दोहोरियो फिदिमवासीको पानी दुःख- फिचर - कान्तिपुर समाचार
कान्तिपुर वेबसाईट
AdvertisementAdvertisement

दोहोरियो फिदिमवासीको पानी दुःख

आप्तावा खोलाको पानीमा लेदो मिसिएर आउन थालेपछि स्वच्छ पानी खोज्न मूल र जरुवा धारा चहार्नुपर्ने बाध्यता
लक्ष्मी गौतम

पाँचथर — पाँचथरको फिदिम नगरपालिका–१ की पवित्रा काफ्लेको निद्रा नपुगेको महिना दिन भयो । साँझ अबेरसम्म पानीका लागि पालो कुर्नुपर्ने र बिहान ३ बजे पँधेरा नपुगे थाप्नै नपाइने बाध्यताले निदाउनसम्म नपाएको उनी गुनासो गर्छिन् ।

पाँचथर सदरमुकाम फिदिमको ट्यांकी, धारामा पानी भर्दै स्थानीय बासिन्दा । तस्बिर : कान्तिपुर

फिदिम–४ स्थित सुखबोध मावि कक्षा १० मा अध्ययनरत भूमिका सापकोटा जरुवा धारामा पालो कुर्दाकुर्दै विद्यालय जान नै ढिला हुन थालेको पीडा पोख्छिन् । फिदिम–२ की भावना अधिकारी (अर्याल) साँझबिहान फिदिम–४ को बुलबुले धाराबाट पानी ल्याउँछिन् । अत्यधिक भीड लाग्ने भएकाले समयमा घर नपुग्दा उनलाई छोराछोरीलाई खाना बनाएर स्कुल पठाउन हम्मेहम्मे पर्न थालेको छ ।

फिदिम नगर क्षेत्रका नागरिकको यो समस्या साझा भइसकेको छ । फिदिम बजारदेखि १६ किलोमिटर टाढाको आप्तावा खोलाबाट ल्याइएको पानीमा लेदो मिसिएर आउन थाले पछि उपभोक्तालाई स्वच्छ पानी खोज्न मूल र जरुवा धारा चहार्नुपर्ने बाध्यता दोहोरिएको हो ।

‘मिटरमा आएको पानी पिउन त के चर्पीमा प्रयोग गर्न पनि योग्य छैन, कपडा धुँदासमेत दाग लाग्छ भने भाँडाकुँडा पहेंलो कस बस्छ,’ भावना अर्याल भन्छिन् । उनले यही समस्याले गर्दा घण्टौं लाममा लागेर भए पनि मूलको पानी बोकेर दैनिकी धानिरहेको बताउँछिन् । फिदिम बजार आसपासमा टैंकीधारा, बुलबुलेधारा, दमाईधारा, गोलधारा र चिसापानी जस्ता आधा दर्जन जरुवा र मूल धारा छन् । घरमा जडित धारामा प्रयोग गर्न नसकिने धमिलो पानी आउन थालेपछि यहाँका स्थानीयको मूल र जरुवामा बिहान ३ देखि राति १० बजेसम्म भीड लाग्छ ।

प्रायः धारामा स–साना बोतलदेखि जरकिन, गाग्री र जार लिएर दैनिक आधादेखि तीन घण्टासम्म लाम लाग्दै पालोमा पानी थापेर घर फर्किन्छन । ती धारामा बजार क्षेत्रबाट स्कुटर, मोटरसाइकल र टेम्पो लिएर पानी थाप्न आउनेको उपस्थिति पनि उत्तिकै हुन्छ । फिदिमका ज्येष्ठ नागरिक ९२ वर्षीय गंगाराम भट्टराईका अनुसार यहाँ २०५९ सम्म स्वच्छ पिउने पानीको हाहाकार अहिलेकै अवस्थामा थियो । त्यो बेला नजिकैको नाम्दु खोलाबाट ल्याइएको पानी धमिलो र दूषित भएकाले स्थानीय मूल र जरुवा धारामा पानी थाप्थे । २०६० मा पाँचथर उद्योग वाणिज्य संघले बजारमा चन्दा संकलन गरी नजिकैको कात्तिके मुहानबाट स्वच्छ पिउने पानी ल्याएर बजार क्षेत्रमा १७ सार्वजनिक धारामार्फत वितरण गरेपछि बजार क्षेत्रका उपभोक्ताले एक गाग्रो पानीकै लागि जरुवा धारा चहार्नुपर्ने अवस्था अन्त्य भएको थियो ।

‘२०७३ मा फिदिम साना सहरी खानेपानी योजना सञ्चालनमा आएपछि नगरपालिकाको वडा नम्बर १, २ र ४ का नागरिकलाई हाइसन्चो नै भयो, अहिले ती योजनाको पानीमा लेदो मिसिएर आउन थाले पछि दुःख दोहोरिए,’ भट्टराई भन्छन् । १७ करोड १४ लाख रुपैयाँ बजेट खर्चिएर बनेको खानेपानी आयोजनाबाट शुद्ध पानी नआउँदा खानेपानी समस्या जस्ताको त्यस्तैमा पुगेको हो । आयोजना सञ्चालन र खानेपानी वितरणको जिम्मा फिदिम साना सहरी खानेपानी आयोजनाको हो । फिदिमको माथिल्लो गाउँमा राखिएको फिल्टरले काम नगर्दा उपभोक्ताका धारासम्म लेदो मिसिएको पानी पुग्न थालेको समितिका अध्यक्ष गजाधर भट्टराई बताउँछन् ।

‘योजनाअन्तर्गत महभीर छेउमा बनाइएको रकिङ फिल्टर सञ्चालनमा आउन सकेको छैन भने पानीको मुहानभन्दा माथि ६ वटा सडक खनिएका छन, ती सडकबाट बगेको लेदो माटोले मुहान भरिएपछि समस्या दोहोरिएको हो,’ उनी भन्छन् । पहिले सङ्लो पानी आउने गरेकाले इन्टेकमा र्‍यापिट फिल्टर जडान नगरिएको खानेपानी तथा सरसफाइ डिभिजन कार्यालय पाँचथरका प्रमुख देवनाथ सिंह बताउँछन् । आयोजना सुरु गर्दा यो अवस्था आउँछ भन्ने पूर्वअनुमान नगरेकाले पनि समस्या भएको उनको भनाइ छ ।

दूषित पानीका कारण उपभोक्तामा शरीर चिलाउने र झाडापाखालालगायत समस्या बढ्न थालेको छ । स्थानीय अस्पताल र स्वास्थ्य संस्थामा यो प्रकृतिका बिरामी बढ्न थालेको बताइएको छ । दैनिक १२ देखि १५ जना छाला र झाडापखालाका बिरामी आउने गरेको जिल्ला अस्पताल प्रमुख डा. बुद्धिबहादुर थापाले बताए ।

प्रकाशित : असार १४, २०७९ ११:१५
प्रतिक्रिया
पठाउनुहोस्

वामदेवले एकता राष्ट्रिय अभियान पार्टी घोषणा गर्दै

कान्तिपुर संवाददाता

काठमाडौँ — नेकपा एमालेका पूर्वउपाध्यक्ष वामदेव गौतमले नयाँ राजनीतिक दल घोषणा गर्ने भएका छन् । मंगलबार अपराह्न कार्यक्रम आयोजना गरेर पार्टीको नाम एकता राष्ट्रिय अभियान नामको राजनीतिक दल घोषणा गर्न लागेका हुन् । 

गौतमले दल घोषणाका लागि दिउँसो ३ बजे भृकुटीमण्डपमा कार्यक्रम आयोजना गर्दै छन् । राष्ट्रिय सभाका सांसद रहेका गौतम नेपालका वामपन्थी दलहरुको एकै स्थानमा ल्याउन अभियान सञ्चालन गर्दै आएका थिए ।

उनले शनिबार मात्रै अभियानका राष्ट्रिय भेला आयोजना गरेका थिए ।

'हाम्रो राष्ट्रिय भेला शनिबार भएको थियो । त्यसले पार्टी गठन गर्ने निर्णय गरेको हो । शनिबारको राष्ट्रिय भेलाले निर्माण गरेको नेकपा (एकता राष्ट्रिय अभियान)केन्द्रिय कमिटीको पहिलो बैठक आइतबार बस्यो । त्यसको केही महत्त्वपूर्ण निर्णय गरेको छ । त्यसलाई आज सार्वजनिक गर्न छौं,' प्रचार संयोजक निमकान्त पाण्डेले भने ।

६९ सदस्यीय केन्द्रिय कमिटीमा गौतम अध्यक्ष र डिबी कार्की सचिव रहेको पाण्डेले बताए । 'हामी निर्वाचन आयोगमा दर्ता पनि गर्छौ र चुनाव प्रक्रियामा पनि अघि जान सक्छौं,' पाण्डेले भने,'अहिलेसम्म ५ वटा पार्टी समाहित भइसकेका छन् ।'

पाण्डेका अनुसार निर्वाचन आयोगमा दर्ता भएका समाजवादी केन्द्र नेपाल, आधुनिक नेपाल समाजवादी पार्टी, नेकपा (राष्ट्रवादी) र निर्वाचन आयोगमा दर्ता नभएका आम नेपाली पार्टी र स्वतन्त्र वामपन्थी समूह छन् ।

प्रकाशित : असार १४, २०७९ १०:५०
पूरा पढ्नुहोस्
प्रतिक्रिया
पठाउनुहोस्
×