौं । पाँच वर्षमा साढे १२ लाख रोजगारी सिर्जना गर्ने योजना अघि सारेका छौं । कसैले योभन्दा धेरै रोजगारी सिर्जना गर्ने भनेको छ भने यो बढी महत्वाकांक्षा हो । व्याबहारिक कुरा ल्याउने कांग्रेस र अरुबीचमा छुटिने ठाउँ त छ नि ? मुद्दाकै कुरा गर्ने हो भने अरुभन्दा हामी फरक छौं ।

राजनीतिक दलको काम चुनावमा सपना देखाउने तर पुरा गर्ने होइन भन्ने विगतका व्यवहारले देखाएन र ?

मतदातालाई घोषणापत्रमा जे लेखिन्छ, त्यो पुरा गरिदैन भन्ने मतदाताको बुझाइ छ । नेपाली कांग्रेसले ०४८ सालपछि सरकाको नेतृत्व गर्‍यो, त्यो बेलामा गरिबीको रेखामुनि अवस्था जस्तो थियो, साक्षरता अवस्था जे थियो, हाल त्योभन्दा फरक छ । ०४८ सालमा गाउँ, सहरमा स्वास्थ्यचौकी एक हजार ९८ वटा थिए, अहिले १३ हजार ७ सय ९४ मा छन् । त्यतिबेला मात्र २२७ मेगावाट बिजुली थियो, अहिले २ हजार १ सय ९० मेगावाट पुगेको छ । घोषणापत्रमा जे लेख्यौ, त्यो पुरा गर्न लागेका छौं । अरु क्षेत्रको सूचक पनि सुधार भएर गएको छ । घोषणापत्रमा जे लेखिन्छ, त्यो पुरा हुन दिनुहुँदैन भनेर मतदातामा निराशा बढ्न दिनु हुँदैन । घोषणापत्रमा लेखिएका सबै कुरा पुरा भए त ? त्यो पनि होइन । विगतमा भोटलाई प्रभावित गर्नेगरी पनि आएको पाइन्छ । यो पटक हामीले सरकार संचालन गर्दा भएका कुराको आत्मालोचना गर्छौं भनेका छौं । घोषणापत्रमा जति गर्न सकिन्छ, त्यति लेखौं, जति बोलौं, त्यति सम्पादन गर्न सकिन्छ त्या लेखौं भनेर लेखिएको हो ।

पहिलोपटक मतदान गर्न गइरहेका युवा मतदाता चासो र सरोकार कसरी सम्बोधन गर्नुभएको छ ?

युवाको चासोको विषय भनेको रोजगारी हो । हामीले रोजगारी कसरी बढाउन सकिन्छ भनेर वार्षिक २ लाख ५० हजार र पाँच वर्षमा साढे १२ लाख रोजगारी सिर्जना गर्ने भनेका छौं । खेलकुदको सन्दर्भमा विगतमा खेलाडीले अन्तराष्ट्रिय पदक जितेर आए पनि मेडल लगाउन होडबाजी हुने गर्‍थ्यो । अहिले हामीले खेलाडी उत्पादनमा जोड दिएका छौं । कसरी उत्पादन गर्ने, कसरी खेलाडीलाई आत्मनिर्भर बनाएर अघि बढाउन सकिन्छ भन्ने विषय छन् । त्यस्तै युवाको भविष्यलाई प्रत्यक्ष प्रभाव पार्ने जलवायु परिवर्तनका विषय पनि अघि बढाएका छौं ।

युवाले देश बन्न भ्रष्टाचारबाट मुक्त बनाउनुपर्छ भन्ने चाहेका छन् । हामीले यसलाई सम्बोधन गर्न भ्रष्टाचार निवारण ऐन २०५९ अब अपुरो भयो । अख्तियार दुरुपयोग अनुसन्धान आयोग जे छ, त्यो निष्प्रभावी भयो । त्यसको पुनर्संरचना गर्नुपर्छ भनेर घोषणापत्रमा उल्लेख गरेका छौं । मुलकको प्रधानमन्त्री, मन्त्री राजनीतिकर्मी मात्र बन्ने भए, बाहिरबाट आउने एक्सेस छैन । हामीले घोषणापत्रमा हामी त्यस्तो अवस्थामा चाँडै जानेछौं ताकि विश्वव्यापी रहेका काबिल मस्तिष्क भएका युवालाई ल्याउन सकिन्छ । हामीले युवाले सोचिरहेको शिक्षा, स्वास्थ्यलगायतका विषयहरु ल्याएका छौं । युवाले चाहेको राजनीतिक रुपान्तरणको विषय, सामाजिक रुपान्तरण, रोजगारी, भ्रष्टाचार नियन्त्रण गर्ने, जलवायु परिवर्तन, खेलुकदका विषय गाँसेर घोषणापत्र बनाएका छौं ।

युवाले खोजेका युवा उम्मेदवार त एक दम कम छन् ?

युवा भनेको उमेरको कुरा पनि हो । तर, उमेरको कुरा मात्र होइन । उर्जाको कुरा पनि हो । युवा आउनु पर्छ वा पर्दैन भन्ने प्रश्नभन्दा नेतृतवमा ‘एक्जिट पोलिसी’ भएन भने, कोही युवाले अवसर पाउने वा नपाउने केमा निर्भर हुन्छ भने प्रणाली निश्चित हुनुपर्‍यो । मैले महामन्त्रीको उम्मेदवारी घोषणा गर्दा एक, दुई, तीन, चार नीति अघि सारेको छु ।

एकचोटि राष्ट्रपति बन्ने, दुईपटक प्रधानमन्त्री बन्न पाउने, तीनपटक मन्त्री पाउने, चार पटक सांसद बन्न पाउने प्रणाली भयो भने धेरै युवा नेतृत्वमा आउँछन् । यो नीतिभित्र रहेर कसैले ७५ मा नेतृत्व गर्छ भने त्यो उसको कुरा भयो । कोही ६० वर्ष र त्योभन्दा कम उमेरमा त्यसको नेतृत्व गर्छ भने उसको क्षमताको कुरा भयो । कोही युवा छ, ऊ दुईपटक प्रधानमन्त्री भयो भने उसले तेस्रोपटक पाउँदैन । उसले समाज सुधारको नेतृत्व गर्न सक्छ । युवा नेतृत्वमा आउने भन्ने कुराचाहिँ समाजले अहिले खोज्दै गर्दा सिस्टममा पुग्न समय लाग्ला । संविधान परिमार्जन होला । तर आगामी निर्वाचनपछि देशले युवा प्रधानमन्त्री पाउनुपर्छ । युवामा लिएर जानुपर्छ । उमेर र स्प्रीट भएको युवाको कुरा हो ।

बेलायतमा ४२ वर्षिय ऋषि सुनक बेलायतको प्रधानमन्त्री बन्न सक्छन् । ३५ वर्षको मान्छे चिलीको प्रधानमन्त्री बन्न सक्छन् । अरु पनि उदाहरण छन् । हामीले केही गर्न सक्ने युवालाई किन नदिने नेतृत्व ?

तपाईंले अर्का महामन्त्री गगन थापालाई प्रधानमन्त्रीको रुपमा अघि सार्नुपर्छ भन्नुभएको हो ?

हो, निश्चयनै नेपाली कांग्रेसभित्र धेरै विकल्प छन् । मतदाताले युवा चाहियो भने युवा हुनुहुन्छ, पाको चाहियो भने पाको पनि हुनुहुन्छ । कांग्रेसभित्र प्रधानमन्त्रीका लागि मधेसी समुदायबाट विमलेन्द्र निधि देखिनुहुन्छ । जनजातिका लागि बनाऔं भन्यो भने हिजो पद त्याग गरेको प्रकाशमान सिंह हुनुहुन्छ । कोइराला परिवारभित्रबाट जाऔं भन्ने हो भने डा. शेखर कोइराला हुनुहुन्छ । खसआर्य समुदायबाट जाऔं भन्ने हो भने पूर्णबहादुर खड्का, बालकृष्ण खाँणहरु हुनुहुन्छ । तर, उहाँहरु कोही पनि अग्रसरता राख्नु हुन्न भने त्यस्तो अवस्थामा एउटा युवाले आएर म नेतृत्व गरेर जान्छु भन्दै छ गगन थापा किन नबन्ने ? अब उनको योग्यता के पुगेन ?

प्रधानमन्त्री बन्नलाई अब के सिङ जुरो पलाउनु पर्‍यो त ? त भनेर भन्दै आएको छु । म चुनावमा जाँदै गर्दा कयौं साथीहरुले हामी तपाईं प्रधानमन्त्री भनेर मत दिंदैछौं, तपाईं किन गगन भन्नुहुन्छ ? तपाईं आफैलाई किन अघि सर्नुहुन्न ? भन्दै गर्दा मैले म २०७० सांसद जितेको थिए भने म सांसद बन्थे । ०७४ मा जितेको थिए भने मन्त्री बन्थे । ०७९ मा जितेर जाँदै गर्दा म प्रधानमन्त्रीको दावा गर्दिनँ । मैले मभन्दा अनुभव भएको, मभन्दा पछिल्लो पुस्ताको गगन थापालाई प्रधानमन्त्री भन्दै आएको छु । यदि भोलि संसदीय दलमा प्रधानमन्त्री बन्न अरु युवा अग्रसर भएनन् भने त्यो बेला आउने नाम विश्वप्रकाश शर्मा हुन्छ ।

सत्ता गठबन्धनका साझा उम्मेदवारको मत एक ठाउँमा खस्दैन भन्ने आशंका छ नि ?

यसमा एक खालको परीक्षण भइसकेको छ देशव्यापी रुपमा । स्थानीय निर्वाचनमा फाट्टफुट्ट रुपमा एक दलले अर्कोलाई मत नखाएको देखियो । त्यो अनुभव छ । यो बैंकको पैसा सारेजस्तो होइन भनेर समीक्षा गरेकै छौं । सँगसँगै अर्को कुरा ठूलो हिस्सा संगठित रुपमा मत गिरेको देखियो, त्यसैले गठबन्धन राष्ट्रव्यापी रुपमा ठूलो आकारमा आयो । कांग्रेस, माओवादी, एकीकृत समाजवादीबीचको एलाइन्सले सबभन्दा बढी ल्याएको देखियो । पोखरा महानगर, हेटौंडा उपमहानगर भर्खर खुलेको एकीकृत समाजवादी कलम चिन्हले जित्यो । त्यो के तागत हो त ? गठबन्धनले तागत देखिन्छ भन्न सन्देश हो । यो सन्देश मंसिर ४ गते देशव्यापी रुपमा आउँदै छ ।

कांग्रेसभित्रको अन्तरघातले तपाईंलाई समस्या पर्छ भनिन्छ नि ?

झापा‍-१ मा कांग्रेस अधिवेशनमा फरक फरक ठाउँमा उभिएकाहरु सबै एकै ठाउँमा छौं। म उम्मेदवार बन्दै गर्दा आदरणीय नेता कृष्णप्रसाद सिटौला र रातभर काठमाडौंमा टिकट वितरणको काम गरेर एउटै जहाजमा झापा आयौं । मेरो उम्मेदवार बन्दा प्रस्तावकमा स्थानीय निर्वाचनमा मेयरका दुई आकांक्षी प्रस्तावक र समर्थक हुनुहुन्थ्यो । स्थानीय चुनावमा के द्वन्द्व गर्‍यौं, त्यसबाट अघि आइसकेका छौं । यो कुराले उर्जा दिएको अवस्था छ । देशभर विगतको द्वन्द्वभन्दा माथि उठेर एक ठाउँमा उभिएर राम्रो परिणाम ल्याउन लागेका छौं । अहिले हामीभित्र अन्तरविश्वास जागेको छ ।

आम निर्वाचनमा कांग्रेसको कस्तो परिणाम आउला ?

हामीले आन्तरिक रुपमा केही विश्लेषण गरेका छौं । त्यो अहिले भनिहाल्न उचित हुँदैन । नेपाली कांग्रेस प्रतिनिधिसभामा ९० स्थानमा उठेको छ । योभित्रबाट हामी बहुमतको आकार आउने गरी विजय हासिल गर्छौं । समानुपातिकसहित नेपाली कांग्रेस सबभन्दा ठूलो दल भएर आउँछ । यो एकदम सुनिश्चित छ । विगतदेखिनै एउटा निर्वाचनमा दोस्रो हुँदा पछिल्लो निर्वाचनमा पहिलो दल हुने इतिहास छ । २०४८ मा ठूलो दल, ५१ मा हार्ने, ५६ मा जित्ने, ०६४ मा हार्ने, ०७० मा जित्ने, ०७४ मा हार्ने भएको थियो । अब ०७९ मा कांग्रेस ठूलो दल बन्ने अवस्था हो ।

प्रकाशित : कार्तिक २५, २०७९ २०:०५
पूरा पढ्नुहोस्
प्रतिक्रिया
पठाउनुहोस्
×