हरिवंशको कोरोना अनुभव : 'नेगेटिभ आए पनि म 'कोरोना फ्रि' भएको छैन'  - फिचर - कान्तिपुर समाचार
कान्तिपुर वेबसाईट
AdvertisementAdvertisement

हरिवंशको कोरोना अनुभव : 'नेगेटिभ आए पनि म 'कोरोना फ्रि' भएको छैन'  

'मलाई पनि लाग्न सक्छ है भनेर मानसिक रुपले तयार हुँदा हुन्छजस्तो लाग्छ'
रीना मोक्तान

काठमाडौँ — कोरोना लागिहाल्छ कि ! धेरैलाई झैं कलाकार हरिवंश आचार्यलाई पनि यो डर थियो । मनको डरमाथि आत्मबल बलियो पार्दै आफैँलाई भन्थें, 'मलाई कोरोना लाग्दैन' । उनकै शब्दमा सावधानी अपनाउन कतै चुकेकै थिएनन् । सामाजिक दूरी कायम गर्थे । साबुनपानीले हात धुन्थे, ‍स्यानिटाइजर प्रयोग गरिरहन्थें ।

बिहान तरकारी किन्न जाँदा पैसाका लागि अर्को प्लाष्टिकको झोला बोक्थे । फिर्ता आएको पैसा त्यसैमा राख्थे । त्यो पैसा २ दिनपछि स्यानिटाइजर लगाएर मात्रै प्रयोग गर्थे ।

सावधानी अपनाउँदा अपनाउँदै कसरी कोरोना लाग्यो, उनलाई थाहा छैन । 'मैले धेरै सम्झिन खोजें, कसरी सर्‍यो भनेर तर पत्ता लगाउन सकिनँ,' उनी सुनाउँछन् ।

पत्नी रमिलाको स्वाद नहराएको भए उनले कोरोनाको परिक्षण गर्ने थिएनन् । खासमा रमिलालाई टाउको दुख्ने, ज्यान दुख्ने लक्षण देख्न थालिसकेको थियो । २ दिन ९९ डिग्रीको ज्वरो आयो । आफ्नै शरीर दुख्न थालेको दुई दिनसम्म भाइरल रुघाखोकी सोचेर त्यति वास्ता गरेनन् । तर, बिस्तारै रमिलालाई बास्ना आउन छोड्यो । त्यसपछि उनी दुईले कोरोना परिक्षण गराए । 'सात दिनसम्म उसलाई जिउ दुख्यो । जिउ दुखेको कम हुन थालेको थियो अचानक उसको मुखको स्वाद गयो । बास्ना आउन पनि छोडेछ । त्यसपछि कोरोनाको शंका लागेर हामीले टेस्ट गर्दा दुवैजनाको पोजिटिभ आयो,' हरिवंशले भने।

असोज २० गते दुईलाई कोरोना संक्रमण देखियो । पत्नी रमिलाको भन्दा हरिवंशको शरीरमा भाइरस धेरै रहेछ । उनको सिटी काउन्ट (साइकल थ्रेसहोल्ड) १९/२० थियो । तर उनको स्वाद र बास्ना गएन । उनी आत्तिएनन्, आत्मबल बलियो बनाए । 'म डराइनँ । किनभने डरायो भने व्यक्ति कमजोर हुन्छ । आत्मबल नै सबैभन्दा ठूलो औषधि भनिन्छ नि त । आत्मबल घटाउनु हँदैन भन्ने थियो । त्यसैले नतिजा पोजिटिभ आएपछि 'ए कोरोना लागेछ' भन्ने भयो,' उनले आफ्नो अनुभव सुनाए ।

आफूलाई संक्रमण पुष्टि हुने बित्तिकै सुरुमा उनलाई मदन दाइ (मदककृष्ण श्रेष्ठ)को चिन्ता लाग्यो । आफूबाट कसैलाई कोरोना सर्ला भन्ने अर्को चिन्ता थपियो । 'मदन दाईको स्वास्थ्य अलि जटिल छ । एकदिन अगाडिसम्म एउटा विज्ञापनको सुटिङमा म उहाँसँगै थिए । हामी एउटै गाडीमा जान्थ्यौं, दिनभरी सँगै हुन्थ्यो । मलाई पोजिटिभ भयो भन्ने साथै मलाई मदन दाइको डर लाग्यो । मदन दाइलाई के भो होला भन्ने भयो,' संक्रमण पुष्टि हुँदाका अनुभव सुनाउँछन् ।

छोरा मोहित र मदनकृष्णको कोरोना नतिजा नेगिटिभ आयो । आफू सँगैसँगै हिँड्ने दुईको कोरोना परिक्षणको नतिजाले उनलाई नै चकित पार्‍यो । साथै उनीहरु सुरक्षित भएकोमा खुशी पनि । 'अचम्मको चिज रहेछ कोरोना । कोरोना नतिजा आउने एकदिन अगाडि पनि छोरा र म एउटै गाडीमा मास्क नलगाइकन हिँडेका थियौं । छोराको नतिजा नेगिटिभ आयो । २ दिनसँगै सुटङ गरेर बसेको मदन दाइको नतिजा नेगेटिभ आयो । यो कसलाई सर्छ अन्दाज नै गर्न नसकिने रहेछ,' उनले भने ।

संक्रमित भइसकेपछि उनको मनमा एउटै कुरा खेलिरह्यो, 'कोरोनालाई कसरी जित्ने ?'

कोरोनासँग लड्न नयाँ बजार खुशिबुस्थित आफ्नै निवासमा आइसोलेसनमा बस्न थाले । छोरा बुहारी माथिल्लो तल्लामा बस्थे । बीचको तल्लामा उनी दुई । भान्सा माथि नै थियो । तर, तातो पानी तताउन एउटा इलेक्ट्रिक चुल्हो आफ्नो कोठामा ल्याए । आइसोलेसनमा बस्न थाल्दा शरिर दुख्न कम भइसकेको थियो । बिहानको ब्यायामलाई उनले आइसोलेसनमा पनि निरन्तरता दिए । योगा गर्न छुटाएनन् । कोठाभित्र चलाउने साइकल चलाउँथें । डाक्टर रवीन्द्र समीर र अनकल डाक्टरसँग फोनमा परामर्श लिइरहे । 'उहाँहरुले पनि तातो खानुपर्छ, चिसो खानु हुन्न । आइसोलेसनमा बस्दा बाहिर कसैलाई नभेट्नु भनेर परामर्श दिनु हुन्थ्यो । मलाई डरचाहिँ लागेन,' आइसोलेसनका दिन सम्झे, 'कोरोना लागेपछि डराउनु हुँदैन, यो लाग्नसक्छ जसलाई पनि । डरायो भने एकदमै पिरोल्छ । त्यसैले नडराईं योसँग लड्नुपर्छ ।'

छोरा बुहारीले खाना बनाएर ढोकामा ल्याइदिन्थे । उनीहरु कोठाभित्र लगेर खान्थे । आमाबुवालाई दिक्क लाग्ला भनेर उनीहरु ढोका बाहिर बस्थे । हरिवंश दम्पति पनि मास्क लगाएर कोठाभित्रैबाट गफ गर्थे ।

आइसोलेसनमा दैनिक चारपटकसम्म बाफ लिने गरेको उनी सुनाउँछन् । 'कोरोनाको भाइरस चार दिन नाकमै बस्छ रे । घाँटीबाट छिर्‍यो भने घाँटीमा चार दिन बस्छ । त्यसपछि फोक्सोमा जान्छ । त्यसलाई नाक, घाँटीमा हुँदै विनाश गर्न सकियो भने फोक्सोमा गएर इन्फेक्सन गर्न सक्दैन रे । त्यसैले हामीले धेरै मात्रामा बाफ लियौं,' उनले भने, 'नुन चिनी पानी, बेसार पानी, ज्वानो पानी, तातो चिजहरु खाइरहने गर्‍यौं । दिनको एकपटक गुर्जो पानी पिउँथ्यौं ।'

एक घण्टाको फरकमा तातो पानी खाइरहन्थे आचार्य दम्पति । अदुवा, बेसार मिसाएको पानी दिनको चारपटक खाने गर्थे । 'अरुबेला भन्दा योबेला डायट कन्ट्रोल गर्नुहुँदैन, जिउ कमजोर हुन्छ,' भनेर सल्लाह दिन्थे अरु । त्यसैले उनले मुख नबारी सबै खानेकुरा खाए । उनका अनुसार आइसोलेसनमा डेढ केजी तौल बढ्यो । 'डेढ केजी मोटाएछु म त । बल्लबल्ल पाँच केजी तौल घटाएको थिएँ,' हाँस्दै सुनाए ।

आइसोलेसनमा बस्दाको एक हप्ता उनले आफूलाई स्क्रिप्ट लेखनमा व्यस्त गराए । सामाजिक सञ्जाल हेर्ने, लेखहरु पढ्ने गर्थे उनी । पत्नी रमिला टेलिश्रृङ्ला हेर्थिन् । कहिलेकाहीँ साथीहरु मिठो खानेकुरा बोकेर भेट्न आउँथे । साथीहरु ढोकाबाट २० फिट पर बस्थे । उनीहरु दुईजना मास्क लगाएर ढोका छेउबाट बात मार्थे । एकजना साथीले त गुर्जो उपहार ल्याइदिएका थिए । आइसोलेसनका दिन सहजै बित्यो । '१४ दिनसम्म आइसोलेसनमा बस्दा हामीलाई खासै गाह्रो भएन । पत्नी र म १४ दिनसम्म सँगै बस्दा झगडा पर्नुपर्थ्यो, ठासठुस् पर्नुपर्थ्यो नि ! त्यस्तो केही भएन, रमाइलोसँग बित्यो दिन,' उनले सुनाए, 'मलाईमात्र कोरोना लागेको भए उनी ढोका बाहिर बसिरहन्थिन् होला । उसलाई लागेको भए म ढोका बाहिर बसिरहन्थे होला । दुईजनालाई लागेकाले दुवैजना सँगै बस्न पायौं । खासै दु:ख भएन ।'

आइसोलेसनको १४ दिनपछि कोरोना परिक्षण गरियो । नतिजा फेरि पोजिटिभ । त्यसपछि भने उनलाई दिक्क लागेछ । नतिजा नेगिटिभ आए आनन्दले बाहिर हिँड्न पाइन्छ भन्ने उनलाई लागेको थियो । तर, सोचेजस्तो नतिजा नआउँदा निराश भए । शरीरमा भाइरस धेरै कम भइसकेको थियो । भाइरस सर्ने सम्भावना कम थियो । त्यसैले १४ दिनपछि उनी दुईले छोराबुहारीसँग भेट्न थाले । सँगै बसेर खान थाले । 'भाइरसको रेट घट्योभन्दा म सुरक्षित भएँ भन्ने भयो । अब अस्पताल गएर अक्सिजन दिनुपर्ने अवस्था आउँदैन होला भन्ने भयो । डर कम भयो । घरको कौशी भान्सामा जान थाल्यौं,' उनले सम्झे ।

२० दिनपछि बल्ल नतिजा नेगेटिभ आयो । उनले सामाजिक सञ्जाल फेसबुकमा यसबारे जानकारी गराए । सामाजिक सञ्जालमा आएको प्रतिक्रियाले उनलाई भावुक बनायो । 'मलाई यतिका धेरै नेपालीले माया गर्नुहुँदो रहेछ भनेर म एकदमै भावुक भएँ । यति धेरै सकारात्मक प्रतिक्रिया दिनुभयो । हजारौं मानिसले सुवास्थ्यको कामना गर्दै मेसेज गर्नु भएको थियो । यति धेरै माया गर्ने मानिस कमाएछु भन्ने लाग्यो मनमा,' उनी सुनाउँछन् ।

फूलपातीको अघिल्लो दिन कोरोना नतिजा नेगेटिभ आएको हो । उनले सामाजिक दूरी कायम गर्दै दसैं मनाए । दिदीको घर र ससुरालीमा गएर टिका थापे । सामाजिक सञ्जालमार्फत् यसपालि आफूकहाँ टिका लगाउन नआइदिन अनुरोध गरिसकेका थिए । त्यसैले धेरैसँग फोनमै शुभकामना आदनप्रदान गरे ।

'शंकाको नजरले हेरे'

नतिजा नेगिटिभ आएपछि सदाझैं हरिवंश एकदिन स्टोरमा सामान किनमेलका लागि स्टोर पुगेका थिए । उनलाई देखेर स्टोरमा मानिसहरुले ठूल्ठूलो आँखा बनाए । 'मलाई कोरोना छैन है, मसँग नडराउनुस्,' उनले यति भनेपछि स्टोरमा भएका सबै हाँसे । हेर्ने नजर पनि फेरियो । तर, त्यो हेराइले उनलाई कोरोना संक्रमितले भोग्ने दुर्व्यवहार महसुस गराइदियो । उनी भन्छन्, 'मलाई त त्यसरी हेर्छन् भनेदेखि सर्वसाधारण मानिसलाई कत्ति गाह्रो रहेछ । कोरोना लागेको मानिसलाई गाउँमा छिर्न नदिने, डाक्टर नर्सलाई दुर्व्यवहार गरिएको पढेको थिएँ । मलाई देखेर ठूल्ठूलो आँखा बनाएको, डराएको देखेपछि लाग्यो यी कुरालाई यसरी व्यवहार गर्नुहुँदैन ।'

उनी कोरोना संक्रमितलाई नकरात्मक भावनाले हेर्न नहुने बताउँछन् ।

कोरोना नतिजा नेगिटिभ आएपछि धेरैले उनलाई कोरोनालाई जितेको भन्दै बधाई दिए । तर उनी आफूलाई 'कोरोना फ्रि' मान्दैनन् । 'कोरोनालाई जित्दाको खुशी बाँड्न चाहन्न । किनभने यो दोहोर्‍याएर पनि लागिरहेको छ । एकपटक लागिसकेको व्यक्तिलाई दोहोर्‍याएर लाग्दैन रे भन्ने सुनेको । तर, दोहोर्‍याएर लाग्यो भने झन् कडासँग लाग्छ रे भन्ने सुन्दा झन् पो डर लाग्यो । अझ मनमा पहिलेभन्दा डर छ,' उनले भने, 'फेरि पनि दोहर्‍याएर लाग्न सक्छ भनेपछि त म कोरोनामुक्त भएकै छैन । कोरोना फ्रि भनेको भ्याक्सिन लगाएपछि हुन्छ । त्यसैले म 'कोरोना फ्रि' भएको छैन ।'

थप्छन्, 'अब सावधानी अपनाउनुपर्छ सबैले । तर मलाई पनि लाग्न सक्छ है भनेर मानसिक रुपले तयार हुँदा हुन्छजस्तो लाग्छ मलाई ।'

प्रकाशित : कार्तिक १५, २०७७ १३:४७
प्रतिक्रिया
पठाउनुहोस्

कलाकार भन्छन्– ‘दसैं मनाऔं तर सुरक्षित भएर’

रीना मोक्तान

काठमाडौँ — अभिनेता विपिन कार्कीको अघिल्लो दसैं काठमाडौंमै बित्यो । यसपालि भने विराटनगरस्थित घरै गएर बुबाआमाको हातको टीका थाप्ने तयारीमा छन् । यति बेला कोरोना महामारीका कारण परिस्थिति अनुकूल छैन । तर, भर्खरै विरामबाट तङ्ग्रिएकी आमालाई भेट्न पनि घर जानैपर्छ भन्ने विपिनलाई लागेको छ ।

गत माघमा उनकी आमा फाेक्सोसम्बन्धी समस्याका कारण गम्भीर बिरामी भएकी थिइन् ।

'पहिलेभन्दा आमा एकदम राम्रो हुनु भएको छ । औषधि खाइरहनुभएको छ । उहाँ निको हुनुभएपछि म गाउँ गएको छैन,' विपिनले भने, 'त्यो सोचेर म बस्न सकिनँ यता । कलाकारको मन कमलो हुन्छ नि त । त्यसैले कोरोना न सोरोना आमासँग त भेट्नैपर्छ भन्ने लागेर घर जाने तयारीमा हो ।'

यसपालि आफन्तकहाँ भने उनी सकेसम्म जानेछैनन् । 'पहिला त छिमेकी आफन्तकोमा दसैं मनाउन गइन्थ्यो । यसपालि गइन्न होला । बुबा आमाको हातबाट टीका थाप्न जाने हो । त्यो नै पर्याप्त हुन्छ,' उनले सुनाए ।

विपिन कार्की

महामारीले गर्दा यसपालिको दसैं सबैका लागि फरक छ । असहजताकै बीच पनि सुरक्षा अपनाएर दसैं मनाउन सल्लाह दिन्छन् विपिन । भन्छन्, 'बाटोमा हेर्दा त निकै भिड देखें । मानिसहरुमा दसैंको उल्लास देख्छु । तर मास्क सबैले लगाएको देखिन्छ । त्यसले गर्दा हामीसँगसँगै रोग पनि छ, त्रास पनि सँगै छ भन्ने लाग्छ । सुरक्षा अपनाएर दसैं मनाउनुपर्छ, म पनि त्यसरी नै मनाउँछु ।'

घर जानुअघि उनलाई एउटा म्युजिक भिडियो भ्याउने चटारो थियो । घर जाने योजना सुनाउँदै गर्दा पनि त्यसैमा व्यस्त थिए । यही भिडियो दर्शकका लागि आफ्नो दसैंको उपहार भएको विपिनले सुनाए । 'एक कलाकारका हिसाबले मैले आफ्नो काममार्फत लकडाउनमा भरिया वर्गको आवाज बोलें, म्युजिक भिडियो 'डर छैन'बाट,' उनले भने, 'अहिले दसैंमा त्यस्तै खालको कथा र गीत पाएँ । बिदेसिएका युवाको दु:ख समेटेर 'परदेशी आयो' बोलको गीत गरेको छु ।'

केकी अधिकारी

अभिनेत्री केकी अधिकारीको दसैं यसपालि घरभित्रै सीमित हुनेछ । पहिले–पहिले दसैंमा मामाघर जान्थिन् । मामाघर काठमाडौंमै हो । तर यसटक कोरोनाले गर्दा कतै जाने सोचेकी छैनन् । घरमै आमाबुबा र भाइसँगै दसैं मनाउने योजनामा छिन् । ‘हाम्रा धेरै आफन्त त यतै हुनुहुन्छ । आमाको मामा घर पनि यतै छ । पहिला त निकै रमाइलो हुन्थ्यो । वर्षको एकचोटि नै हो जमघट हुने भनेको । त्यो पनि यसपटक नगर्ने भएका छौं,’ उनले सुनाइन्, ‘दसैं यसपालि आफ्नै घरमा मात्र मनाउने तयारी छ । सबैले त्यही नै गर्नुहुन्छ होला । त्यसो गर्नु नै अहिलेको आवश्यकता हो ।’

केकीको भनाइमा यो दसैं ‘फ्यामिली आइसोलेसन’जस्तै हुनेछ । बेग्लै अनि स्मरणीय अनुभूति हुनेछ । ‘खासै सपिङ पनि छैन । पहिला एक/दुई पटक लगाएको कपडा लगाएरै दसैं मनाउँछु,’ उनले भनिन्, 'घरमै टीका लगाइन्छ । मिठो खायो, बस्यो । फोनमा एक चरण ठूलाबडासँग कुरा हुन्छ होला । आशीर्वाद मागिन्छ । स्वास्थ्यलाई ध्यानमा राखेर दसैं मनाऔं सबैले ।’

अभिनेता तथा निर्माता दीपकराज गिरी भने पाँच वर्षपछि पहिलोपटक राम्रोसँग दसैं मनाउन पाएको बताउँछन् । यसअघिका दसैंमा उनी कहिले फिल्मको प्रचार त कहिले प्रदर्शनमै व्यस्त हुन्थे । यसपटक कोरोनाले फिल्म हल ठप्प छन् । 'यसपालि फिल्मको प्रचार–प्रदर्शन केही छैन । म परिवारसँगै छु । अर्को समस्या पनि छ, कोभिडको डर,’ उनले भने, ‘हाम्रो ठूलो परिवार छ । चारजना हजुरबुबाका सन्तान भेला भएर टीका लगाउने चलन छ । यस्तै ४०/५० जना हुन्छौं ।’

दीपकराज गिरी

उनी दसैं मनाउन चन्द्रागिरिको दहचोकस्थित घर जाँदै छन् । तर, यसपालि सकेसम्म अलि वृद्ध उमेरकाहरुबाट टीका नथाप्ने उनको योजना छ । ‘वृद्धवृद्धाहरुसँग टीका नलगाउने निधो गरेका छौं । उहाँहरुलाई समस्यामा पार्नु भएन नि त । उहाँहरुले टाढैबाट अक्षता छरिदिनुहुन्छ । आशीर्वाद छरिदिनुहुन्छ । स्वस्थ व्यक्तिले टीका लगाइदिने कुरा छ,’ उनले सुनाए, ‘सुरक्षा अपनाएर, मास्क–स्यानिटाइजर लगाएर दसैं मनाइन्छ ।’

यस वर्ष एकअर्कालाई सहयोग गर्दै दसैं मनाउन सल्लाह दिन्छन् दीपक । ‘कोरोनाले धेरैको रोजगारी गुमेको छ । कतिले दसैंको तलब पनि पाएका छैनन् । घरभाडा तिर्न, खानको धौधौ छ । यसकf बाबजुद पनि दसैं आयो । त्यसैले एकअर्कालाई सहयोग गरेर दसैं मनाउन अनुरोध छ,' उनले भने ।

पूजा शर्मा

अभिनेत्री पूजा शर्मालाई भने दसैं खास लाग्दैन । ‘मलाई दसैं त्यति सारो रमाइलो लाग्दैन । कोरोनाले खोजेजस्तै भयो,' उनले सुनाइन्, ‘यसपालि कहीँ गइन्न । घरमा आमा, मामा र माइजूसँग मिलेर दसैं मनाउने हो । अरु बेला त आफन्तकहाँ गइन्थ्यो । रमाइलो हुन्थ्यो । यसपटक त्यो पनि हुन्न । आमाको हातबाट टीका थाप्ने तयारी छ ।'

प्रदीप खड्का

अभिनेता प्रदीप खड्काको दसैं भने पोखरामा अभिनय कक्षामा बित्नेछ । उनी एक्टर स्टुडियोका अनुप बरालसँग तीनमहिने कोर्स पढ्दै छन् । 'तिहारसम्म यतै हुन्छु होला । परिवारले सम्झिरहनु भएको होला । तर हजुरबुबा/हजुरआमा वृद्धवृद्धा हुनुहुन्छ । कोरोनाको समयमा उहाँहरुकहाँ नजाऊँ भन्ने नै हो । घरतिर मनाउनुहुन्छ । यो समयमा आफ्नो 'ग्रोथ' पनि होस् भनेर मचाहिँ पोखरामै छु,' उनले भने।

उनले पनि दसैंको टीका नथापेको तीन वर्ष भइसक्यो । गत वर्ष काका बितेका कारण मिलेन । त्यसअघिको वर्ष फिल्मको सुटिङमा व्यस्त थिए ।

गत वर्ष काठमाडौंमै दसैं मनाएका अभिनेता पुष्प खड्का यसपालि भने कैलालीस्थित घरतिर लागिसकेका छन् । उनी पनि म्युजिक भिडियोकै काममा व्यस्त थिए । ‘आमाबुबाका लागि नयाँ लुगा किनिदिएँ । सामान किनिदिएँ । बहिनी, सानी भान्जी लिएर गाउँ फर्कँदै छु,' उनले भने ।

पुष्प खड्का

सुटिङमा हिँडिरहँदा पनि उनी निकै सजग र सतर्क रहे । ‘मैले कोरोना परीक्षण पनि गराएँ । नतिजा नेगिटिभ आयो । तर पनि मनमा डर छ । बुबालाई सुगर छ, कतै कोरोना बोकेर गइएला कि भनेर ।’

तर, खड्काले कैलालीमा रहेका आमाबुबासँग नभेटेको डेढ वर्षजति भइसक्यो । त्यसैले पनि यसपालि घर जाने अवसर छोड्न चाहेनन् । ‘उहाँहरु नवरात्रिको व्रत बसिरहनुभएको छ । म पनि घर पुगेर व्रत बस्छु । हाम्रो संस्कृति हो दसैं । सुरक्षित भएर मनाउने तयारी छ । ठूलाबडा आफन्त, इस्टमित्रसँग भेट हुन्छ । तर धेरै दिन बस्दिनँ, १३ गते फर्किहाल्छु,’ उनले भने ।

प्रकाशित : कार्तिक ८, २०७७ १०:४३
पूरा पढ्नुहोस्
प्रतिक्रिया
पठाउनुहोस्
×